Kum 22-na, Issue 25, JULY 25, 2009

YMA MISSION VENGTHLANG BRANCH-IN THISEN PEK RUNPUI AN NEI

July ni 18, 2009 (Inrinni) chawhma dar 10:00 atang khan YMA Mission Vengthlang Branch chuan a mamawhte’n a thlawna an hman turin Civil Hospital tan Thisen pek runpui chu THP Hall-ah neih a ni ta. Kan Veng nu Dr. Lily-i w/o Dr. Eric Zomawia, M Sec leh a hote Civil Hospital atanga lo kalin Thisen hi an rawn la a, thisen petute leh buaipuitute ei leh in siam nan Rs 2,000/- zet YMA te min pe bawk.

Hemi ni hian YMA member thahnem tak an rawn thawkchhuak a, a lo kal zawng zawng hian pe thei phei se la mi za chuang fe in kan pe awm e. Pu R. Zothansanga, Branch Fin. Secretary-in pe hmasa berin YMA member 71 laiin thisen hi an pe a, Pu Gilbert Lalzarliana, Branch Asst. Secretary chuan pe hnuhnung berin hnu a khar a ni. Hetiang hi Section hrang hrangten kan pek dan a ni:

Y Section - Mipa 29 + Hmeichhia 3 = 32
M Section - Mipa 26 + Hmeichhia 2 = 28
A Section - Mipa 11 = 11
A vaiin - 71

Pu Kaisangzuala, Branch President hoin Branch leh Section hruaitu thisen pe tura tling ve ta lo engemaw zatin nilengin an tawiawm bawk. Tin, MHIP hnatlangte thisen hi pek ve tumin an rawn thawkchhuak bawk. Chawhnu lamah ruah a sur tak chiam avangin hun thawl zawk chuh a tlai lama lo kal tum engemaw zat an lo kal thei lova, a pawi tak zet a ni. Pek ve chak ngawih ngawih hna tul avang leh khuain min bumro taka vanga pe theilo tam tak kan la awm a, Branch YMA chuan hun remchang dang la buatsaih leh ngei turah ngai ila. Pathianin nunna atana min pek Thisen hlu tak hi midangte tan luan chhuah tir turin tan i la sauh sauh zel ang u.

Thisen petu leh buaipuitute ei leh in tur M Section ten an buaipui a an tlinin englaipawha ei leh in turin cake leh thingpui tui tak an chhawp reng bawk. Thisen petu leh buaipuitu zawng zawngte chungah YMA Mission Vengthlang Branch chuan lawmthu a sawi tak meuh meuh a ni.



VENG CHHUNG THUTHAR TAWI:

• Nl. C. Lalmuanpuii d/o Pu C. Sanghlira, Y Sec. chu Civil Hospital-ah admit leh a ni.
• Pu Nelson Lalfakawma, Y Sec. te chuan a pakhatna atan fapa an nei thar. Naute hi a pu, Pu C. Lalzika, Y Sec. chuan khup thum a hmuhna a ni.
• Pi P.C. Lalhlimpuii w/o Pu K. Hranga, Y Sec., Durtlang Hospital-a zai chu a lo chhuak.
• Pi C. Lalhmingmawii w/o Dr. L Siamliana, M Sec. chu Durtlang Hospital-ah BP Sang avangin enkawl mek a ni.
• Pi Lalhnawli m/o Upa H. Ngurthansanga, M Sec., a mit (eye)-a bâwk awm, Durtlang Hospital-a paih chu a lo chhuak.
• Pu Zothanliana, A Sec. Secy. chu In lama enkawl chhunzawm turin 7th Day Hospital atangin a lo chhuak.
• Nl. Zothanpuii d/o Pu Lalramliana, Y Sec. chuan BCA 1st Div.-ah a pass thar.
• Nl. Zoengmawii d/o Pu Lalhmahruaia, Y Sec. chuan BCA 2nd Div.-ah a pass thar.
• Pu Lalthlungliana, A Sec. te chhung chu a pa, Pu H. Sangkunga te In hnuai, A Sec.-ah an inbawlhrang ve ta.
• Tv. K. Lalbiakfela s/o Pu Rohmingliana leh Nl. Lalhlimpuii d/o Lalsangluaia, A Sec.-te chu July ni 24, 2009 (Zirtawpni) khan Jubili Kohhran Hall-ah an innei.

ARTICLE: UI LEH AR KHUAHKHIRH
Lawmawma Pa, M Section

Tuk khat chu veng chhunga ka vah vel pahin kan In leh a vel, kawtkai leh tuallai kan lo vawn fai tak ziate ka thlir a. Tun hnai mai atanga faina leh thianghlimna kawnga veng chhung mipuite hmasawnna lo lang chu lawmawm hlein ka hria. Khawtlang hruaitute’n ran khuahkhiarhna an siam, tha taka kan zawm avanga hma kan sawnna pawh a lang nasa hle mai.

