Kum 22-na, Issue 21, JUNE 27, 2009

YMA MISSION VENGTHLANG BRANCH PROPERTY HMAN LEH HAWH CHHUAH DAN

Young Mizo Association, Mission Vengthlang Branch chuan Chhiatni Thatni-a hman turin property engemaw zat a nei ve a; hengte hi veng chhung mipuite leh, Kohhran thleng pawhin kan tangkaipui em em a ni. Heng property hrang hrangte hawh leh hman dan hi kan hriat nawn ve fo a tha awm e.

1. BUNGBEL: YMA bungbel-te hi Chhiatni Thatni-ah veng chhung mite’n hawh theih reng a ni. Thatni bikah dilna siamin OB-te hnenah phalna lak hmasak tur a ni. Chhiatni-ah erawh chuan Chawkidar hnenah fel taka list siam tirin lak chhuah tur a ni a; heng bungbel-te hi YMA Hall-ah dah a ni.

2. THUTTHLENG: Thutthleng hi VC House hnuai, kawngpui ân-ah leh THP Hall-II ah dah an ni a. Thatni-ah dilna siamin, OB-te phalna lak hmasak a ngai a; Chhiatni-ah Chawkidar hriattira lak chhuah tur a ni. A dah leh lamah hian uluk taka dah luh a, rem fel thlap zel tur a ni.

3. GAS THUK: Thatni-ah man chawia hawh chhuah theih a ni a, dilna siamin OB-te phalna lak hmasak tur a a ni. A hawh ni leh a dah ni chhiar telin ni 3 chhung atan Rs 50/- hawhman a ni. Chhiatni-ah Chawkidar hriattir hmasak a, lak chhuah tur a ni a; hawh man a awm lo thung. Dimdawi taka hman tur a ni a, sa leh thil mawm lam chi rawhna atan hman phal a ni lo.

4. VANTLANG MIKE: Vantlang Mike hmang thei turte chu VC, YMA leh veng chhung NGO dangte leh Kohhran hrang hrangte an ni a; VC leh YMA tih loh, pawl dang hian mike hman an duhin YMA President/Secretary hnenah dilna siam hmasak tur a ni. Chhiat tawh leh rikrum thil a nih loh chuan zing dar 6:00 atanga zan dar 10:00 inkarah chauh au tur a ni a; Kohhran inkhawm laiin au loh bawk tur a ni.

Veng chhung chhiattawh (mitthi awm)-ah zing dar 6:00 atanga zanlai dar 12:00 inkarah, an thih atanga a hma thei anga Vantlang Mike-a puan tur a ni. Zing dar 9:00 hmaa puan hman chu a ni-ah vui tur a ni; dar 9:00 hnu lama puan chu lumenpui tur a ni. Zanlai dar 12:00 hma lama puan hman chu a tuk dar 12:00-ah vui tur a ni a; zanlai dar 12:00 hnu lama thi chu a tuk zing dar 6:00-ah puangin, a ni vek chawhnu dar 1:00-ah vui tur a ni.

Tum khatah chhuah vek sen a nih loh avangin YMA Hall hman dan leh tul dangte chu remchan dan anga rawn chhuah chhunzawm zel a ni ang.


VENG CHHUNG THUTHAR TAWI:

• Pi PC Lalhlimpuii (Manovi), Y Sec., Aizawl Hospital atangin a lo chhuak ta.
• Pu PC Rotluanga, Y Sec. (CP Road)-te chuan an fahmingkoh atan fanu an nei thar.
• Pi Biakthangi m/o Pu H.Thangluaia, M Sec., tar chak lo, In lamah enkawl mek a ni.
• Tv. Lalremruatdika s/o Pu Hrangkhuma, M Sec., pumna avangin Aizawl Hospital-ah enkawl a ni.
• Nl. Elizabeth C. Lalrinfeli d/o Pastor C.Lalsangliana, M Sec. Comm. member chu pum nuam lo avangin In lamah enkawl mek a ni.
• Np. Lalzirliani d/o Pu Lalhmunsanga, A Sec. luak, khawsik leh kawthalo avangin Kulikawn Hospital-ah enkawl mek a ni.
• Tv. Lalpianfela, A Sec., mitliam avanga Aizawl Hospital-a awm chu dam takin a lo chhuak.
• Pu Lalchangliana, A Sec., malaria PF leh thinlian avangin In lamah enkawl mek a ni.
• Pu H.Lalbiaktluanga, A Sec., Phai lama in check-up-a kal chu dam takin a lo haw leh ta.
• Pu Lalengliana Khiangte, A Sec., Durtlang Hospital-ah enkawl mek a ni.
• Er. C. Lalkima te chhung, Y Sec. chuan an In sak thar, Y Sec.-a mi chu an luah ta.
• Nl. Lalropuii d/o Pu Lalrohawnga (L), Y Sec. chuan Banaras Hindu University atangin Psychology-ah NET a hmu thar.
• Pu Laldawngliana te chhung chu Pu T.Kapliana (L) In, M Sec. atangin Pu Lalrinawma In, Y Sec.-ah an insuan lut.
• Nl. Remsangpuii d/o Pu H. Romawia, Y Sec. leh Tv. Lalnunzira, Model Veng-te chu June 17, 2009 khan Shalom Baptist Biak In-ah an innei.
• Pu Vankhawpuimawia te chhung chu Pu Rokunga In, A Sec. atangin Pu H. Lalbiaktluanga In, A Sec. vekah an insuan.
• Tv. Albert Lalthakima s/o Pu Varlianzova, A Sec. leh Nl. Lalrinpuii d/o Rev. C. Ronghinga te chu June 25, 2009 (Ningani) khan Jubili Kohhran Biak In-ah an innei.
• Pu Vanengzauva te chhung chuan Pu R. Lalduhawma In, A Sec. an luah thar.
• Pu Lalhmahruaia, Y Sec. (Kawn)-te chhung chuan an In bula an In sak thar chu an luahlut ta. Pu Lalhmingmawia, YMA Branch Secretary chu vawiin June ni 27, 2009 hian Shillong lamah a zin dawn a, Thawhlehni-a lo let leh tura beisei a ni.

