Kum 22-na, Issue 17, MAY 30, 2009

YMA MISSION VENGTHLANG BRANCH-IN YMA DAY ROPUI TAKIN A HMANG DAWN

June ni 15, 2009 (Thawhtanni) khian YMA Day chu kan lo thleng leh dawn ta reng mai le. YMA Mission Vengthlang Branch Executive Committee thurel angin Branch leh Section Office Bearer-te chuan YMA Day programme an rawn duang fel ta.

YMA DAY PROGRAMME:
A hmun: MVT YMA Basketball Court
A hun: Ni 15.6.2009 (Tawhtanni), 11:00 am
Hruaitu: Pu Israela, Vice President
Section Inelna: Basketball (Mipa); Semi-final
Hnam Lam: YMA Chhang atangin
Section Inelna: Basketball invawm luh siak (Hmeichhia)
Thusawi: Pu Kaisangzuala, President
Thupui: Khawtlang Nun Siamthat
Section Inelna: Basketball (Mipa); Final
Announcer-te: Tv. Lalmalsawma Khiangte leh Nl. Elizabeth C. Lalrinfeli

Hetiang hian section hrang hrangte mawhphurhna insem a ni:
(1) Refreshment: Y Section
(2) Decoration: M Section
(3) Seat Arrangement: A Section

Section tinin mahni Section awmna tur Silpoulin zar theuh tur a ni a. Hemi ni hian member a tam thei ang ber kal tura beisei leh ngen kan ni e.

Section inelna tur Basketball hi Section tin atangin mipa team 2 leh hmeichhia team 1 theuh tel tur a ni. Basketball mipa hi Semi-final hmalam zawng chu YMA Day hma hian khelh zawh tur a ni a; Sports Sub Committee-in khelh hun tur chu ruahmanna siamin an lo buaipui ang.

Section tinte’n Champion thei theuh turin tun atanga lo inbuatsaih a, tan lo lak char char tawh mai tur a ni e. Tin, mahni Section mawhphurhna theuhte tha taka hlen tura beisei leh ngen kan ni bawk.


VENG CHHUNG THUTHAR TAWI:

• Pi Rosalind Vanlalchhungi w/o Pu Zodingliana, Y Sec. (Kawn), pumna avangin Durtlang Hospital-ah enkawl mek a ni.
• Tv. R. Lalzarliana s/o Pi Khuangthuami, Y Sec. (Kawn), an In bul kopanga a tlak avanga a hmai sawh hliam chu In lamah enkawl mek a ni.
• Pu F. Lalsanga, Y Sec. (Dam), damlo chu sa tha chak vak lova, In lamah enkawl zel a ni.
• Pu Kulhhmingthanga, Y Sec. (Darnam), damlo, In lamah enkawl mek a ni.
• Nl. C. Lalmuanpuii d/o Pu C. Sanghlira, Y Sec. (Kawn), damlo chu Civil Hospital-ah dah luh leh a ni.
• Pi Zoremi, A Sec., damlo, Aizawl Hospital-ah enkawl mek a ni.
• Pu R. Zakamlova, A Sec., Civil Hospital-a enkawl chu a lo chhuak.
• Pu Lalramthanga te chhung, Y Sec. (Kawn) te chu an In chung sak tharah an insuan lut ta.
• Pi Lalvuani te chhung chu Pu James Zothuama In, Y Sec. atangin Pi Khuangthuami In, Y Sec. (Kawn)-ah an insawn.
• Pu Lalramtana te chhung chu Pu Vanrammawia In, Y Sec. atangin Pu R. Vanlalhuma In, Y Sec. (Dam)-ah an insawn.
• Nl. Jamie Zodinsangi Hrahsel d/o Pu H. Rongura, Y Sec. chuan NET Exam (English) a kal tlang a, JRF (Junior Researh Fellowship) hmuin, PhD a zir chhung thla tin Rs 10,000/- chuang a dawng ziah dawn a ni.
• Pu C. Rothianga, M Sec., Chiangmai, Thailand-a Mizoram Weightlifting team hruai chu dam takin a lo haw leh ta.
• Pu Lalsangliana h/o Pi Lalchhanchhuahi (L), M Sec. (Bethani) chu a hnathawhna Keifang atangin Mamawii Girls HSS-ah sawn a ni.
• CBSE Result hriat belh:

1. Tv. Lalremruata Ralte s/o Pu Lalthanzuala Ralte, Y Sec., CBSE atangin Cl-X Distinction-ah a pass (Lett. in Math, Science, SS leh English)
2. Tv. Vanlalhmachhuana c/o Pu Lalthanzuala Ralte, Y Sec., CBSE atangin Cl-X Distinction-ah a pass (Lett. in Math, Science, SS leh English)
3. Tv. Lalhruaitluanga s/o Pu Lalthanzuala Ralte, Y Sec., CBSE (Delhi) atangin Cl-XII (Sc.), 2nd Division-ah a pass.

ARTICLE: TEK DANNA HIAN TEK A DANG THEI EM?
C.Lalawmpuia, M Section

Thei lo. A dang lo mai ni loin, a kalkawng a siamsak zawk!

Tek danna hi chuti takin kan uar lo va. Uar viau turin min deng fo lo bawk a, a vanneihthlak. US te khu chu a ram a lian hem hawm bawk a. Kum tin mi 1,000 chuang dengin 100 chuangin an thihpui ziah nia chhut a ni. Direct hit kher lohin.

Chhumah khian electric charge a awm tih chu Benjamin Franklin(1706–1790)-a khan lehkhachaih hmangin a lo finfiah daih tawh a. Tun hnuah hian ‘a lehkhachaih chaih laia a thi lo kha a vannei’ kan ti fo thin. Mahse, tekin a deng miau lo va, a thih ngawt chhan tur a awm lem lo. A experiment erawh tek den palh hlauhawm em em a nih avangin tihnawn fo chi a ni lo.

