Tun kar thawhlehni, March 17, 2009 zan khan Pu Peter C.Lalrinmawia In-ah Mission Vengthlang Development Committee (MDC) chu an Chairman, VC President Pu B.Lalhriattira kaihhruainain an thukhawm a, hetah hian veng chhung hmasawnna’na hnathawh tur pawimawh hrang hrangte leh hma lak dan turte an sawiho a ni.
MDC meeting hmasa berah hian member an kal tha hle a, member-te chu veng chhung hmasawnna hna thawk turin an phur tlang hle bawk. Hun remchangah veng chhung hmasawnna chungchang sawiho tur leh, thurawnte inpe a, kawng hrang hranga thawhhona tha a awm theihna’n veng chhunga sorkar hnathawk hrang hrangte nen inkawmhona neih nise an ti a ni.
MDC hi Mission Vengthlang Village Council sitting chuan thahnemngaih thilah a din a; veng chhung hmasawnna hrang hrang chak zawk leh tha zawka a kal theihna’na mawhphur tur leh hma la turin he Committee hi a beisei a ni. MDC chungchangah hian VCP chuan Zonunmawi zawhna chhangin, “MDC hian veng chhung hmasawnna hna hrang hrang a khawih ang a. Veng chhung tana hmasawnna tur sum hmuhte pawh tul a tih ang leh tha a tih angin a hmang ang a, engkim lang tlangin, thup leh zep awm lovin hna a thawk dawn a ni,” a ti a. Veng hmasawnna’na veng mipuite inhawng a, rilru zau tak pu a, thawhhopuiah veng chhung mipui zawng zawng a sawm tih VCP hian a sawi bawk.
MDC Member-te:
Chairman: Pu B.Lalhriattira VCP
Vice Chairman: Pu Peter C.Lalrinmawia
Secretary: Lalmalsawma Khiangte (VC Secy.)
Asst. Secretary: Tv. Lalmuanawma
Treasurer: Tv.Vanlalthlenga (VC Treasurer)
Member-te: VC member-te
YMA President & Secretary
Pu R.Lalhmuliana
Pu Sailoliana
Pu Vanlalsawma
Pu Jolly Newman
Pu Lalthangliana Murray
Pu Lalthuamliana
Pu C.Rothianga
Pu Lalrinliana
Er. K. Lalsawmvela
Pu V.L.Bawiha
Mission Vengthlang VC hnuaiah hian Thlanmual Committee siam thin a ni a. Hei pawhhi VC sitting chuan siam thar leh ngei tha a ti a. Hetiang hian OB turte a ruat:
Chairman: Pu Zarkhawthanga
Vice Chairman: Pu Chawngthankima
Secretary: Pu Lalrokima
Asst. Secretary: Pu H.Lalneihkima
Treasurer: Tv Vanlalthlenga (VC Treasurer)
Tun kar Thawhtan zan khan VC leh YMA OB-te chu Pu Vanmalsawma In-ah Joint Meeting neiin, Market chungchang an sawiho a. Market Committee siam thar leh tha an tiin, hetiang hian Committee an siam.
Chairman: Pu Kaisangzuala
Vice Chiarman: Pu Vanlalhuma
Secretary: Pu Gilbert Lalzarliana
Asst. Secretary: Tv.Lalmalsawma Khiangte
Treasurer: Pu Vanmalsawma
Member-te: VC Member-te,
Branch YMA OB-te
YMA Section Leader-te.
VENG CHHUNG THUTHAR TAWI:
- Pu B. Laltanpuia h/o Pi Malsawmi, Y Sec. (Dam), Thisensâng vangin Aizawl Hospital-ah enkawl mek a ni.
- Rev. Lalnghinglova, Y Sec. chu Durtlang Hospital-ah a mit (eye) hlawhtling taka zai a ni.
- Tv. Vanlalhruaia (Hruaitea) s/o Pu Chuaukunga, Y Sec. chu Bike chesualin a dâr a sawh na a, hun eng emaw chen office kal thei lova a awm hnuin a pawn chhuak peih leh ta.