ARTICLE: ZONUNMAWI
C. Vanlalmalsawma, M Section

Aizawl Hospital peng atanga Sikulpuikawn pumpelha ka kal laiin, nula pathum vel hi chhuk zawngin an lo kal thla a; an hmaah chuan nu pakhat hi rit lain a kal ve mek bawk a. Chutah chuan nula-te chu an inrawn a niin ka hria; ka kal pel a, kan hawilet leh chuan nulate chuan an hmaa kal nu rit la chu chhawk an lo tum mek a ni. Tlawmngaihna kan tih hi a lo hluin a va mawi em ve aw! khang nulate kha an seilenna chhungkuaah pawh Zonunmawi zirtirna an dawng tha hle tih a hriat theih a ni.

Tlawmngaihna hlu, tlawmngaihna hlu;
Zofate min chawi sangtu.
Pi pute nun ze mawi tak kha;
Chuai lovin vul reng se.

Aw, tlawngaihna hlu, vul reng la;
Zofate lairilah hian.
Chuai mai lovin par chhuah zel la;
Zonunmawi, zonunmawi.

Tanpui ngaite tanpui zelin;
Zonun an lo timawi thin.
Chhuanchham mei êng en maite;
Buh ei tur an lo pe thin.

Zonun timawitu tlawngaihna;
Thangthar nunah vulzelin.
Zofate tan par lo chuah se;
Chuai lovin vul reng rawh se.


Kan tunlai nunah hian, tangtharte hian aia upate zahna pawh hi kan lanchuahtir tam tawh awm love. Tlawmngaihna kan tih hi Mizo-te ta bik a ni lo, hnam dangte pawh hi an tlawmngai ve tho tih hriat a tha; tlawmngaihna hming hi an puttir ve lo mai a ni.

Kan pi pute nunmawi khan tunlai khawvelah hian sawi chuahte hi a lo hlawh tawh meuh lo a ni lo maw? Zoram khawvel han bih chiang a, zir chian hian. Hma kan sawnna hian kan hnam nunmawi te kha a lo thamraltir zo ta em ni? Mizo hnathlak peng hrang hrang pawh lo ni mah ila, Mizo kan nihna hi a bo thei dawn chuang lo; chuvangin kan hnam nunmawite kha vui liam mai lovin i kaitho leh ang u. Kan khawtlang nunte a lo nawmna turin zofate thinlung luah khattu ni sela; tuna min luahtu mahni hmasialna hi vui liamin awm mawlh rawh se. Hei hian kan ram leh hnam min ei chhe mek si a.

Kan nu leh pate hian Zonnunmawi a lo vul lehna turin ai a upa zahna leh tanpuingai tanpui te, mite tana inpeknate, kan pi pute nuna lo bet tlat thin kha min zirtir thar leh sela; tichuan Zonnunmawi chuan chuai lovin parfung a lo chuah ang a, Zofate tan a lo vul chhuak dawn a ni.



PASS THAR HRIAT THEIHTE

Tun hnaia University hrang hrangah Graduate leh Post-Graduate result tihchhuah a ni a; kan veng atanga pass kan hriat theihte kan han tarlang e. Kan hriathmaih palhte chuan ZNM Editorial Board hnenah inhriattir nise, kan han tarlang zel ang. Pass tharte kan lawmpui e.

Y SECTION
Ramdinthangi d/o F. Lalduhawma M.A. (Geo) - II
Lalremruata s/o R. Lalluta B.Sc.(H) - I (9-na)
C. Lalrinengi d/o C. Lalhmangaiha B.Sc. (H) - II
Lalhruaitluanga s/o R.Lalhmuliana B.Sc. (H) - II
F. Lallawmkima s/o F. Lalduhawma B.A. (H) - II
Malsawmtluangi d/o H.Lalzuala B.A. (H) - II
Laldingliani d/o R. Vanlallawma B.Com. - II
H. Ramliana s/o Hruaii Hmar B.A. - II
Vanlalruala s/o R. Lalluta B.A. (H) - II
Esther Lallawmzuali d/o Rongura Hrahsel B.A. (H) - II

M SECTION
Jacob Lalnunpuia s/o Vanlalzari B.E. - I
Lalrinpari d/o Lalrintluanga B.A. (H) - II
Lalrammawii d/o PC Lalnunmawia B.Sc. (Home Sc.) - II
K. Vanlalhmuaki d/o K. Vanlalhruaia B.Com. - II

A SECTION
Ramchangliani s/o F. Lalduhawma B.A. (H) - II

(Bracket-a ‘H’ tih hi Honour/Honor tihna a ni.)

Kum 22-na, Issue 20, JUNE 20, 2009

YMA MISSION VENGTHLANG BRANCH-IN YMA DAY ROPUI TAKIN A HMANG

June ni 15, 2009 (Thawhtanni) khan YMA Mission Vengthlang Branch chuan YMA Day vawi 74-na chu Basketball Court-ah ropui takin a hmang. Programme duan lawk tawh angin Pu Israela, Vice President chuan YMA Day lawmna Programme hi a kaihruai a, Pu C. Chuaukunga, CEC chuan a bul atanga a tawp thlengin min hmanpui bawk. Chawhma dar 11:00-ah tanin, tlai lam dar 4:30-ah kham lo takin he YMA Day lawmna hi khar a ni.

Basketball-a Section inelna Mipa Semi Final chu khelh hmasak ber a ni a; Match hmasa berah Y Sec. ‘A’ Team leh M Sec. ‘A’ Team-te’n khelin, M Sec. ‘A’ Team-te’n hnehna an chang a. Khelh hnihnaah M Sec. ‘B’ Team leh A Sec. ‘A’ Team-te’n khel ve lehin, M Sec. ‘B’ Team chuan hnehna an chang ve leh bawk.

