Kum 22-na, Issue 08, MARCH 28, 2009

MISSION VENGTHLANG HMASAWN NAN VC LEH NGO HRUAITUTE AN INHMUKHAWM

March 26, 2009 (Ningani) zan khan Mission Vengthlang VC huaihawtin NGO hrang hrangte nen veng chhung thil pawimawh sawiho a ni. He sawihonaah hian NGO hrang hrang MUP, MHIP, Sporting Club, Vantlang Ram Humhalh Committee leh YMA aiawh OB-te an kal tha hle a, thu pawimawh tak tak an sawikhawmte chu:

SAI HOSTEL HMUN CHUNGCHANG:
Mission Vengthlang ram, Sunhlu Mual-a SAI Hostel sak tum mek chungchang ngaihtuahho a ni. He thil hi veng chhung issue tling khawpa a duh leh duh lo pawl eng emaw zat awm a nih avangin uluk taka sawiho a ni a, he thil hi tha ti lo mi eng emaw zat awm mahse, kan khawtlang hruaitu hmasa (VC)-te’n veng hmasawnna ngaihtuah chunga an lo phal tawh a nih avangin thutlukna mumal an siam nghal thei lo. Hemi chungchang hi NGO hrang hrangte’n an mahni executive committee-ah lo sawiho lehin, an thutlukna VC-ah an thlen khawm ang a, VC-in a tul angin hma a lo la zui ang, tiin an dah ta rih a ni.

VENG CHHUNG HIMNA LEH RUIHTHEIHTHIL LAKA THIANGHLIMNA:
Kan veng chhunga ruihtheihthil, a bik takin Zu lo hluar chho ta viau mai chungchang hi sawiho a ni a, uluk taka sawiho a nih hnuah kan veng chhungah zu zuar sawi tur an awm ve ta nual mai hi a ngaihmawhawmin, tireh tura theihtawpa hmalak nise tih leh, hemi kawngah hian VC leh YMA-in a mawh lo phur bik se, NGO pawl dang leh veng mipuite’n theihtawpin thlawp theuh nise tiin an rel.

UI LEH AR KHUAHKHIRH CHUNGCHANG:
Veng hruaitu kalkhawmte hian thingtlang khaw tam takah pawh hmuh tur awm tawh lo, kan veng chhunga Ui leh Ar zalen taka khawlaia tla thinte hi ngaihmawhawm an ti hle. Hemi chungchangah hian VC sitting-in ui leh ar khuahkhirhna tur order an siam tawh thu report ngaihthlak a ni. Nizan, ni 27.3.2009 (Zirtawpni) khan VC Sitting chuan ui leh ar khuahkhirh chungchanga hmalak zui dan tur an rel a, thupek zawm lote a tul anga pawisa chawi tir dan tur pawh an rel nghal bawk a, an thu hmawrbawkna erawh hun remchang dangah kan la rawn tarlang ang.



VENG CHHUNG THUTHAR TAWI:

• Pi Chiangkungi c/o Rev. R. Lianbuanga, Y Sec. (Kawn) chu thawhah leh taksa chak lohna avangin Aizawl Hospital-ah enkawl mek a ni.
• Pi Rosalind Vanlalchhungi w/o Pu Zodingliana, Y Sec. (Kawn), pum lam tha lo avanga In lama enkawl chu a la dam thei meuh lo.
• Nl. Sainghingi c/o Rev. K. Lungmuana, Y Sec. (Vengmawi) chu an In bul step-ah a tlu palh a, In lamah enkawl mek a ni.
• Np. Hmangaihtluangi d/o Pu Lalhmangaiha, M Sec. chu hritlang avangin In lamah enkawl a ni.
• Pu H.Lalbiaktluanga, A Sec., kan Branch hruaitu hlun, Mumbai lama in check-up kal chu tluang takin a lo haw leh ta.
• Pu Lalchhuanmawia Kawlni, A Sec. chuan scooter-a a chetsualnaah a hmai a sawh khem deuh a, In lamah enkawl a ni.
• Tv. Ramluahpuia c/o Pi Piangzingi, A Sec. In sakna a chesual chu Pathianni zan khan zai a ni a, that lam a pan zel.
• Nl. Remlalruati d/o Pu R. Lalbiakenga, Y Sec. (Kawn) leh Tv. Issac Lalrinawma, Dawrpui Veng-te chu March 24, 2009 khan Dawrpui Presbyterian Kohhran Biak In-ah an innei.
• Pu H.Lalneihkima, A Sec., Branch leh Section Committee member chu an khua Leng-ah a thang mek.
• Kar hmasaa MVT Development Committee member kan rawn tarlanah khan Er. C.Lallunghnema hming kan lo hmaih palh a; hei bakah hian Pu Lalthuamliana tia tarlan kha Pu C.Thuamliana, M Section tih zawk tur a ni e.
  

ARTICLE: MISSION VENGTHLANG TEACHERS’ FELLOWSHIP (MTF) THUCHHUAK

Tun hmain Mizote lehkha zir tura kan infuihna tawngkam ber chu, “Lehkha i zir that loh chuan, rim takin hna i thawk ang, puak i phur ang,” tih hi a ni. India rama zirna kawnga sulsutu ber, National Curriculum Framework 2005 (NTCF) chuan, kan lehkha zir tur ruahmannaah chuan, kut hnathawh hi a laimu a ni tur a ni, a ti bur mai. Kan pi leh pute hunlaia an lo infuihna kha a phetthla ni mai lovin, a do hial zawk a nih chu- A chhan pawh hetiang hian sawi a ni:

• Hnathawh ngaihna khawvela kan awm avangin zirlaite hnathawh tam hi kan tih ngei ngei tur a ni. Zirlaite’n an kum mil tâwk te te a an thawh theih tawk an thawh hian an nun a hlim a, chhungkua leh khawtlangah neitu chan an inchan tir a, a ti tlangnel a, mi pawimawh nia inhriatna a siam thin.
• Hnathawh hian zirlaite than a titha a, an hrisel phah a, rilru chakna leh phurna a siam a, hlawhtlinna kawngah a hruai thin.
• Hnathawh hian zirlaiah hnathawh thiamna leh hmangchang hriatna a pe a, nun hausaknate pein, hlim leh lawmna thar a neih phah.
• Zirlai chuan zirtirtu kaihhruaina leh enpuina hnuaiah hna a thawk thin tur a ni a, zirtirtuin a thlahthlam tur a ni lo. Inhremna atana hna inthawh tir hi phal miah loh a ni thung.