- Nl. Lalnunthari, Y Sec. Treasurer chu a la dam chian theih loh avangin In lamah enkawl zel a ni.
- Pi Ramhlimpuii d/o Pu R.Zasiama, Y Sec. (Vengmawi) chu pum lam tha lo vangin Shillong-ah in checkup-in a thang mek.
- Pu Lalhmangaiha, M Sec. (Tlang veng) te chuan fanu duhawm tak an nei thar.
- Pi Lalrammawii w/o Pu Rodingliana, M Sec. chu Durtlang Hospital-ah a rilphir paih a nih hnuin In lamah enkawl mek a ni.
- Tv. Lalramluahpuia, A Sec. Committee member chu nimin piah khan an In sak lai atangin a tla a; a âwm ruh leh a ngal vei lam a sawh tliak palh. Aizawl Hospital-ah enkawl mek a ni.
- Pu T. Kapliana, M Sec. chu taksa bawrhsawmna avangin In lamah enkawl mek a ni.
- Upa Vanlalzuala Chhangte, kan chanchinbu Zonunmawi Editor tangkai tak lo ni tawh pawh a naute inneih hmangin Guwahati atangin a rawn haw.
- Kan Editor Guru.Lalmuankima, Mizoram Cultural Troup hruaia Chennai lama thang mek pawh March 23, 2009 hian an rawn haw dawn.
- Pu Vanlalliana-te chhung chu A Sec. (Vai lui kam) atangin Pu Lalthantluanga In, A Sec. (Tlang veng)-ah an insawn chho.
- Kan Branch hruaitu hlun, Pu C. Lalduhkima, A Sec. chu an zirlai excursion hruaiin India ram hmun hrang hrang tlawhin a thang mek.
- Pu Vanengzauva, Chhinga Veng, Pi Runremmawii w/o Pu Lalhunmawia, A Sec. pa chu March 18, 2009 khan a boral a, hemi ni vek hian vui liam nghal a ni.
- Pi Rozami, Zemabawk, Pu Vanlalhuma, Y Sec. (Dam phei) nu chu March 19, 2009 khan a boral a, hemi ni vek hian vuiliam a ni.
FAM ROLUNG MUAL:
Hming : LALCHHANCHHUAHIKum :30
Kohhran: Presbyterian
Thihni: March 17, 2009. 2:30 PM
Vui Hun: March. 18, 2009. 12:00 PM
Vuitu: Pastor C.Lalsangliana
Pi Lalchhanchhuahi hi Pu Ralramthanga leh Pi Thangmawii, M Section-te fa tlum ber niin May 28, 1978 khan Aizawl Civil Hospital-ah a lo piang a. Unau pianpui mipa 2 leh hmeichhia pakhat a nei a ni.
Amah hi a naupan lai atanga mi nunzawi leh chhel tak a ni a; mi taima leh hna thawh hreh nei lo tak a ni bawk. Kum 1997 khan Aizawl College atangin PU a zo a, kum 2000 khan Ahmednagar atangin BA a zo leh a ni. July 31, 2000 khan C. Lalsangliana nen Kolasib, Tumpui Biak In-ah an innei a, an nupa hian fanu pakhat leh fapa pakhat an nei. Amah hi nu taima leh chhel tak, a pasal leh fate tana inpezo tak a ni a. A hriselna tha tawk lovin buai viau mah se, a theih ang tawka Pathian biak inkhawm ngaina mi a ni bawk.
Pi Lalchhanchhuahi hi BA a zir lai atang tawh khan Lung (Heart) lam that lohna a neih avangin enkawl ngaiin a awm fo a. Kum 2007 khan a lungna hi rawn thawk lehin, Durtlang Hospital-ah enkawl a ni a. Mahse beisei anga a that chhuah mai loh avang leh, doctor-te rawn angin Birla Hospital, Kolkata panpui a ni a. Kum 2007 hian March, August leh December thlaahte Birla Hospital-ah hian enkawl a niin, a lung tha lo hi zai tura hmalak chhoh a nih mek laiin Kohhran mite tawngtaina zarah damna a chang ta hlauh mai a, heta tang hian Damdawi lama enkawlna pawh an chhunzawm ta lo a ni.