Semi Final khelh zawh hian YMA Chhangte’n Hnam Lam an entir a, kalkhawmte mit an va ti tlai tehlul em! Kum 5 atanga kum 14 inkar YMA Chhangte hian Sarlamkai leh Chawnglaizawn-te an entir a, an thiamin YMA Day lawmna programme an tiropuiin, an ti hlu zual tak zet a ni.

Kum 2009 atana YMA Thupui, ‘Khawtlang Nun Siam That’ tih chu Pu Kaisangzuala, President-in tawi kim leh ngaihthlak nuam takin a sawi a. “YMA chu tanpui ngaite tanpuitu, kan Mizo hnam nun ze mawi vawnghima chhawm nung zeltu a ni a, YMA member-te chuan heng, Aia upa zah te, Tlawmngaihna te, Rinawmna te, mahni hnaa taihmaknate hi kan nunpuiin kan vawng nung reng tur a ni a; kan khawtlang leh keimahni min tichhetu Ruihtheihthil lakah leh, natna hlauhawm tak tak min thlen theitu Hmeichhiat Mipatna hman khawlohna lakah kan inthiarfihlim tur a ni” a ti.

Thusawi ngaihthlak nawm tak kham lo taka ngaihthlak zawh a nih hnuah Hmeichhe Basketball invawmluh siakna neih a ni ve leh thung a; hetah hian M Sec. an Champion a ni.

Hun khar nan Basketball Mipa Final chu M Sec. ‘A’ Team leh ‘B’ Team-te’n an khel a, a hmuhnawm tiah tiah hle mai. Basketball Court neih man a awm a, kan YMA member thalaite hian an lo thiamin, theihtawpin tan la chho zel se la Rampum huap pawhin kan hming a la thang leh ngei ang tih a beiseiawm takzet a ni. An inhneh tawkin inkhel a hmuhnawm hle a, a tawpah M Sec. ‘A’ Team chu Champion ta a ni.

A Sec.-in thutna tur an lo buatsaih diam te, M Sec.-in Basketball Court leh Pavilion mawi taka an lo chei diam mai te leh, Y Sec.-te’n kalkhawmte theitui leh Biscuit tui tak maia min han hrai velte chu YMA Day lawmna tihlawhtling zualtu a ni a; mahni mawhphurhna theuhte tha taka an hlen avangin Section tinte chungah leh, YMA Day lawmnaa kal zawng zawngte chungah YMA Mission Vengthlang Branch chuan lawmthu a sawi a ni.


VENG CHHUNG THUTHAR TAWI:

• Np. Lalhlimpuia s/o Pu Laltlanmawia, Y Sec. (Kawn), khawsik leh luak avangin Durtlang hospital-ah enkawl mek a ni.
• Nl. R. Zoremtluangi d/o Pu R. Lalrinzuala, Y Sec., pumna avangin In lamah enkawl mek a ni.
• Pu Eric Lalremsiama s/o Pu F. Lalchama, M Sec. chu Civil Hospital-ah enkawl mek a ni a, that lam a pan thei vak rih lo.
• Np. Lalthanmawia s/o Pu H. Lalbiaktluanga, M Sec. chu Mitliam avangin Manipur atanga lo hawin Durtlang Hospital-ah enkawl mek a ni.
• Pu R. Hmingthansanga, M Sec. (Synod HSS Teacher) chu a pum lam nawm loh avangin In lamah enkawl mek a ni.
• Nl. Ramfanmawii d/o Pu C. Thanthuama, A Sec., malaria avanga Durtlang Hospital-a awm chu a lo chhuak.
• Pu C. Ramthara, Grace Nursing Home a enkawl mek chu In lama enkawl lailawk turin a lo chhuak.
• Nl. Lalmawipuii Chawngthu s/o Pu Rozama Chawngthu, M Sec. chuan NET through-in M.A. (English) tha takin a pass a, kumin chhung thawk turin Serchhip College-ah a hna a zawm ta bawk.
• Tv. Vanlalfana s/o Pu H.C. Vanlalsiama, M Sec. chuan Madras Christian College atangin M.A. (History) I Div.-ah a pass.
• Tun thla chhung atan hetiang hian Sim Card booking discount a ni. AirTel : Rs 90/- ; Reliance: Rs 40/-; VodoFone: Rs 70/-. Pu RZ-a Dawr-ah booking tih theih reng a ni e.

ARTICLE: THARUM LEH MIHRING ZE LAIRIL
Mahlua, M Section

I nu, zaidam leh nunnem tak mai khan tharum thawhin midang nunna a laksak theih i ring em? I farnu hawihhawm, thenrual kawm thiam leh hlim thei tak mai khan tual a that theiin i ring em?

Tharum thawhna leh mihring-te inkungkaihna hi mi tin tana thil hriat chakawm tak a ni a; kumzabi 20-na hnu lamah phei hi chuan mithiamte pawhin hriatfiah tumin an chhui nasa ngang mai. Misual kan tihte, kutram kan tih te, nunrawng kan tihte nena ‘mi pangngai’ kan tihte hi engnge an danglamna?

Mihring zawng zawng hian tharum thawh duhna hi kan lo nei vek reng em? tih zawhna hi mithiamte’n an zir tak tak hnua an thutlukna chu - “Aw, nei vek e,” tih a ni tawl mai.

SUAL-A HRIN MIHRINGTE:
Zirmite sawi dan chuan kan pian tirh atangin mihring thluakah hian tharum thawh duhna hi thang anga per mai thei turin a inkam lawk sa reng a. Kum 3 kan tlin hma phei hi chuan chu thang inkam sa chu dipdaltu nei miah lovin per mai thei dinhmunah a ding reng niin an sawi.

Kan lo upat chhoh zel hian kan thluak pawh thangin, a insiam danglam chho ve zel a. Tharum thawh duhna leh kutramna rilru kan neih sate lo thunun a, lo tinep turin kan thluak hmalam (pre-frontal cortex) chu a thang lian ve zel a, mi pangngai-ah chuan thlarum thawh duhna chu kan khap dai fo thei ta thin niin mithiamte chuan an sawi a ni.