Sawi tur tam tak a la awm a, kan sawi vek seng lo. Heta tang ngawt pawh hian hnathawh hlutna chu kan hre thei ang. Hriat mai piah lamah a taka kan hman theih turte sawi chhunzawm ila:

Nu leh pa tam tak hian kan tu leh fate lehkha zir kan âwl hneh lutuk a, an thawh theih tawk pawh kan thawh tir phal lova; keimahni’n kan tihsak lo a nih pawhin awmpuite kan tih tir thin hi i sim hmak ang. Mi tlaw leh thatchhe siamna khawlah nu leh pate hi kan tâng hlauh dah ang e.

Kan tu leh fate an thawh theih tawk te te kan thawh tir hi an tan a hlu em em a, nuam an tiin, mi mai mai an ni lo tih inhriatna a pe a, mi pangngaia kan inchherchhuahna kawng tha tak a ni. Chuti ni lova kan duat luat tukna avanga an hnathawh kan han phal lo hi zawng, an nun kawng atan thil tha lo kan siam a lo ni reng zawk thin.

Ziriaite hi mahni intodelh zirtir ngei ngei tur a ni a, an ei tur an buatsaih thin tur a ni a, an uniform te suin, an nawt thin tur a ni. He’ng atanga intodelh zirtir hi an kalzelna turah a pawimawh tak zet a ni.

Tunlaia thalai engemaw zat, hnathawh thiam lo leh peih lo, thatchhe em em mai, ei tur leh thuamhnaw lama hautak hle si, chhungkua leh khawtlang tana hnawksak ru tak an tam ta hle hi vei tham a tling a. Duat dan dik lo va kan induat rah chhuah a ni lovang tih rin a har. Nun kawng dik zawhna atan kut hnathawh i uar ang u.


HSLC 2009 RESULT LEH KAN VENG

Nimin, March 27, 2009 khan MBSE hnuaia HSLC 2009 exam result a chhuak ta. Kumin hian candidate- mipa 6433 leh hmeichhia 6617, an vaiin 13,050 an awm a. Distinction-ah 306, 1st Div.-ah 1328, 2nd Div.-ah 2344 leh 3rd Div.-ah 3709 an pass a; pass percentage chu 60.46% a ni.

Kan veng High School neihchhun, Synod Higher Secondary School chuan candidate 88 neiin, 87 an pass a, Distinction-ah 6, 1st Div.-ah 29, 2nd Div.-ah 30 leh 3rd Div.-ah 16 an pass a ni. Result tha tak nei tura taima taka thawktu, zirtirtute YMA, Mission Vengthlang Branch chuan a chhuangin, an hlawhtlinnaah a lawmpui takzet a ni.

Kan veng atanga HSLC pass thar kan hriat theihte chu a hnuaia mite hi an ni a, Matric pass thar kan hriat hmaihte chuan mahni hming, pa hming leh Section bakah, an pass-na Branch Secretary (Ph: 9436151600) hnena inhriattir theih nise a lawmawm hle ang. Kum dangah chuan veng chhunga HSLC pass tharte hi Branch-in lawmpuina a pe thin a, chu’ng atan chuan hei hi rin nghal mai tur a ni dawn a ni.

Y SECTION

1. Rebecca Lalhlupuii d/o Zodingliana D (E,SS,Sc.)
2. Lalrokimi d/o Lalrohawnga I
3. Lalremtluangi d/o HS Lalnghakliana I
4. Jonathan Lalthlamuanpuia s/o Vanlalruata II
5. R. Zodinpuii d/o R.Lalrinzuala III
6. Malsawmkimi d/o Rodingliana III
7. K.Hmingthansangi d/o Vanlalsawma III
8. Lalrinfeli d/o K.Hranga III
9. Ramthianghlima d/o H.Ramdinliana III

M SECTION

1. Lalrinzuali d/o Upa Lalrintluanga D (Maths-ah chiah Letter a hmu lo)
2. F.Rosangliana s/o Bobby Vanlalrema D (E,SS,Sc)
3. F.Zonunmawii d/o F.Zothansanga D (SS,Sc,Mz)
4. Rohmingthanga s/o Laldinliana D (E,Sc,M)
5. Lalremruati d/o Lalhmingliana I (E)
6. Jacob Lalhmangaihsanga s/o C.Lalbiakkima I (SS)
7. C.Laldinmawii d/o Chalngaihzuala (L) I (M)
8. Baby Lalnunpuii d/o Dr.Lalnunhlima Ralte I
9. Lalduhawma s/o Laldinliana II
10. Lalrinmawii d/o Zoramsanga II
11. Lalduhawma s/o Laldinliana II
12. Zonuntluangi d/o Ramthanzauvi II
13. Hmingthanpuii d/o Vanlalvena II
14. Zothanmawii d/o Zosangzuala III
15. Lalruatsanga s/o Lalrinkima III

