Kum 23-na, Issue 03, FEBRUARY 20, 2010

YMA MISSION VENGTHLANG BRANCH EMERGENCY MEETING NEIH A NI

February ni 18, 2010 (Ningani)) zing khan YMA Mission Vengthlang Branch chuan THP Hall-ah Emergency meeting a nei. Meeting hi Pu Kaisangzuala President-in a kaihruaia Committee member 25 an kal, Chairmanin Pathian hnena tawngtaina a neih zawh ah meeting koh a nih chhan leh Agenda mi harsa In sak chungchang sawi hawnna a nei a. Thurel tan a ni.

MI HARSA IN SAK:
YMA in Mi harsa In an sak nan Pu P.C. Lalnunmawia M Sec. chuan a ram A Sec. a mi chu hman hawh a phal a, YMA chuan lawmawm a ti tak zet a ni. Central YMA-in kum 75-na Platinum Jubilee lawmnan Branch te’n a theih chuan mi harsa In sak sak nise ti a Branch hrang hrangte a ngen leh Section kum 25-na Silver Jubilee lawmna ni bawkin mi harsa In hi sak ngei nise tih a ni.

Branch Executive Committee meeting-in a lo rel tawh angin Office Bearers hmalakna leh tanpuina hmuh tawh dan Branch Secretary Pu Lalhmingmawia’n a report a, hetiangin: mi inphalte thawh khawm sum fai Rs 29,020/- hmuh tawh a ni a, Pu Lalthangliana Murray chuan chartin 30 leh Char char 10 a rawn pe bawk. Tin, Home Minister Pu Lalzirliana’n Rangva bundle 4 a rawn pe bawk a; YMA chuan thilpek petute chungah lawmthu a sawi tak meuh meuh a ni.

Meeting chuan In sak hnatlang hi February ni 20, 2010 (Inrinni)-ah neih nise a ti a, Branch leh Section Committee member zawng zawngte hnatlang tura ngen leh hriattir kan ni. Ni khatah In hi sak zawh nghal a nih theih nan, hnatlanga thawh hum hum theihloh chi ban zawm leh phun, a hmun tlem laih zawl hna chu Feb. ni 19, 2010 (Zirtawpni) ah hlawhfa tlem ruaiin lo thawh lawk nise tiin a rel bawk.

REPORT:
(1) Branch Committee hmasa lama lo rel tawh angin THP Hall-a hman tur Dawhkan lian, Lectern leh Chair 6 chu siam zawh a ni a, a awmna turah dah fel thlap a ni ta.
(2) Er. Lalthanzuala Ralte, Y Section (Branch Committee member) chuan YMA-te a tula an hman turin Mini-Inverter a rawn pe a. Branch chuan a chungah lawmthu a sawi e.





VENG CHHUNG THUTHAR TAWI:

• Pu Lalnuntluanga s/o Pu H. Thanhlira, Y Sec., a chetsualnaah a nakruh 2 a tliak a, in lamah enkawl a ni.
• Pu C. Lalziaka, Y Sec., zuntlum vangin Aizawl Hospital-a enkawl mek a ni.
• Nl. Krosi c/o Pu Lalriliana, Y Sec., accident, In lamah enkawl a ni.
• Pi Thangluaii w/o Pu C. Rothianga, M Sec. a tluknaah a ban ruh a tliak a, in lamah enkawl a ni.
• Pi Zokimi, Y Sec. chuan a pakhatna a tan fapa a nei thar.
• Pu Lalrinawma, Y Sec. te chuan a pakhatna atan fapa an nei thar. Naute nu hi khawsik avangin Kulikawn Hospital-ah enkawl mek a ni.
• Pu Lalfakzuala, M Sec. te chuan a pakhatna atan fanu an nei thar.
• Pu Lalengkima, A Sec. te chuan a pakhatna atan fapa an nei thar.
• Tv. Lalchhandama s/o Pu Zairemthanga, A Sec., damlo, In lamah enkawl mek a ni.
• All India Civil Service T.T. Tournament 2009-2010 khel turin Pu K. Lalbiakvela, Y Sec., Pu Zorema, Y Sec., Pu Sailoliana, Y Sec., Pu PC Lalrinpuia, M Sec. leh Pu K. Lalhmingsanga, M Sec. te chu thlan an ni.
• Mission Vengthlang UPC (NEI) chuan Feb. ni 18, 2010 (Ningani) khan an Kohhran Golden Jubilee an lawm.
• Pu Victor Lalbiakmawia, Y Sec. te chhung chu a hnathawhna hmun, Kolkota-ah an chhuk leh ta.

FAM ROLUNG MUAL:

Hming : LALTHANTLUANGI
Kum : 91
Kohhran: Presbyterian
Thihni: Feb. 14, 2010, 10:30 PM
Vui Hun: Feb. 15, 2010, 12:00 PM
Vuitu:     Rev. K. Lungmuana
Section: A Section

Pi Lalthantluangi hi Pu Selthangvunga (L) leh Pi Zakili(L) te fa panga zinga upa ber niin March ni 14, 1919 khan Thakthing tlangah a lo piang a, an unau hi mipa 3 leh hmeichhia 2 an ni. Mission Veng-ah seilianin, hun eng emaw chen an awm hnuah Hmunsam-ah an pem a, Heta an awm lai hian Pu Lakchhuaha (L) Mission Veng nen inneiin fa 8, mipa 2 leh hmeichhia 6 an nei.

Kum 1960 khan Aizawl-ah lo pem lehin Republic Veng-ah an khawsa a, kum 1968-ah tuna an awmna Mission Vengthlang-ah hian an rawn awm nghet ta a ni. Pi Thantluangi hian tu 23 leh tuchhuan 21 neiin, khup thum a hmu a ni.

Mi hrisel, harh vang leh thenrual kawm thiam tak a ni a, mi hlim thei tak a ni. Pathian tih mi, Kohhran inkhawm leh zai khawm nuam ti mi a ni a, a vanglai hun tam tak Kohhran leh khawtlang rawngbawl nan a lo hmang tawh a ni. Tu leh fate duat leh ngaina mi a ni a, a tu leh fate pawhin an ngai em em thin.

January ni 7, 2010-a a zan mu chu a thaw tha hlei thei lova, a tukah a khua a sik a, damdawite a ei a, mahse, Jan. ni 9, 2010-ah a kua a lo thalo leh ta a, a taksa pawh a chau nghal hle a ni. Jan. ni 11, 2010-ah Aizawl Hospital-ah admit a niin Doctor-te’n ngun taka an han en in Pneumonia, zunthlum, lung thalo, kal vung leh kala lungte awm a ni tih hmuhchhuah a ni a. That lam a pan thei vak lo chungin February ni 11, 2010-ah in lama inenkawl zui turin damdawiin atangin an chhuak a, zia awm lam a pan theih tak loh avngin February ni 14, 2010 (Pathianni) zan dar 10:30 khan Lalpa hnenah min lo chawlhsan ta a ni.

A ruang hi lumenpui a ni a, Feb. ni 15, 2010 (Thawhtanni) chhun dar 12:00-ah Rev. K. Lungmuana’n In lamah vuiin, Upa Zoliana Royte-in thlanmual-ah a vui liam ta a ni.