Tharum thawh chakna lo khapbettu thluak peng than len tirtu chu kan nitin nuna kan thil tawnte leh inzirtirna tha kan dawnte hi niin mithiamte chuan an sawi bawk.

THARUM THAWH TIRTU:
Mihringte’n buaina leh harsatna kan tawhte tharum hmanga vai kiang mai lova, ‘sem sem dam dam’ tia midangte ngaihchan duhna rilru nei lian apiang hi a tak takah pawh an thluak hmalam hi hmuh theihin a thang lian thin niin an sawi a. Chutiang nei tur chuan khawtlang leh chhungkaw inzirtirna tha a pawimawh hle niin an sawi bawk.

Neuroscientist Maria Couppis-i’n Bolivia rama hnam pakhat, Tinku mite a zirchhiana atangin buaina tharum hmanga chinfel inzirna hi a hnam pum anga neih a nih phei chuan chumi hnam thluak pianphung chu hmuh theihin a danglam thei hial a ni.

Thluak pianzia bakah hian kan taksa chemical pakhat, nawmna min petu, Dopamine hian tharum thawh kan duhna hi a hril hle bawkin mithiamte chuan an sawi a. Tharum kan thawh a, kan han invaivung vel hian Dopamine chuan thluakah nawmna a siam a, ruihtheihthil tite’n nuam an tih ang hian nuam kan ti a, Dopamine chu a ‘addict’ theih hial a ni. English football hooligan, Danny Brown chuan, “Kan hmelma lam fan-te nena intihbuai a, han insual hian herion tih tlukin nuam ka ti,” tiin a sawi a; amah hi zu leh drugs ti ngai miah lo a ni thung lawi si.

INVAWNNA HLOH DAN:
Tharum thawh duhna leh hetianga nawmna zawn duhna hi pre-frontal cortex tho hian a thunun a; a chang erawh chuan eng emaw vangin inthununna chu kan hloh thin.

Inthununna hloh theih dan pakhat chu tawhsual tawh vanga kan thluak a lo buaiin a awm thei a. Prof Charles Golden chuan puithiam zaidam tak pakhat chuan car accident-a a lu a sawh hnuin a nupui a sawisa hlum thelh niin a sawi nghe nghe.

Hei bakah hian zu, drugs, thluak natna depression leh mut kham loh angte lek pawh hian kan thluak hnathawh tibuaiin, tharum min thawh tir thei bawk.

Chumi piah lamah chuan kan nitin nuna kan thil tawnte leh khawtlang inzirtirna hian kawngro a su thui hle a. Hnam leh hnam, sakhua leh sakhua, pawl leh pawl etc. ang emawa midangte huatna inzirtina hian tharum thawhna chu thiam chantirin, kan taksaa inkam lawk sa at a lo ni bawk si nen, tharum thawhna sualah kan tlulut ta thin a ni.



I LO CHHINCHHIAH DAWN NIA
R. Vansanga, M Section

Naktuk (Pathianni), June ni 22 hi kumin chhunga ni rei ber hun, zan tawi ber hun a ni a. Karleh Tawhtanni atangin ni a tawi hret hret ang a, ni tawi ber hun, zan rei ber hun chu December ni 22 khi a ni dawn a ni.

Kan veng Thlanmual khu March 1988 atang khan hman tan a ni a, tun thla (June, 2009) ni 11 thleng khan mi 297 kan invui ta. Kum 80 chin chunglam mi 55 vui tawh an ni a, hmeichhia 35, mipa 20 an ni.

Kuang siam lawk a, a rang thei ang bera indah nghal nise tia rel bawhzui a kan hman hmasak ber chu October ni 5, 1998-a boral Pu Singaia (Pu K.Hrangluaia pa) kha a ni.

Motor hmanga invui ni tawh se tih hnua kan vui hmasak ber chu April ni 14, 2006-a boral Pu C. Darhlira kha a ni.

YMA-in zan thum chhung Khawhar In Kaihruaina a lak tanna chu Pu Varchungnunga thih ni, August 8, 2006 kha a ni.

A chunga kan tarlan, kuang siam lawka dah hmasak ber te, motor-a vui hmasak ber te leh, YMA-in Khawhar In Kaihruaina a lakte hi Court Zawl huam chhung veka awm an ni.

YMA-in Khawhar In a lak chhunga zan thum hi thingpui lum tawh loh nise a tih hman tanna chu Upa Zalianthanga thih ni, March ni 4, 2009 kha a ni.

TUNGE HNEK NA ZAWK?:
Kekawr dum ha zawk chuan a khabe tak maiah an hnek siah mai chu kekawr sen ha chuan a khebe a awrh nalh mai. Chutah kekawr sen ha a rawn insangphek leh, kekawr dum ha khabe a rawn hnek fuh leh chiah, kekawr dum ha chuan a khabe a lem hmak. Tunge hnek na zawk ang le?

Ha nget insiam hun hi zan muthilh lai a ni thin a. Mut dawna ha uluk taka nawhfai thin hi doctor thurawn, hanget venna tha a ni.

Thei ei tam hi hriselna leh damreina, fate kan duhsakna ber tur a ni. A ngaipawimawh duh lo chuan fute sep te te leh, Wai Wai te an lei sak tam zawk, an ti.

Kum 22-na, Issue 19, JUNE 13, 2009

YMA MISSION VENGTHLANG BRANCH EXECUTIVE COMMITTEE VAWI 6-NA THU

Kar kalta June ni 6, 2009 (Inrinni) zan inkhawm ban dar 8:15 khan YMA Mission Vengthlang Branch Executive Committee Meeting Vawi 6-na chu YMA Hall-ah neih a ni a, veng chhung chhiat tawh avangin committee hun hi sawn a ni. Meeting hi Pu Israela, Vice President-in a kaihruai a, member 24 kalin, 17 an kal lo. Member kal lo mi 14-te’n an kal theih loh chhan sawiin an pha. Thurel tlangpuite:

1. REPORT: Pu Lalhmingmawia, Branch Secretary hnen atangin committee hmasa thurel bawhzui a nih thu leh, census neih mekah kan veng chhungah foreigner (Burmese) 16 an awm thu report a ni.