A SECTION

1. HC Lalrinfela s/o HC Thanthuama D (E,IT,Sc)
2. Zodinsanga s/o Zolianchama I
3. R. Lalbiaknungi d/o Lalthantluanga I
4. Zothanzami d/o F.Rualzakhuma I
5. Raju Sunar s/o Laxman I
6. Ramengmawii d/o Varsangzuala II
7. Lalsawmliani d/o Lalrintlinga II
8. V.Lalremruati d/o V.Lalchhanchhuaha II
9. R. Remruatpuii d/o Lalhmachhuana II
10. Lalbiaknungi d/o Lalzarliana II
11. George Lalthazova s/o K.Lalthanpuia II
12. Jennifer Lalduhawmi d/o Lalthianghlima II
13. Lalengzauvi d/o C.Lalrinawma II
14. Lalvulmawii d/o HC Thanthuama III
15. Brenda Zorinpuii d/o K.Lalhlimpuia III
16. Lalramnghaki d/o Ronghinglova III

Kum 22-na, Issue 07, MARCH 21, 2009

VENG CHHUNG HMASAWNNA NGAIHTUAHIN MISSION VENGTHLANG DEVELOPMENT COMMITTEE AN THUKHAWM

Tun kar thawhlehni, March 17, 2009 zan khan Pu Peter C.Lalrinmawia In-ah Mission Vengthlang Development Committee (MDC) chu an Chairman, VC President Pu B.Lalhriattira kaihhruainain an thukhawm a, hetah hian veng chhung hmasawnna’na hnathawh tur pawimawh hrang hrangte leh hma lak dan turte an sawiho a ni.

MDC meeting hmasa berah hian member an kal tha hle a, member-te chu veng chhung hmasawnna hna thawk turin an phur tlang hle bawk. Hun remchangah veng chhung hmasawnna chungchang sawiho tur leh, thurawnte inpe a, kawng hrang hranga thawhhona tha a awm theihna’n veng chhunga sorkar hnathawk hrang hrangte nen inkawmhona neih nise an ti a ni.

MDC hi Mission Vengthlang Village Council sitting chuan thahnemngaih thilah a din a; veng chhung hmasawnna hrang hrang chak zawk leh tha zawka a kal theihna’na mawhphur tur leh hma la turin he Committee hi a beisei a ni. MDC chungchangah hian VCP chuan Zonunmawi zawhna chhangin, “MDC hian veng chhung hmasawnna hna hrang hrang a khawih ang a. Veng chhung tana hmasawnna tur sum hmuhte pawh tul a tih ang leh tha a tih angin a hmang ang a, engkim lang tlangin, thup leh zep awm lovin hna a thawk dawn a ni,” a ti a. Veng hmasawnna’na veng mipuite inhawng a, rilru zau tak pu a, thawhhopuiah veng chhung mipui zawng zawng a sawm tih VCP hian a sawi bawk.

MDC Member-te:
Chairman: Pu B.Lalhriattira VCP
Vice Chairman: Pu Peter C.Lalrinmawia
Secretary: Lalmalsawma Khiangte (VC Secy.)
Asst. Secretary: Tv. Lalmuanawma
Treasurer: Tv.Vanlalthlenga (VC Treasurer)
Member-te: VC member-te
YMA President & Secretary
Pu R.Lalhmuliana
Pu Sailoliana
Pu Vanlalsawma
Pu Jolly Newman
Pu Lalthangliana Murray
Pu Lalthuamliana
Pu C.Rothianga
Pu Lalrinliana
Er. K. Lalsawmvela
Pu V.L.Bawiha

Mission Vengthlang VC hnuaiah hian Thlanmual Committee siam thin a ni a. Hei pawhhi VC sitting chuan siam thar leh ngei tha a ti a. Hetiang hian OB turte a ruat:
Chairman: Pu Zarkhawthanga
Vice Chairman: Pu Chawngthankima
Secretary: Pu Lalrokima
Asst. Secretary: Pu H.Lalneihkima
Treasurer: Tv Vanlalthlenga (VC Treasurer)

Tun kar Thawhtan zan khan VC leh YMA OB-te chu Pu Vanmalsawma In-ah Joint Meeting neiin, Market chungchang an sawiho a. Market Committee siam thar leh tha an tiin, hetiang hian Committee an siam.
Chairman: Pu Kaisangzuala
Vice Chiarman: Pu Vanlalhuma
Secretary: Pu Gilbert Lalzarliana
Asst. Secretary: Tv.Lalmalsawma Khiangte
Treasurer: Pu Vanmalsawma
Member-te: VC Member-te,
Branch YMA OB-te
YMA Section Leader-te.



VENG CHHUNG THUTHAR TAWI:

• Pu B. Laltanpuia h/o Pi Malsawmi, Y Sec. (Dam), Thisensâng vangin Aizawl Hospital-ah enkawl mek a ni.
• Rev. Lalnghinglova, Y Sec. chu Durtlang Hospital-ah a mit (eye) hlawhtling taka zai a ni.
• Tv. Vanlalhruaia (Hruaitea) s/o Pu Chuaukunga, Y Sec. chu Bike chesualin a dâr a sawh na a, hun eng emaw chen office kal thei lova a awm hnuin a pawn chhuak peih leh ta.
• Nl. Lalnunthari, Y Sec. Treasurer chu a la dam chian theih loh avangin In lamah enkawl zel a ni.
• Pi Ramhlimpuii d/o Pu R.Zasiama, Y Sec. (Vengmawi) chu pum lam tha lo vangin Shillong-ah in checkup-in a thang mek.
• Pu Lalhmangaiha, M Sec. (Tlang veng) te chuan fanu duhawm tak an nei thar.
• Pi Lalrammawii w/o Pu Rodingliana, M Sec. chu Durtlang Hospital-ah a rilphir paih a nih hnuin In lamah enkawl mek a ni.
• Tv. Lalramluahpuia, A Sec. Committee member chu nimin piah khan an In sak lai atangin a tla a; a âwm ruh leh a ngal vei lam a sawh tliak palh. Aizawl Hospital-ah enkawl mek a ni.
• Pu T. Kapliana, M Sec. chu taksa bawrhsawmna avangin In lamah enkawl mek a ni.
• Upa Vanlalzuala Chhangte, kan chanchinbu Zonunmawi Editor tangkai tak lo ni tawh pawh a naute inneih hmangin Guwahati atangin a rawn haw.
• Kan Editor Guru.Lalmuankima, Mizoram Cultural Troup hruaia Chennai lama thang mek pawh March 23, 2009 hian an rawn haw dawn.
• Pu Vanlalliana-te chhung chu A Sec. (Vai lui kam) atangin Pu Lalthantluanga In, A Sec. (Tlang veng)-ah an insawn chho.
• Kan Branch hruaitu hlun, Pu C. Lalduhkima, A Sec. chu an zirlai excursion hruaiin India ram hmun hrang hrang tlawhin a thang mek.
• Pu Vanengzauva, Chhinga Veng, Pi Runremmawii w/o Pu Lalhunmawia, A Sec. pa chu March 18, 2009 khan a boral a, hemi ni vek hian vui liam nghal a ni.
• Pi Rozami, Zemabawk, Pu Vanlalhuma, Y Sec. (Dam phei) nu chu March 19, 2009 khan a boral a, hemi ni vek hian vuiliam a ni.

