August 25 2012,issue

MISSION VENGTHLANG-AH Red Ribbon Inter Village Football Tournament neih tawhah Round of 16 kan la inpet kai ve ziah a, mahse hei hi veng dang player-te puina zarah a ni. Amaherawhchu, hei hian kan veng Thalaite-ah chona nasa tak a thlen a, tunah hian kan veng thalaite an harhchhuak ve tan ta mek. Central YMA buatsaih Inter Branch YMA Football Tournament 2012-ah pawh kan veng hlanga khelin Pool Final kan thleng ve ta e. Tin, kan veng tlangvalte pakhat Tata Football Academi-ah, pahnih Guwahati Club-ah leh pathum MPL Club, Reiek FC-ah te kan thawhchhuak ve thei ta, hmasawnna lawmawm tak a ni a, a lawmawm e.

MIZORAM FOOTBALL ASSOCIATION (MFA): Mizoram chhunga Football Club-te enkawltu leh thuneitu sang ber chu MFA a ni a, MFA hnuaiah hian District leh Zone Football enkawltute siam leh a ni. MFA hian direct-in Mizoram Premiere Leaque leh 1st Div.-te a enkawl a, District leh Zone lamin 2nd Div. leh 3rd Div.-te an enkawl thung. Div. hrang hranga khelte hian Season khat chhunga an khelh that dan a zirin Season tharah Div. sang zawng an inhlangkai ve zel a ni.

3rd DIV.-AH TEAM PALI: Aizawl District Football Association (ADFA) hnuaia Aizawl South Zone hnuaiah 3rd Div.-a khel turin kan veng atangin Team pali laiin Affiliation tiin an in register fel ta e. Veng khat atanga Team pali daih khel thei players kan nei hi a lawmawm a, mahse a tam lam aia tha taka an khelh a, an hlawhtlinnain veng hmasawnna leh mawina a la thlen turah ngai ila. Veng chhung mipuite’n rilru leh thinlung, tha leh tui senga kan puih theihna a pui chungin beiseina nen i lo thlir teh ang u. Kan veng atanga Team in register-te —

1. FC MISSION VENGTHLANG: Mission Vengthlang Sporting Club hnuaiah FC Mission Vengthlang hi din a ni a, Pu Gilbert Lalzarliana, Y Section chu President niin players 27 an in ziak lut a ni.

2. MISSION VENGTHLANG FC: Veng chhunga Football lama tui mi intel khawmin an din a ni a, Tv. Saidingliana Sailo, Y Section chu President a ni. He Club-ah hian players 30 an in ziak lut bawk.

3. MAXI FC: Hei pawh hi veng chhung Football-a tui mite din a ni, Tv. Chawngsangzuala, Y Section kaihruaina (President) hnuaiah players 30 zet an in ziak lut bawk.

4. JUNIOR FC: Hei pawh hi veng chhung Football-a tui mite din bawk a ni a, Tv. B. Hmingthanruala, A Section kaihruaina (President) hnuaiah players 30 an in ziak lut bawk a ni. KAN NGHAKHLEL EM E: Mission Vengthlang-in rampum huapa 3rd Div.-a Football khel tura inziak lut Club pali-a players 120 vel kan nei hi a lawmawm e.

August 18,2012 issue

18 August 2012

YMA MISSION VENGTHLANG BRANCH MI BO ZAWNGIN A THAWKCHHUAK

Kar kalta Aug. ni 11, 2012 (Inrinni) tlai lama chin hriatloh a bo Tv. Zothansanga (Tete-a), Zotlang leh Nl. Ruth Lalawmpuii, Ramhlun ‘N’ te chu ngawrh taka zawn chhunzawm zel an ni a. Aug. ni 17, 2012 (Zirtawpni) thleng kha chuan an chinchang engmah hriat a la awm rih lo. Tui lianin a la ni a hriatna hmun a tanga Tlawngdung, Sairang leh Hortoki thlengin mi tlawmngaite’n an la zawng mek zel a ni. Chinhriatloha an awm tuk atang khan veng hrang hrang atanga mi tlawm ngai te’n mahni remchan ang angin an zawng a, lui dungah chhun leh zan zawmin an riahchilh reng bawk.

CHANCHIN KIMCHANG: TV lamah zan tin chanchin kimchang kan hre reng thei a, hmalak dan tlangpui leh mi tlawmngaite thawhchhuah dante, heta tana mamawh hrang hrang leina tur sum leh pai lama theihtawp lo chhuah pawh kan awm zel a, a lawmawmin Mizo nih hi a thlamuan thlakin, tlawmngaihna hi a lo la par vul reng a ni.

