Kum 22-na, Issue 14, MAY 9, 2009

YMA MISSION VENGTHLANG BRANCH EXECUTIVE COMMITTEE VAWI 5-NA THU

May ni 7, 2009 (Ningani) zan khan YMA Mission Vengthlang Branch Executive Committee Meeting vawi 5-na chu YMA Hall-ah neih a ni. Meeting hi Pu Kaisangzuala, President-in kaihruaiin Pu Rosangzuala, Treasurer chuan Pathian hnena tawngtaina hun a hmang. Meeting-ah hian member 26 kalin 15 an kal lova, heng zinga 9 te hian harsatna an neih thu sawiin an pha a ni. Thurel tlangpuite hetiang a ni.

1. Report:

1. Section leh Sub-Committee peng hrang hrangte’n an hmalakna leh hmachhawpte an report a, heng zinga ‘A’ Section ten Hmeithai In sak that tura ruahmanna an siam leh hma an lak mek chu Branch anga hmalak chhunzawm nise, heta tana sum mamawh Rs 18,000/- ‘A’ Section hmuh tawh bak Rs 20,000/- dang chu ‘Y’ leh ‘M’ Section ten rawn ngaihtuah belh se, hmalak zel dan tur chu Branch OB leh Section hruaituten rawn ruahman se tih a ni.
   
2. Pu Lalhmingmawia, Secretary hnen atangin Branch hmalakna hrang hrang leh Meeting hmasa thurel bawhzuia tihhlawhtlin a nih thu ngaihtlak a ni.

2. Mission Vengthlang Sporting Club-in Table Games neih nan YMA Hall hman an dilna chu phalsak a ni.

3. YMA Day (15.6.2009) chu chhun leh zanah Programme siamin hlim taka hman nise, Programme leh Item neih turte OB ten rawn duang se tih a ni.

4. June ni 6, 2009 (Inrinni)-ah a mamawh apiangte tana hman turin a thlawn a thisen pek (Blood Donation) leh tura rel a ni.

5. YMA Hall leh a hnuaite chei that nise tih a ni a, hmalak dan tur leh ruahmanna te siam a sum pawh a tul anga lo ngaihtuah turin OB-te ruat an ni.

6. Vengchhung Telephone Directory (Landline & Mobile) siam nise, Section tinin mahni Section huam chhung a mite lo chhinchhiah se tih a ni.

7. Pem lehkha nei lova kan venga lo pem lutte chu Section tinin mahni Section huam chhunga mite Pem lehkha YMA a rawn thehlut ngei turin hriattir nawn leh se, Pem lehkha neilo chu Chhiatni Thatni-ah veng chhung mi ah pawm loh nise tih a ni.

8. April ni 14, 2009 (Thawhlehni)-a Kohhran hrang hrang thalai pawl hruaitute nena Chhiatni Thatni leh Khawtlang Nun Siamthat kawnga inkawmhona neih chu tlirletna neih a ni a, hlawk thlak a tiin, mi sawmte an lo kal tha chu lawmawm a ti a; hetiang zirhona hi neih fo theih nise a duh hle.

9. May ni 1, 2009 (Zirtawpni) zana HSLC leh HSSLC pass lawmna thlirlet a ni a. Programme felfai taka hman a nih leh, khuallian-in hun tawp thlenga a hmanpui thei chu lawmawm an ti hle.

Meeting-ah hian mi harsate pual bawm hun a ni a Rs 520/- thawhkhawm a ni.



VENG CHHUNG THUTHAR TAWI:

• Pi Lalhmuaki w/o Pu R. Hrangzuala (L), Y Sec. (Dam) chuan an In bula a chetsualnaah a ngal ruh a titliak a, Greenwood Hospital-ah enkawl mek a ni.
• Pi Liankhumi, d/o Pu Sanglura, Y Sec. (Darnam), hun rei tak damlohna-in a tlakbuak chu a la tha thei meuh lo; In lamah enkawl mek a ni.
• Nl. Lalfakmawii d/o Upa L.Ramthanga, Y Sec., damlo In lamah enkawl mek a ni.
• Pu Lalnunfela, Y Sec. (Dam) te chuan a pathumna atan fapa an nei thar.
• Pi Rothangi m/o Pu Lalremthanga, M Sec., damlohna avanga Kolkatta panpui chu Nilaini khan zai a ni a, enkawl chhunzawm zel a ni.
• Pu Lalhlira Sailo, M Sec. (Court Zawl), damlo chu Civil Hospital-ah enkawl mek a ni.
• Pu C. Ramthara, A Sec., damlo chu Grace Nursing Home-ah enkawl mek a ni.
• Pu Chhandama, A Sec., taksa chaklo leh hnar thi chu In lamah enkawl a ni.
• Pi Zosangliani w/o Pu Lalnunkima, A Sec., damlo chu In lamah enkawl mek a ni.
• Nl. Emily Lalrinpuii d/o Dr. Jasper Rongura, Y Sec. chuan St. Joseph University, Bangalore atangin M.A. (Economics) distinction-ah a pass a, an class-ah 2-na a ni.
• PEM THAR: (1) Pu Jonathan Lalmuanawma te chhung, Mission Veng North atangin Pi Kawlveli In, Y Sec.-ah. (2) Pi Laltharpuii te chhung, Bungkawn Nursery atangin Pu F. Malsawma In, M Sec.-ah. (3) Pu Lalremruata te chhung, Thingdawl atangin an mahni In, A Sec. (Pu Sangkhawnghina In bul)-ah. (4) Pu Vanlalhruaia te chhung, Dengsur atangin Pu Chhuankima In, A Sec.-ah. (5) Pu Lalthlamuana te chhung, Thenzawl atangin Pu Ralkapzaua In, Y Sec-ah.
• Pi Hmingthanzuali A Sec. chu Pu K. Lalbiakvela Inhnuai M Sec ah a rawn insawn.
• Nimin Zirtawpni khan A Section-te’n sum tuak nan vawk an talh a, thlawmngaia lei saktute chungah an lawm hle.
• Pu C. Rothianga, M Sec. chu 1st Youth World Weightlifting Championship, Chiangmai, Thailand-a neih turah India ram Team Manager turin a kal dawn. Hetiang mi kan vengin kan nei hi a lawmawm hle.

