July 28, 2012 issue

MISSION VENG TO MISSION VENGTHLANG
ROAD IMPROVEMENT COMMITTEE DIN A NI

   July ni 19, 2012 khan kan veng pa, Education Minister Pu Lalsawta chuan Bialtu MLA pahnih Pu R.Selthuama leh Lt.Col (Retd.) Z.S.Zuala te, Mission Veng North & South, Model Veng leh Mission Vengthlang Local Council member-te leh, NGO President leh Secretary-te a Office-ah ko khawmin, Mission Veng to Mission Vengthlang kawng chho tihzauh leh, a chho ulh lutukte siamrem dan tur ngaihtuah a ni a. Chak tak leh lungrual taka hma an lakho theih nan, Mission Veng to Mission Vengthlang Road Improvement Committee (MMRIC) dinin, hruaitu pawh hetiang hian an inruat fel nghal.

Chairman : Pu Kaisangzuala, President YMA, MVT
V. Chairman : Pu Vansangliana, Chairman L/C, MV Pu Lalchungnunga, Chairman,L/C, Model
Secretary : Pu Lalhmingmawia, Chairman L/C., MVT
Asst. Secretary: Pu Joe R.Z.Thanga,Secy., YMA, MV ‘N’ Pu Jeffrey L. Fanai, Secy., YMA MV ‘S’ Pu Zohmingthanga Sailo,Secy,YMA, Model Pu R. Zothansanga,Secy., YMA, MVT
Treasurer : Pu R.L. Zomawia, President, YMA, MV ‘N’
Fin.Secretary : Pu Laldinthara Hnamte, Pre. YMA, MV ‘S’

Committee member-te:
Pu Lalsawta, Minister, Education, etc.
Lt. Col.(Retd.) Z.S.Zuala, MLA, Aizawl S-II
Pu R. Selthuama, MLA, Aizawl W-III
Pu R.L. Rinawma, Principal Secretary, UD & PA, etc.
Er. K. Lalsawmvela, Chief Engineer, PWD (Planning)
Er. Jolly Newman, Joint Secretary, P&E
Er. C. Lallunghnema, Joint Secretary, PHE
Er. C. Lianlunga, SE, P&E
Pu LaIngheta Sailo, DGP (Retd.)
President, YMA, Model Veng Branch
All Members, Local Council, Mission Veng
All Members, Local Council, Mission Vengthlang
All Members, Local Council, Model Veng.
President & Secretary, MUP, Mission Veng Unit.
President & Secretary, MUP, Mission Vengthlang Unit.
President & Secretary, MUP, Model Veng Unit.

   MMRIC hian July ni 24, 2012 khan hma la tan nghalin, Mission Veng Biak Inpui atanga Mission Vengthlang Kawn inkar kawng chhuk siamthat dan tur an enho va; zauh ngai lai nia hriatte leh, kawng chhuat tihhniam leh chhun rual ngai lai tur nia an hriatte an teh fel nghal bawk. Zan lamah he’ng kawng zauhna tura ram neitute In lamah an khawngaih dilin an leng kual leh nghal a; ram neitute an rin phak bak aia nasaa vantlang tana an inhuamna leh inpekna chuan hruaitute a tilawmin a tiphur hle.

    Committee hian theihtawp chhuaha hma la-in, a rang thei anga he hna hi thawh leh tihpuitlin thuai tumin hma an la mek zel.

------------------------------------------------------------------------------------------------------------

Editorial

KHAWTLANG LEH HNATLANG

       Khawtlang hmasawnnan hna hrang hrang thawh a ngai thin, sorkar-in min thawhsak chi a awm a, a chhunga cheng vantlangin kan thawh chi a awm bawk. chutihrualin sorkar hmalakna Local Council emaw NGO-in kan lo thawh chi a awm bawk. Eng chi pawh nise, tute pawhin thawk ila khawtlang tan a tha thei ang bera thawh hi veng hmangaihtute tih tur leh thawh dan tur niin a lang. 
     Sorkar-in a rawn khawih theih loh leh khawih hman mai loh veng chhung hmasawnna tur emaw thianghlimna tur tam tak hi Local Council/YMA chuan hnatlang kohin a thawk thin. Local Council/YMA-in hnatlang koha a thawh hi khawtlang tan a ni tih kan hriat a kan ngaihpawimawh a tul tak zet a ni. Heng hnatlang a kan thawh thin hi felfai leh tha taka thawh pawh tum thin ila. Tumah hman em em bik kan awm lova, a zawng a zaa kan tel thei vek lo a nih pawhin eng emaw chang tal hi chuan thawhchhuah ve ngei tum hi kan tih tur niin a lang. 
        Hnatlang tha avangin khawtlangin hma a sawn a, a lo thianghlim thin, sorkar sumin a thawhtheih bak leh tlin phak bak tam tak hi hnatlang tha avangin kan thawk thin bawk. Hei hi hnatlan hlutna leh pawimawhna a ni tih kan hriat leh inzirtir zel pawh a \ha hle ang. Khawtlangah kan awm leh tel ve si chuan, ‘Ka tel lovin an ti thei tho,’ tih aiin ‘Khawtlang hi ka ta a ni a, Hnatlangah hian ka thawk chhuak ve ngei tur a ni,’ tih rilru i pu thar leh teh ang u.


