Kum 21-na, Issue 35, SEPTEMBER 28, 2008

YMA ZAIPAWL INTIHSIAKNA ATANGIN HMASAWNNA KAN CHHAR

Branch YMA Zawipawl Intihsiakna, CYMA leh Zonet Cable TV tangkawp buatsaih chuan a vawrtawp a thleng chho mek. Sawi tawh angin he intihsiaknaah hian Branch hrang hrang atangin Zaipawl 36 an tel. Kan Branch chu intihsiak thawhkhatna tawp ni, Sept. 19, 2008 (Inrinni) khan kan zai a, Top 10-ah kan inhlangkai ve a. Intihsiak thawhhnihna chu Sept. 25 leh 26, 2008 khan neih leh a ni a; he intihsiak thawhhnihna atang hian a sang panga - Khatla, Chanmari W, Dawrpui Vengthar, Ramhlun S leh Nursery Veng Branch-te’n Final Round an lut leh a, hetah hian kan Branch chu a vanduai zingah telin Final kan thleng zo ta lo a ni. Final Round hi Sept. 30, 2008 (Thawhlehni) zanah neih a ni ang.

Kan Branch Zaipawl:
Branch thenkhat, hun rei tawh tak atangin Zaipawl nghet (Branch Standing Choir) neia lo intuai hriam tawhte zingah kan han tel ve a. Chutih laiin kan Branch Zaipawl-ah khan, tunhma lama zaipawl hla la zirho ngai hauh lo, Kohhran hrang hrang pali atanga kal khawm thalaite kan han infawmkhawm chawp a. Chuti chunga a titha zual Top 10 zinga kan han tel mai pawh kha a ropuiin, hma lam hun atana beiseina lian tak min siam saktu chu a ni ta phawt mai.

Kan Branch Zaipawl hian Final Round thleng chiah lo mahse, lawmman tangkafai Rs 5,000/- bakah certificate mawi tak an rawn hum haw a, hei ngawt pawh hi a ropuiin a duhawm tham khawp mai.

Branch Zaipawl tha tak kan neih theihna’na theihtawp chhuahtu member leh hruaitute zawng zawng bakah, kan Zaipawl hla zirte thingpui hmeh tuihnai tak min ngaihtuah saktu Pu C.Chuaukunga, Pu C.Hualthanga, Pu Jolly Newman leh Pu Saitluanga (Saitea) te chhungkaw chungah te, Intihsiaknaa Zaipawl member-te tha tichak tura intihsiakna hmun thlenga tawiawm tu te leh, lirthei min tumsaktu te zawng zawng chungah YMA, Mission Vengthlang Branch chuan lawmthu a sawi tak meuh meuh a ni.

Kan Branch Zaipawl member leh a hruaitu zawng zawng te u,In zai kha mawi kan tiin, in member-puite leh Mission Vengthlang mipuite bengah hi chuan in zai aia bengfah zawk zai dang a awm reng reng lo. Intihsiak thawhhnihna a ‘Turnipui kan dodai’ tih in sak phei kha chu a mawiin, intihsiak thawhkhatna leh a dawttu hun reilote chhunga in hmsawnna ropui tak kha kan lo hmu asin. ‘Thliten lo chhem an fawn dîm e,’ in han ti chho phei kha chuan Mission Vengthlang hi a chhem fawn a, in thlen chin leh in lawmman dawn lam ngaihtuah miah lovin kan thinlungah lawmman pakhatna kan lo hlan fel der che u a nia. Chu lawmman chu in tan eng ang chiaha hlu nge a nih kan hre pha lo naa, hei hi erawh chiang takin kan hria, kan thinlunga in hlutna hi tu Branch Zaipawl tan mah han hnehchhuh chi rual a ni lo.



VENG CHHUNG THUTHAR TAWI:

• Durtlang Hospital-a Eye-Camp neih mekah Pi Lalsiami w/o Pu F.Lalsanga leh Pi Laltlankimi c/o Pu V.L. Chhandama, Y Sec. te chu an mit zai sak an ni.
• Pi F.Lalropuii w/o Pu Lalramnghata, M Sec. chu a bawrhsawm deuh avangin In lamah enkawl mek a ni.
• Pu Saizama Sailo, M Sec. chu Aizawl Hospital-ah enkawl mek a ni.
• Dr. Zonuntluanga, M Sec. te chuan an fa 3-na atan fanu an nei thar.
• Pu Vanlalfela, A Sec., a pumpui zai a ni a. Greenwood Hospital-ah enkawl mek a ni.
• Pi Lalthlanzovi w/o Pu Ramchungnunga, A Sec. chu Grace Nursing Home-ah admit nawn leh a ni a, thisen unit 2 pek a ni bawk.
• Pu Zaliama, A Sec., BP sang avangin Durtlang Hospital-ah enkawl mek a ni.
• Pu Lalawmpuia, A Sec. te chuan a pahnihna atan Civil Hospital-ah fapa duhawm tak an nei thar.
• Nl Laltlanmawii d/o Pu R.Lalbiakenga, Y Sec. chuan Oct. 2, 2008 khian Tv Nicky Lalremruata, Tlangnuam veng chu Kohhran Hall-ah a nei dawn.
• Nl Vanlalruaii d/o Pu Phunkara, M Sec. leh Tv H.Lalbiakliana, Nursery veng chu Oct. 3, 2008 hian Nursery Kohhran Biak In-ah an inneih dawn.
• Pu Zorama te chhung chuan Lunglei atangin kan veng Dawrkawn, Y Sec.-a an In thar chhawng chung ber an rawn luahlut ta.
• Tv C.Lalrochhunga s/o C.Lalronunga, M Sec. chuan BCA 1st Division-ah a pass thar, kan lawmpui hle.
• Er. Samuel Ramdinthara, A Sec., kan Branch Executive Committee member chu Lunglei-ah sawn a ni.

