Kum 21-na, Issue 32, SEPTEMBER 07, 2008

MISSION VENGTHLANG YMA EXECUTIVE COMMITTEE THUTKHAWM VAWI 9-NA THUREL

Kumin chhunga YMA, Mission Vengthlang Branch Executive Committee thutkhawm tum 9-na chu YMA Hall-ah tluang taka neih a ni. Tun tum thutkhawm hi Presbyterian leh Baptist Kohhrante’n Beihrual an hman avanga zan awl a awm theih loh avangin zing dar 6:00-ah tan a ni. Thurel leh report pawimawh, member-te hriat tlan awm chi han tarlang ila:

1. Basketball Court Tihchangtlun: Kan Basketball Court thuam phuisui lehzualna tur Sport Council chuan Rs 1,99,990/- min pe. Basketball Ring leina atana kan senso khuh turin Sports Directorate-in Rs 6,300/- min pe bawk. Hei baka lawmawm tak tak la awm chu Basketball Court hmar lam hungna tur Angle Iron ban 22 zet Agri. & Fisheries Deptt. Director chuan min pe a, a hungna tur Goatproof Wire Mesh (Kel pal) min ngaihtuah sak mek bawk. Hengte pawh hi kan la dawng cheu: NSS, Aizawl College atangin Rs 10,000/-; NSS, Republic Higher Secondary School atangin Rs 10,000/- leh; NSS, Synod Higher Secondary School atangin Rs 6,000/-, a vaiin Rs 26,000/-. Heng, NSS Unit hrang hrang atanga kan sum hmuhte hmang hian Zun In leh infiammite inthlakna pindan tha tak siam tum a ni.

2. MPF, Mission Vengthlang Local Forum-a Branch YMA aiawha tel turin Pu R.Vansanga, M Section leh Pu Lalramthanga, Y Section-te ruat an ni.

3. Hall Kawngkhar: Kar hmasa lama kan rawn tarlan tawh, Market Building chunga Hall luh chhohna kawngkhar chu Branch Committee member-te’n a hmuna kala an ngaihtuahho hnuah Rolling Shutter pahnih hmanga kawngkhar hi siam nise tiin an rel. Tunah hian kan Hall thar hi a bang chhung leh pawn bakah, a chhuat pawh plaster zawh vek tawh a ni. Rawng hnawih leh Tukverh darthlalang vuah hi hna pawimawh la awm chu a ni ta deuh mai.

4. YMA Hall Chung Rawng hnawih: YMA Hall, Tlang Veng pan chhohna ami zawk hi a chung rangva a tuiek nasat deuh tawh avangin ruahtui hul deuh hun, October thla velah a chung hi rawng nalh taka hnawih nise tih rel a ni bawk.

5. Gas sem chungchang: Tunlaiin eirawng­bawlna gas a vangin, a la tur chuan zankhua khuaa nghah te pawh a ngai hial thin. Veng chhungin rualkhai leh kan mamawh tawk ang theuh, awlsam zawka kan lak tlan theihna a nih beiseiin kan OB-te’n ruahmanna an rawn siam dawn a. A tul angin Section hruaitute’n mahni Section theuhah an lo bawhzui ang.

6. Branch Committee apianga hun thin, miharsate tanpuina bâwm-ah Rs 360 a tling khawm.



VENG CHHUNG THUTHAR TAWI:

• Pu H. Rodinga, Y Sec. (Dam) te chuan fapa duhawm tak an nei thar.
• Rev. Lalhluma Sailo, M Sec., Durtlang Hospital-a a mit-a lungte awm zai chu rawn chhuakin, In lamah enkawl mek a ni.
• Pu Lalrotluanga (LR-a), M Sec. chu Civil Hospital-a hun eng emaw chen enkawl a nih hnuah remchan zawkna avangin, damdawi In hnai zawk Kulikawn Hospital-ah enkawl chhunzawm a ni.
• Tv Andrew Lalthianghlima s/o Pu Lalremsiama, M Sec. chu Aizawl Hospital-ah enkawl mek a ni.
• Pu H.Lalrammawia, A Sec. chu kawngchhung lam fel lo avangin Aizawl Hospital-ah enkawl chhunzawm zel a ni.
• Pi Lalthlanzovi w/o Pu Ramchungnunga, A Sec. chu Nazareth Hospital-ah enkawl mek a ni.
• Upa Zalianthanga, A Sec. chu lungna avangin Durtlang Hospital-ah enkawl mek a ni.
• Pu Sangkhawnghina, A Sec., thawhah avanga Durtlang Hospital-a enkawl chu a lo chhuak.
• Nl Mary Lalhmangaihsangi d/o Pu C.Thanthuama, A Sec. chu nurse hna zir turin Patna (Bihar) lamah a liam ta.
• Vantlang Mike enkawlna tur chu Section hruaitute’n chhung tin hnenah an rawn khawn dawn a. Rs 10/- lo thawh theuh turin i lo inring lawk ang u.

KAN BRANCH ZAIPAWL-IN HLA AN ZIR NGAWRH

Branch YMA Zaipawl Intihsiakna lo awm tura kan Branch Zaipawl-te inbuatsaihna chuan a vawrtawp a thleng chho mek . Nimin khan YMA Hall-ah chhun dar 11:00 atangin hla an zir a, tlai lamah hlim takin zanriah an kilho nghal. Tunah chuan an hla zirte an thiam tawhin, kan hruaitute beisei pawh a sang khawp mai. Sawi tawh thin angin kan Branch zaipawl member-te hi Presbyterian Kohhran zaipawl Intihsiaknaa 1-na lo la tawhtu Mission Vengthlang Presbyterian Kohhran Zaipawl member-te, Aizawl khawpui huap Baptist Kohhran zaipawl intihsiakna a 1-na hauhtu Shalom Baptist Kohhran, Mission Vengthlang leh, Kohhran dang dang atanga zaipawl member tha tak tak fuankhawm an ni a, kan lo beisei sang deuh anih pawhin tu dem chi kan ni êm lo’ng chu maw! Hei mai a la ni hlei nem, kan Branch Zaipawl hi Mizoram pum huap Presbyterian Kohhran Zaipawl Intihsiakna-a Conductor tha ber (Best Conductor) lawmman lo dawng tawh, Tv F. Lalrinawma’n a ho leh nghal mawle. Zonunmawi Editorial Board chuan lawmman kan dawn leh dawn loh tur kan ngaihtuah lo, tun hma lama hla la zirho ngai lo, Kohhran hrang hrang thalaite’n lungrual taka hla an han zirho ringawt pawh hian veng inpumkhat lehzualna a thlen ngei dawn e, ka ti hmiah tawh mai. Thalaite inlungrualna hi veng chakna thahrui pawimawh ber a ni tlat si a.

Click here to download the full issue (SEPT. 07, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)