Branch YMA Zawipawl Intihsiakna, CYMA leh Zonet Cable TV tangkawp buatsaih chuan a vawrtawp a thleng chho mek. Sawi tawh angin he intihsiaknaah hian Branch hrang hrang atangin Zaipawl 36 an tel. Kan Branch chu intihsiak thawhkhatna tawp ni, Sept. 19, 2008 (Inrinni) khan kan zai a, Top 10-ah kan inhlangkai ve a. Intihsiak thawhhnihna chu Sept. 25 leh 26, 2008 khan neih leh a ni a; he intihsiak thawhhnihna atang hian a sang panga - Khatla, Chanmari W, Dawrpui Vengthar, Ramhlun S leh Nursery Veng Branch-te’n Final Round an lut leh a, hetah hian kan Branch chu a vanduai zingah telin Final kan thleng zo ta lo a ni. Final Round hi Sept. 30, 2008 (Thawhlehni) zanah neih a ni ang.
Kan Branch Zaipawl:
Branch thenkhat, hun rei tawh tak atangin Zaipawl nghet (Branch Standing Choir) neia lo intuai hriam tawhte zingah kan han tel ve a. Chutih laiin kan Branch Zaipawl-ah khan, tunhma lama zaipawl hla la zirho ngai hauh lo, Kohhran hrang hrang pali atanga kal khawm thalaite kan han infawmkhawm chawp a. Chuti chunga a titha zual Top 10 zinga kan han tel mai pawh kha a ropuiin, hma lam hun atana beiseina lian tak min siam saktu chu a ni ta phawt mai.
Kan Branch Zaipawl hian Final Round thleng chiah lo mahse, lawmman tangkafai Rs 5,000/- bakah certificate mawi tak an rawn hum haw a, hei ngawt pawh hi a ropuiin a duhawm tham khawp mai.
Branch Zaipawl tha tak kan neih theihna’na theihtawp chhuahtu member leh hruaitute zawng zawng bakah, kan Zaipawl hla zirte thingpui hmeh tuihnai tak min ngaihtuah saktu Pu C.Chuaukunga, Pu C.Hualthanga, Pu Jolly Newman leh Pu Saitluanga (Saitea) te chhungkaw chungah te, Intihsiaknaa Zaipawl member-te tha tichak tura intihsiakna hmun thlenga tawiawm tu te leh, lirthei min tumsaktu te zawng zawng chungah YMA, Mission Vengthlang Branch chuan lawmthu a sawi tak meuh meuh a ni.
Kan Branch Zaipawl member leh a hruaitu zawng zawng te u,In zai kha mawi kan tiin, in member-puite leh Mission Vengthlang mipuite bengah hi chuan in zai aia bengfah zawk zai dang a awm reng reng lo. Intihsiak thawhhnihna a ‘Turnipui kan dodai’ tih in sak phei kha chu a mawiin, intihsiak thawhkhatna leh a dawttu hun reilote chhunga in hmsawnna ropui tak kha kan lo hmu asin. ‘Thliten lo chhem an fawn dîm e,’ in han ti chho phei kha chuan Mission Vengthlang hi a chhem fawn a, in thlen chin leh in lawmman dawn lam ngaihtuah miah lovin kan thinlungah lawmman pakhatna kan lo hlan fel der che u a nia. Chu lawmman chu in tan eng ang chiaha hlu nge a nih kan hre pha lo naa, hei hi erawh chiang takin kan hria, kan thinlunga in hlutna hi tu Branch Zaipawl tan mah han hnehchhuh chi rual a ni lo.
VENG CHHUNG THUTHAR TAWI:
- Durtlang Hospital-a Eye-Camp neih mekah Pi Lalsiami w/o Pu F.Lalsanga leh Pi Laltlankimi c/o Pu V.L. Chhandama, Y Sec. te chu an mit zai sak an ni.
- Pi F.Lalropuii w/o Pu Lalramnghata, M Sec. chu a bawrhsawm deuh avangin In lamah enkawl mek a ni.
- Pu Saizama Sailo, M Sec. chu Aizawl Hospital-ah enkawl mek a ni.
- Dr. Zonuntluanga, M Sec. te chuan an fa 3-na atan fanu an nei thar.
- Pu Vanlalfela, A Sec., a pumpui zai a ni a. Greenwood Hospital-ah enkawl mek a ni.
