Kum 21-na, Issue 41, NOVEMBER 09, 2008

MISSION VENGTHLANG YMA EXECUTIVE COMMITTEE THUTKHAWM VAWI 12-NA THUREL

Kumin chhunga YMA, Mission Vengthlang Branch Executive Committee thutkhawm vawi 12-na chu Nov. 6, 2008 (Ningani) zan khan YMA Hall-ah neih a ni. Branch meeting-ah hian member 27 zet an kal a, member dang 10 erawh chu damlohna leh harsatna eng emaw an neih thu thawnin meeting an pha thung. Thu pawimawh tak tak sawiho a ni a, report leh thurel pawimawh zual, member-te hriat tlan âwm han tarlang ila:

SUM DINHMUN: Tun dinhmunah kan Branch-in pawisa hman theih kan kawl mek chu Rs 35,718/- a ni a. Hei bakah hian Hall thara thutthleng (plastic armchair) leina tur veng chhung mi inphalte’n kan thawhkhawm chu Rs 92,400/- zet a tlin tawh thu report a ni bawk. Hei hian kan thutthleng lei tur ang hi chair 308 zet a lei thei dawn a ni.
Branch sum pangngai bakah hian Zonunmawi chanchinbu puala kan pawisa neih mek chu Rs 10,473/- a ni a. Branch Committee apianga mi harsate tanpuina tur bawm hunah hemi zan hian Rs 515/- a tla bawk.

VC E-ROLL: Kan Branch-in kan veng chhung atana VC Electoral Roll kan buatsaih a, kan veng dinhmun chu hetiang hi a ni:
Y Section
Vote neih zat-999
Chhungkaw zat-293
M Section
Vote neih zat-956
Chhungkaw zat-267
A Section
Vote neih zat-866
Chhungkaw zat-253

CENTRAL BUDGET: Tun General Conference neih zawh tâka kum 2008-2009 chhung atana kan Branch Budget min tuk zat Rs 5,000/- chu kan hruaitu, Conference kalte’n an puan ni la lain Rs 5,100/- pein an rawn tlak nghal.

YMA HALL-II: Basketball Court bula YMA Hall-II chu inthiarna leh tui dehna hmunte siama mimal luah theiha cheibawl tum a ni.

BRANCH SPORT LEH HNATLANG: Kan Branch chuan Nov. 22-29, 2008 chhung hian Section pathumte pualin intihsiakna thianghlim (sports) a buatsaih dawn a. He sport hi Dec. 2, 2008 zan khian a kharna hun YMA Hall-ah ropui taka hman tum a ni.
Sport inbuatsaihna leh Section-te intihsiak tanna’n Nov. 15, 2008 (Inrinni) hian Basketball Court-ah Branch Hnatlang neih tur a ni a. Intihsiak tanna a nih ang ngeiin, hemi ni-a Section tin atanga hnatlang member pakhat zel hian Sport atan point 1 (khat) an hmu ang. Section hruaitute an tang hle.

CHHIATNI CHUNGCHANG: Chhiatni-a kan veng kalphung thlirletin ngun taka sawiho a nih hnuah chhiattawk an awmin Lumen Zan tih loh, YMA zan thum chhungah hi chuan thingpui lum tawh loh nise tih chu lungrual taka pass a ni.
He’ng bakah hian Branch Committee chuan Mitthi Lumen leh Khawhar In-a zurui chunga kal thinte hi a ngaimawh hle a. Tun hnuah chuan hetiang ti thinte chu insum hram hram turin a ngen a ni.
Khawhar In-a thingpui sem chungchangah a bikin kan nulate’n kekawrtlawn nena thingpui sem lo hram tur leh Khawhar In-a kan Mizo hmeichhiate incheina mawi tak, puan bih chunga kal hram hram turin Branch Committee chuan kan nulate a ngen bawk a ni.


