Kum 21-na, Issue 48, DECEMBER 30, 2008

KAN AIAWHTU TUR BRANCH HRUAITU KAN THLANG DAWN

December 30, 2008 (Thawhlehni) zan khian kum 2009 chhunga kan Branch hruaitu pawimawh, Office Bearers kan thlang leh dawn ta. Kan veng chhungah hian Kohhran hrang hrang kan awm ve tak neuh neuh avang hian veng chhungin chhiat tawh leh khawtlang huap thil tul eng emawa min khai khawmtu kan neih awm chhun chu YMA hi a ni ta deuh mai. Hetiang hi kan veng dinhmun anih avangin YMA chak tak nei tur chuan member-te kan tanrual a ngai khawp mai. YMA hruaitu tha tak nei tur chuan member tam thei ang berin kan lungrualna anga hruaitu kan thlan chhuah hi a pawimawh a, member tlemtein mawhphurhna kan bel ai chuan a tam thei ang ber kal khawmin hruaitu kan thlan hian, kan thlan chhuahte tan pawh inpek zel a phurawm dawn a ni. Chuvangin hruaitu thlang tur hian member a tam thei ang ber kal khawm tum ila a duhawm hle ang.

Kan veng hi YMA hruaitu dinhmun inchuhna boruak awm ngai lohna veng a ni a. Chutih rualin YMA hruaitu atana kan thlan chhuahte erawh veng leh YMA tana theihtawp chhuah mi an ni zel thin. Hetiang veng kan ni hi kan vanneihna pakhata chhiar loh phal rual a ni lo.
Hruaitu thlan programme tlangpui:

Returning Officer: Pu C. Chuaukunga
Polling Officer: Pu R. Vanlallawma, Pu C. Thanliana, Pu H. Lalzuala, Pu Lalmalsawma
Hunserh: Upa C. Zosangliana

Hruaitu thar thlan tur atan heng a hnuaia mi 12 te hi Branch Committee-in a nominate a ni:

• Pu Kaisangzuala, A Section
• Pu Israela, Y Section
• Pu Lalhmingmawia, Y Section
• Pu Gilbert Lalzarliana, Y Section
• Pu H. Lalbiaktluanga, A Section
• Pu Rosangzuala, M Section
• Pu Lalthawmmawia, A Section
• Pu Chawngthankima, M Section
• Pu Lalmuankima, M Section
• Pu F. Lalduhawma, Y Section
• Pu H. Ramdinliana, Y Section
• Pu R. Zothansanga, Y Section

Heng mi 12 te bakah hian floor atangin mi 3 nominate theih an ni bawk ang.

Hruaitu thlan hi post by post a inthlan tur a ni a. ‘Aizawl South Khawtlang Nun Siamtha Pawl’ atangin thusawi ngaihthlak a ni ang bawk ang. Hei bakah hian member vannei zual tana ‘Lucky Gift’ dawn tur thahnem tak a awm dawn bakah thingpui leh a hmeh tuihnai tak sem a ni bawk ang.

YMA hruaitu tha tak tak kan neih thinte hian kan veng nawmna’n an theih tawk an chhuah thin a. Khawtlangah chhiat tawk kan awm phei chuan zan rei pawh sawi lovin kan kaitho thuai thuai thin. Hetiang dinhmun pawimawh, veng tana chelhtu tur thlang tur hian YMA member zawng zawng hian mawhphurhna kan nei a ni tih i hre thar leh ang u.



KAN VENG KRISMAS:


















Kumin Krismas vuakvetah kan veng chhunga buaina lian tham sawi tur a awm lo. Hetiang hunpui lai hian ram chhung leh khawvel hmun hrang hrangah intihhlimna zawnga thalai pawnto, accident avanga chhungkua leh khawtlangin a buaipui ngai an awm fo thin. Hetiang harsatna awm lova Krismas kan hmang tluan thei hi a lawmawm hle a ni.

Kumin Krismas lawm chhung hian kan veng hmun thumah YMA Section pathumte’n veng chhunga harsatna hrang hrang thleng thei laka venhimna a tul ang ang thawk turin duty-na hmun an siam a. Khawtlang venghim tura ruatte thahnemngai takin an duty reng bawk. Hetia Duty-te’n thahnemngai taka an thawh avang hian zu rui pawngpawrh leh bengchheng, buaina siam sawi tur a awm meuh lo.

