Kum 21-na, Issue 43, NOVEMBER 23, 2008

INFIAMNA ROPUI BRANCH SPORTS TAN A NI TA

Nimin, November 22, 2008 (Inrinni) khan YMA, Mission Vengthlang Branch Sports chu YMA Field, Vaivakawn-ah ropui taka hawn a ni ta. Branch Sports hi kan Branch huam chhunga Section pathum, Y, M leh A Section-te inhmelhriatna’n leh thawhhona tha zawk kan neih theihna’na ruahman a ni. Branch Sports hawnna hi member-te’n an ngaipawimawhin an kal tha hle a. Kan veng atanga Vaivakawn Field panna tur hian Branch YMA chuan hmeichhia zawng zawng chuanna tur Bus leh, Section tin atanga mipa chuan khawmna’n ‘pa’ takin 407 Truck pathum a hire. He’ng bakah hian veng chhunga member tlawmngai mi eng emaw zatin mahni motor an rawn thawhchhuahpui bawk.

Nimin, Branch Sport hawn ni hian infiamna dang buaipui tel hauh lovin Football chauh khelh a ni. Football-ah hian Section pathum atanga a tha tha thlan chhuah Team hnih theuhte inkhelh a ni bawk a, match hmasa ber atangin game en chakawm tak a ni chho vek mai. Result erawh kan rawn tarlang hman ta lo hlauh.

Hei bakah hian Football final khelh hma a Exibition Match, Branch Committee member mipa leh Section pathum hruaitute inkhel tur pawh hi a boruak a sang khawp mai. President Pu Kaisangzuala’n an tumpui turte vau lawkna’na, “Keini chu hneh rual kan ni lovang, kan adviser hovin kan thim thla mup mup mai dawn a nia,” a tih mai pawh Official Pu Lalmuankima’n, “Hei hi chu vun rawng vanga inhmuhsitna a nih avangin a sawitu hi Yellow Card leh Rs 50/- chawi tira hrem ni rawh se,” a tih chu thu tlinga ngaih a nih vangin Yellow Card hmu saa inkhel tur pawh an awm nawk dawn a nih hmel.

Tun kar chho Sport Programme:
Tun kar chhoah hian Branch Sports hi kan veng chhung hmun 5-ah a hnuaia tarlan ang hian chhunzawm chhoh zel tura ruahman a ni. Tun kar chhova sport item hrang hrang khelh turte hi basketball tih loh chu zanah vek, inkhawm zanah zan dar 7:45 leh, inkhawm loh zan chuan zan dar 6:30-ah te tan ziah tum a ni.

1. Synod Higher Secondary School TT Hall: Hetah hian Table Tennis match zawng zawng khelh tura ruahman a ni. Section aiawha khel turte’n mahni khelh hun tur Section hruaitute leh Game Incharge-te hnenah ngaihven vat vat nise.

2. YMA Hall: YMA Hall-ah hian Table Games, Carrom match zawng zawng khelh tura ruahman a ni. Carrom bikah hian Men’s Singles-ah ringawt pawh mi 70 chuang zet an chhuak dawn a, hei bakah hian Women’s Singles, Mixed Doubles leh Men’s Doubles-ah engemaw zat khel tur an awm bawk avangin mahni khelh hun tura inpeih hman lote chu tumah innghak buai lova inkal kân (walkover) hmiah hmiah tur a ni. Player tinte inring rengin i awm ang u.

3. THP Hall (YMA Hall thar): Hetah hian Table Games chi hrang hrang- Draught, Chinese Checker leh Dawlchuh te khelh tur a ni. Heng game-a Section aiawh turte chuan mahni khelh hun tur Section hruaitu leh Game Incharge-te hnenah ngaihven nise.

4. Basketball Court: Basketball bikah hian Section tin atangin team 3 theuh (Under 20-ah team 1, Above 20-ah team 2 theuh) an rawn thawhchhuahpui dawn a. Above 20 bik hi chu Nov 29, 2008 (Inrinni)-a final khel hman turin Nov 25, 2008 (Thawhlehni) atangin tlai tin dar 3:30-ah khelh chhoh ziah tur a ni. Rules pawimawh leh mahni khelh hun tur chu Game Incharge-te hnenah ngaihven tur a ni e. Hei bakah hian Nov. 29, 2008 (Inrinni) zing dar 10:00 atanga tanin under 20 team-te leh above 20 final khelh tura ruahman a ni.

5. Inkawibah: Hmeichhia te pual bik liau liau infiamna Inkawibah-ah hian Section tin atanga a tha thlanchhuah 10-te’n Basketball Court-ah an thiam an entir bawk ang.

6. Govt. Middle School Kawt: Hetah hian Section tin atanga Volleyball thiam thlanchhuah thah, mipa leh hmeichhia team 1 theuhte’n an Section tan an theihna an lantir dawn a, Inrinni bikah hi chuan mit a tlaiin, a thlang lam nge ka en ang a chhak lam, ti reng renga inkhap buai a awl khawp ang le. Volleyball pawh hi Inrinni hian khelh zawh vek hman tum a ni.