Khawtlanga khawsa ho leh inthenawm khawveng theuh theuh hi duh dan leh ngaihdan a inang lo thluah awm e. Ran ngainami, rawlthar chhuah thlenga ui leh zawhte thlenga mutpui a, dai vahnaah pawh hruai thei; ar pawh an tlatna atanga au khawm a, kut leh mal chunga chaw pe thin ka ni. Ran vulhte’n min tihhlim zia leh min kawmngeih theih zia hre chiang ber tute zinga mi ka nih ve ngei ka ring.

Heti khawpa ran ngaina ka ni chung hian mahni ui ni lo, thenawm khawveng-a lenna a, an ui, hmelchhe ve takte’n min hnim vut vut a, min melh kuau mai chuan ngainatpui chu sawi loh, ka nel chuang hauh lo thung. Chuvangin, mahni fate kan hmuh hmelthat ber leh duat em em lai hian midangte’n kan mit ang hi an lo pu vek lo tih erawh chu ka hrechiang lawi si.

Tunlai khawvel thang zelah faina leh thianghlimna te, khawtlang vawn thianghlim zelna te kan lo uar takah hian kan ran vulhte hian, kan enkawl that loh avangin harsatna min siam a, thenawm khawvengte tan hnawk leh ngeiawm te pawh ka lo ni thei reng mai tih min hriatchhuah tir a. Duat taka kan enkawl leh kan ngainat em emte pawh midang tan chuan hlauhawm leh tihbaiawm tak an lo ni reng thei tihte ka ngaihtuah fo thin.

Veng chhung faina leh thianghlimna tur khawtlang hruaitute’n ran khuahkhirhna an siam hi tha taka zawmte tan a lo hnawk hauh lo va, kan zavai atan hmasawnna a lo ni reng zawk a ni. Kan ui/ar vulhte hi uluk tak leh duat takin enkawl ila, midangte leh khawtlang tana hnawksak leh bawlhhlawh siam lo tura kan vawn fel chuan tuma’n min sawisel ka ring lo. A vulhtute tan pawh a nuamin a hlimawm zual sawt zawk ngei ang.

Kan fa, duat leh duhlai ngawih ngawihte pawh khawtlang dan zawm lova, hnawksak leh suala an awm chuan zilhtu an tawng nge nge thin. Khawtlang mipui tam zawkte zalenna, veng chhung thianghlimna leh faina ngaihtuah chunga khawtlang hruaitute’n inkaihhruaina leh khuahkhirhna an siamte tha taka zawm hi khua leh tui tha nihna a lo ni, tihte ka ngaihtuah ta mai mai a.


ARTICLE: KA THLIRNA TLANG ATANGIN
May R. Fente, A Section

UI CHUNGCHANG:
Ran ngaina mi ka nih vang nge ni, tuna VC thuchhuak thin, Ui chhar thu kan au thin chungchang hi han kam hnih ve ka duh a ni. Neitu nei lo Ui an awm loh avangin Mizoram hi kan vannei ka ti thin a; India khawpui dangah chuan neitu awm lo Ui a tam em em avangin a khat tawka vai an ngai, an inthlahpun zel loh nan. Keini mi Ui duhlai, inseng teuha an vulh puitlin tawh (eng eng emaw te pawh an thiam tir tawh mahna) kan man a, Rs.500/- a tlan tura kan au thin hi a tha ber em? Kan thenawm leh vengte thinlung na ngawih ngawihin kan siam em? Veng dang atanga kan inlengte’n engtinnge kan veng hi min ngaih dawn le?

Mi ran kan va leina sawi miah lovin Mizoram Sorkar hriatpuia vulh kan ni a (Ui pakhatah Rs10/- chhiah kan pe tawh); VC hian Mizoram Sorkar a kalh em ngaihtuah chian leh a va tha êm.

Chubak ka sawi duh chu, Ui "bo" mantute hi hna thawk peih lo, mi neih ang it ngawih ngawih an nih ka ring a; hei hian zawhna dang, ‘Sualna kan tipung zawk ang em?’ tih hi a hring chhuak a ni. Pa zahawm pangngaiin "Ui bo" an chhar ka ring lo tlat. VC member-te hian a chhartute an hre ngei ang a, lo ngaihtuah leh se a tha lawm ni? Ui puitling tawh an "bo" mai mai ka ring lo.