2. SECTION REPORT:
Y Section - Damlo 4 an kan a; veng chhung Telephone Directory tur an khawn zo.
M Section - Damlo 3 an kan.
A Section - Damlo 3 an kan a; THP Hall-II tihfai hnatlang an nei.

3.Chhiatni-a hman tur Tuichhawpna bur 30 lei nise tih a ni.

4. Pi Biakkimi In sak nana sum hmuh leh hman dan Teasurer-in a report a; sum hmuh zawng zawng - Rs 73,060/-, hman ral - Rs 50,260/-, a la bang - Rs 22,800/-. Sum hman bang hi chhiat tawh leh tanpui ngai dangah a tul anga hman turin Branch-in kawl tha se tih a ni.

5. Workshop for Blood Donor Motivators, ni 16.6.2009 (Zirtawpni)-a neihah tel turin Pu David C. Zoliana leh Pu C. Lalnunsanga te ruat an ni.

6. Vana Memorial School-in zing dar 9:00 - 10:00-a Devotion neih nan leh thla khata Zirtawpni vawi khat dar 1:00 - 3:00 pm CCA atan YMA Hall hman an dilna chu phal sak a ni.

7. BLOOD DONATION: Committee hmasain June ni 6, 2009 (Inrinni)-a Blood Donation neih nise tia a lo rel tawh chu Civil Hospital-a thawktute hman remchan zawkna avangin July 11, 2009 (Inrinni)-ah neih zawk tura tih a ni.

8. Duty chungchang: Section tinte’n mahni Section huam chhungah theihtawp chhuahin hma lak chhunzawm zel nise tih a ni.

9. Chhiatni Thatni-a hman turin thingpui inna no leh thingpui thlit chhuahna plastic no-te lei nise, Office Bearer-te’n hma lo la se tih a ni.

10. Miharsate Pual Bawm hun a ni a, Rs 400/- thawhkhawm a ni.



VENG CHHUNG THUTHAR TAWI:

• Pu H. Thanhlira, Y Sec. (Darnam), thisensang avangin Civil Hospital-ah enkawl mek a ni.
• Pu Vanlalthanga Ralte, Y Sec., a mit (bile)-a lungte awm chu New Life Hospital-ah zai a ni.
• Pi Zohmangaihi w/o Pu C. Lalliana, Y Sec., thisensang, Aizawl Hospital atangin a lo chhuak.
• Pi Rohlumi w/o Pu K. Khualdawla, Y Sec., lung (heart) tha lo, Aizawl Hospital atangin In lama enkawl zui turin a lo chhuak.
• Pu C. Ramthara, A Sec., Nazareth Hospital-ah admit leh a ni.
• Pu H. Lalbiaktluanga, Branch Treasurer hlui, A Sec. chu vawiin hian Mumbai-a in check-up turin an kal leh dawn.
• Nl. Liansangpuii d/o Pu Liansailova, M Sec. leh Tv. Laltlanzova, Kolasib-te chu June ni 19, 2009 (Zirtawpni) hian Kolasib Diakkawn Presbyterian Kohhran Hall-ah an innei dawn.
• PEM LEH INSAWN:

1. Pu Peter Lalrinmawia te chhung, Edenthar veng atangin Pu R. Vanhlira (L) Building, Y Sec.-ah.
2. Tv. Darrokima te unau, Bawngkawn atangin Y Sec. Pu Lalawmliana In-ah.
3. Pu R. Vanlalhmuaka te chhung, Pu Denghlira, Y Sec. In atangin an In sak thar M Sec.-ah.
4. Pu R. Lalbiakenga te chhung, Y Sec. (Kawn), Bethlehem veng-a an mahni In-ah.
5. Pu F. Aihnuna te chhung, Rawpui atangin Pu Lalngheta Sailo, M Sec. In-ah.
6. Pu L.Thangmawia te chhung, Khatla ‘S’ atangin an mahni In, Y Sec.-ah.
7. Pu Lalbiakhlua te chhung, Upper Republic atangin Pu H. Kaphnuna (L), A Section In-ah.
8. Pu R. Lalrempuia te chhung, Mission Veng atangin Pi Zahmingliani, M Sec. In-ah.
9. Pi Lalropuii te chhung, Sialsuk atangin Pu H. Kaphnuna (L) In, A Sec. In-ah.

FAM ROLUNG MUAL:

Hming : DAVID LALREMSANGA
Kum : 31
Kohhran: Presbyterian
Thihni: June 11, 2009. 01:05 AM
Vui Hun: June 11, 2009. 01:00 PM
Vuitu:Pastor C. Lalsangliana
Section: A Section

Tv. David Lalremsanga hi March ni 21, 1978 khan Pu PB Lalbiakliana leh Pi F. Lalkhumi fahmingkoh turin Jairampur Medical College, Arunachal Pradesh-ah a lo piang a; an unau hi pali, hmeichhia pakhat leh mipa pathum an ni.

Aizawl College-ah B.Com a zawh hnuin politics-ah a lut a. Kum 2001 atangin MPC General Headquaters-ah Thalai Secretary niin, kum 2002-ah Aizawl South-II Block Secretary-in a awm leh a. Kum 2008 kum bul lam atang khan Zoram Kuthnathawk Pawl (ZKP)-ah General Secretary hna a chelh leh a ni.

Khawtlang leh Kohhran-ah a phak tawka inhmangin, Mission Vengthlang YMA, Y Section-ah pawh Committee Member a lo ni tawh thin. Chhiatni-ah khawtlang tana chenfakawm tak niin, a dam phawt chuan thlan laih a thulh ngai lo. Tlangval zaidam leh mi huatthu sawi ngai lo, hruaitu mi leh taima tak a ni.