Engtiang takin nge chhumah khian electric charge a insiam pun hluai a, tekah a lo insiam tih hi mi thiamte pawhin an la hre fiah vek bik lo. Chu electric charge insiam pung vak chuan inpaih thawlna tur a rawn zawng a. Lei hi a rawn deng ta nghek mai thin a ni. Mahse, kan awmna lei hi Siamtu hian a duang thiam em kher a. Eng anga current sang pawhin rawn deng zawt zawt mah se, a lo dah zero charge zel tho!

Vawi khat tek han tla dur hi mit khap kar lek a ni nain, in chhunga kan current chhit let nuai 4 vel daiha chak a ni thin a, hlauhawm ther ther tak chu a ni. Kawng lehlamah hlauhawm em em mah se, khawi lai nge a rawn den dawn tih hi sawi lawk ngaihna awm miah lo a ni tlat thung. In chhawng sang tak tak, thir ban sang tak tak leh thing mal din sang takte a deng ngei chuang lo va, a deng lo chuang hek lo va, a bul lawka lei a rawn den zawk chang a awm tho va. A duhna tak a deng pawp pawp a ni ber. Tek danna kan tih lah hian a bul vela tek tla tur engtin mah a hip chuang der lo bawk.

Eng pawh chu ni se, a rawn deng emaw, deng lo emaw, ven ngai zual hrim hrim a awm thin a. Petrol leh gas dah khawmna hmun te, puak thei leh electronics bungraw chhek khawmna hmun ang te hi chu tek danna siam ve hrim hrim a ngaihthatawm.

In bul maia tek a rawn tlak hian, leia current kal ral tur chuan electric line emaw, leia earth line kan phum emaw, eng hrui hrui emaw a la rawn zawh palh thei a. Hei pawh hi in chhunga kan electronic bungraw tichhe thei khawp a la ni thin. Chuvangin, electronic khawl khawih loh a tha a, tek tlak hma atanga power plug phawi vek a him. TV phei chu power cable bakah Star TV cable phawi tel ngei tur.

Electric power kal fuh lo ven nana kan hman, cut out, MCB, spike guard kan tihte hian tek hi a veng thei lo hrim hrim a. Chuvangin, electronic bungraw dimdawi ngai zual tamnaah chuan a bik taka siam, tek man khawl, lightning arrester an hmang thin.

Tek tlak dum dum lai chuan in chhung hula awm hi tih theih awmchhun leh tha ber a ni deuh mai. Landline phone hman loh a tha a, cordless emaw, mobile emaw hman a him zawk. In chhunga kan mobile hmang lai min la rawn deng fuh palh tâlh a nih zawngin, network chungnung zawkah post paid bill pe tura kaihthawh kan nih mai hmel!

Pawna kan awm chuan tlang chhipa awm hi a duhawm lem loh; tek hian ruam lam a deng tlem zawk. Car chhunga awm hi a eng emaw him phian. Tekin car a rawn deng emaw, a siperin a rawn deng emaw a nih chuan car body thir zawhin leiah a inkhawh lut nghal thin (Faraday’s cage an tih angin). Tek current meuh chu motor ke rubber pawh hian a dang zo bik lo va, leia a inkhawh luhna kalkawng tha tak a ni zawk. Motor ke thar i en chuan a wheel rim leh a tyre inkarah thir mum an dah bawk nalh thin a. Hei pawh hi car body leh a ke current inkalpawh that lehzual nan motor siamtuten an dah an ti alawm!

(Thu belh: Tek tlak laia Mobile Phone hman chungchang kar hmasaa kan rawn sawi kha he article nen hian a inkungkaih avangin sawi zawm mai ila. Mobile Phone, Radio, Wireless Transmitter etc. in an hman, boruaka kal chi signal, Radio Wave-ah hian Tek a kal thei lo a; chuvangin tek tlak laia mobile phone hman hi dan pangngaiah chuan a hlauhawm lova ngaih a ni. Landline phone leh TV angte’n an hman, signal kalna kawng atana wire leh cable hi tekin a zawh theih avangin he’ng khawl hi tek tlak laiin hman a hlauhawm zawk. Landline phone-ah pawh codeless ang chite hi mi kan biak laiin wire-a inthlunzawm a nih loh vangin tek den a hlauhawm lem loh.

Mobile Phone khawlah hian electric conductor tha tak, thir leh thil dang a awm avangin chutiang chu tekin a zawh thei tho a; tek tlak duhna hmun, thingkung bul leh hmun âwl zau lai angah te hi chuan mobile phone hi hman fimkhur erawh a ngai niin thil hre zawkte chuan an sawi. ZNM Ed. Board)

Kum 22-na, Issue 16, MAY 23, 2009

YMA MISSION VENGTHLANG BRANCH-IN HMEITHAI IN LUAH THEIHIN PEIH TA

YMA Mission Vengthlang Branch chuan May ni 16, 2009 (Inrinni) khan hnatlang nei lehin, hmeithai Pi Lalbiakkimi In chu an sa zo ta. Hemi ni vek tlai lamah Pi Biakkimi te chhungkua hian an In thar hi an luahlut nghal a ni.

He In sakna atan hian A Section chuan hma lo la hmasain, Pi Biakkimi-te chhung leh an awmna hmun neitu Pu P.L. Siamliana te lo biain, sum leh hmanraw tul tur engemawzat pawh khawn khawmin theihtawp an lo chhuah tawh a. Hemi hnuah sumte’n a la daih loh avangin Branch Committee-ah thlen a ni a, Branch-in hma la chhunzawmin, sak zawh a ni ta a ni. A Section-te hmalakna leh inpekna a fakawm hle.

He In sakna atan hian hmanrua (châk) hrang hrang thawhkhawm bakah Rs 49,803/- vel sen ral a ni. Hnatlang hi A Section-in tum khat leh, Branch huapin tum hnih neih a ni a, hnatlang-ah hian mi 300 chuang zet an thawk chhuak a ni. In hi a dung feet 18, a vang feet 12; a bang tile, a chung rangva hmanga sak a ni a. Kawmchhak lamah bual-in tur nampuk a ni. Tui dehna, chhuar leh pindan daidanna bangte siam nghal vek a ni bawk.

