Kum 22-na, Issue 24, JULY 18, 2009

YMA LEH MORAL REFORM-TE’N JOINT MEETING AN NEI

July ni 14, 2009 (Thawhlehni) zan dar 7:00 khan THP Hall-ah YMA Mission Vengthlang Branch leh Mizo Moral Reformation Network International (Moral Reform) chuan Joint Meeting an nei. YMA lam atangin Branch Executive Committee, Section Committee leh Sub-Committee peng hrang hrang member-te an tel a, Moral Reform lam atangin Rev. K. Lungmuana, Chairman; Upa H. Ngurthansanga, Gen. Secretary leh Upa Chhawnvunga, Treasurer te an tel bawk.



Programme duanlawk angin he Meeting hi Pu Kaisangzuala, YMA Branch President-in kaihruaiin Pu Vanlalruala, Branch Executive Committee member chuan Hunserh a hmang. Upa Chhawnvunga’n Moral Reform lo din dan, hruaitute leh a kalphung sawihawnna a nei a; he pawl hi March ni 28, 2009 khan din a niin, a thil tum tlangpui chu kan awmna apianga Mizo nun mawi heng - tlawmngaihna te, rinawmna te, dikna te leh huaisenna te, aia upa leh nu leh pa zahna te, Chanchin Tha a lang thei ngei a nun chhuahpui te hi a ni. Hei hian mihring leh mihring inkar mai ni lovin, Pathian thilsiam dang - ram leilung, nungcha leh boruak neitu chan changa enkawltu tha nih te hi a huam vek a ni.

Thusawi tura ruat Rev. K. Lungmuana, Chairman, Moral Reform chuan, “He pawl thiltum te tihlawhtling turin theihtawp chhuaha kan tan tlan a tul tak zet a, YMA te hi Mizo nun mawi vawng nungtu leh Khawtlang nun siam that kawnga hma la tu pawl lian leh zahawm in ni a. Mizoram leh mizo te tan hian a hlu tak zet a ni” a ti. “Mizo te nunah hian Tlawmngaihna hi a la reh lova, kan nun mawi tam tak pawh a la reh lo, hengte hi kan chhawm nun zel leh inzirtir uar deuh deuh a tul a ni,” a ti bawk.

“Rinawmna lo tla hniam ta te, aia upa leh nu leh pa zahna chang kan hre lo ta lutuk leh hmeichhiat mipatna kawnga kan hnam nun lo chhe nasa ta te hi siam that a, kan pi leh pute atanga kan neih sa ‘Zo nun mawi’ muthlu ang mai hi chawh nuna tuai thar leh a ngai a ni,” a ti. Thusawi tha leh ngaihthlak nawm tak ngaihthlak zawh ah sawihona neih a niin thawhhona tha tak nen chak zawka hmalak zel nise an ti.

Pu Kaisangzuala, YMA President chuan hun kharna neih pahin, “Tunlai thangthar tam takte hian inchhung khurah zirtirna kan tlachham ta a ni lo maw, veng chhung chhiat tawh thu puante chu ral lehlama ui bauh thawm leh darbenthek ri ve mai mai ang lekah an ngai ta mai niin a lang,” tiin, inchhung khurah tlawmngaihna uar zawka inzirtir a tul thu a sawi bawk.





VENG CHHUNG THUTHAR TAWI:

• Tv. Lalsangzuala s/o Pu Lalhmahruaia, Y Sec., khawsik, Aizawl Hospital-ah enkawl mek a ni.
• Pu K. Lalengmawia, Y Sec., khawsik leh awmna, In lamah enkawl mek ani.
• Pu MC Lalliana, Y Sec., eisual vanga Nazareth Hospital-a enkawl chu a lo chhuak.
• Pu F. Malsawma, M Sec., Kâwngna avangin Durtlang Hospital-ah enkawl mek a ni.
• Nl. Lalthakimi d/o Pu H. Zahmuaka, M Sec., Cilvil Hospital-a a tonsil zai chu In lama enkawl zui turin a lo chhuak.
• Pi Lalthanpuii w/o Pu Vanlalsawma, M Sec., Kolkata Amri Hospital-a enkawl chu vawiin hian an lo haw dawn.
• Pu Lallawmkima, M Sec.-te chuan fapa an nei thar.
• Nl. Lalrinzuali d/o Upa C. Hmingthanga, A Sec., Civil Hospital-a a aw-bawm zai chu In lama enkawl turin a lo chhuak.
• Tv. Zothanliana, A Sec. Asst. Secy. chu 7th Day Hospital-ah enkawl mek a ni.
• Pu C. Ramthara, A Sec. chu a tha chak thei vak lo.
• Tv. K.Lalbiakfela s/o Pu Rohmingliana, A Sec. leh Nl. Laldinpuii d/o Pu Lalsangluaia, A Sec. te chu July ni 24, 2009 (Zirtawpni) khian Jubili Kohhran Hall-ah an innei dawn.
• Mission Vengthlang Presbyterian Kohhran chuan Pavalai Pawl a din thar.

FAM ROLUNG MUAL:

Hming :ZACHHINGI RENTHLEI
Kum : 82
Kohhran: Presbyterian
Thihni: July 10, 2009. 02:00 PM
Vui Hun: July 11, 2009. 12:00 PM
Vuitu:Upa K. Roseia
Section:Y Section

Pi Zachhingi Renthlei hi Pu Te-a Renthlei (Chhawnhleia) leh Sawithangi Ralte-te fahmingkoh ni turin kum 1927 khan tuna an In hmun (Mission Vengthlang)-ah hian a lo piang a; an unau hi paruk an ni.

Indopui II-na (1939-1945) hun lai khan khawsak harsatna avangin Hmar Chaltlang-ah an raltlan a, chutah chuan Lalsiama Hmar nen kum 1947 khan inneiin, fa an hrin chuan nausenin a thihsan a, fa dang an nei ta lo a ni. Rambuai lai khan Thingdawl grouping-ah an lut a; a pasal hi Presbyterian Kohhran Upa-ah thlan a ni nghe nghe. Vanduaithlak takin a pasal hian May ni 15, 1986 khan a boral san a, a hmeithai ta a ni.

Kum 1989 khan Aizawl-ah lo chhovin, Serchhip-ah a vahteho a han awmpui zak zak hnuin, a nau R. Zasiama, Y Section a rawn fin leh a. Ani hian a laizawnnu Pi Hmingmawii nen an awm nan tuna an In hi a sak sak a, Feb. 1997 atang khan an hmeithai dun ta a ni.

Amah hi Kohhran bel tlat leh a dam phawt chuan inkhawm pawh thulh ngai lo a ni a; mi nunzawi leh zaidam em em a ni bawk. A taima hle a, a thih hma thleng hian huan-ah a la feh nghe nghe a ni.

July ni 10, 2009 (Zirtawpni) zingah eirawngbawlin, tukthuan an han ei tur chu, ‘Ka lu a haiin a na em mai,’ tiin a mu a. Aizawl Hospital-ah dah luh nghal a niin, doctor leh nurse-te’n theihtawp chhuaha an enkawl chungin chhan theih a ni ta lova, chawhnu dar 2:00-ah a rawngbawl sak thin Lalpa hnenah min lo chawlsan ta a ni.

A ruang hi tlaivarpui niin, July ni 11, 2009 (Inrinni) chhun dar 12:00-ah Bialtu Upa K.Roseia’n In lamah vuiin, T/Upa Hmingthansanga’n Thlanmualah a thlah liam ta a ni.