FAM ROLUNG MUAL:
Hming: VANLALTLUANGA
Kum: 69
Kohhran: UPC
Thihni: Sept. 21, 2008. 07:00 PM
Vui Hun: Sept. 22, 2008. 12:00 N
Vuitu: Rev. C.Lalthlengliana

Pu Vanlaltluanga (Sena) hi Upa Challiana (L) leh Pi Lalbiakthangi (L) fa hmingkoh niin, 17th October, 1939 khan Chungtlang khuaah a piang a, unau pianpui 14 a nei. Kum 1963 April ni 10 khan Phuldungsei khaw nula Remthangi nen an innei a, fa paruk (mipa 4 leh hmeichhe 2) a nei a, tu 13 a nei bawk.

Chungtlang atang hian Rulpuihlim-ah an pem a, chuta tangin kum 1972 khan Mission Vengthlang-ah an rawn pem leh a. Amah hi pa kawm nuam, mi nunnem leh mi pawisawi hlau, Pathian tihmi, thil engkimah ‘Pathianin rem a ti ang em?’ ti zel thin mi a niin, a nula rimnaah pawh tawngtaina hun hmang zel khawpa tawngtai ngaina mi a ni bawk.

Chungtlang leh Rulpuihlima a awm lai atang tawhin theih ang anga Pathian rawngbawl tum tlat mi a ni a; KTP Branch Leader hial pawh lo ni tawhin, kum 1974 khan United Pentecostal Church (UPC) Kohhran-ah a lut a, a thih ni thlengin he kohhran-ah hian rinawm taka awmin Kohhran hruaitu pawimawh tak a ni.

Ni 21.9.2008 (Pathianni) Sunday School kal tura a insiam zo chu a pum a nawmsam loh avangin Aizawl Hospital, Mission Veng-ah an inentir a, hetah hian BP sang leh pumpui Ulcer a nei tih hmuchhuakin, na chhawkna leh damdawi ei turte an lo chawh hnuah In lamah an haw leh ta a. Mahse, Inah chuan a na chu zual lehin, nachhawkna pawhin a chhawk theih loh bakah, chawhnu inkhawm ban velah chuan a irhfiak a, zanriah a ei kham chuan a âwm chu tawt riau leh a khabe ruh kual chu na them thumin a hria a, a thlanfimte a tlak avangin a chhungte chuan an mut hahdamtir a. Chutia an inbuaipui reng chung chuan zan dar 7:00-ah a rawng a lo bawl sak thin Lalpa hnena chawl turin a lei taksa chu a lo chhuahsan ta a ni.

Pu Vanlaltluanga ruang hi tlaivarpui a nih hnuah ni 22.9.2008 chhun dar 12:00 khan In lamah Rev. C.Lalthlengliana’n vuina hunserh a hmang a. Thlanmual-ah Evan. Kawlluta’n thlahna hun hnuhnung a hman leh hnuin, Mission Vengthlang Thlanmual-ah vui liam a ni ta a ni.

Click here to download the full issue (SEPT. 28, 2008) in PDF file
(Note: PDF file chhiar turin "Acrobat Reader" or "Foxit" computer-ah a awm a ngai)

Kum 21-na, Issue 34, SEPTEMBER 21, 2008

CHHIATNI THATNI CHUNGCHANGA HMASAWNNA TUR SAWIHO

Nimin, September13,2008 khan Mission Vengthlang Presbyterian Kohhran, Social Front bultumin Chhiatni Thatni chungchang sawihona neih a ni. He Sawihona hun, Mission Vengtlang Presbyterian Kohhran Hall-a neihah hian a huaihawttute bakah YMA Mission Vengthlang Branch hruaitu te, Jubili Presbyterian Kohhran Social Front aiawh te, Shalom Baptist TKP, KTP Mission Vengthlang leh Jubili Branch te bakah, MUP Mission Vengthlang Unit hruaitu te leh MHIP Mission Vengthlang Branch hruaitu te, an vaiin mi 70 chuang an kal khawm a ni.