FAM ROLUNG MUAL:

Hming : ZOHMINGLIANA
Kum : 42
Kohhran: Presbyterian
Thihni:Nov. 16, 2008. 2:30 PM
Vui Hun: Nov. 17, 2008. 12:00 N
Vuitu: Pastor C.Lalsangliana

Pu Zohmingliana hi January 20, 1966 khan Pu Chuauva leh Pi Thanzuali te fa 4-na niin, Kolasib khuaah a lo piang a. An unau hi mipa 3 leh hmeichhia 5 an ni.

January 20, 1988 khan Kelsih khaw nula R. Lalthianghlimi nen an innei a. An pahnih hian nupa lungrual leh inngeih tak an ni a, tunah hian fa pathum, mipa 1 leh hmeichhia 2 an nei a ni. An fate zinga naupang ber hian Class X a zir mek a, an fa u pahnihte chuan Class XII an zir mek thung.

Amah Pu Zohmingliana hi mize zawi leh inthlahrung tak, mi dang tana hnawksak lo tak a ni a. Midangte ngaipawimawh mi leh office-a a hnathawh bakah chuan mahni In chhuahsan ngai mang lo mi a ni.

Pu Zohmingliana hi zirna lama thiamthei tak a ni a, a hun hmasa lamah chuan Kolasib leh Saipum khuaah te High School zirtirtu hna thawkin a awm a. Zirtirtu hna atang hian Bank Service lamah lutin Vijaya Bank-ah a thawk leh a ni. Bank-a a thawh chhung hian India ram hmun hrang hrang, Saharanpur (UP), Shillong (Meghalaya), Silchar (Assam), leh Itanagar (Arunachal)-ah te Manager hna thawkin sawn kual a ni. Hetia hmun hrang hranga a awm kual hnu hian kum 2006 khan Aizawl-ah rawn sawn luh leh a ni a. Chumi hnuah Mission Vengthlang-a Y Section huam chhunga a In sak tharah March 4, 2007 khan an chhungkuain an rawn pem lut ta a ni.

Hetia Mission Vengthlanga an rawn awm hnu hian a hriselna a insawisel tan deuh a, Doctor-te pawh tum eng emaw zat an rawn hnuah a natna chu Scepticemia a ni tih hmuhchhuah a ni a. Hetia a khat tawka natnain a tihbuai deuh reng lai hian Nov. 16, 2008 (Pathianni) khan a natna chu rawn thawk lehin Aizawl Hospital panpui nghal a ni a. Hospital-ah hian doctor-te leh thawktu dangte’n theihtawp chhuaha an lo enkawl chungin a chhungte leh thenawm khawvengte beisei loh takin Pathianni chhun dar 2:30 kha Chatuan Ram lam min lo pan san ta a ni.

Pu Zohmingliana ruang hi tlaivarpui a nih hnuin a tuk, Nov. 17, 2008 (Thawhtanni) chhun dar 12:00 khan Bialtu Pastor C. Lalsangliana’n In lamah vuina hunserh a hmang a. Upa L.Ramthanga’n thlahna hun hnuhnung Mission Vengthlang Thlanmual-ah hmangin, vui liam a ni ta a ni.



VENG CHHUNG THUTHAR TAWI:

• Pi Lalthanpuii w/o Pu Vanlalsawma, M Sec. (Tlangveng) chu a chetsual avangin In lamah enkawl mek a ni.
• Pi Khuangthuami, Y Sec. chu Biak In chhunga a tluk sual avangin In lamah enkawl mek a ni.
• Pu H.Lalnuntluanga, Y Sec. (Darnam), pumna avanga Aizawl Hospital-ah enkawl a nih hnuin In lama enkawl turin a lo chhuak.
• Pu Lalhmahruaia, Y Sec., khawsik leh âwmna avangin In lamah enkawl mek a ni.
• Pu Ralramthanga, M Sec. chu phai lamah refer a nih avangin a fapa Pu Lalrochunga (Puia) chuan a kalpui.
• Pu Lalrintluanga, M Sec. (Bethani) chu phai lamah refer a nih avangin a thiannuin a kalpui.
• Pi Zairemthangi w/o F.Lalrochunga, M Sec. chu Guwahati-ah inenkawl turin a kal.
• Dr. Lalsiamliana, M Sec., kan veng VCP chu Delhi-a a hnungzang zai a nih laia a lung lam a that loh tel avangin damdawiin tha zawk panpui a ni a, ICU-ah dah a ni. Tunah chuan ICU atanga chhuakin zai leh theih hun tur nghakin an awm mek.
• Pu Zosangzuala, M Sec. (Courtzawl Dam) te chuan an fa hmingkoh atan fanu an nei thar.
• C.Lalrempuia s/o Pu C.Lalronunga, M Sec. leh Zohruailiani Pachuau, Sialsuk te chu Nov. 21, 2008 khan Mission Vengthlang Presby. Kohhran Hall-ah an innei.
• Pu Lalthansanga Varte, M Sec. chu Itanagar-ah AIR Director turin Arunachal Pradesh lamah a liam ta.
• Dr. Eric Zomawia te nupa, M Sec. chu International Association of Cancer Registry annual meeting, Sydney (Australia)-a neihah India aiawhin an kal. He meeting-ah hian Dr. Eric Zomawia’n paper a present a ni.