Kum 21-na, Issue 40, NOVEMBER 02, 2008

MISSION VENGTHLANG THLANMUAL IN HULHLIAP ZAUH A NI
Mission Vengthlang Thlanmual In, Thalai thlanlaiten thlipui ruahpui leh ni sat huna an belh ber chu kan khawtlang hruaitu, VC-te thahnemngaihna azarah tun hnai khan mi tam zawk tawm hul theihna tura zauh a ni. Nunphung leh thil tih dan inthlak chho zelah Thlanmual In kan hman tangkai dante pawh a pung chho zel a, fur khaw diak leh ruahsur lai phei chuan mitthi kan vui pawhin thlan kotlang-ah kher hun hmang lovin Thlanmual In-a hun hman mai pawh sawi tur ting chuan kan nei ve ta zauh zauh mai. Hetiang hunah hian kan Thlanmual In zauh hi mipui vantlang tan a chhawrnahawm khawp ang.

Hetia Thlanmual In zau leh nuam zawk kan han neih takah chuan Thlanmuala mitthi vuina hunserh hnuhnung kan hman thin hi thlan kotlangah kher hmang lova Thlanmual In-a felfai taka hman mai hi suntu mipui nawlpui leh nunau chhangchhe tan chuan a remchang zawk phian lo maw? Tichuan, mipui nawlpui tin hunah thlalaite’n thil tul dang chu tifel zui mai thin ta se.

Thlanmual In zauh mai bakah tunah chuan kan VC-te hmalakna zarah kan Thlanmual panna kawng pawh a chhe zual lai siam tha a, a kawng lai leh sir hnimte pawh fai taka thlawh fai vek a ni bawk. Hetia kan Thlanmual hmun leh a panna kawngte tih changtlun chhoh a nih mek lai hian a mawhphurtu, kan khawtlang hruaitute mawhphurhna leh, an hahnate hriatpui hi mipuite mawhphurhna pawimawh tak a ni tih hi veng mipuite’n kan hriat thar a pawimawh khawp mai. Kawng lehlamah erawh chuan kan khawtlang hruaitute hi mihring, tlin tawk lohna leh hmuh hmaih nei thei ve tho an nih avang erawh chuan khawtlang hmasawnna kawnga thil tangkai turah chuan, mawhphurhna beltu mipuite tho hi a finchhuahtu tur pawh kan ni tho tih kan hriat tlan a tha khawp mai.

Hetia Thlanmual In hulhliap tha tak mai kan neih tak hian kan veng Thlanmual chu hmangaih then tawhte rilruah a hlutna leh a mawina a tizual a. Tunah phei chuan mahni chhungte thlan tlawh leh, tifai paha naupangte nen hlim taka chhun chaw fakna’n pawh a iaiawm ta lo khawp mai. Mahse, Thlanmual In hi kan vaia ta a nih ang ngeiin a enkawl fai chungchang pawh keini a neitute kuta awm a ni a. Thlamual In chawlhna’na hmangtu zawng zawngte’n kan mawhphurhna hlenin, fai taka enkawl tlan theuh i tum ang u.


VENG CHHUNG THUTHAR TAWI:

• Pu Laltlanmawia, Y Sec. (Kawn) te chuan a pahnihna atan fapa an nei thar.
• Pu F.Lalhmangaiha, Y Sec. Comm. member chu bike-a chetsual vangin a la pawnchhuak peih meuh lo.
• Nl Lalawmpuii d/o Pi Saichhungi, A Sec. chu mit (eye) zai tir turin Guwahati-ah a nu nen an thang mek.
• Pu Rorelliana, A Sec. chu lu-na leh thawhah avangin Aizawl Hospital-ah enkawl mek a ni.
• Nl Vanlalthlani d/o Pu Sanglura Sailo, A Sec. chu thisensang vangin Civil Hospital-ah enkawl mek a ni.
• Pu H.Lallawmkima, A Sec., Kal (kidney) na leh pumna avanga Civil Hospital-a enkawl chu a lo chhuak.
• Pu H.Lalbiaktluanga, A Sec., kan Branch Treasurer chu Ningani khan inenkawl turin Mumbai-ah a liam ta.
• Nl Lydia Malsawmtluangi d/o Dr. Jerome Rokima, Y Sec. leh Tv H.Lalrinsanga, Kulikawn te chu Nov. 07, 2008 (Zirtawpni) hian Kulikawn Presby. Kohhran Biak In-ah an innei dawn.
• Pi Lalthawmi m/o Pu Varthanmawia, M Sec. chu USA atangin Krismas vuakvet hmang turin a lo haw.

