July ni 14, 2012 Issue

MISSION VENGTHLANG JAC-IN VENG CHHUNG THIANGHLIMNAN HMA LA ZEL

Mission Vengthlang Joint Action Committee (JAC) chuan veng chhung thianghlim nan theihtawpin hma a la mek zel. Joint Action Committee (JAC) hian veng pum huapa Committee a siam bakah Section hrang hrang vil turin Section JAC Committee a siam vek bawk a, veng chhunga ruihtheih thil lak luh, zawrh leh tih a lo rem theihna turin theihtawp chhuahin hma lak mek zel a ni. Tun hnaia JAC hmalakna langsar zual leh thu chhuahte a tlangpui han tarlang ila —


1. DUTY: Veng chhungah chhun leh zan pawh sawi lovin, a remchan hun leh tul hun apiangah an Duty-a, zan rei pawh sawi lovin hmalak a ngaih leh ruihtheih thil vanga buaina a awm chuan eng hunah pawh an inkoh khawm nghal zung zung thin.

2. ZU MAN LEH MI KOH: Tun hnaiah A Section-ah leh Dawr kawnah Zu man a ni a, heng zu an man te hi a neitute nen Excise/Police hnenah hlan nghal an ni. JAC chuan thuchhuah siama ruihtheih thil avanga man an awm chuan thu neitute hnenah hlan nghal zel an ni ang tih a lo chhuah tawh angin Excise/Police hnenah hlanin hma lak nghal zel a ni tawh.

(1) July ni 7, 2012 (Inrinni) Zan dar 8:30 khan YMA Hall-ah JAC Committee chuan veng chhunga Zu an man sakte leh ruihtheih thil avanga buaina leh bengchheng siam thin te a koh a, hemi zan hian mi 17 kohin zilhhauna leh nunkawng dik zawh tura thu tha hrilhin Pathian hnena tawngtaisakna an nei a ni.

(2) July ni 8, 2012 (Pathianni) tlai dar 3:00 khan YMA Hall-ah vek JAC Committee chuan veng chhung mi 6 koh lehin ruihtheih thil avanga an harsatna leh buaina an siam chungchangah zilhhauna a nei leh a, thu tha hrilh a warning pe-in heng mite hian an tih tawhloh tur thu an sawi hnuah Pathian hnena tawngtai sakna neiin haw tir an ni.

3. JAC THU CHHUAH: JAC chuan a hnuaia thu chhuah a lo siam tawh chu veng chhung mipuite a hriattir nawn leh a, veng chhung mipuite’n zawm theuh turin a ngen bawk e— Mission Vengthlang huam chhungah Zu leh ruih theih thil lak luh leh zawrh khap tlat a ni a, tin, khawlai leh kawngpui kama zu leh ruihhlo ti thinte pawh sim turin kan in ngen e. Mission Vengthlang Joint Action Committee chuan chak takin hma a la dawn a, khawtlang tana mi hnawksak, Sorkar, Kohhran leh Vengin a phalloh leh duhloh tilui leh midangte tana harsatna, mi tithlabar zawnga che leh, buaina siam thinte chungah khauh zawka dân lekkawh a tum tih JAC chuan veng chhung mipuite a hriattir e. Heng Sorkar, Kohhran leh Vengin a phalloh leh duhloh tiluite chungah indimna lantir JAC chuan a tum lo a ni.
4. NGENNA & INFORMATION CENTRE: JAC chuan veng chhung mipuite chu veng chhunga ruihtheih thil la lut, zuar, ruihtheih thil ualau taka ti a, bengchheng leh buaina siam an hriatte chu eng hunah pawh a rang thei ang bera JAC hruaitute hriattir nghal zel turin a ngen a, veng chhung thianghlim nan leh ralmuanna tura kan zavaia thawkho turin a sawmin a ngen tak meuh meuh a ni.

Information Centre:

Tv. Lalmalsawma Khiangte — 9862379047
Pu R. Lalrinzuala (Y Sec.) — 9862809881
Pu Rothangliana Bawihtlung (M Sec.) — 9436147753
Pu Zolianchama (A Sec.) — 9862169691



________________________________________

VENG CHHUNG THUTHAR

♣ Pu F. Ngurthanzuala, Y Sec., Care Hospital-ah enkawl mek a ni.
♣ Pu Zochhuana, M Sec., Aizawl Hospital-ah enkawl mek a ni.
♣ Nt. Malsawmzuali d/o Pu R. Lalhmingliana, M Sec., Greenwood Hospital-ah a kut zai a niin, enkawl mek a ni.
♣ All Mizoram TKP Mission Drive chu July ni 14-15, 2012 chhung hian Shalom Baptist Kohhran Biak In-ah neih a ni dawn.
♣  MCS preliminary exam-ah kan veng atangin mi 9 lai an tling a; heng mite hian Main Exam leh Interview an la nei leh ang.
♣  Mizoram University (MZU) hnuaiah degree exam result tihchhuah a ni a; result chiang lo chinfel tur a awm nual avangin pass-te kan rawn tarlang thei rih lo.
______________________

FAM ROLUNG MUAL

Hming : LALTHAWMMAWIA SAILO (SENA)
Kum : 38
Kohhran : Presbyterian
Thihni : July ni 11, 2012. 08:30 PM
Vui Hun : July ni 12, 2012. 12:00 N
Vuitu : Pastor Lalbiakvulmawia