Kan hriat tawh angin he In sak nan hian veng chhung mi inphalte’n sum leh hmanraw tul ang angte an thawhkhawm a, YMA Mission Vengthlang Branch chuan an chungah lawmthu a sawi tak meuh meuh a ni. Tin, chhung tina khawn a nih loh avangin, “Engatinge min rawn khawn ve loh, ka thawh ve chak a sin,” tia vuite awrawl mawi tak chu YMA Mission Vengthlang Branch chuan a thlamuanpui takzet a; tanpui ngaite tanpui a, kan zaivaia a tul anga kan thawh chhuah zel theihna turin hma a la zel dawn a ni.

Tin, he In sak nana tha thawh a, hnatlang zawng zawngte chungah YMA Mission Vengthlang Branch chuan lawmthu a sawi bawk e.


VENG CHHUNG THUTHAR TAWI:

• Np Lalhlimpuia s/o Pu Laltlanmawia, Y Sec. (Kawn), Pneumonia vangin Kulikawn Hospital-ah enkawl mek a ni.
• Pu Vanlalthanga, Y Sec., Durtlang Hospital atangin In lama enkawl zui turin a lo chhuak.
• Y Sec. Treasurer Nl. Lalnunthari damlo, In lama inenkawl chuthat lam a pan zel.
• Pi Marovi w/o Pu RC Lalrokunga, M Sec., damlo, In lamah enkawl mek a ni.
• Pu Lalhlira Sailo, M Sec., Civil Hospital-a enkawl chu a lo chhuak ta.
• Zonunmawi Jt. Editor Pu Lalremthanga nu, Pi Rothangi, M Sec., thluak-a thisen put, Kolkata-a enkawl mek chu zai nawn leh a niin, enkawl mek zel a ni.
• Pi Zoremi, A Sec. chu taksa chak lohna avangin In lamah enkawl mek a ni.
• Nl. Lalnunsiami d/o Pu C.Laltanpuia, A Sec., khawsik, Kulikawn Hospital-ah enkawl chu dam takin a lo chhuak.
• CBSE hnuaia Cl-XII pass kan hriatte: (1) Nl. Zothanpari d/o Dr. Lalnuntluanga, Y Sec.- Dist. Engineering leh MBBS zir turin entrance test-ah a tling a, Maths-ah 3-na; Biology-ah 2-na a ni (2) Nl. F. Lalmuanpuii d/o Pu F. Lalduhawma, Y Sec. - Ist Div. (2) Lalhlimpuii d/o Pu Vanmalsawma, M Sec.- 2nd Div. (Lett. in Mizo)
• Court Zawl lam atanga Tlang Veng panna tur motor kawng sial hna tan a ni.
• LPS Pro Fight neih mekah kan veng atangin mi 3, Tv. Stephen Lalramzauha, M Section; Tv. Vanlalhruaia, M Section leh Tv. Sete Lalchhuanawma, A Section te chhuakin, an zing atangin Tv. Stephen Lalramzauha hian Semi-final a lut.
  

ARTICLE: THE OTHER SIDE OF MISSION VENGTHLANG
R.Vanlallawma, Y Section

Sangha thar lam tak pawh hi mi tiltip deuhin a lei dawna a hnim den den chuan, a rim duhawm lo deuh lai chu a awm chawk zuk nia. Chutiang deuh chuan kan veng chhungkaw 908 zet, mihring 4563 chuang tuallenna, mamawhna bik riau nei lo, Aizawl-a cheng rei ve fu tawh pawhin, “In veng hi ka vawi khat kalna chauh a ni,” an tih chawk hi duhsak leh thahnemngai takin ka han bih chiang ve deuh a, zir tur a awm chuan thahnemngai leh huaisen taka zir tur pawhin kan insawm e. Kum 2009-a HSLC leh HSSLC exam result, mi hlawhtling 90 lai awmna veng hi i insangmar zel ang. A, a mawihawih lam zawng Pu R.Vansanga-te kutah dah daih phawt ila.

Hmanni Zonunmawi chhuakah khan kan thalai thenkhatte’n thawm nalh vak lo an chhuah niin ka hria a, a pawi ka ti hle a; a hnuah pawh mawi lo deuhva chetna a awm niin ka hria a, a pawi takzet a ni. Kan thalai hruaitute leh vantlang hruaitute pawh hi kan veng hruaitu atana vantlangin duh taka kan thlan chhuahte an nih avangin zaha chawimawi an phu a, an thu awih pawh kan ba. Kan hriat phak baka kan veng thatna tur an thawh nasat zia hre vek phei ila, an hnenah lawmthu kan sawi mawlh mawlhna turte vek an ni. Chuvangin an thla hi kan hauh ngam a, an hnungah hian rinawm takin kan ding tlat a ni tih hriat tlan a tha.

Hman zan SAI Complex-a LPS Pro Fight tantirh lampang khan, SAI Complex bul velah in-khuai-nuai a awm bawk a ni awm e. Chutah pawh kum lama upa an inrawlh hnu pawha Upa thu ngaichang lo taka kan thalai thenkhat an awm kha a zahthlak, sim nghal chi a ni. Upa zawkte’n aw an neih tawh hnu chuan Mizo tlangval chuan tawp hun a nih mi-zawn nikhua pawhin an lo hre thin asin, mi phutkhat an nih nghal loh chuan. Chutiang awm si lo va, thuawihna kan tlachham a nih chuan kan veng tan a mualphothlak fo ang.

