Kum 22-na, Issue 05, MARCH 07, 2009

MISSION VENGTHLANG VILLAGE COUNCIL THARIN HNA A THAWK THEI TA

February 28, 2009 (Inrinni) khan Mission Vengthlang Village Council 10-na atana thlan tharte chuan VC kal chhuak tate hnen atangin mawhphurhna an la fel ta. VC charge inhlanna inkhawm hi Pu B.Lalhriattira-te Inah neih a ni a, VC Election RO Pu R.Vanlalawma’n kaihruaiin, Mission Vengthlang bialtu Pastor C.Lalsangliana chuan VC member tharte Pathian hnena hlanna leh, thuchah sawiin hun a hmang bawk.

VC charge inhlannaa VCP kalchhuak leh VCP tharte thusawi tlangpui:
Dr. Lalsiamliana (VCP kalchhuak):
Mission Vengthlang VC President hna pawimawh tak, term 2 chhung zet tluang taka chelh thei tura ka thawhpui member-te leh veng mipuite tawiawmna ka dawn zawng zawngah lawmthu ka sawi a, a bik takin kan term tawp dawn kum khat chhung deuhthaw damlohna avanga engmah ka tih theih loh chhunga mawi taka min hliahkhuh thintu kan Vice President Pu P.C.Lalnunmawia chungah ka lawm takmeuh a ni. Mission Vengthlang VC tharte ka thinlung takin ka lawmpui a, khawtlang kaihhruai leh hmasawnna hna thawh kawngah tangkaina ka neite a nih ngai chuan theihtawp chhuaha thlawp hi ka inhuam reng a ni.

B.Lalhriattira (VCP thar):
Tun tum Mission Vengthlang VC election-a duhsak taka min thlang tlingtu veng mipuite chungah thinlung takin lawmthu ka sawi a; inthlannaah chuan theihtawpin tang theuh mah ila a tling lo lamte’n tihtak meuha min lawmpui hi zahawm ka tiin, ka lawm takmeuh a ni. Heti hian VC dinhmun pawimawh tak chelh mah ila tun maiah chuan kan tih ngei ngei tur, veng hmasawnna tur engmah tiam tur ka nei lo. Amaherawhchu, veng hmasawnna atan chuan kei leh ka thawhpuite hian kan theihtawp kan chhuah ang tih hi Mission Vengthlang mipuite laka ka intiamna a ni e.

Charge inhlan zawh hian VC tharte buatsaih zanriah tuihnai tak kilho a ni.



















VENG CHHUNG THUTHAR TAWI:

• Nl. C.Lalmuanpuii d/o Pu C.Sanghlira, Y Sec. (Kawn) chu a taksa chak tawk loh avangin Shillong-ah in check-upin a thang mek.
• Nl. Lalnunthari, Y Sec. Treasurer chu a taksa chak tawk loh avangin In lamah enkawl mek a ni.
• Np. Lalengkima s/o Pu B.Lalkulhmawia, A Sec. chu pneumonia avangin Aizawl Hospital-ah enkawl mek a ni.
• Np. Jonathan Lalrintlaka s/o Pu C.Lalrinmawia, A Sec., Khawthalo leh Luak avanga Aizawl Hospital-a enkawl chu dam takin a lo chhuak.
• Pu Lalneihtluanga, A Sec., Kawng na avanga Aizawl Hospital-a enkawl chu a lo chhuak.
• Pi Manthuami, A Sec. chu hmeichhe that lohna avangin In lamah enkawl mek a ni.
• Pu H.Lalbiaktluanga, A Sec. kan Branch Treasurer thin, Mumbai-a inenkawla kal chu vawiin hian a lo haw dawn.
• Pi Lalhmuaki te chhung, Y Sec. (Dam) chuan an In sak that chhung atan Pi Lalengzauvi Building, Y Sec. an luh lut.
• Er. C.Lallunghnema, M Sec. fapa-te, Dr. Lalhmangaihzuala chu P.G. (Surgery) zir turin a tling a, Tv. Lalrintluanga chu 68% hmuin Sound Engineer (Diploma), London-ah a zo.
• Kan Editor Pu Lalmuankima chu North East Zone Cultural Centre, Dimapur, Ministryof Culture, Govt. of India chuan hnam lâm (Folk Dance) lama midang zirtirna In din thei tura nihna ropui tak, ‘Guru’ a rawn hlan rup mai.
• Lallawmzuala s/o Pu Lalthantluanga, A Sec. chu SCERT State Level Nation Talent Search, 2008 Nov.-a neihah 5-na a ni a, May 10, 2009 hian National Level Talent Search inelnaah a tel leh ang.
  

FAM ROLUNG MUAL:

Hming : UPA ZALIANTHANGA
Kum : 64
Kohhran: Presbyterian
Thihni: March 04, 2009. 04:30 AM
Vui Hun: March. 04, 2009. 01:00 PM
Vuitu: Pastor C.Lalsangliana

Upa Zalianthanga hi May 15, 1945 khan Bawngthah khuaah a lo piang a. A pa Upa Lalbuaia (L) leh a nu Pi Lalruali (L) te an ni. An unau hi 12 niin, a pangana a ni. Primary School chu an mahni khuaah kalin, Middle School hi hostel chaw chhuma inhlawh chungin Dawrpui Middle School, Aizawl-ah Private-in a zo leh a, Class VI Scholarship Exam-ah Mizoram puma a titha thlan chhuah zingah a tel phak nghe nghe a ni. College a kal laiin chhungkaw harsatna avangin a zir mumal lo hle a, UCC, Barapani (Meghalaya) leh Pachhunga College-ah te zirtirtu hna thawk chungin B.A. tha takin a zo a, 1986-ah B.Ed. a zo leh a, kum 1993 - 1997 chhungin Union Biblical College, Pune-ah M.Div. (Missiology) a zir zo leh a ni.