FAM ROLUNG MUAL:

Hming : LALCHHANCHHUAHI
Kum :30
Kohhran: Presbyterian
Thihni: March 17, 2009. 2:30 PM
Vui Hun: March. 18, 2009. 12:00 PM
Vuitu: Pastor C.Lalsangliana

Pi Lalchhanchhuahi hi Pu Ralramthanga leh Pi Thangmawii, M Section-te fa tlum ber niin May 28, 1978 khan Aizawl Civil Hospital-ah a lo piang a. Unau pianpui mipa 2 leh hmeichhia pakhat a nei a ni.

Amah hi a naupan lai atanga mi nunzawi leh chhel tak a ni a; mi taima leh hna thawh hreh nei lo tak a ni bawk. Kum 1997 khan Aizawl College atangin PU a zo a, kum 2000 khan Ahmednagar atangin BA a zo leh a ni. July 31, 2000 khan C. Lalsangliana nen Kolasib, Tumpui Biak In-ah an innei a, an nupa hian fanu pakhat leh fapa pakhat an nei. Amah hi nu taima leh chhel tak, a pasal leh fate tana inpezo tak a ni a. A hriselna tha tawk lovin buai viau mah se, a theih ang tawka Pathian biak inkhawm ngaina mi a ni bawk.

Pi Lalchhanchhuahi hi BA a zir lai atang tawh khan Lung (Heart) lam that lohna a neih avangin enkawl ngaiin a awm fo a. Kum 2007 khan a lungna hi rawn thawk lehin, Durtlang Hospital-ah enkawl a ni a. Mahse beisei anga a that chhuah mai loh avang leh, doctor-te rawn angin Birla Hospital, Kolkata panpui a ni a. Kum 2007 hian March, August leh December thlaahte Birla Hospital-ah hian enkawl a niin, a lung tha lo hi zai tura hmalak chhoh a nih mek laiin Kohhran mite tawngtaina zarah damna a chang ta hlauh mai a, heta tang hian Damdawi lama enkawlna pawh an chhunzawm ta lo a ni.

A chhungte leh a pasal pawhin tha pangngai taka a awm chho ve zel nia an hriat laiin ni 17.3.2009 (Thawhlehni) khan pawn chhuak peih lovin a awm a. Chutia a awm chu chawhnu her hretah a thawk a hahin, khawi chet ngam mang lohin a awm ta a. A rang thei ang berin doctor-te an han rawn nghal a. Doctor-te thurawn anga In lama oxygen pek a, a harh deuh huna damdawiin lam panpui tura an inbuatsaih mek laiin, chawhnu lam dar 2:30 khan a pasal fanaute leh a chhungte ui beh rual lohin Chatuan Ram min lo pan san ta a ni.

Pi Lalchhanchhuahi ruang hi tlaivarpui a ni a, a tuk ni 18.3.2009 chhun dar 12:00-ah khan Bialtu Pastor C. Lalsangliana’n In lamah vuina hunserh a hman hnuah, Thlanmual lamah Tualchhung Upa H.P. Lalzuala’n thlahna hun hnuhnung a hmang a, Mission Vengthlang Thlanmual-ah vui liam a ni ta a ni.



EDITOR HNENA LEHKHATHAWN

Pu Editor,

Ramngaw leh nungcha humhalhna kawngah kan veng, Mission Vengthlang hian hma kan sawn nasa hle tawh a, Aizawl khawpuiah chuan ramngaw nei tha ber pawl pawh kan ni awm e. Mi thahnemngaite avangin nungcha chi hrang hrang leh savate pawh kan veng-ah hian an ngam tawhin, hnai vai te tea hmuh tur pawh an awm ta hial mai. Hetih lai hian mi tlemte, sapel leh sava veh ching kan la awm a. Khawvel changkang zelah hetiang tih la chin fo mai hi hnam changkanglo zia a nih tawh avangin sim theih hram kan tum a hun ta hle mai. Sim hram tawh turin ka ngen tak meuh meuh a ni.

Kumin, 2009-ah pawh hian mi rinawm tak hnen atanga ka hriat danin kan veng mi pahnih chuan sa an kap ngei tih ka lo hria a (an hming chu tarlang rih lo mai ila). He thu ka lo hriat rual rual hian pawi ka tiin, kan veng tan ngei pawh a mualphothlak hlein ka hria.

Nungcha hlu tak takte hi The Wildlife (Protection) Act, 1972 chuan khauh takin a humhalh tlat a; tul bikna thil a nih ngawt loh chuan thah mai mai a thiang lo reng reng a ni. Kan ramah nungchate an tlem tawh avangin pakhat kan thah hian an chhuan (generation) eng emaw zat awm thei tur kan titawp tihna a ni a, hetia ngaih mai ai hian a pawi em em a ni.