VENG CHHUNG THUTHAR TAWI:

• Rev. Dr. Lalsawma, Y Sec., Shillong-a in check-up chu a lo haw leh ta.
• Pi Laltlanmawii c/o Pu H.Ramdinliana, Y Sec. chu BP sang avangin Durtlang Hospital-ah enkawl mek a ni.
• Pi Zothanpari w/o Pu PC.Lalrinpuia, M Sec. chu Durtlang hospital-ah zai a ni a, In lamah an inenkawl mek.
• Pu H.Lalbiaktluanga, A Sec., kan Branch Treasurer chu Nov. 11, 2008 (Thawhlehni) khian Mumbai-ah a hrawk an hem dawn.
• Np Lalruatpuii d/o Pu Vanlalhruaia, A Sec. chu khawsik avangin Civil Hospital-ah enkawl mek a ni.
• Nl Vanlalthlani d/o Pu Sanglura Sailo, A Sec. chu Civil Hospital atangin dam takin a lo chhuak.
• Tv Lalrinchhana c/o Pu C.Lalrintluanga, A Sec., Aizawl Hospital-a awm chu dam takin a lo chhuak.
• Pi Laltlanzovi w/o Pu Ramchungnunga, A Sec. chu ni 7.11.08 khan thisen Unit 3 pek a ni.
• Pi Lalrikhumi m/o Pu vanlalruata, A Sec. chu Aizawl Hospital-ah enkawl mek a ni.
• Pu K.Lalbiakvela, Y Sec., kan Branch Librarian chuan M Section-a a In sak thar chu luah theih turin a peih ta.
• Nl C.Lalsawmzuali d/o Pu C. Vanlalrema, Y Sec. chu kumin a NET (National Eligibility Test) exam result chhuakah a tling. Kan lawmpui hle.
• Pi Mawitei w/o Pu M.Guite, M Sec. chuan MP&SS-ah Reserch Officer hna a hmu thar.
• Tv Calvin Lalchawimawia s/o Pu H.Lalsanglura, M Sec. leh Nl Grace Lalchhawntluangi d/o Rev. C.Pazawna (L), M Sec. te chu Nov. 13, 2008 (Ningani) hian MVT Presby. Kohhran Biak In-ah an innei dawn.
• Jubili Kohhran chuan Dec. 9, 2008 (Thawhlehni) khian ruai nen an Biak In hawn an tum. Tunah hian a hmunhma chei thain, Biak In pawh a chhung leh pawn rawng hnawih thar an tum mek.
• Tv C.Lalawmpuia (OP-a) s/o Pu Sangnghina, Y Sec. chuan LLB (Bachelor of Laws) a pass thar. Kan lawmpui e.

BIAK IN THAR HAWNG DAWN

Nov. 10, 2008 (Thawhtanni)-a hawn tur, Mission Vengthlang Presbyterian Biak In chu peih thawkhat a ni ta. Nimin khan kohhran pum huapin Biak In thar hawnna leh Ruby Jubilee lawmna atana thil tulte buaipuia hnatlang neih a ni. He Biak In saknaa thil chhinchhiahtlak thenkhatte chu:

Biak In sakna senso (1.11.’08 thleng): Rs 1,85,66,086/-
Biak In zau zawng:
A dung - Ft. 100 leh a bathlar ft.22 leh inch 4.
A vang - Ft. 65 leh a sir tawn bathlar ft. 8 leh inch 6 ve ve.
Biak In san zawng:
A chhuat atanga a tlûng - Ft. 50 leh inch 3.
A chhuat atanga Kross chhip - Ft. 76 leh inch 5.

Biak In tharah hian thut dan pangngai, tawt lutuk lova thuin a chhungah mi 1,360 leng tura chhut a ni.

Hei bakah hian Biak In thara thil tul, Kohhran chhungkua atanga mi inphalte’n an chhungte hriatrengna atana an pek lengsar zualte chu:

1. Dar (Kg. 59-a rit,17” hawlhtlang): Rs 33,000/-
2. A hmalam kawngkharpui laita: Rs 24,000/-
3. A hma sir kawngkharpui pahnih): Rs 22,000/- ve ve.
4. Gallery kawngkhar: Rs 18,000/-
5. Vestry kawngkhar: Rs 13,000/-
6. Lectern pahnih: Rs 7,000/- ve ve.
7. Maicham: Rs 26,000/-
8. Pulpit: Rs 1,20,000/-

Hei bakah hian Electronics Piano thar (Yamaha company siam) Rs 1,18,000/- man zet, dum tle nalh zar mai pawh lei thar a ni tawh bawk.