Khamrang khuaah ser leh balhla huan neiin a enkawl mek a. June ni 5, 2009 (Zirtawpni) zan khan a ramriak lo haw chu a nun a nguai hle a. Pathianni khan Malaria a nih leh nih loh a thisen test a ni a; an hmuh loh avangin Thawhlehni-ah test nawn leh a niin, a awm a nawm loh avangin Civil Hospital panpui a ni a, pum lam natna nia ngaiin damdawite chawhin haw tir leh an ni. Mahse haw kawngah a thaw a chham tak avangin Aizawl Hospital panpui nghal a ni a; doctor leh nurse-te’n theihtawp chhuaha oxygen nen enkawl nghalin, June ni 11, 2009 (Ningani) zing dar 1:05 khan Chatuan Ram min lo pan san ta a ni.

Hemi ni vek hian In lamah Pastor C.Lalsangliana’n vuina hun a hmang a; Upa Lalrintluanga’n Thlanmual-ah a thlah liam ta a ni.



FAM ROLUNG MUAL:

Hming :NUCHHUNGI SAILO
Kum : 56
Kohhran:Baptist
Thihni: June 11, 2009. 10:00 PM
Vui Hun: June 12, 2009. 12:00 PM
Vuitu: Rev. H. Chalbuanga
Section:Y Section

Pi Nuchhungi Sailo hi Pu Lalchhuana leh Pi Sailothangi Sailo-te fa 5-na turin kum 1953 khan Lungsen khuaah a lo piang a; unau 8, mipa 2 leh hmeichhia 6 an ni. Kum 1983-ah Pu C, Sanghlira nen inneiin fa 5 an nei a, an fate 2-in an tet laiin an boral san tawh a ni.

Kum 1991 khan a pasal eizawnna avangin Mission Vengthlang-ah an lo pem a. Amah hi mi hlim thei tak, fiamthu ngaina mi leh thenrual pawl thiam tak a ni. A taima em em a, chhungkua a enkawlnaah a pasal leh a fate tana inpezo em em a ni a, a pasal leh fanaute tan thahnemngai taka tawngtai thin mi a ni bawk.

Baptist Kohhran an ni a; Mission Vengthlang-a Biak In an neih hma pawhin Upper Republic Biak In-ah taima takin a inkhawm tang tang thin a. Kum 1999-a Mission Vengthlang-ah Baptist Kohhran a lo din khan a sul sutu zinga mi niin, Baptist Kohhran Hmeichhe Pawl (BKHP) committee member a ni thin. Mihlim, Pathian faka zai leh lam nuamti mi a ni. Kohhran rawngbawlna Work Camp-ah te a kal fo thin.

Kum 2004 khan a mit (bile)-a lungte awm zai turin Civil Hospital-ah admit a ni a. A BP that loh leh zunthlum a vei avangin zai lovin In lama inenkawl turin chhuah leh a ni. Kum 2009 March khan a fanu kal tha lo, Shillong-a refer chu a zuk hruai a; kar khat vel an awm hnuah amah chu a khawsik avangin enkawl a ngai ve ta a, April ni 4 khan Aizawl lamah an lo hawn chho leh ta a ni. A khawsik a reh mai theih loh avangin April 14 khan Greenwood Hospital-ah admit a ni a; a that theih chuan loh avangin April 27-ah an inla chhuak leh a. May ni 3-ah Civil Hospital-ah indah lut lehin, a natna chu Thin Cancer a ni tih finfiah a ni ta a. Theihtawpa inenkawl zuiin, June 11, 2009 (Ningani) zan dar 10:00 khan a Lalpa hnenah min lo kalsan ta a ni.

Zanah tlaivarpui a nih hnuin, a tuk June ni 12, 2009-ah In lama Rev, H.Chalbuanga’n vuina hun a hman hnuin; Upa R.Vanmawia’n Thlanmual-ah a thlah liam ta a ni.

Kum 22-na, Issue 18, JUNE 06, 2009

YMA MISSION VENGTHLANG BRANCH CHANCHINBU ZONUNMAWI CHANCHIN TAWI

Zonunmawi”, a hming a mawi a, Mission Vengthlang khua leh tui, he veng tui liak tawhte tan chuan kan veng YMA Chanchinbu hming hi kan thinlungah a cham reng a ni. Inrinni zing a lo nih tawh chuan chhung tinin, “Khaw’nge Zonunmawi, a lo thleng tawh em?” kan tih thin kha.

Kum 1987 khan YMA mission Vengthlang Branch chuan veng chhung chanchin inhriat tawn nan YMA Chanchinbu siam ve nise tiin a rel a. Ngun taka a ngaihtuahin, chanchinbu hming atan Zonunmawi tih chu thlangin, editor hmasa ber chu Pu Ch. Rohmingliana, M Section a ni. Hemi atang hian tun thlengin khaihlak leh harsatna tawk lovin kan kalpui ta zel a ni.

A chhuah tan tirh, kum 1987 atanga kum 1999 thleng khan typewriter-a chhuin, cyclostyle-a her a ni thin a. January 1994-ah a ‘Lu’, Zonunmawi tih leh a behbawm te khi Pu C. Lalawmpuia, M Section, hetih laia Editorial Board member chuan nalh taka rawn design-in, computer-a stencil-a cut a ni a, a bak zawng chu typewriter leh cyclosetyle hmanga la tihchhuah chhunzawm zel a ni. February, 1999 atangin a thu dangte pawh computer-a chhut a ni a; hemi kum vek October thlaah offset-a print a lo ni ta. Hetih lai hian Pu R. Zothansanga, Y Section chu editor a ni. YMA Branch hrang hrang chanchinbu siam vete zingah offset-a chhu hmasa ber kan ni awm e.

Chanchinbu buatsaih tirh atanga hun harsa leh hreawm tak, khawl changkang lem lo tak tak hmanga, tlawmngai taka hma lo la tute zarah tun hun kan lo thleng thei hi a lawmawmin, a enkawltu hmasate inpekna a fakawm tak zet zet a ni.