Kan tana tha tura Sawrkar-in Dan tha tak a siam pawh zah zo lo khawpa insum thei lote hi ram leh khawtlang tana thahnemngaihna avanga kan report a nih chuan lung-in hial tan theihna leh, sum tam tak chawi theihna a ni a; Sawrkar hnathawk tan ngat phei chuan suspend tawh hial theihna a ni. Chutiang em kan thleng a nih chuan, na kan ti lutuk si ang tih a hlauhawm avangin i chanchinbu zahawm tak kaltlang hian sim tawh turin ka han ngen tak meuh meuh a ni. Danin a phal loh mai piah lamah, Pathian-in duh taka a siam tho an nih avang tal pawh hian ringtute chuan kan tih loh hi a tha reng reng a ni. Ei tur atana kan ranvulhah hian lungawi hram hram thei tawh ila ava duhawm em!

Thahnemngai taka kan inngen chung pawha kan sim duh lo a nih chuan veng chhung chanchinbu Zonunmawi-ah hian an hming hial tarlang mai ila tha i ti em?A rem a nih chuan an hming chu ka nei sa vek e.

Nungchate tana theihtawp chhuah thintu,
sd/- K.LALMUANSANGA, Y Section

Kum 22-na, Issue 06, MARCH 14, 2009

YMA MISSION VENGTHLANG BRANCH EXECUTIVE COMMITTEE VAWI 3-NA THU

March 10, 2009 (Nilaini) zing dar 6:45 khan YMA Mission Vengthlang Branch Executive meeting chu kumin atana a tum thumna atan YMA Hall-ah rorelin an thukhawm. He rorel thutkhawm hi a hun pangngaia kan veng-in chhiat kan tawh avangin zing karah sawn a ni chungin member 26 zet an kal khawm a ni. Report leh thurel pawimawh, member-te’n kan hriat tlan awm chi han tarlang ila:

Sum dinhmun:
Tun dinhmuna kan Branch sum neih zat chu Rs 11,116/- a ni a. Hemi zing committee-a miharsate pual bawm hunah Rs 327/- a tla bawk.

THP Hall Electric Wiring:
Kan Hall thara Electric Wiring hna hautak tham zet mai chu Information & Publicity te bultumin hnatlanga thawh zawh a ni ta. Hei bakah hian YMA Hall-II, mimal luah theih siam thar pawh Electric Wiring hna thawkin an zo fel nghal. Electric Wiring hi thiam thil bik nei tan lo chuan thawh mai theih anih loh avangin an thiamna te veng tana phal taka thawhtu mi thahnemngaite chungah YMA Mission Vengthlang Branch chuan lawmthu a sawi a ni.

Zunin & Bualin Thar:
Kan sawi tawh thin, Basketball Court bula infiammite hman tur Zunin leh Bualin sak hna pawh tluang taka zawh fel a ni ta. Heta tan hian cheng nuai khat chuang fe hman ral a ni a, thahnemngai taka he hna enkawltu Pu Vanmalsawma chungah Branch Committee a lawm takmeuh a ni.

MICCLUB hruaitu ruat:
Kan Branch leh kan veng aiawha Mizo culture humhalh kawnga hma latu MICCLUB, kum 2009 - 2010 chhunga hruaitu atan heng mite hi ruat thar an ni:
President: Pu Israela, Y Section
Vice President: Pu Lalmuankima, M Section
Secretary: Pu Samuel Vanlalhruaia, M Section
Asst Secretary: Tv. Hmangaihkima, M Section
Treasurer: Nl. Lalengmawii Khawlhring, Y Section
Fin Secretary: Tv. Lalruatkima, A Section
An ni hian an thawhpui tur Committee member an ruat leh ang.

Civil Service Coaching Class:
Central YMA atanga lehkha kan dawn danin Mizoram Youth Commission chuan Lord Krishna Academy nena tang kawpin kumin 2009 UPSC- Civil Service Preliminary Exam lo awm tur atan Coaching Class a buatsaih dawn. A kal duhte tan dilna form hi Mizoram Youth Commission Office, Secretariat Building Annex - I, Treasury Square ah lak theih a ni a, chuta kal remchang theilo tan www.myc.mizoram.net ah download theih a ni bawk.

YMA Chhang din:
CYMA in min ngen angin kan Branch huam chhungah YMA Chhang din tura hmalak mek a ni. Branch Committee chuan YMA Chhang enkawl tur hian Pu R. Zothansanga, Branch Fin Secy leh Pu C. Lalduhkima, Branch Committee member-te a ruat a ni.

THP Hall enkawltu ruat:
Kan Hall neih zinga a tha ber leh thar ber THP Hall chu Y Section-te’n a enkawl fai leh, a tul anga humhalh hna lo thawk se tiin rel a ni. Hall Chabi hi Pu R. Lalrinzuala’n (Mazuala) a kawl ang.



VENG CHHUNG THUTHAR TAWI:

• Nl. C. Lalruatdiki d/o Pu Zautea, M Sec., khawsik avanga Aizawl Hospital-a awm chu dam takin a lo chhuak.
• Rev. Lalnghinglova, Y Sec. chu karleh Thawhlehni khian Durtlang Hospital-ah an zai dawn.
• Nl. Lalnunthari d/o Pu F. Lalduhawma, Y Sec. Treasurer chu Aizawl Hospital atangin dam takin a lo chhuak.
• Pi C. Lalbiakzuali w/o Pu Andrew L Varte, M Sec., Durtlang Hospital-ah a rilphir zai a ni.
• Pi Rammawii w/o Pu Rodingliana, M Sec., Durtlang Hospital-ah a rilphir zai a ni.
• Nl. Vanlalhliri, A Sec. chu kawng herh avangin In lamah enkawl mek a ni.
• Nl. Hruaitluangpuii d/o Upa H.C. Thanthuama, A Sec., mit check-up turin Guwahati-ah a thang mek.
• Pu P.C. Thianga, A Sec., kawngherh, In lamah enkawl mek a ni.
• Pi Rochungnungi m/o Pu H.Lalneihkima, A Sec. chu khawchhung nâ avangin Aizawl Hospital-ah enkawl mek a ni.
• Nl. Rebec Lalthanmawii d/o Pu R. Sangliana, Y Sec. leh Tv. Laldingngheta, Chhingchhip-te chu March 12, 2009 (Ningani) khan Chhingchhip Presby. Kohhran Hall-ah an innei.
• Kan Editor Pu Lalmuankima chu Mizoram Cultural Team hruaiin Chennai lamah a thang mek.
• Tv. C. Vanlalzama s/o Pu C. Lalzika (L), Y Sec. leh Nl. Lalawmpuii d/o Pu J. Lalzarliana, A Sec. te chu March 20, 2009 (Zirtawpni) hian MVT Presby. Kohhran Hall-ah an innei dawn.
• Er. Lalthangkhuma Ralte, Br. Comm. member, M Sec. chu hna pawimawh thawkin Shillong lamah a thang mek.
• Pu Lalnghakliana Hmar te chhung chu Mission Veng South Branch huam chhung atangin Rev C. Lianhmingthanga In, Y Sec.-ah an rawn pem lut.
• Pu R. Zothanpuia, Y Sec. te chuan an fa hmingkoh atan fapa duhawm tak an nei thar.
• Pu David Ramengmawia te chhung chu Bawngkawn chhim veng atangin YMA Hall-II, M Section huam chhungah an rawn pem lut.
• Pu Vanlalhruaia Fanai te chhung chu Kolasib Vengthar atangin Pu Israela In, Y Sec.-ah an rawn pem lut.
• Tunlaiin mi huana Balhla, vawk chaw atana la ru thin in awm tih hriat a ni a. La tawh lo turin kan inhriattir e.
• Nimin Chapchar Kut lawmnaah khan kan Branch aiawhin MiCCLUB-te chuan hnam lam chi thum, Sarlamkai, Cheraw leh Tlanglam te an entir.

ARTICLE: MIPUI LAKA VILLAGE COUNCIL BAT
Samuela Pa, M Section

Mipui hi kan phunchiar hrim hrim a ni lova, kan fingin thil kan chik peih tawh a, ram leh khawtlangah hian telna nei ni-a kan inhriat avangin kan beisei ang thil a thlen loh hian kan phun thin a ni. VC kan thlang a, VC thar kan nei ta! An chhiat an that sawi tur a la awm lova, Engnge an an dawn? tiin kan thlir ta thap mai a nih hi. Kan VC thlan thar ten mipui laka an bat thil pathum chiah sawi rih ila, a bak chu nidang atan ni rih rawh se.

1. State Election Commissioner chuan Common Ballot Paper leh Single Ballot Box siam a nih chhan chu Vote lei leh thil fel lo tihbona atan ni mai lovin; thlan tlinte’n a thlangtu mipui laka rinawmna an bat letna tur a ni a, khawtlang Development thil hrang hrangah tunhma aia VC te an rinawm zawk beiseina vang a ni bawk, a ti a. He an thil bat pakhat hi eng tin nge an rulh dawn tih kan lo thlir dawn a ni.

2. LAD Minister Pu PC Lalthanliana’n Chanchinbu mite a kawm khan thil pawimawh pahnih a sawi a, a pakhat zawk chu khawtlang tana Development sum an dawn chu mipui hriatah an puangzar tur a ni, tih a ni. VC kan neih tawh zawng zawngah khan hetiang hi a la awm lo a ni pawhin Sorkarin a phut pawh kan hre lem lo, tunah chuan Mipui thlan Sorkar hian mipui thlan VC te chu an khaw tana Development sum hmuh te puangzar turin a phut tawh a ni. Kan VC te hian an ti dawn em? i lo thlir ang u.

3. VC sum chu uluk leh dik takin Treasurer-in a vawng ang a, VC sitting rel anga hmangin Audit thin tur a ni. VC kan neih tawh te khan eng tin nge sum an vawn thin tih inzawh let a tulna a awm hran lo, mahse tunah chuan Committee in a rel ang a sum hmang a, Audit tur a ni tih Minister meuhin a sawi tawh avangin an sum khawihte Audit an ngam dawn em tih kan lo thlir dawn a ni.



SECTION REPORT:

Y SECTION

• March 12, 2009 zân khan committee an nei.
• February 10, 2009 leh March 12, 2009 inkar, committee karlakah damlo mi paruk (6) an kan.
• An Section committee member Nl. Lalengmawii Hmar chu Delhi-ah Stenography zir tura a kal avangin a aiawh atan Tv. Michael Laldinsanga s/o Pu Rodinliana Ralte chu ruat a ni.
• Emergency Light thar tha tak lei an tum.
• An Section committee member Tv. C. Vanlalzama nupui neihnaah tawiawm vek turin an inngen a, lawmpuina tha tawk tak pek an tum.
• Mike Longhorn tha tawk tak lei an tum.
• THP Hall-ah Chhiatni Thatni bungrua dahna tur Rack, Branch YMA-ah siam dil nise an ti.

M SECTION

• Ni 10.3.2009 khan Upa Zai intihsiaka an Section aiawha thawkchhuakte leh Section committee member- te’n zanriah an kilho.
• Nimin khan an Section huam chhunga damlo mi 3 hnenah damlo kanna an pe.
• Bawng/Ui talha sum tuak an tum. Veng mipuite’n tlawmngaiin i lei sak ang u.
• Sum tuakna’n tho, chhung tinin kan mamawh, Thovuakna an rawn zuar dawn.
• An Section huam chhunga House No. thar siam turin chak takin hma an la mek.