He sawihona hunah hian Pu C.Chuaukunga, Committee Member, Social Front, Mission Vengthlang Presbyterian Kohhran chuan paper present-in, “Tuna Mizo-te’n Chhiatni Thatni-a kan intawiawm thin dan hi hmanlai Mizo pi leh pute tlawmngaihna kan chhawm, Kristian-nain a thlitfim leh tawh a ni a, a mawiin a tha hle a ni. Mahse, veng leh khaw tina Kohhran pawl lo pung zel hian mahni Kohhran bil tih dan lak vawng lutukna lamah Chhiatni thatni bika kan inlungrualna a tichhe palh ang tih a hlauhawm ta hle. Engpawhnise, veng lungrual ni tur chuan Chhiatni Thatni bikah hi chuan Kohhran hrang hrang awm lova kan Kristian tlan zel hi a duhawm ber mai,” tiin a sawi hawng. Chhiatni Thatni-a veng chhung inenkawl dante a tarlan hnuah, sawihona hun tha tak hman a ni.

He Joint Meeting-ah hian zalen taka pawl hrang hrang aiawh kal khawmte’n Chhiatni Thatni-a veng lungrualna tur thil thate an sawiho hnuin kan kal zel dan turah rawtna thenkhat an siam a, chu’ng an rawtna siamte chu lo zir chian leh bawhzui turin VC, YMA leh veng chhung Kohhran hrang hrangah te thlen nise, tiin meeting hi an intin ta rih a ni.


ZAIPAWL INELNAAH KAN ZAI TA
Nimin CYMA leh Zonet Cable TV tangkawpte buatsaih, Branch YMA Zaipawl Intihsiak thawh 1-na (Elimination Round) tawp ni-ah kan Branch Zaipawl pawh an inbuatsaihna angin tha takin an han zai. Zaipawl Intihsiakah Branch tel tura hming pe 66 zinga 36 chauhin intihsiakna hi an bei a ni. Intihsiak thawh 1-naah hian kan Branch chu a zai hnuhnung ber kan ni naa, result lamah erawh a hnuhnung pawl kan nih loh beiseina kan nei lian hle. Kan Branch Zaipawl converner Pu C.Zosangliana paw’n an zai zawh TV interview-ah,”Kawl a êng khawp mai,” tiin veng mipuite beiseina a chhem nung hle.




VENG CHHUNG THUTHAR TAWI:

• Pu Lalrotawma, Y Sec. chu hritlang âwmna avangin kar khat chhung zet office kal thei lovin In lamah enkawl a ni.
• Pi Rinmawii c/o Pi Hmingkhumi, Y Sec. chu zuntlum avangin Aizawl Hospital-ah enkawl mek a ni.
• Np Mary Malsawmtluangi d/o Pu Lalkunga (LK-a), Y Sec. chu âwmna avangin Aizawl Hospital-ah enkawl a ni.
• Pu B.Rangkhuma f/o Pu B.Thangrikhuma, Y Sec., asthma avanga Civil Hospital-a awm chu dam takin a lo chhuak.
• Pi Thuamkungi w/o Pu V.L.Faka Hnamte, Y Sec. chu Civil Hospital-a ruh-na zai a nih hnuin a lo chhuak.
• Pi Lalhmingzami w/o Pu C.Lallunghnema, M Sec., hnar dâwt fel lo, Guwahati-ah zai sak a ni.
• Np Lalchhanchhuaha (Thabawihtea) s/o Pu Zobela, M Sec., khawsik leh pumna avangin In lamah enkawl mek a ni.
• Np Lalrinhlui d/o Pu Lalhmangaihzuala (Atea), M Sec. chu Care Hospital-ah enkawl mek a ni a; a chauh deuh avangin nimin lam khan thisen unit 7 pek a ni. A blood group hi AB+ a ni a, Blood Bank-ah stock a awm loh avangin veng chhung thalai, blood group AB+ neite chu tul palh thulhah i lo inring deuh ang u.
• Pi Laltlanzovi w/o Pu Ramchungnunga, A Sec. chu damdawiin atangin a rawn chhuak.
• Pu Lalrinmawia, A Sec. te chuan fanu an nei thar.
• Pi Zaikhumi w/o Pu C.Lalhmangaiha (L) te chhung chu Central Jail Veng atangin an mahni In, Y Sec.-ah an rawn insuan lut.
• Pu H.Lianchhinga, M Sec. te chhung chu a In luah lai atangin Tv R.Lalfakzuala te In sak thar, M Sec. (Bethani)-ah an insawn lut.
• Pu R.K.Lungmuana, A Sec., kan Branch president hlui chu a hnathawhna lamah Functional Manager-ah a kaisang a, DIC, Aizawl-ah a awm dawn.
• Pu C.Thansiama, A Sec. Committee member chu Church of God (7th Day) pastor atana lak thar niin, tunah Champhai-ah a thang mek.
• Nl Hmingthanzuali (Azuali) d/o Upa C.Hmingthanga, A Sec. chu a zirna hmun, Hyderbad-ah a liam thla leh ta. Ani hi Ph.D. research bei lai a ni.
• Pu Lalropuia s/o Pu Vanruma, A Sec., Assam Regiment-a tanglai chu India aiawha UN Peacekeeping Force hna thawk turin Rep. of Congo (Africa)-ah a kal dawn.
• Tv John Lalnunhlima s/o Pu Lalriliana, A Sec. chu tun hnaia Mizoram University M.Sc. (Botany) result chhuakah 1st class-ah pass-in, MU-a Gold Medalist a ni. Hetiang zirlai thiam chungchuang, veng chhung chhiat thata mi tangkai pawl tak ni bawk si kan nei hi kan chhuangin, kan lawmpui tak zet zet a ni.
• A Sec. chu Sept. 17 leh 19, 2008 khan Section sum tuakna’n Secretariat insawnnaah an hnatlang a, member 15 thawkchhuakin Rs 1,500/- zet an hlawh. Hnatlang hruaina taxi thawhtu Tv Vanramthanga leh member hnatlangte chungah Section hruaitute an lawm hle.
• Kar hmasa Pathianni khan kan veng chhungah scooter (MZ 01-9092) document tihbo a ni a. A chhar chuan Asangi Dawr, Dawrkawn-ah dah nise a lawmawm hle ang.