Central YMA leh I&PR Deptt. tangkawp chuan kum 1999 atangin Mizoram pum YMA Branch chanchinbu tha thlanna, Sangkamlova Memorial Award a siam tan a; Zonunmawi chuan hetiang hian lawmman a lo dawng tawh a ni:

(1) Kum 1999; Editor: R.Zothansanga; 1-na
(2) Kum 2000; Editor: R.Vansanga; 2-na
(3) Kum 2001; Editor: R.Lalfakzuala; 1-na;
(4) Kum 2002; Editor: R.Vansanga; 1-na.

Hemi hnuah hian, kan thehluh kum apiangin Top 10-ah a la lang zel thin.

He kan veng YMA Chanchinbu, Zonunmawi tihlutu leh tun thlenga chawl lova la kal tir zeltute chu veng chhung mipuite in ni e. Veng chhung chanchin kan inhriattawn nana chanchinthar min rawn hrilh zung zungtu te, article rawn thawh zel thintu te, a chhuah hlan nghakhlel a lo chhiartu zawng zawngte in zaivaia chungah Zonunmawi Editorial Board chuan lawmthu a sawi takmeuh a ni. Zonunmawi vul zel rawh se.


VENG CHHUNG THUTHAR TAWI:

• Pi C. Lalzarzovi w/o Pu C. Laldina, Y Sec., Durtlang Hospital-a zai chu a lo chhuak.
• Pi Linda Lalrammawii w/o Pu H. Lalhlimpuia, Y Sec. (Darnam), lung that loh avanga Aizawl Hospital-a check-up chu In lama enkawl turin a lo chhuak.
• Np. Lalnunpuii d/o Pu Thangdailova, Y Sec. (CP Road), Graceland Hospital a tonsil zai chu dam takin a lo chhuak.
• Pu Vanlalzawna s/o Pu Ngurchhawna, Y Sec. (CP Road), scooter accident avanga damdawiin-a awm chu dam takin a lo chhuak.
• Pi Vanlalsawmi w/o Pu V.L. Vuana, Y Sec. (CP Road), a kal-a lungte awm Durtlang Hospital-a zai a nih hnuin dam takin a lo chhuak.
• Pi Zahmingthangi w/o Pu Roliana, M Sec. chu New Life Hospital-ah a thyroid (hrawk) zai a ni.
• Pi Lalthanpuii w/o Pu Vanlalsawma, M Sec., Durtlang hospital-ah enkawl mek a ni.
• Pu Lalthianghlima, M Sec.-te chuan a pahnihna atan fanu an nei thar.
• Pu Lalrinchhana, A Sec.-te chuan fapa an nei thar.
• Pu H. Lalhlimpuia, Y Sec. (Darnam) chu Aizawl District Table Tennis Association (ADTTA) Committee Member atan ruat thar a ni.
• Pi Lalmuankimi w/o Pu Vanmalsawma, Zonunmawi Manager, kar khat lai Shillong-a zin chu dam takin a lo haw leh ta.
• Tv Lalruatkima, A Sec. Asst. Leader chu chhungkaw chakkhai ngaihvenin Phai-ah a thang mek.
• Tv. Lalzarliana c/o Pu Lalhunthara (L), A Sec. leh Nl. Lallawmpari, Chanmari vengte chu June 4, 2009 khan Jubili Kohhran Biak In-ah an innei.
• PASS THARTE: (1) Tv. Saisangzuala s/o Pu Lalrolura, Y Sec.; HSLC Compartmental Exam; 3rd Div. (2) Tv. Vanlalhmachhuana s/o Pu R. Lalhmuliana, Y Sec.; CBSE Cl-X (Lett. in Maths, Sc. SS & Eng).

FAM ROLUNG MUAL:

Hming : LALTLANZOVI
Kum : 29
Kohhran:Church of God
Thihni: June 01, 2009. 08:10 AM
Vui Hun:June 01, 2009. 01:00 PM
Vuitu:Pastor K.Rothanga
Section: A Section

Pi Laltlanzovi hi kum 1980 January ni 1-ah Ratu khuaah a lo piang a; an unau mi pasarih, hmeichhe pathum leh mipa pali zinga a naupang ber dawttu a ni. Mission Vengthlang-ah hian kum 1999 khan an rawn pem lut a, tuna a pasal Pu Ramchungnunga nen hian kum 2003 khan inneiin, tunah hian A Section-ah an fanu 3 te nen an khawsaho mek a ni.

Pi Laltlanzovi hi mi hlim thei tak leh thenrual kawm thiam tak a ni a. Natna khirh tak a tawrh lai pawh hian midang tana hmuh hreawm leh buaipui ngai lutukin a awm ngai lo.

Vanduaithlak takin natna khirh tak, Thisen Cancer chu kum 2008 August thla khan a nei tih hriat chhuah a ni a; Nazareth Hospital-ah thla thum lai enkawl phawt a ni. Hemi hnu hian dam angreng taka lo chhuakin, hemi hnu kumin May ni 15 atang khan a natna pangngai avang hian a rawn zual thar leh a. In lamah theih ang anga inenkawlin, ni 31.5.2009 zan khan Civil Hospital-ah kalpui a ni a; nachhawkna te an pek hnuah haw tir leh a ni. A tuk ni 1.6.2009 zing khan Aizawl Hospital-ah dah luh niin, zing dar 8:10 khan Chatuan Ram min lo pan san ta a ni.

In lamah Pastor K. Rothanga’n vuina hun a hman zawh hnuin Thlanmual-ah Upa R.C. Ngura’n a vui liam ta a ni.


FAM ROLUNG MUAL:

Hming : T. KAPLIANA
Kum : 80
Kohhran:Presbyterian
Thihni: June 02, 2009. 2:35 PM
Vui Hun:June 03, 2009. 12:00 PM
Vuitu: Pastor C. Lalsangliana
Section:M Section

Pu T. Kapliana hi kum 1930 khan Lungkawlh khuaah a lo piang a; an unau pathum zinga milai a ni. Kum 1954 khan Pi Saichhingi nen inneiin, fapa pahnih leh fanu 3 an nei a; an nu Pi Saichhingi hian 1995 kum khan a lo thihsan tawh a ni. 1985-ah Aizawl lamah rawn pem thlain, Y Section (Darnam)-ah In luahin an khawsa a; nikum 2008 khan M Section-a an mahni In chu an luah lut a ni.