Veng chhung himna atana thahnemngai taka tha thawhtu zawng zawng chungah YMA, Mission Vengthlang Branch chuan lawmthu a sawi e.

Mission Vengthlang kohhran lian 4, Mission Vengthlang Presbyterian Kohhran, Jubili Kohhran, Shalom Baptist Kohhran leh United Pentecostal Church-te chuan tluang takin Krismas lawmna ruai an theh thei a. Kan hriat chinah kohhran khata ruaitheh tamna ber, MVT Presbyterian Kohhran-ah chuan mi 2,264 zetin Krismas lawmna ruai hi an kil a ni.


VENG CHHUNG THUTHAR TAWI:

• Tv Saidingliana Sailo s/o Pu Vanlalropuia Sailo, Y Sec., a mit (eye) checkup tira Guwahati-a kal chu dam takin a lo haw.
• Pi Darhliri w/o Pu H.Hrangzuala (L), Y Sec. (Darnam) chu kan veng Bazar Sazawrhna gate tluin a nak a vaw palh a, In lamah enkawl mek a ni.
• Pi Lalrinliani te nupa, A Sec. leh Pu B.Lalremsiama s/o Pu B.Thangrikhuma, Y Sec. te chu an ding khawm lai scooter-in a su a. Pi Lalrinliani hi a khup ruh a pelh avangin an tuam khawng a, In lamah enkawl a ni. Pu B.Lalremsiama pawh a kawng na avangin a che thei meuh lo.
• Pi Lalthangpuii w/o Pu Vanlalsawma, M Sec. chu Greenwood Hospital atangin dam takin a lo chhuak.
• Pu Bobby Vanlalrema leh Pu Eric Lalremsiama, M Sec. te chu Aizawl Hospital-ah enkawl mek an ni.
• Pu Lalnunzira s/o Pu Roparliana (L), M Sec. chu a ke na Durtlang Hospital-ah zai saka enkawl mek a ni.
• Tv Lalmalsawma (Sawmtea) s/o Pi Sailothangi Sailo, A Sec. chu Dec. 24, 2008 zana tawhsual a tawh palh avangin In lamah a mit (eye) enkawl mek a ni.
• Upa R.Malsawma, A Sec. chu khawsik avangin In lamah enkawl a ni.
• Upa Zalianthanga, A Sec., Kolkata in checkup-a kal chu In lama enkawl zui turin an rawn haw.
• Pu C.Lalrintluanga, A Sec. (Tlawng Road) chu BP sang avangin In lamah enkawl mek a ni.
• Pi K.Lalengmawii w/o Pu Zarkhawthanga, A Sec. chu a nawmsam loh avangin In lamah enkawl mek a ni.
• Pi Lalramengi w/o Pu Lalzarliana, A Sec. chu Civil Hospital-ah zai a ni.
• Pu Lallawmzuala, A Sec. chu Durtlang Hospital-ah enkawl mek a ni.
• Pu Vanlalhruaia Sailo, A Sec. chu Krismas ruai fatunaah têl sa-in a kut a inleih palh a, In lamah enkawl a ni.
• Pu Lalsona, A Sec. te chuan an fahmingkoh atan fanu an nei.
• Tun Krismas vuakvet chhung hian Pu R.Lalengliana, Y Sec. chuan Y Section Duty-te en theih turin a thlawnin LPS Vision a ngaihtuah sak a. Hei bakah hian Excise & Narcotics leh Mizoram Prohibition Council chuan Y Section Duty-te thingpui inna tur Rs 1,000/- an pe bawk. Y Section hruaitute leh duty-te an lawm hle.
• Er. F.Rualzakhuma, A Sec. chuan an Section chhunga Duty-te senso atan Rs 500/- a pe a. Hei bakah hian Pu PC Lalramzauva’n chhang leh thingpui a buatsaih sak bawk a, Section hruaitute an lawm hle.
• Kan venga Zirna In lian ber, Synod HSS-a zirtirtu atan Nl Elizabeth C.Lalrinfeli d/o Pastor C.Lalsangliana leh Pi Rebecca Rosangpuii d/o Rev. H.Lalchhanhima, Synod Moderator te lak thar an ni.
• Mahni pianna leh seilenna tia veng pawn leh hmun hla zawk atanga kan veng-ah ngei tia Krismas hmang tura rawn chhuak zawng zawngte chibai kan buk che u a, engemaw vanga rawn chuang chhuak thei lote leh, kan chanchinbu Internet atanga min lo chhiar saktu zawng zawngte chungah lawmthu kan sawi bawk a; in hun hman leh zel turah Zonunmawi Editorial Staff-te chuan kan duhsakna sang ber kan hlan mawlh mawlh a che u.