Mi tumruh leh a thil tih tawha hlawhchham tum ngai lo, tihtakzeta bei a, hlawhtling mai zel mi a ni. Retheihna leh harsatna tam tak kara mahni thawhchhuah ringa inzir chhuak, hna tha tak a thawh lai kal sana Ramthar rawngbawlnaa, hreawmna leh retheihna tuar huamin Missionary-a kal chhuak ta a ni.

March 6, 1982-ah Chawngmawii nen Khawlek-ah inneiin, fapa 1 leh fanu 1 an nei a. Middle School zirtirtu hna a thawh laiin, kum 1980 khan Synod Mission Board hnuaiah Missionary-in a lut a. Ramthar Board School, Cachar Field, Tlabung, Mizoram-ah te Headmaster-a a thawh hnuah, kum 1998 - 2005 chhung Missionary Training Centre, Mission Vengthlang-ah Lecturer hna a thawk leh a ni.

Kum 1999-ah Jubili Kohhran upa atan nemngheh a ni a. Kohhran-ah rawngbawlna hrang hrang chelhin, Kohhran atana mi tangkai tak a ni.
Kum 2006 atangin Lung lam natna nei tanin, Kolkata-ah te pawh kalpui a ni. Ni 28.2.2009 khan tlang hrileng avangin chaw a ei thei lova, Civil Hospital-ah admit niin, a natna avanga harsatna lutuk pawh nei lovin March 4, 2009 zing dar 4:30 khan a rawngbawl sak thin Lalpa hnena chawl turin min lo kalsan ta a ni.


FAM ROLUNG MUAL:

Hming : HRANGTINTHANGA
Kum : 78
Kohhran: Presbyterian
Thihni: March 05, 2009. 09:30 AM
Vui Hun: March. 06, 2009. 12:00 PM
Vuitu: Rev. Lalhluma Sailo

Pu Hrangtinthanga (Hranga) hi Pu Thangzama (L) leh Pi Tinmeni (L) te fa pathum zinga naupang ber niin, kum 1931 khan Farkawn khuaah a lo piang a. An unau hi mipa 2 leh hmeichhia 1 an ni a, vanduaithlak takin a ute pahnih hian 1978 leh 1990 khan an lo boral san tawh a ni. Pian leh murna lamah Sukte hnam ni mahse tunlai mite’n kan hriat lar vak tawh loh angin Chhakchhuak hnamah sa an phun a, a fate pawh Chhakchhuak an ni ta zel a ni.

Pu Hranga hi a tlangval chhuak zawt tihin Aizawl lamah a thlangtla a, Aizawl lama a pem thlak hnu hian a hming puma koh a hlawh vak loh avangin Hranga tih chu mite’n an hriat dan ber a ni ta a ni. Aizawl-ah hian Venghnuai leh Mission Veng-ahte a awm hnuah, April 12, 1957 khan Lalhnuaii (Upa Chawngzika tunu) nen an innei a, an nupa hian nupa inkawprem leh hlim tak an ni. Hlimawm ve deuh pakhat chu an nupa an inkoh reng reng hian ‘I nu’, ‘I pa’, ti ngatin an inko kher thin. April 12, 2007 khan an Inneih Golden Jubilee an lawm a, fapa 6 leh fanu 1 neiin, tu 16 leh tuchhuan 3 an nei a ni.

Amah hi pa hrisel, mahni tawka chak leh taima, mistiri thiam tak a ni a, mistiri hna a thawh lai hian, ‘A thawh sen loh hna a hmu reng thin,’ tia mite sawi a ni. Hei bakah hian Synod HSS-a peon cum Chawkidar hna chelh hmasa ber a ni bawk.

Kum 2002 khan thâwk lamah harsatna neiin a insawisel tan a, Guwahati lamah inentirin, Chuap that loh vang a ni tih hmuhchhuah a ni a. A chuap lam tha lo hi zual zelin, 2007 kum tawp lam atang phei kha chuan a pawn chhuak peih ta meuh lo va, Jan. 28, 2009 khan Aizawl Hospital-ah dah luh a ni a, thla khat zet a awm hnu, March 3, 2009 khan doctor-te râwn angin Civil Hospital ICU-ah dah luh leh a ni. Khawl changkang zawk hmanga doctor leh thawktu dangte’n theihtawpa an enkawl chungin March 5, 2009 zing 9:30 khan a tu leh fa, a nupui leh thenrual thate uibeh rual lovin Chatuan Ram min lo pan san ta a ni.

Pu Hrangtinthanga ruang hi tlaivarpui a nih hnuin a tuk chhun dar 12:00 khan In lamah Rev. Lalhluma Sailo-in Vuina Hunserh hmangin, Thlanmual lamah Upa H.Ngurthansanga’n Thlahna Hun Hnuhnuang a hmang a, Mission Vengthlang Thlanmual-ah vuiliam a ni ta a ni.