Pathianni apianga kan veng Kawn-a naupang duhzawng Bazar pawh ni 10.5.2009 atang khan a reh ta vuk mai. A engthawlthlak a; veng hruaitute ngenna ngaipawimawha thil zuar thinte an insum ta hi an chungah lawmthu ka sawi e. Pathianni-a Kawn-a thil zawrh hian veng a tizahawm lo va, Kawn a tibawlhhlawh a, a titawp a, veng hmel a tibal a; Kawn hi kan veng hmel lanna ve tak mai pakhat a ni si a, veng chhung vawn zahawm hi mitin mawh a ni. Veng dangah pawh an inngenna avangin an thiang vuk a, ka kal chhuah ve chang pawhin ka awt thin. Veng dangah hian inzuar hnêk hnuk mah se, kan veng atan chuan ka it lo hle a ni. Chutih laiin a hnufual kan ni zawmah ta a ni em? tiin pawi ti tak leh hnawk ti takin ka thlir thin.Veng tana hnawk tura inpekna aiin, a thianghlim leh zahawm theih nana inpek hi a tul hle. Mahse, tunah chuan veng dang ka awt bik ta lo.

A chang chuan kan hruaitute leh YMA hnunga khawng taka ding turin Pavalai deuh hi insawm khawmin, kan veng hmel mawina duh pawl din mai hi a tha tawh em mi chu aw? ka ti thin. A tul a nih phawt chuan hemi atan hian Pavalaiho hi kan inpeihin ka beisei. Tunah hian kan veng hmasawnna tur leh thanna tur kawngah thawh tur leh tih tur tam tak a awm. Chumi ti thei tur chuan a tute pawh kan pawimawh a, tihtheih kan nei theuh. Tan la tlang ila, Mission Vengthlang Muanna leh Himna i vawnghim zel ang u.

Kum 22-na, Issue 15, MAY 16, 2009

YMA MISSION VENGTHLANG BRANCH-IN HMEITHAI IN SAK HNATLANG AN NEI

Nimin, May ni 15, 2009 (Zirtawpni) khan YMA Mission Vengthlang Branch chuan hmeithai Pi Lalbiakkimi In tur sak hnatlang neiin, member 100 chuang zet an thawk chhuak a ni.

He In sakna atan hian YMA Branch leh Section-te’n theihtawp chhuahin hma an la a; veng chhung mi inphal eng emaw zatah tanpuina te pawh an khawn a. Heng veng chhung miinphalte zarah leh, YMA Branch leh Section sum atangin hengte hi khawn khawm a ni:
(1) Sum Fai: Rs 73,060/-
(2) Char Char: 3
(3) Char Tin: 7
(4) Banril: 8
(5) Tukverh Frame: 4
(6) Kawngkhar: 2
(7) Tuidawn: 6
(8) Rizing: 12

In hi feet 18 leh feet 12-a zau, a bang tile, a chung rangva hman tura ruahmanin, rel a ni a. Heta tan hian chak lakkhawm, ban zawm leh chokut siam hnatlang Inrinni hmasa (May 9) khan A Section-te’n an lo nei tawh bawk. Hnatlang-ah hian VC member-te kim takin an rawn thawk chhuak a. Tin, Presbyterian Mission Vengtlang Pastor Bial bialtu Pastor C. Lalsangliana’n hnathlang a rawn ho bawk. Khawtlang hruaitute leh Kohhran lamah pawh hruaitute’n an ho theite, veng chhunga kum lama upa zawk mistiri eng emaw zat an lo thawk chhuakte leh, member thahnem tak an lo thawk chhuak chu YMA chuan lawmawm a tiin, an chungah lawmthu a sawi a ni. In sakna hmun hi Pu PL Siamliana, A Section ram, phal taka a hmanhawh tir a ni.

He In sakna atan hian YMA chuan veng chhung huapin In tinah tanpuina akhawn lova, a daih tawk tur awm hisapin chhungkaw thenkhatah a khawn chauh zawk rih a ni. “Engngatinge min rawn khawn ve loh,” tia mi inphalte vui awlrawl mawi takte YMA-in a hria a, a lawm takzet a ni. Hengte hre reng chung hian YMA chuan mi harsa leh tanpui ngaite tanpui turin hma a la zel dawn a ni.

Vawiin, May ni 16, 2009 (Inrinni) dar 9:30 atangin hnatlang hi chhunzawm leh a ni dawn a. YMA member a thei apiang hnatlang tura ngen leh beisei kan ni e.










VENG CHHUNG THUTHAR TAWI:

• Pu Vanlalthanga Ralte, Y Sec. (CP Road), khawsik leh pum tha lo vangin In lamah enkawl mek a ni.
• Pi Ramhlimpuii d/o Pu R. Zasiama, Y Sec., pum lam Shillong-a inentir chu dam takin a lo haw leh ta.
• Pi Nuchhungi w/o Pu C. Sanghlira, Y Sec., damdawi In atanga lo chhuakin, In lamah enkawl a ni.
• Pu R. Zothansanga, Branch Fin. Secy. chu pum lam nuam lo avangin In lamah a inenkawl mek.
• Pu R. Lalzawmliana, M Sec. (Tlang), Aizawl Hospital atanga lo chhuakin, In lama enkawl a ni.
• Dr. Lalsiamliana, M Sec. chu Delhi-a zai a nih hnuin In lama inenkawl zui turin a lo haw.
• Pu T. Kapliana, M Sec., damlo, In lamah enkawl.
• Pi Lalhmachhuani w/o Pu Lalchhuanmawia, A Sec., HB hniam avangin Tv. Laltluangkima, Pu Lalmuantluanga leh a pasal-te chuan thisen an pe.
• Pi Zosangliani w/o Pu Lalnunkima, A Sec., Aizawl Hospital-ah enkawl mek a ni.
• Tv. Lalramluahpuia c/o Pi Piangzingi, A Sec., Durtlang Hospital-ah a ke zai turin admit a ni.
• Tv. Lalthangkima s/o Pu VL Chhuanga, A Sec., bike accident avangin Siliguri Army Hospital-ah enkawl a ni.
• Pu C. Ramthara, A Sec. chu damdawiin atanga lo chhuakin, In lamah enkawl zui a ni.
• Pi Ngurthanzami Sailo, A Sec., kal tha lo avangin In lamah enkawl mek a ni.
• Nl. Lalnunsiami d/o Pu C.Laltanpuia, A Sec., khawsik, Kulikawn Hospital-ah enkawl a ni.
• Pu Gilbert Lalzarliana, Branch Asst. Secy. chu chhungkaw pawimawhah W.Phaileng-ah a zin mek.
• Pu Lalsawta, Education Minister, M Sec. chu Lunglei lamah a thang mek.