Chhun dar 12:00-ah Kohhran kum 40 tlin champhaphak (Ruby Jubilee) Dar, Kohhran mipawimawhte leh Kohhran member kum upa (kum 80 tling chin)-te’n an vua ang a. Chumi zawhah Souvenir tlangzarhna hun hmangin, Synod Moderator Rev. Dr. H.Vanlalauva’n Biak In thar a hawng ang a, Biak In tharah inkhawm zui nghal a ni ang.

Biak In thar hawn inkhawm zawhah hian, tlai lamah Kohhran pum huapin Biak In thar hawn leh Ruby Jubilee lawmna ruai ropui taka theh nghal a ni ang.



ARTICLE: FATU
R.Vansanga, M Section

Fatu hming han sawi hian thinlungah ruai a lo lang nghal a,iptepui ak lai leh lukhum parh khum, kekawr vela sa thisen kai pawh kan mitthla nghal awm e. Fatute inpekna zarah mipuiin ruai tui takte kan theh thei a, an fakawm em em a ni. Fatu hming kan lam rual chiah hian mi tlawmngai an nihna pawh hi thinlungah langsar tak a ni bawk. A hming hian ril a ti tamin, min ti tlai bawk.

Mangnghilh kan nei em: Tunlai mite hian hmanlai mite fatu dinhmun kha kan luah zo ta lo deuh mai em? tih ngaihtuahna a lo piang ta. Kan tha ta lo hle tihna chu a ni hauh lo va, inenfiah tulna kan nei tih erawh chu i pawm ang u.
Ei leh inah: Tun hma deuh fatu rilruah khan rilru zahawm, thuk deuh inphum a awm a. Chu chu mipui an tlai em, an duhtawk eitur an hmu em, tih hi an dah pawimawh ber a, fatu-in ei tur chan loh rum rum te, ningnawi tak han ei mai changte a awm fo. Heti chung hian fatu tawngkam chu, "E khai, eitur kan la hnianghnar lutuk, kan tlai ngei mai," tih kha ring takin a ri. He fatu rilru zemawi tak hi tunlai fatu rilruah hian a la lian em? Nge, fatu chu tlai bik tur leh hnianghnar bik turah kan inngai?

A hna hi: Inpek ngai zet mai a ni a, tawng tam aia thawh tam mamawh hna a ni. A tir lama phur hlut a, a tawp lama zuih ral san chi a ni lo. Lum hle mahse a lum zualna lai sabel lam pan a chawh miah miah tul hun a tam. A lum nuam tawka awm a, rel fel theih a ni lo. Lum engang mahse thing tuah hna chu fatu kuta awm a ni. Sa urh te, chaw kangte hi a awm fo va, a chhan berah chuan fatute inpek that tawk loh vanga thleng thei thil a ni a, inven zawh loh pawh awm thei tho chu a ni ang. Fatu tan tlan thep thawpna hmunah tihsual a tlem tih hi chu a chiang.

Kan hmasawnna tur: Mipui kan han phut mur mur tawh hi chuan pawisak a tlem duh khawp a, uanthuan thila tuihnai to taka chet palh theih a ni. Leia sa tih tlak palhte pawh engah maha ngai lova chan chhunzawm mai a sam thin. Tamna hian kan duh ulukna leh thianghlimna hi dal lose. Sa dahna hmun hi tuma’n rap lo ila, eng anga ruaipui pawh buatsaih ila, thianghlim tak leh uluk tak hian a kalpui theih em em a, hmanlai fatu-te aia chet fel leh thianghlim hi kan tan lakna tur leh hmasawnna tur a ni ang.

Kan hmanrua pawh a thianghlim tawk tur a ni. Fatu dinhmuna kan ding theite hi malsawmna a ni a, ruat kan ni emaw, inpek ngai a ni emaw a lo nih pawhin inthlahrunna chi a ni lova, hna chhuanawm a ni e.

Click here to download the full issue (OCT. 26, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)