A SECTION

• Ni 7.3.2009 khan Kuang siamin an hnatlang a. Kuang 6 an siam zo.
• Ni 13.2.2009 khan THP Hall-II khawngkhar kalhna siamin hnatlang an nei a, chahbi hi Pu K.Lalhlimpuia In-ah dah a ni.
• A Section huam chhunga Vantlang Tuikhur pahnih tifaiin hnatlang an nei.
• Feb. 24, 2009 khan Section sum tuakna’n Sangha an zuar.
• Feb. 24, 2009 khan kumina an project, Khuang tur pahnih lak a ni.
• March 17, 2009 (Thawhlehni) zan hian Section sum tuakna’n Mombati zawrh an tum.
• April 9, 2009 (Ningani) khian Section sum tuakna’n Bawng ser an tum.
• Section sum tuakna’n Sericulture Tour Programme-a hman tur banner siam an tum.
• Pu Laia Huan Tlang tawntirha bawlhhlawh paih tawh lo turin veng chhung mipuite an inngen.
• Tuikhur tlan laia Insuk leh Inbual tawh lo turin veng chhung mipuite an inngen bawk.
• Chhiatni Thatnia hman thin Gas Stove leh Petrogas-te hi hman mai theih turin siamthat vek nise, tiin an rel.

Kum 22-na, Issue 05, MARCH 07, 2009

MISSION VENGTHLANG VILLAGE COUNCIL THARIN HNA A THAWK THEI TA

February 28, 2009 (Inrinni) khan Mission Vengthlang Village Council 10-na atana thlan tharte chuan VC kal chhuak tate hnen atangin mawhphurhna an la fel ta. VC charge inhlanna inkhawm hi Pu B.Lalhriattira-te Inah neih a ni a, VC Election RO Pu R.Vanlalawma’n kaihruaiin, Mission Vengthlang bialtu Pastor C.Lalsangliana chuan VC member tharte Pathian hnena hlanna leh, thuchah sawiin hun a hmang bawk.

VC charge inhlannaa VCP kalchhuak leh VCP tharte thusawi tlangpui:
Dr. Lalsiamliana (VCP kalchhuak):
Mission Vengthlang VC President hna pawimawh tak, term 2 chhung zet tluang taka chelh thei tura ka thawhpui member-te leh veng mipuite tawiawmna ka dawn zawng zawngah lawmthu ka sawi a, a bik takin kan term tawp dawn kum khat chhung deuhthaw damlohna avanga engmah ka tih theih loh chhunga mawi taka min hliahkhuh thintu kan Vice President Pu P.C.Lalnunmawia chungah ka lawm takmeuh a ni. Mission Vengthlang VC tharte ka thinlung takin ka lawmpui a, khawtlang kaihhruai leh hmasawnna hna thawh kawngah tangkaina ka neite a nih ngai chuan theihtawp chhuaha thlawp hi ka inhuam reng a ni.

B.Lalhriattira (VCP thar):
Tun tum Mission Vengthlang VC election-a duhsak taka min thlang tlingtu veng mipuite chungah thinlung takin lawmthu ka sawi a; inthlannaah chuan theihtawpin tang theuh mah ila a tling lo lamte’n tihtak meuha min lawmpui hi zahawm ka tiin, ka lawm takmeuh a ni. Heti hian VC dinhmun pawimawh tak chelh mah ila tun maiah chuan kan tih ngei ngei tur, veng hmasawnna tur engmah tiam tur ka nei lo. Amaherawhchu, veng hmasawnna atan chuan kei leh ka thawhpuite hian kan theihtawp kan chhuah ang tih hi Mission Vengthlang mipuite laka ka intiamna a ni e.

Charge inhlan zawh hian VC tharte buatsaih zanriah tuihnai tak kilho a ni.



















VENG CHHUNG THUTHAR TAWI:

• Nl. C.Lalmuanpuii d/o Pu C.Sanghlira, Y Sec. (Kawn) chu a taksa chak tawk loh avangin Shillong-ah in check-upin a thang mek.
• Nl. Lalnunthari, Y Sec. Treasurer chu a taksa chak tawk loh avangin In lamah enkawl mek a ni.
• Np. Lalengkima s/o Pu B.Lalkulhmawia, A Sec. chu pneumonia avangin Aizawl Hospital-ah enkawl mek a ni.
• Np. Jonathan Lalrintlaka s/o Pu C.Lalrinmawia, A Sec., Khawthalo leh Luak avanga Aizawl Hospital-a enkawl chu dam takin a lo chhuak.
• Pu Lalneihtluanga, A Sec., Kawng na avanga Aizawl Hospital-a enkawl chu a lo chhuak.
• Pi Manthuami, A Sec. chu hmeichhe that lohna avangin In lamah enkawl mek a ni.
• Pu H.Lalbiaktluanga, A Sec. kan Branch Treasurer thin, Mumbai-a inenkawla kal chu vawiin hian a lo haw dawn.
• Pi Lalhmuaki te chhung, Y Sec. (Dam) chuan an In sak that chhung atan Pi Lalengzauvi Building, Y Sec. an luh lut.
• Er. C.Lallunghnema, M Sec. fapa-te, Dr. Lalhmangaihzuala chu P.G. (Surgery) zir turin a tling a, Tv. Lalrintluanga chu 68% hmuin Sound Engineer (Diploma), London-ah a zo.
• Kan Editor Pu Lalmuankima chu North East Zone Cultural Centre, Dimapur, Ministryof Culture, Govt. of India chuan hnam lâm (Folk Dance) lama midang zirtirna In din thei tura nihna ropui tak, ‘Guru’ a rawn hlan rup mai.
• Lallawmzuala s/o Pu Lalthantluanga, A Sec. chu SCERT State Level Nation Talent Search, 2008 Nov.-a neihah 5-na a ni a, May 10, 2009 hian National Level Talent Search inelnaah a tel leh ang.
  