------------------------------------------------------------------------------------------------------------

THISEN SANG
— Dr. Lalrinsiama

       Thisen sang natna vei hi India-ah mihring maktaduai 50 awm anga chhut a ni a; mahse, a veite zingah fimkhur leh rang taka inenkawl a ngai a ni tih hre lo kan la tam zawkin a lang. A hlauhawmna leh a thlen theitu, BP tha taka thunun a ngaihzia mipuite zirtirna pe tur hian thuneitu te, damdawi thiam te leh puanzauna (media) hnathawktute kan pawimawh em em a ni. 
       Thisen sang, BP (Blood Pressure) sang kan tih bawk hi a zirna lamah chuan Hypertension tih a ni a; lungin thisen a kahchhuah (pump) nat lutuk vanga lo awm a ni. He natna hi a tam sawt hle a; changkannain a ken tel zinga pakhat niin a lang. 
        BP pangngaia ngaih leh tlanglawn ber chu 120/80 mm. Hg a ni a; kum a upat poh leh BP pawh hi a sang tawlh tawlh thin. 120/80 mm. Hg chiah chiah hi chu an tam vak lo zawk a; kum 20 mi tan 140/90 mm. Hg chin leh kum 50 mi tan 160/96 mm. Hg thleng hi a pangngaia ngaih a ni. Mizote hi a tlangpuiin kan thisen a sang lo hle. 
         BP pangngai tak (120/80) a\anga 20-a sang emaw hniam emaw hi ngaihpawimawh thama ngaih a ni a; a chung lam aiin a hnuai lam hi ngaihpawimawh a ni zawk thin. Entirna’n 140/100 (120+20/80+20) hi BP sang a nih laiin, 100/60 mm. Hg (120-20/80-20) hi BP hniam a ni. Mahse, a hranpa takin BP hniam natna hi a awm lo va; insawiselna neih loh a, an hna pangngai an thawh theih chuan a pawi lem lova ngaih a ni. Tin, kan BP hi a inang lo thluah a; mi thenkhat tana pangngai kha thenkhat tan chuan a sangte pawh a ni thei. Chuvangin mahni BP theuh hriat a tha.
A hnuaia tarlante hian a tlangpuiin thisen sang an nei duh:
1. Kum upa (Kum 45 chung lam)
2. Chi (Al) ei nasa lutuk te
3. Meizu mi te
4. Zu in mi te,
5. Lung natna nei mi te
Insawizawi, zahna, helhhawlh, zauthau leh thlabarnate hian thisen a tisang ve thei a; mahse a sang rei lo. Chuvang chuan BP teh dawn reng rengin hahdam zâna awm tur a ni.

A lan chhuah dan: Thisen sang hi chi hrang hrangin a lang chhuak thei a; chungte chu —
1. Lu a hai fo
2. A changin lu a na
3. Nikhawhrelote'n an tlu
4. An âwmte a na vawt vawt
5. An hnarte a thi
6. Mit a vai
7. Thâwkte a harsa
8. Lungphu a su dup dup
9. An chau ngawih ngawih
10. A then an tawng thei lova, an zeng a, thih thut mai pawh awl tak a ni.

An enkawl dan : Mahnia in daktawr chawp leh thiante ei ang hmawm ve mai mai hi a hlauhawmzia hriat a tha. Thisen sang hi damdawi hmang leh damdawi hmang loa enkawl theih dan a awm a. Damdawi chi tam tak a awm a, chungte chu daktawr thu anga, a hunbi dik taka ei thlap thlap tur a ni. Entirna’n: Nefedipine 5mg., 10mg. etc., a hmuama hmuam chite phei hi chu hmanhmawh ngaihna (emergency)-ah an hmang nasa hle.
---------------------------------------------------------------------------------------------------------

CLEAN & BEAUTIFICATION THU:

n Clean & Beutification Committee chuan theih tawp chhuahin hma a la mek zel a, faina lama inzirtirna (awareness) pawh veng chhungah a neih chhunzawm zel bawk. July ni 20, 2012 khan Living Water School leh Vana Memorial School-ah te Faina Awareness Campaign hi neih a ni a, bawlhhlawh bawm 10 ve ve an hlan nghal bawk.

Tin, July ni 27, 2012 chawhma khan Missionary Training Centre-ah Faina Awareness Campaign hi neih leh a ni a, bawlhhlawh bawm 10 an pe leh bawk. Faina Awareness Campaign hi a tul angin kalpui zel tum a ni a; veng chhung faina leh mawina kawngah theihtawpin ke pen zel an tum ruh hle.