ARTICLE: PASS LAWM THLIRZAUNA
R.Vansanga, M Section

Kum danga hetiang zat zat kan neih ngai loh, kumina pawl 10 & 12 pass thar 99 zet lawm tur kan nei hi malsawmna ropui tak, veng tan kum that kuma puan ngam a ni. YMA-in May ni 1,2009-ah lawmpuina hun a hmang a, May ni 9, 2009-ah Presbyterian Kohhran-in Social Front bultumin kohhran huang chhunga pass-te lawmpui-na a nei bawk, pass thar tam zawk chuan lawmpuina chihnih in dawng a, in vannei tak zet. He pass lawmna hi i han thlir thuak thuak teh ang.

Sum sen: A theuneu hauh lo. YMA bultum lawmna-ah Rs 42,000/- zet senral a ni a, Kohhran-in Rs 24,000/- lai a seng bawk, a vaiin Rs 66,000/- zet vengin pass lawm nan kan hmang a nih chu. In sa lai mek tan chuan cement bag a lei theih tur zat han chhut a, chilthli tla duah a, ui tak leh it tak chunga thlir zui vawng vawng tham a ni.

Sum thawhtute: YMA bultum lawmpuina sum thawhtute chu veng mi inphal, veng tana inpe, veng hmangaihtute an ni; an chhuanawm a, veng tan thlamuampui tling an ni. Hetiang mi veng-in kan neih chhung hi chuan veng nuam kan ni reng ang. Mi engemaw zatin, “Engatinge min rawn khawn ve loh, hetiang lamah hi chuan ka neih ang ang thawh ve ka chak asin,” titute hlei hlei kha in chhuanawmin, kan thinlungah rimawi ngaihnawm a ni reng e; in chhuanawm tak zet. A nihna takah chuan ‘YMA-in a lawm’ kan tih hian, a ruahmanna siamtu mai a ni a, sum thawhtute in bulpui hle. YMA-in a hming a tum a, veng-in a lawm a ni ber zawk e.

Lawmman dawn: Nu leh pa leh zirtirtute zia a lang thui. Chetze mawi leh awmdan mawi hi kan lo inzirtir ngai lo hle tih a hriat. Lawmman dawngtuin hmanhmawh tak mai a, a hlantuin a pek hma hma a phihthlak sak tum ang mai hmuh tur a awm a. Lawmman dawn veleh, bak lenga let leh nghal vut, thlalak sak hman loh te, mahni Jail tanna tur lehkha dawng ang ziazanga hlim hmel pu lova tum bur mai te, ka lawm e tihna chang hre lo te, kekawrbul ipte awm thut nena lawmman dawngte in awm a nia. Kan dem ngawt lo che u; in nu leh pa leh sikul lamah zirtirna in dawng ngai lo a ni ngei ang. Tan lakna tur a ni e.

Lawmman hi a hlu: Lawmman hlutna hi mi tam takin kan hre tawk lo. Thil holam mai maiah lawmman buatsaih a ni ngai iova, a tha lam thilah chauh buatsaih thin a ni. Lawmman dawng thei dinhmuna siamtu chu thawhrimna leh malsawmna inkawp a ni. Mahni hriselna bakah chhungkaw hriselna thlenga malsawmna dawn tul a ni a, hlu veng veng tak a ni. Lawmman-a inpek thin thil kha chu lawmman hlutna a ni lo va, la thei dinhmuna dinna tak kha a hlu lai ber a ni. Mi tam ber hi tar kun thleng pawhin dam ila, lawmman dawn tur nei pha lo kan ni. Hengte hi ngaihtuah ila, lawmman dawng thei nih hlutna hi kan chiang ang. Ka’n sawi belh hram duh chu tun tum pass lawmnaah khan a dawng tur zingah harsatna engmah nei lo, mahni leh chhungkaw hriselna pawh tha, zin bo ni bawk si lo, tul dang eng mahin a tlakbuak si loh, chhuanlam tur awm miah lo chunga rawn kal lo ringawt engemaw zat in awm, a pawi hle. Pawi ti hle ula, inchhir hle ula ka ti. In dinhmun zel tur kan sawi thei lo; i dam chhunga i lawmman dawn tur awmchhun ho takin i pumpelh hlauh te a ni palh ang tih a hlauhawm. Hetiang hun hlu tak hi in la tawng leh a nih chuan pumpelh tawh hauh lo ula, phurna chi leh hlut chi a nihna hi vawng reng ang che u.

He pass lawmnaah hian kan veng pa ngei, Pu Lalsawta, Education minister-in phur tak leh lawm takin min hmanpui a, zirlaite tan chona tha nise. Minister awmna veng leh result tha hi a inhmeh a, kumin aia tha result nei zel turin zirlaite hi kan lo thlir reng che u. Topper hmel kan hmuh loh pawhin Top Ten hmel chu hmu turin kan mit kan len mek e.

Kum 22-na, Issue 14, MAY 9, 2009

YMA MISSION VENGTHLANG BRANCH EXECUTIVE COMMITTEE VAWI 5-NA THU

May ni 7, 2009 (Ningani) zan khan YMA Mission Vengthlang Branch Executive Committee Meeting vawi 5-na chu YMA Hall-ah neih a ni. Meeting hi Pu Kaisangzuala, President-in kaihruaiin Pu Rosangzuala, Treasurer chuan Pathian hnena tawngtaina hun a hmang. Meeting-ah hian member 26 kalin 15 an kal lova, heng zinga 9 te hian harsatna an neih thu sawiin an pha a ni. Thurel tlangpuite hetiang a ni.