A chhungte leh a pasal pawhin tha pangngai taka a awm chho ve zel nia an hriat laiin ni 17.3.2009 (Thawhlehni) khan pawn chhuak peih lovin a awm a. Chutia a awm chu chawhnu her hretah a thawk a hahin, khawi chet ngam mang lohin a awm ta a. A rang thei ang berin doctor-te an han rawn nghal a. Doctor-te thurawn anga In lama oxygen pek a, a harh deuh huna damdawiin lam panpui tura an inbuatsaih mek laiin, chawhnu lam dar 2:30 khan a pasal fanaute leh a chhungte ui beh rual lohin Chatuan Ram min lo pan san ta a ni.
Pi Lalchhanchhuahi ruang hi tlaivarpui a ni a, a tuk ni 18.3.2009 chhun dar 12:00-ah khan Bialtu Pastor C. Lalsangliana’n In lamah vuina hunserh a hman hnuah, Thlanmual lamah Tualchhung Upa H.P. Lalzuala’n thlahna hun hnuhnung a hmang a, Mission Vengthlang Thlanmual-ah vui liam a ni ta a ni.
EDITOR HNENA LEHKHATHAWN
Pu Editor,
Ramngaw leh nungcha humhalhna kawngah kan veng, Mission Vengthlang hian hma kan sawn nasa hle tawh a, Aizawl khawpuiah chuan ramngaw nei tha ber pawl pawh kan ni awm e. Mi thahnemngaite avangin nungcha chi hrang hrang leh savate pawh kan veng-ah hian an ngam tawhin, hnai vai te tea hmuh tur pawh an awm ta hial mai. Hetih lai hian mi tlemte, sapel leh sava veh ching kan la awm a. Khawvel changkang zelah hetiang tih la chin fo mai hi hnam changkanglo zia a nih tawh avangin sim theih hram kan tum a hun ta hle mai. Sim hram tawh turin ka ngen tak meuh meuh a ni.
Kumin, 2009-ah pawh hian mi rinawm tak hnen atanga ka hriat danin kan veng mi pahnih chuan sa an kap ngei tih ka lo hria a (an hming chu tarlang rih lo mai ila). He thu ka lo hriat rual rual hian pawi ka tiin, kan veng tan ngei pawh a mualphothlak hlein ka hria.
Nungcha hlu tak takte hi The Wildlife (Protection) Act, 1972 chuan khauh takin a humhalh tlat a; tul bikna thil a nih ngawt loh chuan thah mai mai a thiang lo reng reng a ni. Kan ramah nungchate an tlem tawh avangin pakhat kan thah hian an chhuan (generation) eng emaw zat awm thei tur kan titawp tihna a ni a, hetia ngaih mai ai hian a pawi em em a ni.
Kan tana tha tura Sawrkar-in Dan tha tak a siam pawh zah zo lo khawpa insum thei lote hi ram leh khawtlang tana thahnemngaihna avanga kan report a nih chuan lung-in hial tan theihna leh, sum tam tak chawi theihna a ni a; Sawrkar hnathawk tan ngat phei chuan suspend tawh hial theihna a ni. Chutiang em kan thleng a nih chuan, na kan ti lutuk si ang tih a hlauhawm avangin i chanchinbu zahawm tak kaltlang hian sim tawh turin ka han ngen tak meuh meuh a ni. Danin a phal loh mai piah lamah, Pathian-in duh taka a siam tho an nih avang tal pawh hian ringtute chuan kan tih loh hi a tha reng reng a ni. Ei tur atana kan ranvulhah hian lungawi hram hram thei tawh ila ava duhawm em!
Thahnemngai taka kan inngen chung pawha kan sim duh lo a nih chuan veng chhung chanchinbu Zonunmawi-ah hian an hming hial tarlang mai ila tha i ti em?A rem a nih chuan an hming chu ka nei sa vek e.
Nungchate tana theihtawp chhuah thintu,
sd/- K.LALMUANSANGA, Y Section
No comments:
Post a Comment