ARTICLE: HALPUAH I HAL DAWN EM?
C.H. Thangkhuma, M Section

Mizoram-a halpuah hal kan khap hi India ram pum huap chuan khap a ni ve hauh lo nia! Mizoram-in kan khap bik hi thiltih âwm tak a ni thei bik dawn em ni? Kum tin kan khap ziah a, mahse kumhlui thlah zanah chuan khap a nihna awm reng reng hmuh tur a awm ngai si lo. Eng nge a chhan ni thei ang? Sorkar hian a tih loh tur a ti em ni ang? Nge, khapna thupek chhuahtu hian a bawhzui tha tawk lo? Halpuah zuar leh a halte hi an man thin em? Khapna thupek bawhchhiate hi eng ati nge a man loh? Zawrhlai an mansakte hi a mantute’n an hal leh tho lo maw? YMA pawhin a khap thin em kha? Hruaitute leh member-te hi a bawhchhetu an ni thin em? Chhan tur a va tam em!


India ram hmun dangah khap a ni lo maw kha? Mahse, dan fel tak hnuaiah kaihhruaina an zawm thin asin. Zan dar 10:00 hnu lamah halpuah leh puak-thei thil hal khap tlat a ni a, zan dar 10:00 hma pawhin a thawm ring chi chu hal phal a ni chuang lo. Sorkar phalnaa halpuah siam thinte chuan a puah rin zawng tehna fel tak neiin sorkar phal china ringa puak turin an siam thin. Mizoram-a kan hmuh phak tam ber hi chu sorkar phalna nei lova a ruka siamte siam chhuah a ni.

Mizoram sorkar hian thil ngaihtuah chiang mang lovin halpuah leh puakthei thil zawrh leh hal a khap a nih kan ring em? Kan boruak a thianghlim a, mipui leh nungchate hriselna atan khapna thupek hi a chhuah thin a ni. Sorkar thupek kan zawm loh vanga thil thleng thin pahnih chauh lo tarlang ila:

(1) Boruak-a hrawk dawt tiza thei, thawkna leh chuap lama harsatna thlen thei chi leng vel hi nikum, Kumhlui thlah zana halpuah hal vanglai khan hal hma aiin a let 16-in a pung a. A nghawng i hre duh em?
(2) Mizoram Pollution Control Board-in January atanga March thla thlenga Asthma natna vanga thi an chhinchhiahnaah chuan, heng thla thum chhunga Asthma natna vanga thi zingah za-a 87 chu January thla chhunga thi an ni. Puak thei thil leh halmawi kan hal vang hian hlim viau mah ila, kan venga mi tam tak kan timangang-in, thihna kotlangah kan lo hnuk liam mek a lo ni.

Kulikawn, Bethlehem Veng leh Bethlehem Vengthlang-ah te chuan zên hmanga siam hal chi reng reng khawtlangin lungrual takin an hal lo thei a. Chuvang chuan heng veng-ah te hian kumhlui thlah zan apiangin mi tam tak an raltlan thin! Kan veng hi kumhlui thlah zan huphurh em emtute tan inhumhimna hmun ni ve thei se a va duhawm em!

Sorkar khap thil, tlawmngaipawl leh kohhrante’n tih loh atan an duh hi “I HAL LEH DAWN EM?”

Kum 21-na, Issue 47, DECEMBER 21, 2008

ENG ANGIN NGE KRISMAS LEH KUMTHAR I HMAN DAWN?

Mizoram mai ni lo, India ram leh khawvel pumin kan nghahhlelh em em Krismas chu kan lo thleng leh dawn ta reng mai. He hun hian Mizo-te Kristian kan nih atang kha chuan kan hnam nunah hmun sang ber leh hun nghahhlelhawm ber a chang tiin sawi ila, thu uar lutuk kan ni hran hauh lovang le.