BRANCH-IN THILPEK A HLAN: Tui lianin a la nia rin an nih avangin lui dungah an ruang zawn hna thawh a ni ber a, Aug. ni 13, 2012 (Thawhtanni) atang khan kan veng atangin YMA member tlawmngaite anmahni remchan ang angin an kal nitin a, Aug. ni 16, 2012 (Ningani) thlengin Branch pum huap erawh chuan kan la in au khawm rih lova, amaherawhchu Branch YMA chuan Aug. ni 16, 2012 (Ningani) khan hnatlanga thawkchhuakte mamawh atana hman turin Zotlang Branch YMA hnenah Rs 2000/- a hlan a ni.

BRANCH KAN THAWKCHHUAK E: Central YMA chuan awlsam, zangkhai leh daihrei deuh zawka ruang zawn hna thawh a nih zel theihnan a inchhawka zawn hna thawk turin Branch-te a ruat a. Kan Branch chu Aug. ni 17, 2012 (Zirtawpni)-a thawkchhuak tura ruat kan nih angin mi 70 chuang zet kan thawk chhuak a ni. Reiek kai lama kal tura ruat kan ni a, hemi ni hian Reiek kai lam atangin Branch 11 atanga member 500 chuangin ruang zawn hna hi ngawrh taka beih a ni.

HMALAK DAN TLANGPUI: Tui a len avang leh tui a nut avangin tui chhungah ruang zawn hna hi thawh a harsa hle a, tui a an lang leh vaukam hnawmhnawk zingah an lo tang mial em tih zawn chu thawh theihchhun a ni deuh ber. Zirtawpni hian Sairang leh Nghalchawm atangin tui thiamte an lo kal leh a, motor lian ke tube pump puar eng emaw zat tawn khawmah chuangin lui dung chu Sairang thlenga kal turin an zawh thla bawk. Lui dungah a khat tawkin camp siam a ni a, hengah te hian chhun zan zawmin riah leh awmchilh reng a ni.

August 11, 2012 issue

11 August 2012

MISSION VENGTHLANG LOCAL COUNCIL KOHIN VANTLANG HNATLANG TUM HNIH NEIH A NI

Mission Vengthlang Local Council chuan July ni 28, 2012 (Inrinni) leh Aug. ni 4, 2012 (Inrinni) te khan Thlanmual kawng-ah vantlang hnatlang a koh a, thawk chhuak an tha thawkhat hle. Thlanmual kawng siam nan hian Pu Lalhmingliana, MP (RS) atangin MP Fund cheng nuai sawm (10 lakhs) hmuh a ni a, awlsam zawka hna thawh a nih theih nan kawng hi lo siam rual lawk a ni. Furpuiin min chiah mek lai a nih avangin hna hi tan mai theih a la ni lova, tunah hian kawng chhuat tih mam leh luikawr siam that hna te, leimin paih hna te lo thawh lawk a ni.

1. HNATLANG KAL DAN: Vantlang hnatlang a nih avangin chhungtin atangin mi pakhat tal thawk chhuak tura ngen kan ni a, hetiang hi hnatlang thawhchhuah dan a ni.
July ni 28, 2012 (Inrinni)-ah:
Y Section — 77; M Section — 146; A Section — 129
August ni 4, 2012 (Inrinni)-ah:
Y Section — 97; M Section — 135; A Section — 105

2. HNATLANG PHATNA ATANGA SUM HMUH: July ni 28, 2012-ah hnatlang theilo phatna pek atangin Rs. 28,000/- (Singhnih sangriat) leh Aug. ni 4, 2012-ah Rs 29,800/- hmuh a ni a. Tin, hnatlang lo, pha bawk si lo runna atangin July ni 28, 2012-ah Rs 5,800/- hmuh a ni bawk. Aug. ni 4, 2012-a hnatlang lo, pha bawk si lo runna hi la hmuh kim loh a ni a, tarlan rih loh a ni e.