MHIP Day (6.7.2009) khan mipa tleirawl pathumin Pu K.Sawmvela, Court Zawl a cheng ui, zung tura an chhuah (chain awrh) an man a. Pi Khumi w/o Lt. Col. K.R.Siama'n ui tang tauh tauh a hmuhin chhuah turin a ti a, ‘A inah a haw mai ang,’ tiin. Mahse heng tleirawl hian an chhuah duh lo, "ui bo" an chhar angin an chhal tlat a ni. Pu Sawmvela nupui ka phone a, thu awmdan min hrilh a, ZONUNMAWI-a chhuahah ka han ziak a ni e. Hetiang tleirawlte hi kan awm avangin VC hian a thupek hi ennawn leh se ka ti hle mai. People For Animals pawl hial a ding ta bawk a.

Neitu neilo Ui awm lohna state-ah engvanginnge hetiang hian thu kan chhuah ka hre lo. Amaherawhchu, an zun leh ekin vantlang kawng a ti bawlhhlawh tih thu a nih takin - ka In luah, Lt.Col. K.R. Siama In bul kawng chhoah hian ui aia zung hnem, luang khawp zunram thiar an tam mai. Thinghnah leh bawlhhlawh dangte pawh hi thing neitu leh tihnawktu aiin, a bula chengte hian kan tifai zing zawk ngei ang, kan phun lo ve.

CHHIATTAWH LEH THINGPUI:
Tin chhiat tawh a, zan thum chungchang pawh hi ka sawi duh bawk a ni. Thingpui sem loh hi ka vei hle mai. Thihna ngaipawimawhin veng hla tak tak atangin hun leh sum sengin an rawn kal a, pawisa engemaw zatin Mizo takin min han ral leh a, thingpui no khat êm pe lova kan tin tir thin hi ngaihtuah ve teh u, kan hnam nunmawi a ni em? Tlawmngaihna, kan hnam nunmawi chawi nun zel kan tum bawk a, YMA hruaitute ngaihtuah nawn lehah ka han vawrh chhuak a ni e. Khawhar chhungte, thihna an tawh chunga an zah dawn nen, an zahna kan belhchhah palh ange. Khawhar chhungte an insenso loh deuh nan chuan buhfai kan khawn rual hian In tinah (hmanlaia thingfak an khawn thin aiah khan) Rs 2/- or Rs.5/-, a nawi remchan danin khawn mai nise a tha lovang maw? In tin hming list chhut chhuahah an pek zat ziak ni mai se.

Kum 22-na, Issue 24, JULY 18, 2009

YMA LEH MORAL REFORM-TE’N JOINT MEETING AN NEI

July ni 14, 2009 (Thawhlehni) zan dar 7:00 khan THP Hall-ah YMA Mission Vengthlang Branch leh Mizo Moral Reformation Network International (Moral Reform) chuan Joint Meeting an nei. YMA lam atangin Branch Executive Committee, Section Committee leh Sub-Committee peng hrang hrang member-te an tel a, Moral Reform lam atangin Rev. K. Lungmuana, Chairman; Upa H. Ngurthansanga, Gen. Secretary leh Upa Chhawnvunga, Treasurer te an tel bawk.



Programme duanlawk angin he Meeting hi Pu Kaisangzuala, YMA Branch President-in kaihruaiin Pu Vanlalruala, Branch Executive Committee member chuan Hunserh a hmang. Upa Chhawnvunga’n Moral Reform lo din dan, hruaitute leh a kalphung sawihawnna a nei a; he pawl hi March ni 28, 2009 khan din a niin, a thil tum tlangpui chu kan awmna apianga Mizo nun mawi heng - tlawmngaihna te, rinawmna te, dikna te leh huaisenna te, aia upa leh nu leh pa zahna te, Chanchin Tha a lang thei ngei a nun chhuahpui te hi a ni. Hei hian mihring leh mihring inkar mai ni lovin, Pathian thilsiam dang - ram leilung, nungcha leh boruak neitu chan changa enkawltu tha nih te hi a huam vek a ni.

Thusawi tura ruat Rev. K. Lungmuana, Chairman, Moral Reform chuan, “He pawl thiltum te tihlawhtling turin theihtawp chhuaha kan tan tlan a tul tak zet a, YMA te hi Mizo nun mawi vawng nungtu leh Khawtlang nun siam that kawnga hma la tu pawl lian leh zahawm in ni a. Mizoram leh mizo te tan hian a hlu tak zet a ni” a ti. “Mizo te nunah hian Tlawmngaihna hi a la reh lova, kan nun mawi tam tak pawh a la reh lo, hengte hi kan chhawm nun zel leh inzirtir uar deuh deuh a tul a ni,” a ti bawk.

“Rinawmna lo tla hniam ta te, aia upa leh nu leh pa zahna chang kan hre lo ta lutuk leh hmeichhiat mipatna kawnga kan hnam nun lo chhe nasa ta te hi siam that a, kan pi leh pute atanga kan neih sa ‘Zo nun mawi’ muthlu ang mai hi chawh nuna tuai thar leh a ngai a ni,” a ti. Thusawi tha leh ngaihthlak nawm tak ngaihthlak zawh ah sawihona neih a niin thawhhona tha tak nen chak zawka hmalak zel nise an ti.