Pu Lalthawmmawia Sailo (Sena) hi Rev. Lalhluma Sailo leh Pi Saidawli te fa pali-na niin, July ni 15, 1974-ah North Vanlaiphai-ah a piang a; an unau hi hmeichhia pahnih leh mipa pali an ni. Kum 1997 khan nupui neiin, fapa pahnih a nei.
Amah hi naupang thuawih thei tak a ni a; Primary leh Middle School a kal laiin ‘Nungchang Tha Lawmman’ a la thin a; Sunday School Exam-ah pawh Honours lawmman a la fo thin. Kum 1991 khan Thingdawl High School atangin HSLC a pass a; 1996-ah Gov’t T. Romana College atangin P.U. tha takin a zo leh a. B.A. hi Gov’t Aizawl College atangin kum 2003-ah zovin, hemi hnu hian M.A. (Mizo) zir zawm lehin, Final Semester a exam ta lo a ni.
Amah hi kut themthiam tak, cement leh thing lam khawih kawp thiam a ni a; mahni phak ang tawka intodelh tum mi a ni. Hmun danga hna a thawh karah inchhung sekrek leh tulte siamin, chhungkua pawhin an tangkaipui hle thin a ni.
Sena hi mi nunzawi leh inthlahrung tak, mi pawisawi ngai lo mi a ni a; thian kawm thiam tak, a bula awm tawh chuan han nuih dar darna tur sawi tur hre em em mai a ni a; hei vang hian thian pawh thahnem tak a nei nghe nghe. Mahni phak ang tawka Kohhran leh khawtlang thiltih ngaipawimawh tak mi a ni. Tunlai thalaite nun tibuaitu ruihhlo hian a nun a tibuai ve hle thin a; a nun hi hrehawm a tih thin avangin insiamthatte pawh a tum ve nasa thin hle a ni.
Kumin May ni 11 khan insawiselna a neih avangin Synod Hospital, Durtlang-ah admit a ni a, a pum a lo tha lo hle tih hriatchhuah a ni. Hei hian amah pawh tichau telh telhin, July ni 11, 2012 (Nilaini) zan dar 8:30 khan Chatuan Ram min lo pan san ta a ni.
Pu Lalthawmmawia Sailo (Sena) ruang hi tlaivarpui a ni a, July ni 12, 2012 chhun dar 12:00 Pastor Lalbiakvulmawia’n In lamah vuiin, Upa H. Ngurthansanga’n thlanmual-ah a thlah liam ta a ni. YMA member a nih avangin July ni 13, 2012 (Zirtawpni) zanah Branch YMA chuan ralna hun a hmang.

________________________________________________

CLEAN & BEAUTIFICATION THU

☻ July ni 6, 2012 (Zirtawpni) zingkar leh tlaiah veng chhung mi, a duh apiang tan thing tiak phun tur Dawrkawn-ah sem a ni a, hemi ni hian thing tiak 250 sem a ni. Thiang tiak min petu Pu Rongura Hrahsel (Y Sec.), RO, Sairang chungah lawmthu kan sawi e.
☻‘Faina Thuchah 10’ tih chu veng chhung In tinah sem mek a ni a; chhung tinte Faina Thuchah 10 hi zawm theuh turin kan inngen e. A thlawna min chhut saktu Pu Ralramthanga, M Section chungah lawmthu kan sawi e.
☻July ni 7, 2012 (Inrinni) khan veng chhunga lungrem hrang hrang (retaining wall)-ah lung banga zâm chi thlai (plant) phun hnatlang neih a ni a; he’ng plant-te hi enkawl leh humhalh zel turin veng chhung mipuite kan inngen e.
☻ Veng chhung mawi nan theihtawp chhuaha tan la theuh turin Clean & Beautification Committee chuan mipuite a ngen tak meuh meuh a ni.
________________________________

SPORTING CLUB NEWS

♥1st Vanlalpeka Pachuau Memorial Local Table Tennis Tournament chu July ni 19 - 21, 2012 chhung hian THP Hall-ah neih a ni dawn a; tel turin veng chhung TT players zawng zawngte kan insawm e. Category chi hrang hrang siam a ni dawn a; Entry Fee leh Category chu a pekna hmunah zawhfiah tur a ni.
Entry Fee pekna hmun — 3’s Drugs Store
Last Date — July ni 18, 2012; 3:00 PM
Category-ah hian Men’s B siam a ni dawn a; hei hi lawmman pakhatmah la la lo tan siam a ni.
July ni 21, 2012 zanah Final khelh a ni dawn a; hei hi veng chhung Local TV channel (LPS)-ah live-a pekchhuah tum a ni.
♥ Sporting Club-a Table Tennis players zawng zawngte ADTTA hnuaiah affiliation tih thar tur a ni a; Affiliation ti duh chuan Pu Zorema Pachuau hnenah form la chhuakin a tul angte fill-up hnuah theh luh leh tur a ni, a bak chu an lo buaipui ang, hei hi a hma thei ang bera tihfel tur a ni e.
♥ Kum tawp lam, hun remchang hamsaah Local Basketball Tournament siam tum a ni.
♥ Hun remchang hmasa berah Computer Games Tournament puitham tak buatsaih tura hma lak mek a ni bawk.