ARTICLE: ENTAWN TUR THA A AWM EM?
C.Lalremruata, A Section

August 29, 2008 khan Bethlehem venga kan chhungte chhiat tawhnaah ka kal ve a, chuta ka thil hmuh leh hriatte tlem azawng han tarlan pahin kan tih dan inang lo leh tih dan tha zawk a awm thei em tihte in thlirho mai mai teh ang.

Kan veng leh veng thenkhatte tih dan ang lo takin zan thum YMA-in hun an hman chhung hian thingpui an sem miah lo a, hei hian khawhar chhungte phurrit engemawzat a chhawk zangkhai bakah, thingpui buaipuia nula leh tlangval engemaw zat buai tur kha a pumpelh tir hmiah mai a, kan veng-ah hian tih ve chi ni tak maw? Mitthi (kuang) thlalakpui chungchangah vawi 15 aia tam thlalak awih a ni lo bawk. Hei hian mitthi vui tura kalte leh mitthi chhungte hun leh sum nasa takin a ‘save’ ngeiin a rinawm. Chu bakah, thlalak chhungin Kuang bula pangpar zap teuh hi an ti ve lem lo ni awm tak a ni. Hemi ni, Aug. 29, 2008 pawh hian Kuang chungah pangpar buk mawihnai angreng tak pakhat an dah tih loh chu Kuang bul leh hma lamah pangpar an zap ve dul lo a, thlalak erawh a felfai zawk phianin a rinawm tlat (mitthi khan pangpar a dawng tam lo tihna erawh a ni hauh lo). Hei pawh hi kan veng tan entawn tlak tak niin a lang. A thu hrimah, mitthi pangpar (siamchawp lehnghal) kan inpek dan em em hi chu, a lutuk deuh em aw? tih hi ngaihtuah tham a tlingin, lainat hauh lova sawi phei chuan pangpar siamchawp kan inpek tam tak hi chu mitthi chhungte tana tangkaina nei lo leh hnawksak mai a nih theihna lai a awm zawk hial a ni. Pangpar siamchawp pakhat hi cheng 200/300 man velte a ni a. Heti a nih chuan pangpar tam tak kan inpek ai hi chuan a tlukpui pawisa faia inpek mai hi mitthi chhungte tan chuan a hluin a tangkai zawk hial awm asin.

Thlanmual pan kawngah mitthi kuang chu tawlailir-in an nawr a. Thlanmual tawntirhah thalai rualte kawng sirah lo intlarin, kuangin Thlanmual a thlen veleh Kuang nawrtute chu lo chhawk nghalin, Thlan thlengin an zawn nghal a. Khatiang anga thalai lo intlar zingah khan nula pawh 10 atanga 15 vel zet chu an tel ve tlat nia! Chutih laiin kan veng-ah chuan tlangval thlan laite chuan an mahniin thingpui an inlum chawp a, tlangval bawkin an sem thin. A tha zawk ka hre chiah lo na a, an veng tihdan hi chuan min ti rualawt deuh chu a ni. Mahse, hetia ka sawi avang hian kan veng hi a changkang ta lo riau leh nuam lo ta riauah ka ngai tihna erawh a ni hauh lo thung.

Thalaite mitthi lumennaa an awm dan, a bikin faina chungchang hi han tarlan leh lawk thain ka hria. Kan veng angin khawhar Inah bawlhhlawh bawm an chhawp ve lem lova (bawlhhlawh bawm chhawp hi thil tha tak phei chu a ni, a hnu lama seng khawm leh a buaithlak deuh mai pawh a). Tui in tur erawh kan veng ang hian an chhawp ve thluah tho mai. Kan tluk lohna ni a lang chu, zing khawvarah, In chhungah bawlhhlawh leh thil hnawk hmuh tur a tlem khawp mai. An Bawlhhlawh: kuhva funna/sweet kawr etc. te chu an ipteah an ak mai niawm tak a ni?

Tin, zankhua a zai tlaivar a nih avang erawh chuan zunram thiar chungchangah leh Kawng kham/Mawng kham chungchangah hriselna a inchen loh avangin harsatna awm thei a ni. Mi engemawzat chhuak mahse khawhar Inah thutthleng a ruah phah chuang lo tlat mai! Engtinnge an tih le? tih chu ka thlithlai reng pek a. An tih dan chu, mi 4/5 chhuak mahse midang, an aiawh tur an rawn luh nghal thuai thin vang mai a lo ni. Hemi kawngah pawh hian kan veng thalaite, a bikin nula leh tlangvalte hian entawntur kan neiin a lang.