- Pi Lalthlanzovi w/o Pu Ramchungnunga, A Sec. chu Grace Nursing Home-ah admit nawn leh a ni a, thisen unit 2 pek a ni bawk.
- Pu Zaliama, A Sec., BP sang avangin Durtlang Hospital-ah enkawl mek a ni.
- Pu Lalawmpuia, A Sec. te chuan a pahnihna atan Civil Hospital-ah fapa duhawm tak an nei thar.
- Nl Laltlanmawii d/o Pu R.Lalbiakenga, Y Sec. chuan Oct. 2, 2008 khian Tv Nicky Lalremruata, Tlangnuam veng chu Kohhran Hall-ah a nei dawn.
- Nl Vanlalruaii d/o Pu Phunkara, M Sec. leh Tv H.Lalbiakliana, Nursery veng chu Oct. 3, 2008 hian Nursery Kohhran Biak In-ah an inneih dawn.
- Pu Zorama te chhung chuan Lunglei atangin kan veng Dawrkawn, Y Sec.-a an In thar chhawng chung ber an rawn luahlut ta.
- Tv C.Lalrochhunga s/o C.Lalronunga, M Sec. chuan BCA 1st Division-ah a pass thar, kan lawmpui hle.
- Er. Samuel Ramdinthara, A Sec., kan Branch Executive Committee member chu Lunglei-ah sawn a ni.
FAM ROLUNG MUAL:
Hming: VANLALTLUANGAKum: 69
Kohhran: UPC
Thihni: Sept. 21, 2008. 07:00 PM
Vui Hun: Sept. 22, 2008. 12:00 N
Vuitu: Rev. C.Lalthlengliana
Pu Vanlaltluanga (Sena) hi Upa Challiana (L) leh Pi Lalbiakthangi (L) fa hmingkoh niin, 17th October, 1939 khan Chungtlang khuaah a piang a, unau pianpui 14 a nei. Kum 1963 April ni 10 khan Phuldungsei khaw nula Remthangi nen an innei a, fa paruk (mipa 4 leh hmeichhe 2) a nei a, tu 13 a nei bawk.
Chungtlang atang hian Rulpuihlim-ah an pem a, chuta tangin kum 1972 khan Mission Vengthlang-ah an rawn pem leh a. Amah hi pa kawm nuam, mi nunnem leh mi pawisawi hlau, Pathian tihmi, thil engkimah ‘Pathianin rem a ti ang em?’ ti zel thin mi a niin, a nula rimnaah pawh tawngtaina hun hmang zel khawpa tawngtai ngaina mi a ni bawk.
Chungtlang leh Rulpuihlima a awm lai atang tawhin theih ang anga Pathian rawngbawl tum tlat mi a ni a; KTP Branch Leader hial pawh lo ni tawhin, kum 1974 khan United Pentecostal Church (UPC) Kohhran-ah a lut a, a thih ni thlengin he kohhran-ah hian rinawm taka awmin Kohhran hruaitu pawimawh tak a ni.
Ni 21.9.2008 (Pathianni) Sunday School kal tura a insiam zo chu a pum a nawmsam loh avangin Aizawl Hospital, Mission Veng-ah an inentir a, hetah hian BP sang leh pumpui Ulcer a nei tih hmuchhuakin, na chhawkna leh damdawi ei turte an lo chawh hnuah In lamah an haw leh ta a. Mahse, Inah chuan a na chu zual lehin, nachhawkna pawhin a chhawk theih loh bakah, chawhnu inkhawm ban velah chuan a irhfiak a, zanriah a ei kham chuan a âwm chu tawt riau leh a khabe ruh kual chu na them thumin a hria a, a thlanfimte a tlak avangin a chhungte chuan an mut hahdamtir a. Chutia an inbuaipui reng chung chuan zan dar 7:00-ah a rawng a lo bawl sak thin Lalpa hnena chawl turin a lei taksa chu a lo chhuahsan ta a ni.
Pu Vanlaltluanga ruang hi tlaivarpui a nih hnuah ni 22.9.2008 chhun dar 12:00 khan In lamah Rev. C.Lalthlengliana’n vuina hunserh a hmang a. Thlanmual-ah Evan. Kawlluta’n thlahna hun hnuhnung a hman leh hnuin, Mission Vengthlang Thlanmual-ah vui liam a ni ta a ni.
No comments:
Post a Comment