Pu Kaisangzuala, YMA President chuan hun kharna neih pahin, “Tunlai thangthar tam takte hian inchhung khurah zirtirna kan tlachham ta a ni lo maw, veng chhung chhiat tawh thu puante chu ral lehlama ui bauh thawm leh darbenthek ri ve mai mai ang lekah an ngai ta mai niin a lang,” tiin, inchhung khurah tlawmngaihna uar zawka inzirtir a tul thu a sawi bawk.





VENG CHHUNG THUTHAR TAWI:

• Tv. Lalsangzuala s/o Pu Lalhmahruaia, Y Sec., khawsik, Aizawl Hospital-ah enkawl mek a ni.
• Pu K. Lalengmawia, Y Sec., khawsik leh awmna, In lamah enkawl mek ani.
• Pu MC Lalliana, Y Sec., eisual vanga Nazareth Hospital-a enkawl chu a lo chhuak.
• Pu F. Malsawma, M Sec., Kâwngna avangin Durtlang Hospital-ah enkawl mek a ni.
• Nl. Lalthakimi d/o Pu H. Zahmuaka, M Sec., Cilvil Hospital-a a tonsil zai chu In lama enkawl zui turin a lo chhuak.
• Pi Lalthanpuii w/o Pu Vanlalsawma, M Sec., Kolkata Amri Hospital-a enkawl chu vawiin hian an lo haw dawn.
• Pu Lallawmkima, M Sec.-te chuan fapa an nei thar.
• Nl. Lalrinzuali d/o Upa C. Hmingthanga, A Sec., Civil Hospital-a a aw-bawm zai chu In lama enkawl turin a lo chhuak.
• Tv. Zothanliana, A Sec. Asst. Secy. chu 7th Day Hospital-ah enkawl mek a ni.
• Pu C. Ramthara, A Sec. chu a tha chak thei vak lo.
• Tv. K.Lalbiakfela s/o Pu Rohmingliana, A Sec. leh Nl. Laldinpuii d/o Pu Lalsangluaia, A Sec. te chu July ni 24, 2009 (Zirtawpni) khian Jubili Kohhran Hall-ah an innei dawn.
• Mission Vengthlang Presbyterian Kohhran chuan Pavalai Pawl a din thar.

FAM ROLUNG MUAL:

Hming :ZACHHINGI RENTHLEI
Kum : 82
Kohhran: Presbyterian
Thihni: July 10, 2009. 02:00 PM
Vui Hun: July 11, 2009. 12:00 PM
Vuitu:Upa K. Roseia
Section:Y Section

Pi Zachhingi Renthlei hi Pu Te-a Renthlei (Chhawnhleia) leh Sawithangi Ralte-te fahmingkoh ni turin kum 1927 khan tuna an In hmun (Mission Vengthlang)-ah hian a lo piang a; an unau hi paruk an ni.

Indopui II-na (1939-1945) hun lai khan khawsak harsatna avangin Hmar Chaltlang-ah an raltlan a, chutah chuan Lalsiama Hmar nen kum 1947 khan inneiin, fa an hrin chuan nausenin a thihsan a, fa dang an nei ta lo a ni. Rambuai lai khan Thingdawl grouping-ah an lut a; a pasal hi Presbyterian Kohhran Upa-ah thlan a ni nghe nghe. Vanduaithlak takin a pasal hian May ni 15, 1986 khan a boral san a, a hmeithai ta a ni.

Kum 1989 khan Aizawl-ah lo chhovin, Serchhip-ah a vahteho a han awmpui zak zak hnuin, a nau R. Zasiama, Y Section a rawn fin leh a. Ani hian a laizawnnu Pi Hmingmawii nen an awm nan tuna an In hi a sak sak a, Feb. 1997 atang khan an hmeithai dun ta a ni.

Amah hi Kohhran bel tlat leh a dam phawt chuan inkhawm pawh thulh ngai lo a ni a; mi nunzawi leh zaidam em em a ni bawk. A taima hle a, a thih hma thleng hian huan-ah a la feh nghe nghe a ni.

July ni 10, 2009 (Zirtawpni) zingah eirawngbawlin, tukthuan an han ei tur chu, ‘Ka lu a haiin a na em mai,’ tiin a mu a. Aizawl Hospital-ah dah luh nghal a niin, doctor leh nurse-te’n theihtawp chhuaha an enkawl chungin chhan theih a ni ta lova, chawhnu dar 2:00-ah a rawngbawl sak thin Lalpa hnenah min lo chawlsan ta a ni.