FAM ROLUNG MUAL:

Hming : RODINGLIANA
Kum : 34
Kohhran: Presbyterian
Thihni: Oct. 31, 2008. 08:00 AM
Vui Hun: Nov. 01, 2008. 12:00 N
Vuitu: Upa K.Lalengzauva

Tv. Joseph Rodingliana (RD-a) hi Pu C.Manliana leh Pi Chawnghmingthangi (L) fate zinga upa ber dawttu niin, November 18, 1974 khan Synod Hospital, Durtlang-ah a lo piang a. Unau pianpui, u hmeichhia 1 leh nau mipa 2 a nei a ni.

Amah hi naupan lai atanga nu leh pa thu awih thei tak leh zaidam a nih avangin a nu leh pate bakah a unaute pawhin a bula awm hi an thlahlelin, nuam pawh an ti hle thin. Zirna lamah chuan PUC (tunlai Class XII) a zo a. Mi taima a nih avangin kuthnathawh leh ram lam hnaah pawh a pa thachhangdawltu ber a ni. Tunah pawh hian Ailawng ramah thlai chi hrang hrang leh rose pangparte chingin a hun tam zawk chu hetah hian a hmang thin a. Kuthnathawha intodelh leh chhungkaw chawm tum tlat mi a ni.

October 22, 2008 (Nilaini) atang khan hritlang leh lu- nain a tlakbuak tan a, hritlang naran maia ngaih a nih avangin In lamah enkawl a ni a. A tuka tlema a lo that deuh avangin inentir pawh tul a ti lem lo va. Zirtawpni-ah pawh In-ah awmin, that lama a pan zela ngaih a nih laiin a lu-na leh khawsik a zual ta deuh a. A chhungte’n damdawiin kal mai an rawt pawh chu tul a tih loh avangin a tuk, October 25, 2008 (Inrinni) chaw ei khamah Aizawl Hospital-ah a inentir ta a ni. Doctor-te’n an lo endik hnuah chuan Hospital-ah hian admit nghal a ni a. Hospital-a thawktu leh unaute’n thahnemngai taka an enkawlna zarah a khawsik leh lunate chuan kian lam a pan chho deuh a an hriat mek laiin Oct. 29, 2008 (Nilaini) tlai dar 4:00 khan a chaw ei laiin a kaih ta thut mai a. Zan lamah pawh tum hnih lai a kaih leh tak avangin a tuk Ningani khan Trinity Diagnostic Centre-ah a lu chu CT Scan-a en a ni a, hemi ni tlai dar 3:00-a a kaih leh tih mai loh chu dam tha chho zel tura a chhungte’n an beisei em em laiin, a tuk Oct. 31, 2008 (Zirtawpni) zing dar 2:00 vel atang khan a natna chuan a tihah zual ta hle mai a. Doctor leh nurse-te’n oxygen nen thahnemngai taka an enkawl chungin zing lam dar 8:00-ah khan a chhungte leh a thenrualte chuan kan lo then ta a ni.

Tv Joseph Rodingliana ruang hi Oct. 31, 2008 (Zirtawpni) zan khan lumenpui a nih hnuah a tuk Nov. 01, 2008 (Inrinni) chhun dar 12:00 khan Bialtu Upa K. Lalengzauva’n In lama vuina hunserh a hmang a; Thlanmual lamah Upa H. Ngurthansanga’n thlahna hun hnuhnung a hman leh hnuin Mission Vengthlang Thlanmualah vui liam a ni ta a ni.


KAN VENG CHOAK:
Kan veng Choak hian mihring a nel viau tawh asin. Nula buh thap lai pawh thlamuang takin a kilpui ngam tawh a. Nungcha dang pawh ‘tiang hian i sawm lut zel ang u.

Click here to download the full issue (OCT. 26, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)