1. Report:

1. Section leh Sub-Committee peng hrang hrangte’n an hmalakna leh hmachhawpte an report a, heng zinga ‘A’ Section ten Hmeithai In sak that tura ruahmanna an siam leh hma an lak mek chu Branch anga hmalak chhunzawm nise, heta tana sum mamawh Rs 18,000/- ‘A’ Section hmuh tawh bak Rs 20,000/- dang chu ‘Y’ leh ‘M’ Section ten rawn ngaihtuah belh se, hmalak zel dan tur chu Branch OB leh Section hruaituten rawn ruahman se tih a ni.
   
2. Pu Lalhmingmawia, Secretary hnen atangin Branch hmalakna hrang hrang leh Meeting hmasa thurel bawhzuia tihhlawhtlin a nih thu ngaihtlak a ni.

2. Mission Vengthlang Sporting Club-in Table Games neih nan YMA Hall hman an dilna chu phalsak a ni.

3. YMA Day (15.6.2009) chu chhun leh zanah Programme siamin hlim taka hman nise, Programme leh Item neih turte OB ten rawn duang se tih a ni.

4. June ni 6, 2009 (Inrinni)-ah a mamawh apiangte tana hman turin a thlawn a thisen pek (Blood Donation) leh tura rel a ni.

5. YMA Hall leh a hnuaite chei that nise tih a ni a, hmalak dan tur leh ruahmanna te siam a sum pawh a tul anga lo ngaihtuah turin OB-te ruat an ni.

6. Vengchhung Telephone Directory (Landline & Mobile) siam nise, Section tinin mahni Section huam chhung a mite lo chhinchhiah se tih a ni.

7. Pem lehkha nei lova kan venga lo pem lutte chu Section tinin mahni Section huam chhunga mite Pem lehkha YMA a rawn thehlut ngei turin hriattir nawn leh se, Pem lehkha neilo chu Chhiatni Thatni-ah veng chhung mi ah pawm loh nise tih a ni.

8. April ni 14, 2009 (Thawhlehni)-a Kohhran hrang hrang thalai pawl hruaitute nena Chhiatni Thatni leh Khawtlang Nun Siamthat kawnga inkawmhona neih chu tlirletna neih a ni a, hlawk thlak a tiin, mi sawmte an lo kal tha chu lawmawm a ti a; hetiang zirhona hi neih fo theih nise a duh hle.

9. May ni 1, 2009 (Zirtawpni) zana HSLC leh HSSLC pass lawmna thlirlet a ni a. Programme felfai taka hman a nih leh, khuallian-in hun tawp thlenga a hmanpui thei chu lawmawm an ti hle.

Meeting-ah hian mi harsate pual bawm hun a ni a Rs 520/- thawhkhawm a ni.



VENG CHHUNG THUTHAR TAWI:

• Pi Lalhmuaki w/o Pu R. Hrangzuala (L), Y Sec. (Dam) chuan an In bula a chetsualnaah a ngal ruh a titliak a, Greenwood Hospital-ah enkawl mek a ni.
• Pi Liankhumi, d/o Pu Sanglura, Y Sec. (Darnam), hun rei tak damlohna-in a tlakbuak chu a la tha thei meuh lo; In lamah enkawl mek a ni.
• Nl. Lalfakmawii d/o Upa L.Ramthanga, Y Sec., damlo In lamah enkawl mek a ni.
• Pu Lalnunfela, Y Sec. (Dam) te chuan a pathumna atan fapa an nei thar.
• Pi Rothangi m/o Pu Lalremthanga, M Sec., damlohna avanga Kolkatta panpui chu Nilaini khan zai a ni a, enkawl chhunzawm zel a ni.
• Pu Lalhlira Sailo, M Sec. (Court Zawl), damlo chu Civil Hospital-ah enkawl mek a ni.
• Pu C. Ramthara, A Sec., damlo chu Grace Nursing Home-ah enkawl mek a ni.
• Pu Chhandama, A Sec., taksa chaklo leh hnar thi chu In lamah enkawl a ni.
• Pi Zosangliani w/o Pu Lalnunkima, A Sec., damlo chu In lamah enkawl mek a ni.
• Nl. Emily Lalrinpuii d/o Dr. Jasper Rongura, Y Sec. chuan St. Joseph University, Bangalore atangin M.A. (Economics) distinction-ah a pass a, an class-ah 2-na a ni.
• PEM THAR: (1) Pu Jonathan Lalmuanawma te chhung, Mission Veng North atangin Pi Kawlveli In, Y Sec.-ah. (2) Pi Laltharpuii te chhung, Bungkawn Nursery atangin Pu F. Malsawma In, M Sec.-ah. (3) Pu Lalremruata te chhung, Thingdawl atangin an mahni In, A Sec. (Pu Sangkhawnghina In bul)-ah. (4) Pu Vanlalhruaia te chhung, Dengsur atangin Pu Chhuankima In, A Sec.-ah. (5) Pu Lalthlamuana te chhung, Thenzawl atangin Pu Ralkapzaua In, Y Sec-ah.
• Pi Hmingthanzuali A Sec. chu Pu K. Lalbiakvela Inhnuai M Sec ah a rawn insawn.
• Nimin Zirtawpni khan A Section-te’n sum tuak nan vawk an talh a, thlawmngaia lei saktute chungah an lawm hle.
• Pu C. Rothianga, M Sec. chu 1st Youth World Weightlifting Championship, Chiangmai, Thailand-a neih turah India ram Team Manager turin a kal dawn. Hetiang mi kan vengin kan nei hi a lawmawm hle.