A ruang hi tlaivarpui niin, July ni 11, 2009 (Inrinni) chhun dar 12:00-ah Bialtu Upa K.Roseia’n In lamah vuiin, T/Upa Hmingthansanga’n Thlanmualah a thlah liam ta a ni.

Kum 22-na, Issue 23, JULY 11, 2009

YMA MISSION VENGTHLANG BRANCH EXECUTIVE COMMITTEE VAWI 7-NA THU

July ni 4, 2009 (Inrinni) chawhnu dar 1:00 khan YMA Mission Vengthlang Branch Executive Committee Meeting vawi 7-na chu zanriah kilho pahin Park Eden, Falkland-ah neih a ni. Meeting hi Pu Kaisangzuala, President-in kaihruaiin Pu B. Thangrikhuma’n Pathian hnena tawngtaina hun a hmang. Member 27 kalin 14 an kal lova, member kal lo 10-in an kal theih loh chhan sawiin an pha a ni. Thurel tlangpuite chu:

1. Report : Branch leh Section hrang hrang atangin report tlangpui hetiangin ngaihthlak a ni.

• Branch: Executive Meeting hmasa in bawhzui tura a rel leh ruahman te a theih ang ang a bawhzui leh tihhlawhtlin a ni a, YMA Hall chei mek a niin zawh fel tep a ni. Chhiatni Thatni-a hman tur thingpui inna no 20 doz (240 nos), tui bottle 30 leh plastic no lian 5 te lei thar a ni.
• Y Section: Damlo 3 an kan a, Property an Section-in an kawlte THP Hall-ah dahluh fel a ni.
• M Section: Damlo 3 an kan a, Section sum tuak nan Hmunphiah an zuar mek.

A Section: Damlo 1 an kan a, hnatlang an nei bawk.

2. Chanchinbu Tha: Central YMA-in Branch hrang hrang chanchinbu tha thlanna a nei leh dawn a, Zonunmawi Editorial Board ten lo thehlut ve se tih a ni.

3. Thisen pek runpui (Blood donation): July ni 11, 2009 (Inrinni)-a neih turah member-te ngenna In tinah sem nise, Banner siamin pekna hmun turah zar ni bawk se, tih a ni.

4. Zun In: Dawrkawn-a PHE Deptt. hmalaknaa zunin siam mek chu lawmawm a tiin, a chungah hian Tlang veng panna kawn ân-in zunin dang siam leh turin hmalak nise, OB ten lo bawhzui se, tih a ni.

5. Moral Reform, Mizoram ten Joint Meeting neihpui tura YMA te an sawmna chu Committee chuan tha a ti a, July ni 14, 2009 (Thawhlehni) zan ah THP Hall (Kawn)-ah neih nise a ti a, he Joint Meetingah hian Branch, Section leh Sub-Committee peng hrang hrang member zawng zawng kal vek ni se a ti.

6. Branch Committee Meeting neih apiang a miharsate pual bawm hun thin a pawisa thawhkhawm leh veng chhung mi inphalte thawhkhawm chu a tul huna hman turin Account hranga vawn ni se, tih a ni.

7. YMA Day, July ni 15, 2009 (Thawhtanni)-a hman zawh tak chu thlirlet a ni a, a hlawhtling thawkhatin Item neitu leh mawhphurhna hrang hrang changtuten tha taka an tihlawhtling thei chu lawmawm a ti a. A bik takin YMA Chhangte’n an chanvo tha taka an rawn tihlawhtling thei kha a buaipuitu leh member zawng zawng chungah Branch chuan lawmthu a sawi tak meuh a ni.

8. Chhiatni Thatni-a hman tur Silpaulin tha chi 2 (pahnih) lei ni se, tih a ni.

9. Miharsate pual bawm hunah Rs 635/- thawhkhawm a ni.



VENG CHHUNG THUTHAR TAWI:

• Marina Zohlimpuii d/o Pu K. Lalbiakvela, Y Sec. chuan a pakhatna atan fapa a nei thar.
• Pu Lalremhluna (Puia), Y Sec. te chuan fapa an nei thar a, Aizawl Hospital-ah admit leh nghal a ni.
• Nl. Lalngaizuali d/o Pu K. Hmingthanga, Y Sec. (Darnam), taksa chakloh avanga Aizawl Hospital panpui chu In lama enkawl zui turin a lo chhuak.
• Pu R. Lalhmunliana, Y Sec. (Kawn), kawng herh, In lamah enkawl mek a ni.
• Tv. Zothanpuia s/o Pu Zosangzuala, M Sec. leh Nl. Lalbiaknguri d/o Pu Vanlalzawna, M Sec. te chu scooty-a an accident avangin Durtlang leh Civil Hospital-ah te enkawl an ni.
• Pi Saithuami w/o Pu R. Lalsiamliana, A Sec. chu a ke zai a nih avangin Civil Hospital-ah enkawl mek a ni.
• Zothanpari d/o Pi Lalhmingliani, A Sec. Civil Hospital-ah fa a nei thar.
• Tv. Lalmuankima s/o Pu Lalhmachhuana, Y Sec. (Dam) leh Nl. R. Lalneihpuii, Tuikual ‘S’ te chu July ni 17, 2009 (Zirtawpni) hian Mission Vengthlang Presbyterian Kohhran Hall-ah an innei dawn.
• Tv. Lalhlimzauva te unau, A Sec. chu Pu H. Lalbiaktluanga In atangin Pu R. Hmingliana te In-ah an insawn.
• Pu Lalbiakdika te chhung chu Pu Laltlankima, M Sec. In atangin Pu R. Tlanglawmthanga Building, Y Sec.-ah an insawn.
• LO PEM KAN HRIAT THEIHTE: (1) Pu Lalramenga te chhung Thingsai North atangin Pu R. Lalhmingliana, A Sec. In-ah (2) Pu Zohmingliana-te chhung Chhinga Veng atangin Pu C. Lalnunnema, M Sec. In-ah (3) Tv. John-a leh Albert-a, Bungtlang ‘S’ atangin Pu Lalengliana Khiangte, A Sec. In-ah (4) Nl. Champuii leh Nl Lallianpuii te unau, Vanghmun (N. Tripura) atangin Pu C. Lianchhunga, Y Sec. In-ah.

ARTICLE: TUI HMANGA INENKAWL DAN
David Malsawmtluanga, A Section

Tui in tam turin ka nu’n min hrilh thin a, ka ning thei khawp mai. Amaherawhchu, Internet atanga doctor article rintlak tak ka chhiar atangin a that zia ka hre thar ve a, chumi ka chhiar atang chuan tlemazawng mite hriat atana tha ka tih ka han tarlang ve duh a ni.

Tunlai hian Japan ramah chuan zing thawh veleha tui in hi a lar em em a; tui in hrim hrim scientific test atang pawhin a that zia hmuhchhuah zel a ni bawk. Natna khirhkhan leh tunlai natna tlanglawnte hi hetiang tui in thin hian za-a-za (100%) a tihdam theih Japanese Medical Society chuan a hmuchhuak a; chung natnate chu - Luna (Headache), Taksa na (Body ache), Lung lam natna (Heart diesease), Ruhchuktuahna (Arthritis), Lungphu rang (Fast heart beat), Phungzawlna (Epilepsy), Thau lutuk, asthma, TB, Meningitis, Kal leh zungkawng natna, Luak, Gastritis, Diarrhea, Piles, Diabetes, Constipation, Mit lam natna (Eye dieseases), Cancer, Thi neih dan fel lo etc. te an ni.

TUI IN DAN TUR:

1. Zing thawh veleh, ha nawh hmain tui no li (4), 160ml theuh in tur a ni.
2. Chumi hnu, ha nawh zawh minute 45 chhung chu tui leh thil engmah ei emaw, in emaw loh tur a ni.
3. Minute 45 hnuah chuan thil a ei theih tawh.
4. Minute 15 hnua thil/chaw ei zawh hian darkar 2 chhung tui emaw, thil dang emaw ei-a in loh tur a ni.
5. Damlo emaw, tar emaw, tui in harsa ti tan chuan a tantirhah tlem deuh atanga tanin, nitin in tam chhoh tial tial tur a ni, no li (4) thlengin.
6. Hetiang tui in hian a chunga kan tarlan natna te khi a tihdam theih bakah hriselna atan a tha em em a ni.

Hetianga tui in-a inenkawl hnua natna a dam emaw, natna a ziaawm hun tur chu a hnuaia mi hi a ni:

1. Thisensang (High Blood Pressure) - Ni 30 hnuah.
2. Pumpui na - Ni 10 hnuah.
3. Zunthlum (Diabetes) - Ni 30 hnuah.
4. Constipation - Ni 10 hnuah.
5. Cancer - Ni 180 hnuah.
6. TB - Ni 90 hnuah.
7. Ruhchuktuah-na (Arthritis) - Ni 10 vel atangin.

Hetianga tui in thin hian side-effect a nei lo a; tih tantirhah erawh chuan an zung zing hle thin. Tin, Chinsese leh Japanese-te hian an chaw ei laiin tui vawt aiin thingpui sa in tel an ching a, chin ve a tha khawp mai. Tin, chaw ei khama thingpui lum emaw, soup lum emaw in hi a tha hle bawk. Chaw ei khama tui vawt in hian kan chaw pai mawmte hi a ti khang a, paitawih a timuamg thin a, thau chhia a siam tam bik bawk. Chuvangin chaw ei zawh hian thingpui lum emaw, tui lum emaw, soup lum emaw in thin ang che.