Krismas hun hi sumdawngte’n kum tluana an nghahfak, a bik takin thawmhnaw leh naupang lawm chi hrang hrang zuartute tan phei chuan a aia hun nghahhlelhawm zawk sawi tur awm hauh lo a ni. Hei vang tak hian he Krismas lo thleng tur hi Kristian ni kher lo tan pawh eizawnna kawng lama hun nghahhlelhawm ber a tling tiin huai takin a sawi ngam awm e.

Krismas leh Kumthar bawr velah hian mahni phak tawk theuhah mitinin hlimpui tur thil hrang hrang kan zawng a. Hlimna hun a nih tlat avangin hringnun thlir thiam mite chuan he hun hi mi harsa zawkte tanpuina hun hlimawm atan an hmang nasa thin hle. Mimal mai bakah, pawl leh kohhran hrang hrangte pawhin he hun hi hlim taka kan hman tlan theihna’n, kan zingah khawsak harsat vanga Krismas hlim taka hmang thei lo tur an awm em? tiin tanpuina chi hrang hrang sem chhuahna hun atan kan hmang nasa hle bawk.

He Krismas hunah vek hian mi thenkhat (a bikin thalai lam), halpuah leh bengchheng siama hlimna zawng tlat pawl pawh veng tin leh khaw tinah sawi tham tak chu an awm ve ziah bawk. He’ng mite hi mihringin kan pianchhuahpui theuh, hlimna zawng an nih avangin a pawng a puia dem ngawt chi chu an ni bik lo maithei.

He Krismas hun tho hi, thalai thenkhat ve thung chuan hun danga an la tih ngai loh thil tha lo leh sual lam tih tanna hun atan an hmang ve fo bawk. Mi nawlpuiin hlim taka Krismas an hman laia thalai thenkhat, mahni nu leh pate hmuh phak loha hlimna zawng mi thahnem takte tan chuan, an zawn loh zawk lungngaihna vawrtawp chharna hun a ni fo bawk.

Han sawi tak zelah chuan Krismas hun hi, zalenna âta â, thalai thenkhat, zan rei, mi mut reh tawha khawlaia au bengchheng vak vak leh, midangte tana ninawm leh bengchheng khawpa bike leh motor chak leh ring tak taka khalh chiam chiam thintute tan pawh hun hlimawm a nih tho vang erawh chuan Dan kengkawhtute leh khawtlang hruaitute tan erawh thil buaithlak deuh erawh a awm thei fo bawk.

Engpawhnise, tunlai thalai thenkhat, tuma dip dal hauh loh a khawtlang leh sawrkar kal phung sawisel bawrh bawrh thin leh, kohhran hial pawh archuk tui lova chhuah mai hreh hauh lo leh, chuti chunga, “Kan zalen lo,” ti tlat bawk si pawh kan ngah sawt fu niin a lang. Heti chung chung hian, he Krismas lo thleng tur hian Mission Vengthlang tan, hlimna leh himna a rawn thlen ngei ang tih hi he thu ziaktu beisei a ni.

Nang, YMA member duhtak, Krismas hlim taka hmang tura i inpuahchah mek lai hian eng in nge i ngaihtuahna luah le? Mi dangte’n hlim taka Krismas an lo hman ve theihna’n mi harsa zawkte tanpuina hun atan i hmang dawn nge? In thenawm khawvenga dam lote tana boruak tha lo leh mi tithlabar khawp bengchheng chhuah thei halpuah hal leh bengchheng siamin hlimna i zawng dawn le?

A tawpna atan chuan, ram ti hmasawn a, tun ang dinhmuna Mission Vengthlang lo hlangkaitu, nu leh pa zawng zawngte Krismas hlim taka hmang turin duhsakna ka hlan che u a. In fate hi in hlimna thlen theitu leh in hlimna la bo theitu kan nih vang erawh chuan, lainat tak chunga zalenna awmzia, ‘Mi zawng zawng zalen taka awm tlang tur chuan, mi tinte zalenna theuh hi lak then a ngai a ni,’ tih hi min hrilh thar fo thin dawn nia.