MVT MIDDLE SCHOOL INTUAITHAR

Mission Vengthlang Middle School chuan school naupangte’n taihmakna leh hmasawnna chak zawk an neih theih nan, a hnuaia mi ang hian school naupangte tan ruahmanna an siam:

• Cl-V leh Cl-VI thiam berte chu Promotion result chhuah ni-ah lawmman pek an ni ang. Term Exam hrang hranga mark hmuh belhkhawma sang ber chu an class-a thiam ber lawmman dawng tur a ni. Lawmman hian certificate leh Rs 300/- a keng ang.
• MSLC exam (Cl-VII)-a distinction-a pass-te chu lawmman atan certificate leh Rs 300/- zel pek an tum.
• MSLC exam (Cl-VII)-a subject hrang hranga letter hmute, subject pakhat zel-ah Rs 100/- pek an tum.
• Lawmman pek turte hi zirtirtute’n an thawhkhawm dawn a ni.
  

HMEITHAI IN SA DAWN

Branch Executive Committee thurel angin, YMA Mission Vengthlang Branch chuan hmeithai Pi Lalbiakkimi In tur a sa dawn. Pi Biakkimi te chhungkua hi Thlanmual kawng Pu P.L. Siamliana ramah rap-in chhe takah an khawsa mek a, a fate hi 5 la naupang te te an ni, tuna an awmna In hi furpui han tuarpuina tlak a nih tawh loh avangin A Section chuan sak that ngei tha in an hria a, an Section sum bakah an Sectionhuam chhungah a remchan ang angin Sum leh hmanraw tul ang angte an lo khawnkhawm tawh a, heng an khawnkhawm hi avaiin Rs 18,000/- hu lai a ni tawh.

Branch Executive Committee chuan A Section hmalakna hi tha a tiin, Branch-a an rawn thlen angin Branch pum huapa hma lak chhunzawm a, a rang thei ang a In hi sak thuai nise a ti. Heta tana sum la mamawh tur dang chu Branch sum bakah Y Section leh M Section ten Rs 10,000/- ve ve rawn thawhchhuah tum se a ti a, Vengchhung mi inphal leh tanpui ngaite tanpui tura inpeih rengte zarah he hmachhawp hi tihhlawhtlin ngei a in beisei a ni. Tin, an awmna tura phal taka a ram hawh tirtu Pu P.L. Siamliana hi a fakawm tak zet a ni.

Sum leh hnatlang tha engemaw zat sen a ngaih dawn avangin mahni theihna zawn theuhah tanpui ngaite tanpui tur leh hnatlanga thawkchhuak ngei turin YMA memberte lo inkau lawk ang u.




MOTOR NEITE NGENNA

The Mizoram Regulation & Control of Vehicles Parking Rules No 12-naah chuan Motor zawng zawng (Sorkar emaw, Private etc. emaw pawh huam vekin) chu Motor Garage-a dah vek tura tih a nih laiin, Aizawl khawpui chhungah hian chutiang dan zawm chu mi tlemte zawk niin a lang. Mi tam zawkte hian vantlang kawngpui chu mahni ram ang maia Motor dah nan an hmangin mipui ke-a kalte leh Motor veka kalte tan harsatna nasa takin a thlen a ni. A bik takin rikrum thil leh kangmei chhuakah pawh vantlang kawngpuia Motor dah avangin Kang thelh pawl Motor-ten (Fire & Emergency Secvice) a hun taka an hnathawhna tur hmun an thlen loh phah sawi tur a awm ta nual a ni.

YMA Mission Vengthlang Branch chuan Sorkar dante zawma, mipui ke-a kalte, motor veka kalte tan leh rikrum leh kangmei chhuak laka thawktute tana harsatna kan thlen lohna turin Vengchhung mipui Motor neite chu Garrage-a Motor-te dah vek turin a ngen a ni. Dan hnuaia hrem leh chawi tir ngai lova thuawih taka Dan zawm mai hi zahawmna leh thenawm khawvengte tana mi tangkai nihna a ni.

Tin, Vengchhunga Traffic Sign leh Sign Board awmte tidanglam leh tichhe lova, uluk taka enkawl turin vengchhung mipuite a ngen tak meuh a ni e.