CLEAN MISSION VENGTHLANG COMMITTEE DIN A NI

Mission Vengthlang VC bultumin Clean Mission Vengthlang Committee din a ni a; Mission Vengthlang huam chhung a lo fai a, a lo thianghlim zawk nan leh a lo mawi zawk nan ngawrh taka hmalak mek a ni. He committee OB atana ruatte chu:

Chairman: Upa C.H. Thangkhuama
Vice Chairman: Pu F. Lalchama
Secretary: Tv. Vanlalthlenga
Asst. Secretary: (1) Pu Zolianchama (2) Pu P.C. Lalrinpuia

Kum 22-na, Issue 22, JULY 04, 2009

YMA MISSION VENGTHLANG BRANCH YMA HALL HMAN DAN

Kar hmasa issue-ah khan YMA Mission Vengthlang Branch property thenkhat hman leh hawh dan tlangpui kan rawn tarlang tawh a. Tunah hian hian YMA Hall hman dan kan han tarlang leh e. Heng YMA property leh Hall-te hi veng chhung mipuite’n tangkai taka kan hman theih theuh a tha hle.

1. YMA Hall hmang duh reng rengin an hman duh dan leh hman hun tur ziakin President/Secretary hnenah dilin, ziaka an phalsakte chauhin YMA Hall hi an hmang thei ang. President/Secretary an awm loh lai a nih chuan Office Bearers awm remchang apiangin ziakin Hall hman phalna an pe thei ang.

2. YMA Hall hmang tur tan chauh Choka hi hman tel theih a ni a. Hall hmang turte’n Choka an hmang tel duh dawn a nih chuan Hall hman dilna-ah an hman duh dan ziak lang telin an dil tel tur a ni.

3. YMA Hall hmang turte’n Hall hman phalsak an nihna lehkha leh Hman man/Light Charge, an hman dawnah YMA Hall chowkider hnenah pek tur a ni a, hman man pe lawk lo tan Hall hman theih a ni lovang.

4. YMA Hall hmang tute’n an hman chhunga Hall/Choka bungrua eng pawh tihchhiat an neih chuan a chhiat dan a zirin siamthat man (repairing charge) emaw, a thar man emaw an chawi ang.

5. YMA Hall hmangtute’n Choka an hman telin, Gas Cylinder an intum a ngai a; YMA Hall-in tui dahna a neih tam loh avangin tin 5 aia tam hman a nih dawn chuan mahni intum tur a ni.

6. YMA Hall leh Choka hi Mission Vengthlang VC chuan khawtlang thilah a thlawnin a hmang thei ang.

7. YMA Hall leh Choka hi Mission Vengthlang huam chhunga tlawmngai pawl dang (Veng pum huap NGO) leh Kohhran-te’n sum tuak nan ni lovah a thlawnin an hmang thei ang. Zan-a an hman dawn erawh chuan êng chhit a ngaih dawn avangin, êng chhit man (Light charge) zan khatah Rs. 50/- an tum ve thin ang.

8. YMA Hall hi he’ng atan hian man chawiin a hman hawh theih ang :
(a) Sumtuak nan
(b) Birthday lawm nan
(c) Innneih lawm nan
(d) Pass lawm nan
(e) Jubilee lawm nan
(f) Political Party tan
(g) Veng pum huap lo pawl (Association) tan.

Hman Man (Rate):
(1) Chhunah - Rs 100.00; Choka telin - Rs 300.00
(2) Zanah - Rs 150.00; Choka telin - Rs 300. 00
(3) Chhun & Zanah - Rs 200.00; Choka telin - Rs. 400.00

9. YMA Hall leh Bungraw hmangtute’n dimdawi taka hmangin, hnuhma fel takin an kalsan tur a ni.

10.Heng baka tul dang a awm chuan Branch Executive Committee-in thutawp a siam thin ang.



VENG CHHUNG THUTHAR TAWI:

• Pu C. Chuaukunga, CEC leh an nu Pi C.Ropari, Y Sec., damlo chu In lamah enkawl mek an ni.
• Pi Vanlalfeli, Y Sec. (Dam), pum lam tha lo, New Life Hospital-ah enkawl mek a ni.
• Pu R. Vankhuma, Y Sec., khawsik, In lamah enkawl mek a ni.
• Tv. Thanpuia s/o Pi Thankimi, Y Sec., Kulikawn Hospital-ah enkawl mek a ni.
• Np. Altuft-a s/o Ramhlimpuii, Y Sec., Durtlang Hospital-ah enkawl mek a ni.
• Pu H.Thanhlira, Y Sec., Civil Hospital atangin In lama enkawl zui turin a lo chhuak.
• Pi Lalrinpuii d/o Pu R. Lalkuala, M Sec., damlo, In lamah enkawl mek a ni.
• Pi Lalthanpuii w/o Pu Vanlalsawma, M Sec., Kolkata-ah in check-up-in an thang mek.
• Zonunmawi Jt. Editor Pu Lalremthanga nu, Pi Rothangi, M Sec., Kolkata-a enkawl mek pawh that lam a pan hret hret zel e.
• Zonunmawi Manager Pu Vanmalsawma, M Sec. chu khawsik avangin In lamah enkawl mek a ni.
• Np. Malsawmzuali d/o Pu Lalrema, A Sec. chu Kulikawn Hospital-ah enkawl mek a ni.
• Pi Lalramengi w/o Pu Vanlalruala, A Sec., ke tliak avangin In lamah enkawl mek a ni.
• Pi Lalthakimi w/o Pu CVL Remruatpuia, A Sec., Kulikawn Hospital-ah enkawl mek a ni.
• Pi R.Vanlalruati w/o Pu Kaisangzuala, Branch President, A Sec., BP sang, In lamah enkawl a ni.
• Np. Lalrochhari d/o Pu Vankhawpuimawia, A Sec., Kulikawn Hospital-ah enkawl mek a ni.
• Np. Lalrindiki d/o Pu Vanlalhruaia, A Sec., Kulikawn Hospital atangin dam takin a lo chhuak.
• Np. Lalhriatpuia leh Np. Vanlalpeka, Pu C. Remruatpuia, A Sec. fapate chu Kulikawn Hospital atangin an lo chhuak.
• Pu Lalchangliana, A Sec. Civil Hospital atangin dam takin a lo chhuak.
• Tv. Hualzidinga s/o Pu Darthangvunga, A Sec., damlo, In lamah enkawl mek a ni.
• Pu Zothanliana, A Sec. Asst. Secy. chu taksa chak lo avangin In lamah enkawl mek a ni.
• Tv. Lalfakzuala s/o Pu Zasiama, A Sec. Kulikawn Hospital-ah enkawl mek a ni.
• Dr. Eric Zomawia, M Sec. chuan MSACS Project Director hna chu a zawm fel ta.
• Kan Br. Secy. Pu Lalhmingmawia Shillong zin pawh dam takin a lo haw leh ta.

FAM ROLUNG MUAL:

Hming :BIAKTHANGI
Kum : 90
Kohhran:Salvation Army
Thihni: June 29, 2009. 12:15 AM
Vui Hun: June 29, 2009. 01:00 PM
Vuitu:Rev. H. Manga Khongsai
Section:Y Section

Pi Biakthangi hi kum 1919 February thla khan Ratu khuaah Pu Ralchhinga (L) leh Pi Darmawii (L)-te fa upa ber ni turin a lo a piang a; an unau hi 13 an ni. Kum 1937 June ni 21-ah Upa Chhunga inneiin, fa 7, mipa 4 leh hmeichhia 3 an nei a; kum 2004 December ni 5 khan kum 86 mi niin a pasal hian Chantuan Ram a lo pan san tawh a ni.

Kohhran-a rawngbawlna lamah mite angin nihna nei lo mahse a pasal Upa Chhunga hi a tawiawm tha em em a; Pathian biak inkhawm, tawngtai leh Ramthim rawngbawlna lamah thahnem a ngai em em thin. Pathian Ram Sawma Pakhat ngaipawimawh mi a niin, a thawh chhuah buh leh bal, huan thlai atang thlengin dik taka pe thin mi a ni.

Mizoram buai lai, kum 1967-ah Vaitin khua atangin Churachandpur (Manipur)-ah an raltlan a, kum 1990-ah Mizoram-ah an lo let leh chauh a ni. Kum 1956-a a fa 5-na a neihin a hriselna lo tlahniam deuh a, kum engemaw zat bawrhsawmnain a tlakbuak a; hun engemaw chen chu a hriselna pawh lo tha chho lehin, a hriatna lam (a beng)-ah harsatna erawh a nei zui ta a ni.
Kum 1999 tawp lamah an kailawn (step)-ah a tlusual a, damdawiin a awm atangin a beng a lo chhet zual a; natna dang leh hrisel lohna em em dang nei lova a awm laiin June 18, 2009 zana a muhil chu a tuk zingah an kaitho zo ta lo va. Tichuan a mu chu tho tawh lovin, June ni 29, 2009 zing dar 12:15 khan a Lalpa hnenah a chawl hlen ta a ni. Hemi ni vek chawhnu dar 1:00-ah Rev. H. Manga Khongsai-in In lamah vuiin, Pro Pastor David R. Mihriemate chuan Mission Veng Thlanmual-ah a thlahliam ta a ni.