He thu hi kan veng tihdan tha ti tho siin, mi veng tih dan atang hian hmasawnna chhar belh tur kan hmuh tak hlauhin tih thu hlaah ka’n rawn ziak ve mai mai a ni.

Click here to download the full issue (SEPT. 21, 2008) in PDF file
(Note: PDF file chhiar turin "Acrobat Reader" or "Foxit" computer-ah a awm a ngai)

Kum 21-na, Issue 33, SEPTEMBER 14, 2008

BRANCH YMA ZAIPAWL THA BER NI TURA INBUATSAIH CHHOH MEK A NI

Zonet Cable TV leh Central YMA tangkawpte buatsaih, Branch YMA Zaipawl Intihsiaknaa tel tura kan Branch Zaipawl inbuatsaihna chuan a vawrtawp a thleng chho mek. Tunah hian hla sak tur thlan bik 4-te chu an thiam nal tawh hle a, hla zir hunbi pangngai an duanlawk angin ngawrh tak leh lungrual takin an zir chho mek a; tunah chuan intihsiak pawh an cho ta hle.

HLA SAK TUTE: Zaipawl Intihsiaknaah hian he’ng hla thlan bik 4-te hi inelna’n hman tur a ni:

• Tur Nipui Kan Do Dai - Rokunga
• Sem Sem Dam Dam - B.Bawlkhuma
• Rualtin Khumtu YMA - V.Thangzama
• Parmawi Thang Vulna - Liandala

He Zaipawl Intihsiaknaah hian Branch hrang 66-in tel turin hming an thehlut a ni.
INTIHSIAK DAN TUR: Intihsiak thawh 1-na (Elimination round) hi Sept. 17-20, 2004 chhungin neih tur a ni. He intihsiak thawh 1-na, ni li chhunga nitina zai turte hi thum vawra zawn a ni a, kan Branch chu intihsiak thawh 1-na tawp ni, Sept. 20, 2008 (Inrinni) hian kan zai dawn a ni.

Intihsiak thawh 1-naah hian Branch zaipawl tinte hian intihsiakna tur hla 4 atanga an duh ber (Hla chuam) pakhat leh, hla dang pathum atanga hla pakhat khat pawh theuh hmangin an inel ang a, thawh 1-na atang hian Branch titha zual 10 (Top 10) thlanchhuah an ni ang.

TOP 10 INELNA: Intihsiaknaa tel Branch-te zinga a tihtha zual 10 chu intihsiakna hla 4 zinga pakhat pawtin an inel leh ang a, Branch 10 zing atang hian a titha zual 5 (Top 5) thlan chhuah leh an ni ang.

TOP 5 INELNA: Hei hi chu a titha fal Branch 5-te inelna a ni satliah mai dawn lova. Branch zaipawl thiam ber zawnna (Final Round) a nih nghal tawh dawn avangin inelna pawh uluk bik a ni dawn a, Top 5 Branch-te hian hla 4 zinga an duh ber (Hla chuam) leh intihsiakna kal tawha an la sak loh hla pakhat theuh hmangin an inel leh dawn a ni. Top 5 thlenga tel chho Branch-te chuan zaipawl intihsiak chhung hian intihsiakna tur hla thlan chhuah 4-te hi an sak kim vek a tul dawn a ni.

KAN BRANCH INPUAHCHAH DAN: Kan Branch Zaipawl inpuahchahna hian a vawrtawp a thleng tawh a ni, ti ila, pawn lam atanga an hla zir boruak han thlir leh, an zai han ngaihthlak mai chuan thil sawi awm loh a ni tawh kher lovang. Mahse, zaipawl member-te leh a hruaitute hian an uluk em a, mawi leh tha tawk viaua kan hriat hnuah pawh tha lehzual, bel lehzual leh mawi lehzual turin an cheimawi chho zel. Nimin Inrinni chhun khan vawiina Naupang Inkhawmpui lo awm tur atana inbuatsaihnaah kan zaipawl member-te hi mi pawimawh tak tak an nih avangin hla an zir lo va. Tun kar chho, Thawhtanni zan atang hi chuan zan tin Inkhawm ban apianga hla zir ziah turin an inruahhman tawh a ni.

KAN TEL VE DAWN EM?: Zaithiam ni ve kher lo tan pawh, kan veng aiawh Branch Zaipawl inbuatsaihnaah hian pawimawh leh hlu deuha tel ve theih dan a awm a nia. Chu chu hriain, Tv Saitluanga (Saitea), M Section paw’n Zirtawpni zan khan hla zirte thingpui hmeh tui tak a rawn ngaihtuah sak a, member-te an lawm hle.

UNIFORM: Zaipawl thawmhnaw inang (uniform) hak hian zai thiamna thlen kher lo mahse, member-te leh veng lungrualna lantir turin kan Zaipawl member-te hi uniform mawi leh felfai tak hak tir ngei hi Branch hruaitute duh dan leh tum dan a ni.