FAM ROLUNG MUAL:

Hming : UPA ZALIANTHANGA
Kum : 64
Kohhran: Presbyterian
Thihni: March 04, 2009. 04:30 AM
Vui Hun: March. 04, 2009. 01:00 PM
Vuitu: Pastor C.Lalsangliana

Upa Zalianthanga hi May 15, 1945 khan Bawngthah khuaah a lo piang a. A pa Upa Lalbuaia (L) leh a nu Pi Lalruali (L) te an ni. An unau hi 12 niin, a pangana a ni. Primary School chu an mahni khuaah kalin, Middle School hi hostel chaw chhuma inhlawh chungin Dawrpui Middle School, Aizawl-ah Private-in a zo leh a, Class VI Scholarship Exam-ah Mizoram puma a titha thlan chhuah zingah a tel phak nghe nghe a ni. College a kal laiin chhungkaw harsatna avangin a zir mumal lo hle a, UCC, Barapani (Meghalaya) leh Pachhunga College-ah te zirtirtu hna thawk chungin B.A. tha takin a zo a, 1986-ah B.Ed. a zo leh a, kum 1993 - 1997 chhungin Union Biblical College, Pune-ah M.Div. (Missiology) a zir zo leh a ni.

Mi tumruh leh a thil tih tawha hlawhchham tum ngai lo, tihtakzeta bei a, hlawhtling mai zel mi a ni. Retheihna leh harsatna tam tak kara mahni thawhchhuah ringa inzir chhuak, hna tha tak a thawh lai kal sana Ramthar rawngbawlnaa, hreawmna leh retheihna tuar huamin Missionary-a kal chhuak ta a ni.

March 6, 1982-ah Chawngmawii nen Khawlek-ah inneiin, fapa 1 leh fanu 1 an nei a. Middle School zirtirtu hna a thawh laiin, kum 1980 khan Synod Mission Board hnuaiah Missionary-in a lut a. Ramthar Board School, Cachar Field, Tlabung, Mizoram-ah te Headmaster-a a thawh hnuah, kum 1998 - 2005 chhung Missionary Training Centre, Mission Vengthlang-ah Lecturer hna a thawk leh a ni.

Kum 1999-ah Jubili Kohhran upa atan nemngheh a ni a. Kohhran-ah rawngbawlna hrang hrang chelhin, Kohhran atana mi tangkai tak a ni.
Kum 2006 atangin Lung lam natna nei tanin, Kolkata-ah te pawh kalpui a ni. Ni 28.2.2009 khan tlang hrileng avangin chaw a ei thei lova, Civil Hospital-ah admit niin, a natna avanga harsatna lutuk pawh nei lovin March 4, 2009 zing dar 4:30 khan a rawngbawl sak thin Lalpa hnena chawl turin min lo kalsan ta a ni.


FAM ROLUNG MUAL:

Hming : HRANGTINTHANGA
Kum : 78
Kohhran: Presbyterian
Thihni: March 05, 2009. 09:30 AM
Vui Hun: March. 06, 2009. 12:00 PM
Vuitu: Rev. Lalhluma Sailo

Pu Hrangtinthanga (Hranga) hi Pu Thangzama (L) leh Pi Tinmeni (L) te fa pathum zinga naupang ber niin, kum 1931 khan Farkawn khuaah a lo piang a. An unau hi mipa 2 leh hmeichhia 1 an ni a, vanduaithlak takin a ute pahnih hian 1978 leh 1990 khan an lo boral san tawh a ni. Pian leh murna lamah Sukte hnam ni mahse tunlai mite’n kan hriat lar vak tawh loh angin Chhakchhuak hnamah sa an phun a, a fate pawh Chhakchhuak an ni ta zel a ni.

Pu Hranga hi a tlangval chhuak zawt tihin Aizawl lamah a thlangtla a, Aizawl lama a pem thlak hnu hian a hming puma koh a hlawh vak loh avangin Hranga tih chu mite’n an hriat dan ber a ni ta a ni. Aizawl-ah hian Venghnuai leh Mission Veng-ahte a awm hnuah, April 12, 1957 khan Lalhnuaii (Upa Chawngzika tunu) nen an innei a, an nupa hian nupa inkawprem leh hlim tak an ni. Hlimawm ve deuh pakhat chu an nupa an inkoh reng reng hian ‘I nu’, ‘I pa’, ti ngatin an inko kher thin. April 12, 2007 khan an Inneih Golden Jubilee an lawm a, fapa 6 leh fanu 1 neiin, tu 16 leh tuchhuan 3 an nei a ni.

Amah hi pa hrisel, mahni tawka chak leh taima, mistiri thiam tak a ni a, mistiri hna a thawh lai hian, ‘A thawh sen loh hna a hmu reng thin,’ tia mite sawi a ni. Hei bakah hian Synod HSS-a peon cum Chawkidar hna chelh hmasa ber a ni bawk.

Kum 2002 khan thâwk lamah harsatna neiin a insawisel tan a, Guwahati lamah inentirin, Chuap that loh vang a ni tih hmuhchhuah a ni a. A chuap lam tha lo hi zual zelin, 2007 kum tawp lam atang phei kha chuan a pawn chhuak peih ta meuh lo va, Jan. 28, 2009 khan Aizawl Hospital-ah dah luh a ni a, thla khat zet a awm hnu, March 3, 2009 khan doctor-te râwn angin Civil Hospital ICU-ah dah luh leh a ni. Khawl changkang zawk hmanga doctor leh thawktu dangte’n theihtawpa an enkawl chungin March 5, 2009 zing 9:30 khan a tu leh fa, a nupui leh thenrual thate uibeh rual lovin Chatuan Ram min lo pan san ta a ni.

Pu Hrangtinthanga ruang hi tlaivarpui a nih hnuin a tuk chhun dar 12:00 khan In lamah Rev. Lalhluma Sailo-in Vuina Hunserh hmangin, Thlanmual lamah Upa H.Ngurthansanga’n Thlahna Hun Hnuhnuang a hmang a, Mission Vengthlang Thlanmual-ah vuiliam a ni ta a ni.