3. HNA THAWH CHHUNZAWM A NI: Hnatlanga thawh bak leimin paih fai leh tuihawk luankawr siam that hna chu JCB hmangin thawh chhunzawm nghal a ni a, Aug. ni 8-10, 2012 chhung khan hna hi thawh a ni. Pu Lalthangliana Murray, M Section chuan JCB hman tur hi ngaihtuahin hnatlang phatna atanga sum tling khawmin Desiel leh mamawh tul dangte lei a ni. Tunah chuan khua a that chuan motor te pawhin thlanmual a kal leh theih ta a, a lawmawm hle.

4. LAWMTHU: Mission Vengthlang Local Council chuan hnatlanga thawk chhuak zawng zawngte, hnatlang ve theilo phatna leh runna petu zawng zawngte chungah lawmthu a sawi a, tin, JCB hman man awm lova ngaihtuahtu Pu Lalthangliana Murray, M Section chungah lawmthu a sawi bawk e.

August 4, 2012 issue

4 August 2012

YMA MISSION VENGTHLANG BRANCH EXECUTIVE COMMITTEE VAWI 8-NA NEIH A NI

YMA Mission Vengthlang Branch chuan August ni 2, 2012 (Ningani) zan khan THP Hall-a YMA Committee Room-ah Executive Committee Meeting vawi 8-na a nei. Meeting hi Pu Kaisangzuala, President-in kaihruaiin Dr. R. Zonuntluanga’n Pathian hnena tawngtaiin hunserh a hmang. Meeting-ah hian member 32 kalin 10 an kal lova, kal theilo 7 in an kal theihloh chhan sawiin an pha. Tanpui ngaite pual bawmah Rs 470/- thawhkhawm a ni.

THUREL TLANGPUITE:
1. REPORT: Branch Secretary hnen atangin meeting hmasa thurel bawhzui ngaite tha taka bawhzui leh tihhlawhtlin a nih thu ngaihthlak a ni. Section hrang hrangte’n an mahni Section huam chhungah chhiatni fund an khawn mek. M Section te’n damlo pakhat an kan bawk.

2. LEHKHA HMUH:
(1) Gen. Secretary, Central YMA atangin Ruihhlo ngaite pual Camping August ni 13-25, 2012 chhung Art & Culture Auditorium, Beraw Tlang-a neih tur hriattirna leh Branch atanga lut tur lo zawng tura ngenna hmuh a ni a, a tul angin bawhzui nghal nise, tih a ni.
(2) Gen. Secretary, Central YMA hnen atangin Central YMA leh PHE Deptt. tangkawpin Tuihna humhalh beihpui hawnna August ni 8, 2012 (Nilaini)-a Vanapa Hall-a a neih tur thu leh Branch aiawh mi pathum kal tura hriattirna hmuh a ni a. Pu Lalremmuana, Pu C. Lalnunsanga leh Pu Lalmuankima te kal tura ruat an ni.
(3) Pu Lalramdinliana, Y Section hnen atangin THP Hall-a TT khel thinte aiawhin TT khelhna Hall-ah an mahni senso a carpet phah dilna hmuh a ni a, remtihsak an ni.
(4) Member Secretary, Local Council hnen atangin THP Hall chunga ruahtui tla zat tehna dah dilna hmuh a ni a, eng tianga enkawl tur leh kalpui tur nge a nih lo zawt chiang leh phawt se, la ngaihtuah leh nise tih a ni. Tin, THP Hall-II sak mekah Anganwadi Centre tur room/pindan an dilna chu inremsiamna fel tak siam nise, tiin phalsak an ni bawk.

3. TUIZEM LEI: YMA Hall hnuai sira hun tur tuizem lei nise, tih a ni a, Property Sub-Committee te’n litre 5000 dawng leh tui pump khawl a remchan hunah lo lei se, tih a ni.

4. DISASTER TRAINING: Desaster training neih nise, tih a ni a, Branch President-in Department lam lo dawrin remchang hun pawh OB te’n ruahmanna rawn siam se, tih a ni.

5. SEPTIC TANK SIAM: YMA Hall septic tank chu May thla khan paih a ni a, a khur a lo thatloh avangin July ni 31, 2012 (Thawhlehni) khan a sah leh chiam mai a, hei hi paihfai tir leh nghal a niin, a khur pawh siam that hna thawh nghal a nih thu Property Sub-Committee Secretary hnen atangin ngaihthlak a ni a. Branch chuan Sub-Committee hmalakna hi tha a tiin a pawmpui. Tin, Branch chuan septic tank chhiain veng chhung tana harsatna a siamah mipui hritthiamna a ngen a, a tihfai kawnga puitu zawng zawng chungah lawmthu a sawi bawk e.