VENG CHHUNG THUTHAR TAWI:

• Pu Lalramliana, Y Sec. chu thingzaiin a kephah ruh a delh auh avangin In lamah enkawl mek a ni.
• Pi Laltlanthangi, Y Sec. (Dam phei) chu pumna avangin In lamah enkawl mek a ni.
• Pi C. Zomuanpuii w/o Pu R.Vanlallawma, Y Sec. chu pumna avangin In lamah enkawl mek a ni.
• Pu H.Lalzuala, Y Sec. chu khawsik leh hritlang avangin In lamah enkawl mek a ni.
• Pi Lalsiami w/o Pu Lalhmachhuana, Y Sec. chu Greenwood Hospital-ah a mit-a lungte awm zai a ni.
• Kan Editor, Pu Lalremthanga, M Sec. chu tluk sual palh avangin a banrek ruh tina a, an tuam khawng sak.
• Pu Zorema Pauchau, Y Sec. te chuan fanu an nei thar.
• Pi Zairemi w/o Pu F.Lalrochunga, M Sec., hmeichhe lam that lohna avangin zai a ni.
• Pu F.Lalchama, M Sec., thisen zam fel loh avanga Civil Hospital-a enkawl chu In lama enkawl zui turin a lo chhuak.
• Pu C.Rochungnunga, M Sec. Treasure chu khawsik avangin In lamah a inenkawl mek.
• Upa Zalianthanga, A Sec., thawhah vanga Durtlang Hospital-a enkawl chu In lamah enkawl zui turin a lo chhuak.
• Nl Jamie Zodinsangi d/o Pu Rongura Hrahsel, Y Sec. chuan M.A. (Eng.) chu Mizoram University atangin 1st class-ah a pass.
• Pu R.Zakhuma, Y Sec. chuan phone no. 2310848 a nei thar.
• Pu C.Vanlalenga te chuan Kawltheihuan atangin Pu R.Zasiama, Y Sec. te In an rawn luahlut.
• Pu Chhangkunga te chhung chu Pu Lalhmahruaia, Y Sec. hnen atangin In hnuai lamah an inbawl hrang ve ta.
• Tv Saitluanga (Saitea) s/o Pu Lalzuiliana (L), M Sec. leh Nl Zohmingthangi (Ma-i) d/o Pi Lalzuichhungi, Y Sec. te chu Sept 19, 2008 (Zirtawpni) hian MVT Presbyterian Kohhran Hall-ah an innei dawn.
• Pu Lalsangkima, M Sec. chu a hnathawhna Kolkata atangin chawlh hmangin a rawn haw. Amah Assam Regiment-a thawk lai a ni.
• Tv F.Lalrawngbawl leh Tv Ramkalsiama, A Sec. te chuan Pi Laltlanzovi w/o Pu Ramchungnunga thisen an pe.
• Tv R.Lalhmangaihzuala s/o Pu R.Rokhuma, A Sec. leh Tv C.Lalzuitluanga s/o Pu C.Thuamliana, M Sec. te chuan XIth Mizoram Taekwondo Championship, 9-12 Sept., 2008 chhunga neihah Gold Medal an la.
• Pu Lalremmuana, Addl. SP, Kolasib Dist. chu Addl. SP, Security turin rawn sawn chhoh a ni. Amah hi kan Branch hruaitu pawimawh leh Zonunmawi chanchinbu-ah pawh Editor hna tlin taka lo chelh tawh thin a ni.
• CHHUANAWM: Pu Lalthanzuala Ralte, Y Sec. chuan Indian Institute of Technology (IIT), Delhi atangin Master of Technology (Construction Engineering & Management) a rawn zo ta nawlh mai. An zirnaah hian 78% (7.8/10) hmuin, an batch-ah 2-na a ni bawk. He thiamnaa Mizo master degree nei hmasa ber leh awmchhun a ni. A thil zir leh a tangkaina te hi mipuite hriatthiam leh chhawrbawk phak tawka min la hrilhfiah ngei hi Zonunmawi Editorial Board-te beisei leh duhthusam a ni.
• Kan veng mi, Police hna lak thara tling kan hriatte:

• ASI (Ministerial)

• Chawngsangzuala s/o C.Thuamluaia (L), Y Sec.
• Aldrin Ngurhmingliana s/o Laldingliana Sailo, A Sec.

• 5th IR Battalion Constable

• Laltharmawia s/o R.Lalhmingthanga, M Sec.
• Lalchungnunga s/o R.Dara, A Sec.
• Laltlanthanga s/o Zonghingliana
• Lalhruaitluanga s/o R.Lalbiakenga, Y Sec.
• C.Vanlalhimpuia s/o C.Vanlalzika (L), Y Sec.
• Lalruatfela s/o C.Hmingthanga, A Sec.
• Lallawmsanga s/o Lalramliana, Y Sec.
• Zirsangliana s/o K.Vanlalngheta, Y Sec.
• David Lalmuankima s/o Rodingluaia, M Sec.