Pu T. Kapliana hi mizopa tak, pa tlawmngai, inngaitlawm tak a ni. Tar chaklo ni a, a bengte a that loh hnu pawhin mi biangbiak peih tak leh, thenrual kawm thiam tak a ni. Kohhran bel tlat mi a ni a; kum 1984 Hlimpui khan manin, zai leh lam te, tawngtaite a peih em em a; inkhawm leh lenkhawm-a zai hi a nuam tih ber a ni.

Ni 19.12.2008 khan Lungkawlh-ah a nauin Pathian a chawimawina hmang turin a kal a; Krismas te hmang nghalin a hlim hle. Ni 29.12.2008 khan a zing tho tur chu BP sang avanga stroke neiin a tlu a, ni 2.1.2009 khan Aizawl-ah rawn phurh thlak a niin, Aizawl Hospital-ah admit nghal a ni. A pang khing zeng chungin ziaawm lam a pan hreta a lan avangin ni rei awm lovin In lama enkawl zui turin a lo chhuak a. Dam vat vata inkhawm hlan a nghakhlel hle thin.

Hetia that lam a pan zel nia a lan lai hian ni 10.5.2009 chawhnu dar 1:00 vel khan a kaih vak mai a. A tukah doctor-te rawn a nih hnuin 12.5.2009 khan hospital-ah admit nawn leh a ni a; drip khai leh injection chu enkawlna awmchhun a ni ta deuh mai. Ni 18.5.2009-ah beidawngin damdawiin atangin an chhuak a; doctor leh nurse-te rawn chunga theih tawpa enkawl reng a niin, a lo chau zual tial tial a, ni 2.6.2009 chawhnu dar 2:35 khan a rawng a bawl thin Lalpa hnenah min lo chawl san ta a ni.

Ni 2.6.2009 zanah tlaivarpui niin, a tuk ni 3.6.2009 chhun dar 12:00-ah In lamah Pastor C.Lalsangliana’n vuina hun a hman zawh hnuin Thlanmual-ah Rev. K.Lungmuana’n a vui liam ta a ni.



LAWM LO THEI KA NI LO
Upa Lalhriata, A Section

Mite'n, 'Tap lo thei ka ni lo, ' an tih vawng vawng laia, "Lawm lo thei ka ni lo," tih thu ziak thei dinhmuna ka han ding ngawt mai pawh hi lawm lo thei ka ni lo ve.

Pathian malsawmna liau liauvin ka kutchhuak tlawm tak 'Chûn chawi loh' chu MAL chuan "Book of the year, 2008"-ah a lo thlang hlauh mai a, a va lawmawm tehlul em! Chutih laiin Mission Vengthlang YMA Branch lian tak chuan phu loh chawimawina min hlan ta lehnghal a. Thu chei (citation) mawi tak leh dictionary hlu tak bakah, tangka fai Rs 500/- a la tel cheu. Keini khawtlang tana tangkaina nei ve miah lo hi mite'n min hre ve meuh pawha kan inrin loh laiin min lo hre em em a; kan hlawhtlinna neih ve chhun te chu tha na miah lovin min chawimawi a; kan chhungkua chu lawm lo thei kan ni lo ang bawkin kan lawmna hi sawi chhuak lo thei kan ni lo bawk a ni. Veng chhung leh khawtlang timawitu nih theih zel a va chakawm em!

Hetiang chawimawina hlu tak dawng thei tura min hruaitu leh mal min sawmtu Pathian chungah kan lawm em em bawk. Heng thil zawng zawng hi 'Ama tih vek' a ni si a.

Kan naupan laia ka pa nen vahai thang kan kam te min ti hre chhuak thin. "Thang pakhat hi i pual ni rawh se," a ti a. A tuka kan va en chuan ka 'thang' ngei maiah chuan vahai a lo awk a. Ka pa chuan, "Hriata thangah vahai a lo awk a, " tia mi hnena sawi vel chu nuam a ti hle a. A awktu nihna chu min chuhpui miah lo. Dik tak chuan kei chuan kut hmawr pawhin ka khawih lo va, ama tih vek a ni zawk. Mahse, min itsik lo va, a awktu nihna chu hlim takin min pe a. A thang kamtu ni miah lo khan 'Vahai ka awk ta' a ni.

Pathianin finna leh ziak tur thute min pe a; mahse, chawimawina ka dawn chu, ‘Keima tih zawk asin le, ' tiin min chuhpui miah lo va. Chutih a hnehin Kohhran mipuite leh YMA thlengin min chawimawi turin a chawk tho ta zawk niin ka hre thin a; lawm lo thei ka ni lo a ni. Tumah hian min lawmpui ta lo se, a hlutna a tlahniam ngei ang le.

YMA tangkaizia hi tlem tal han sawi zui ila. Kum khat lek pawh han chawl ta se engtin tak awm hlawm ang i maw? A rethei apiangin kan tuar nasa ang ti dawn ila, a hausate pawh chhiat ni that ni nei ve tho an nih avangin a nghawng ve tho ngei ang. Thlan laih emaw mitthi lu men a ngaih changin tu nge hlawh phut ngai? Khawtlang thianghlim nana tlaivara an duty changa lawmthu hrilhtu an awm miah loh pawhin YMA hi a vui ngai em ni?

Mizorama mitin huap thei pawl awmchhun chu YMA hi a ni a. Congress Party chuan Kohhran pawl hrang hrang a fun khawm a, mahse, MNF, etc. chu a huap tel thei lo. Presbyterian Kohhran chuan MNF, Congress, etc. a hui khawm a, mahse Baptist, UPC, etc. erawh a huam tel thei si lo. YMA erawh chuan heng zawng zawng hi a huap kim vek a, lungrual takin ke a pentir a nih hi. Mizo min tipumkhattu YMA hi vul zual zel sela, mi tin tan a par rimtui hi chhuah zel mawlh rawh se.