MVT MIDDLE SCHOOL INTUAITHAR

Mission Vengthlang Middle School chuan school naupangte’n taihmakna leh hmasawnna chak zawk an neih theih nan, a hnuaia mi ang hian school naupangte tan ruahmanna an siam:

• Cl-V leh Cl-VI thiam berte chu Promotion result chhuah ni-ah lawmman pek an ni ang. Term Exam hrang hranga mark hmuh belhkhawma sang ber chu an class-a thiam ber lawmman dawng tur a ni. Lawmman hian certificate leh Rs 300/- a keng ang.
• MSLC exam (Cl-VII)-a distinction-a pass-te chu lawmman atan certificate leh Rs 300/- zel pek an tum.
• MSLC exam (Cl-VII)-a subject hrang hranga letter hmute, subject pakhat zel-ah Rs 100/- pek an tum.
• Lawmman pek turte hi zirtirtute’n an thawhkhawm dawn a ni.
  

HMEITHAI IN SA DAWN

Branch Executive Committee thurel angin, YMA Mission Vengthlang Branch chuan hmeithai Pi Lalbiakkimi In tur a sa dawn. Pi Biakkimi te chhungkua hi Thlanmual kawng Pu P.L. Siamliana ramah rap-in chhe takah an khawsa mek a, a fate hi 5 la naupang te te an ni, tuna an awmna In hi furpui han tuarpuina tlak a nih tawh loh avangin A Section chuan sak that ngei tha in an hria a, an Section sum bakah an Sectionhuam chhungah a remchan ang angin Sum leh hmanraw tul ang angte an lo khawnkhawm tawh a, heng an khawnkhawm hi avaiin Rs 18,000/- hu lai a ni tawh.

Branch Executive Committee chuan A Section hmalakna hi tha a tiin, Branch-a an rawn thlen angin Branch pum huapa hma lak chhunzawm a, a rang thei ang a In hi sak thuai nise a ti. Heta tana sum la mamawh tur dang chu Branch sum bakah Y Section leh M Section ten Rs 10,000/- ve ve rawn thawhchhuah tum se a ti a, Vengchhung mi inphal leh tanpui ngaite tanpui tura inpeih rengte zarah he hmachhawp hi tihhlawhtlin ngei a in beisei a ni. Tin, an awmna tura phal taka a ram hawh tirtu Pu P.L. Siamliana hi a fakawm tak zet a ni.

Sum leh hnatlang tha engemaw zat sen a ngaih dawn avangin mahni theihna zawn theuhah tanpui ngaite tanpui tur leh hnatlanga thawkchhuak ngei turin YMA memberte lo inkau lawk ang u.




MOTOR NEITE NGENNA

The Mizoram Regulation & Control of Vehicles Parking Rules No 12-naah chuan Motor zawng zawng (Sorkar emaw, Private etc. emaw pawh huam vekin) chu Motor Garage-a dah vek tura tih a nih laiin, Aizawl khawpui chhungah hian chutiang dan zawm chu mi tlemte zawk niin a lang. Mi tam zawkte hian vantlang kawngpui chu mahni ram ang maia Motor dah nan an hmangin mipui ke-a kalte leh Motor veka kalte tan harsatna nasa takin a thlen a ni. A bik takin rikrum thil leh kangmei chhuakah pawh vantlang kawngpuia Motor dah avangin Kang thelh pawl Motor-ten (Fire & Emergency Secvice) a hun taka an hnathawhna tur hmun an thlen loh phah sawi tur a awm ta nual a ni.

YMA Mission Vengthlang Branch chuan Sorkar dante zawma, mipui ke-a kalte, motor veka kalte tan leh rikrum leh kangmei chhuak laka thawktute tana harsatna kan thlen lohna turin Vengchhung mipui Motor neite chu Garrage-a Motor-te dah vek turin a ngen a ni. Dan hnuaia hrem leh chawi tir ngai lova thuawih taka Dan zawm mai hi zahawmna leh thenawm khawvengte tana mi tangkai nihna a ni.

Tin, Vengchhunga Traffic Sign leh Sign Board awmte tidanglam leh tichhe lova, uluk taka enkawl turin vengchhung mipuite a ngen tak meuh a ni e.

Kum 22-na, Issue 13, MAY 2, 2009

YMA MISSION VENGTHLANG BRANCH-IN HSLC LEH HSSLC PASS LAWMPUI

Nizan April ni 24,2009 (Zirtawpni) zan khan YMA Mission Vengthlang Branch chuan kumin-a HSLC leh HSSLC kan veng atanga Pass-te lawmpuina YMA Hall-ah a nei a, Pass tharte leh an chhungte bakah YMA hruaitu leh memberte an kal tha hle.

He hun hi Pu Kaisangzuala, Branch President-in kaihruaiin, Rev. C. Lalsangliana’n Hunserh a hmang a, Pu Lalsawta, Hon’ble Minister, Education Deptt. chu khuallian a ni. Khuallian leh Dr. E. Saipari, Lawmsanga Award tumtute’n zirlaite lawmpuina thilpek an hlan. Lawmsanga Award hi Pi Elizabeth Saipari’n a pasal Pu Lawmsanga hriatreng nana a donate a ni a; he Award hian citation, lehkhabu leh pawisa fai Rs 1000/- a keng tel a ni.

He hun hi programme duan lawk angin tluang taka hman a ni a, item nei tura sawmte’n an hun te tha takin an rawn hmang thei a, thusawi tura sawm bikte leh kalkhawmte zing atangin thu tha tak tak ngaihthlak a ni.

Tun tumah hian HSLC-a pass tha ber Mipa leh Hmeichhia, Rosangkima s/o Pu R. Rotluanga, Y Section leh Lalrinzuali d/o Upa Lalrintluanga, M Section te hnenah Lawmsanga Award hlan a ni. Tin, HSSLC Pass tha pathumte Laldinfeli d/o Pu C. Laldina, Y Section; Lalrinawmi d/o Upa H. Lalhmangaihzuala, M Section leh Lalhruaitluangpuii d/o Upa HC Thanthuama, A Section te hnenah Lawmsanga Award hi hlan an ni bawk. Heng bakah hian HSLC leh HSSLC pass zawng zawngte hnenah hian Lawmpuina Thilpek hlu tak hlan vek an ni.