FAM ROLUNG MUAL:
Hming: H. LALRAMMAWIA
Kum: 53
Kohhran: Presbyterian
Thihni: Sept. 07, 2008. 03:20 AM
Vui Hun: Sept. 07, 2008. 01:00 PM
Vuitu: Rev. Dr. Lalsawma

Pu H.Lalrammawia hi November 5, 1955 khan Pu Doliana leh Pi Lalkungi te inkarah Chhawrtui khuaah a lo piang a. An unau hi 13 niin, mipa 5 leh hmeichhia 8 an ni a, a unau pianpuite zinga mipa 1 leh hmeichhia 2-in an lo boral san tawh a ni. An khua, Chhawrtui atang hian kum 1969 khan Mission Vengthlang-ah an rawn pem lut a. Kum 1978 khan Nl Darmawii nen inneiin, an nupa hian fa 4, mipa 1 leh hmeichhia 4 an nei a ni. A fapa neihchhun Tv Lalchhandama phei hi chu kan Branch member tangkai leh Branch Executive Committee member ni lai a ni nghe nghe.

Pu H.Lalrammawia hi a phak ang tawka Pathian leh Kohhran bel tlat mi a ni a. Kum 1975-a Pathiana lawmna thar a neih hnu phei chuan Pathian biak inkhawm pelh ngai lo mi a ni. Tunah hian Jubili Presbyterian Kohhran-ah Inrinni zan tantu leh Kristian Chhungkaw Committee rawngbawlna chelh mek a ni.

Kum 2006 kum tir atang khan a natna tak sawi chian theih si lovin a hriselna a insawisel tan a. Hun engemaw chen In lama an inenkawl hnuah that lam a pan theih meuh loh avangin Sept. 20, 2007 khan Aizawl Hospital-ah admit-in, Pathian leh doctor-te enkawlna zarah Oct. 18, 2007 khan dam takin a lo chhuak leh a. Chutia hun engemaw chen dam tak leh hna tul ang angte thawk theia a awm leh hnu, July 2008 khan a natna hian a rawn tibuai leh avangin Aug. 12, 2008 khan Aizawl Hospital-ah vek hian admit leh a ni a. Heta tang hi chuan a natna hian ziaawm lam a pan thei ta meuh lo a ni. Hetia natna khirh tak a tawrh lai pawh hian a riltu erawh a fimin, a thlamuang hle a. A chhungte hnenah, “Pathianni-ah dam takin ka lo hawng ang,” tia a lo sawi lawk ang ngeiin Sept. 7, 2008 (Pathianni) zing dar 3:20 khan Chatuan Ram min lo pan san ta a, a taksa erawh chu natna tihbuai phak rual lohvin a chenna In-ah a lo haw leh ta a ni.

Pu H. Lalrammawia ruang hi Sept. 7, 2008 chhun dar 1:00 khan In lamah Rev. Dr. Lalsawma’n vuina hunserh a hman hnuin, thlanmualah Upa Zoramthanga Royte-in thlahna hun hnuhnung a hmang a, Mission Vengthlang thlanmualah vuailiam a ni ta a ni. Lungsun chhungte Mission Vengthlang Branch chuan a tuarpui takmeuh a ni.

Click here to download the full issue (SEPT. 14, 2008) in PDF file
(Note: PDF file chhiar turin "Acrobat Reader" or "Foxit" computer-ah a awm a ngai)

MISSION VENGTHLANG THLALAK

LUNG TILENGA'N

KAN VENG BASKETBALL COURT THAR:

Kum 21-na, Issue 32, SEPTEMBER 07, 2008

MISSION VENGTHLANG YMA EXECUTIVE COMMITTEE THUTKHAWM VAWI 9-NA THUREL

Kumin chhunga YMA, Mission Vengthlang Branch Executive Committee thutkhawm tum 9-na chu YMA Hall-ah tluang taka neih a ni. Tun tum thutkhawm hi Presbyterian leh Baptist Kohhrante’n Beihrual an hman avanga zan awl a awm theih loh avangin zing dar 6:00-ah tan a ni. Thurel leh report pawimawh, member-te hriat tlan awm chi han tarlang ila:

1. Basketball Court Tihchangtlun: Kan Basketball Court thuam phuisui lehzualna tur Sport Council chuan Rs 1,99,990/- min pe. Basketball Ring leina atana kan senso khuh turin Sports Directorate-in Rs 6,300/- min pe bawk. Hei baka lawmawm tak tak la awm chu Basketball Court hmar lam hungna tur Angle Iron ban 22 zet Agri. & Fisheries Deptt. Director chuan min pe a, a hungna tur Goatproof Wire Mesh (Kel pal) min ngaihtuah sak mek bawk. Hengte pawh hi kan la dawng cheu: NSS, Aizawl College atangin Rs 10,000/-; NSS, Republic Higher Secondary School atangin Rs 10,000/- leh; NSS, Synod Higher Secondary School atangin Rs 6,000/-, a vaiin Rs 26,000/-. Heng, NSS Unit hrang hrang atanga kan sum hmuhte hmang hian Zun In leh infiammite inthlakna pindan tha tak siam tum a ni.