Pass lawmpui zawng zawngte hi HSLC Distn. - 11; I Div - 19; II Div. - 25; III Div. - 19, an vaiin - 74 leh HSSLC Distn. - 1; I Div. - 4; II Div. - 15; III Div. - 5, an vaiin - 25 an ni. Kan Vengin HSLC leh HSSLC-a hlawhtling heti zat kan nei hi a lawmawm takzet a, Pass zawng zawngte veng chhung mipuite’n an lawmpui tak zet a ni. Chutihrualin harsatna avanga hlawhtling ve ta rih lote theihtawp chhuah a, tang fan fan tur leh beidawng lova hlawhtlinna hmu ve ngei turin YMA Mission Vengthlang Branch chuan duhsakna a hlan a ni.



VENG CHHUNG THUTHAR TAWI:

• Pu Kulhhmingthanga, Y Sec. (Darnam) chu Grace Nursing Home-a enkawl a nih hnuin dam takin a lo chhuak ta.
• Pi Malsawmi w/o Pu Lalvuana, Y Sec., CP Road, a mit (bile)-a lungte awm chu Durtlang Hospital-ah zai a ni.
• Pi Khuangthuami, Y Sec. chu Aizawl Hospital atanga rawn chhuakin In lamah enkawl mek a ni.
• Np. Lalthlamuani d/o Pu R. Lalmuanpuia, Y Sec. chu khawsik avangin In lamah enkawl mek a ni.
• Np. Lalhlimpuia s/o Pu Laltlanmawia, Y Sec. , pneumonia avangin Kulikawn Hospital-ah enkawl mek a ni.
• Tv. Lalchungnunga Pachuau, M Sec. chu bike-a a chetsual avangin In lamah enkawl mek a ni.
• Pi Rothangi m/o Pu Lalremthanga, Zonunmawi Jt. Editor, M Sec. chu thluak-a thisen put avangin Civil Hospital ICU-ah enkawl mek a ni a, Phai panpui tum a ni.
• Dr. L. Siamliana, M Sec. chu Delhi-ah zai nawn leh a ni.
• Pu R. Zakamlova, A Sec. chu a thapui na avangin In lamah enkawl mek a ni.
• Nl. Lalhriatpuii d/o Pu Lalmalsawma, A Sec. chu Grace Nursing Home-ah enkawl mek a ni.
• Kan veng pa, Pu Zothankima te chhung chu hnathawhna lama hun rei tak an awmbo hnuin Chaltlang Lily Veng atangin Pu R. Lalhmingliana, Y Sec. (Kawn) In hnuaiah an insuan lut ta.
• Tv. Lalhlimzauva te unau chu Rev. Lalnghinglova te In atangin Pu H. Lalbiaktluanga In, A Section-ah an insawn.
• Kan veng nula zaithiam Josephine Lalramengi, M Sec. chuan kumin Lelte Awards sem-ah Singer of the Year (Female) leh New Artist of the Year-ah te lawmman 1-na a dawng.
• Pi Liantluangi (Nu-i) w/o Pu C. Lalhlira, M Sec. chu Superintendent atangin Under Secretary-ah a kaisang.
• Tun hnaia Mizoram Sorkar hnuaiah kan veng atangin hengte hian hlawhtlinna thar, promotion an hmu:

Assistant atangin Superintendent-ah:
1. Pi F. Lalrodingi w/o Pu C. Vanlalrema, Y Sec.
2. Pu C. Vanlalsiama s/o Padma Shree C. Rokhuma, M Sec.
3. Pi Lalhmingzami w/o Er. C. Lallunghnema, M Sec.
Assistant-a tling thar (Deptt. Exam):
1. Pi H. Laltanpuii w/o Pu C. Vanlaltluanga, Y Sec.



YMA CHHANG DIN A NI

April ni 25, 2009 (Inrinni) khan YMA Mission Vengthlang Branch chuan YMA Chhang a din fel ta. Branch Executive Committee-in i/c tur a ruat angin Pu R. Zothansanga, Br. YMA Fin. Secy. leh Pu C. Lalduhkima, Br. Exe. Com. Member ten YMA Chhang dinna hi an kaihruaia, Pu Rosangzuala, Br. YMA Treasurer chuan telpuiin YMA Chhang kalkhawmte theitui in tur leh Sweet sem turte a lo buatsaih bawk. Incharge-te sawm angin Pu Lalmuankima, M Sec. chuan YMA Chhang din chhan leh naupangte fuihna thu a sawi.

Kum 2009 chhunga hruaitu turte thlanna neih nghal a ni a, hengte hi thlan chhuah niin Committee member tur pawh ruat nghal an ni.

Office Bearers:
OB i/c: Pu R. Zothansanga, Fin. Secy., Br. YMA
Leader: Lalngaihawma, M Section
Asst. Leader: R. Zothanpuii, Y Section
Secretary: Lalduhawma, M Section
Asst. Secretary: Joanna Zorinpuii, M Section
Treasurer & Fin. Secy: Pu C. Lalduhkima, Br. Exe. Member

Kumin chhunga hmalakna tur ruahmanna hetiang hian an siam:

1. Hnam Lam (Cultural Dance) zir: School chawlh chhung denchhenin tlai tin YMA Hall-ah MICCLUB hruaituten an zirtir thin. An phurin member an kal thahnem thei hle.
2. Nunphung tha inzirtir: School chawlh leh hun thawl remchang apiangah Nunphung tha inzirna hun leh zirnaa hlawhtlingte inlawmpuina hun hman an tum.
3. Sport: Second Term Exam chawlh laiin Sport buatsaih tum a ni.
4. Fehchhuah: Kum tawp Third Term Exam chawlh-ah Fehchhuah Tlawngkam/Reiek tlang lamah an tum.

YMA Chhang member ni duh tan hruaitute hnenah englai pawhin hming pek theih reng a ni.