2. MPF, Mission Vengthlang Local Forum-a Branch YMA aiawha tel turin Pu R.Vansanga, M Section leh Pu Lalramthanga, Y Section-te ruat an ni.

3. Hall Kawngkhar: Kar hmasa lama kan rawn tarlan tawh, Market Building chunga Hall luh chhohna kawngkhar chu Branch Committee member-te’n a hmuna kala an ngaihtuahho hnuah Rolling Shutter pahnih hmanga kawngkhar hi siam nise tiin an rel. Tunah hian kan Hall thar hi a bang chhung leh pawn bakah, a chhuat pawh plaster zawh vek tawh a ni. Rawng hnawih leh Tukverh darthlalang vuah hi hna pawimawh la awm chu a ni ta deuh mai.

4. YMA Hall Chung Rawng hnawih: YMA Hall, Tlang Veng pan chhohna ami zawk hi a chung rangva a tuiek nasat deuh tawh avangin ruahtui hul deuh hun, October thla velah a chung hi rawng nalh taka hnawih nise tih rel a ni bawk.

5. Gas sem chungchang: Tunlaiin eirawng­bawlna gas a vangin, a la tur chuan zankhua khuaa nghah te pawh a ngai hial thin. Veng chhungin rualkhai leh kan mamawh tawk ang theuh, awlsam zawka kan lak tlan theihna a nih beiseiin kan OB-te’n ruahmanna an rawn siam dawn a. A tul angin Section hruaitute’n mahni Section theuhah an lo bawhzui ang.

6. Branch Committee apianga hun thin, miharsate tanpuina bâwm-ah Rs 360 a tling khawm.



VENG CHHUNG THUTHAR TAWI:

• Pu H. Rodinga, Y Sec. (Dam) te chuan fapa duhawm tak an nei thar.
• Rev. Lalhluma Sailo, M Sec., Durtlang Hospital-a a mit-a lungte awm zai chu rawn chhuakin, In lamah enkawl mek a ni.
• Pu Lalrotluanga (LR-a), M Sec. chu Civil Hospital-a hun eng emaw chen enkawl a nih hnuah remchan zawkna avangin, damdawi In hnai zawk Kulikawn Hospital-ah enkawl chhunzawm a ni.
• Tv Andrew Lalthianghlima s/o Pu Lalremsiama, M Sec. chu Aizawl Hospital-ah enkawl mek a ni.
• Pu H.Lalrammawia, A Sec. chu kawngchhung lam fel lo avangin Aizawl Hospital-ah enkawl chhunzawm zel a ni.
• Pi Lalthlanzovi w/o Pu Ramchungnunga, A Sec. chu Nazareth Hospital-ah enkawl mek a ni.
• Upa Zalianthanga, A Sec. chu lungna avangin Durtlang Hospital-ah enkawl mek a ni.
• Pu Sangkhawnghina, A Sec., thawhah avanga Durtlang Hospital-a enkawl chu a lo chhuak.
• Nl Mary Lalhmangaihsangi d/o Pu C.Thanthuama, A Sec. chu nurse hna zir turin Patna (Bihar) lamah a liam ta.
• Vantlang Mike enkawlna tur chu Section hruaitute’n chhung tin hnenah an rawn khawn dawn a. Rs 10/- lo thawh theuh turin i lo inring lawk ang u.

KAN BRANCH ZAIPAWL-IN HLA AN ZIR NGAWRH

Branch YMA Zaipawl Intihsiakna lo awm tura kan Branch Zaipawl-te inbuatsaihna chuan a vawrtawp a thleng chho mek . Nimin khan YMA Hall-ah chhun dar 11:00 atangin hla an zir a, tlai lamah hlim takin zanriah an kilho nghal. Tunah chuan an hla zirte an thiam tawhin, kan hruaitute beisei pawh a sang khawp mai. Sawi tawh thin angin kan Branch zaipawl member-te hi Presbyterian Kohhran zaipawl Intihsiaknaa 1-na lo la tawhtu Mission Vengthlang Presbyterian Kohhran Zaipawl member-te, Aizawl khawpui huap Baptist Kohhran zaipawl intihsiakna a 1-na hauhtu Shalom Baptist Kohhran, Mission Vengthlang leh, Kohhran dang dang atanga zaipawl member tha tak tak fuankhawm an ni a, kan lo beisei sang deuh anih pawhin tu dem chi kan ni êm lo’ng chu maw! Hei mai a la ni hlei nem, kan Branch Zaipawl hi Mizoram pum huap Presbyterian Kohhran Zaipawl Intihsiakna-a Conductor tha ber (Best Conductor) lawmman lo dawng tawh, Tv F. Lalrinawma’n a ho leh nghal mawle. Zonunmawi Editorial Board chuan lawmman kan dawn leh dawn loh tur kan ngaihtuah lo, tun hma lama hla la zirho ngai lo, Kohhran hrang hrang thalaite’n lungrual taka hla an han zirho ringawt pawh hian veng inpumkhat lehzualna a thlen ngei dawn e, ka ti hmiah tawh mai. Thalaite inlungrualna hi veng chakna thahrui pawimawh ber a ni tlat si a.

Click here to download the full issue (SEPT. 07, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)