VENG CHHUNG THUTHAR TAWI:

• Pu Lalhmingmawia h/o Pi Rosy Rosangpuii, A Sec. chu bike accident avanga a khaberuh na chu Aizawl Hospital-ah enkawl mek a ni.
• Nl Laldinpuii d/o Pu Laldinlena (Malena), A Sec. chu lung-na avangin Aizawl Hospital-ah enkawl mek a ni.
• Np Vanlalruatsanga s/o Pu R.Zohmingthanga, A Sec., pneumonia avanga Aizawl Hospital-a enkawl chu dam takin a lo chhuak.
• Pi Ngurthanzami (Pi Manguri), A Sec. chu kal (kidney) na avangin In lamah enkawl mek a ni.
• Pi Saikungi w/o Pu Lalchhandama, A Sec. chu ke ulh avangin In lamah enkawl mek a ni.
• Pi V.Rothuami w/o Pu H.Kaphnuna (L), A Sec. te chhung chuan an In sak thar an luah ta.
• Lalhruaisangi, Pu Lalrinzuala, A Sec. fanu, thla 2 leh ½ chu December 18, 2009, zan 9:30 khan a thi a. Hemi zan vek hian Mission Vengthlang Hlamzuih thlanmualah phum nghal a ni.
• CHANGKANG LO: Tunlai hian kan veng chhungah silai leh sairawkherh hmanga sava leh thehlei veh ching, A Section-ah patling pui lehnghal hmuh thin a ni. Naupang pawhin an tih duh tawh loh, hetiang thil changkang lo hi a ti thin hian chanchinbu-a a hming kan tarlan hma hian sim thei se a duhawm hle mai. Nungchate hi thah tuma kan veh kher loh pawhin an dinhmun a chep hrim hrim tawh a ni tih i hre thar leh ang u.

KAN VENG SCHOOL-TE TITHA

Kumin Class VII leh Class IV Board Exam-ah kan veng School-te’n result tha tak an nei hlawm a.Kan veng chhunga chool hrang hrang leh an result tlangpui heti hian han tarlang thuak thuak ila:

Mission Vengthlang Middle School atang hian F. Lalrinmawia chu Aizawl District-ah 8-na niin, Lalrintluanga chu 9-na a ni bawk. A result tlangpui chu:
Exam beitu: 29
Distinctioned: 3
First Division: 6
Second Division: 11
Third Division: 8
Failed: 1

Vana Memorial School:
Exam beitu: 23
Distinctioned: 1
First Division: 15
Second Division: 4
Third Division: 3
Failed: Nil

Mission Vengthlang Primary School atanga Class IV result tlangpui:
Exam beitu: 12
Distinctioned: 2
First Division: 7
Second Division: 2
Third Division: 1
Failed: Nil

Result tha tak nei tura thawktu zirtirtu leh naupang zawng zawngte kan lawmpui e.

Kum 21-na, Issue 46, DECEMBER 14, 2008

RALTIANG KAN KAI HMASAWNNA LAMTLUANG ZAWHIN

December 12 , 2008 (Zirtawpni) zan khan Branch YMA huaihawtin Inter Section Sports kharna programme, Zaipawl Nite leh kan veng chhunga hlawhtling chungchuangte chawimawina thilpek hlanin hun hman a ni. Hall chhungah member-te kan khat zo lo deuh nain a kal chhunte erawh vannei an intiin an hlim tlang hle.

Hemi zan bik liau liau atan hian Pi Mathani-te thianzahoin zahpuiawm lo takin Hall Stage an chei a, veng pawn atanga lo kalte pawhin a mawi leh ropui zia thu an hrilhfak hial a ni. He intawhkhawmna hi kan Branch President Pu Kaisangzuala’n boruak hlimawm tak siamin a kaihruai a, a tir atanga a tawp thlengin hun ninawmin hmun a luah hman lo.

Veng pawn atangin CYMA President, Pu JH Zoremthanga leh CEC member Pu Lalsailova, Mission Veng te lo kalin min rawn tawiawm a ni.


Mi hlawhtling chawimawite:

Pu Lalsawta:
March 21, 1946 kum khan Aizawl Luangmual-a lo piangin, 1958-ah Zarkawt-ah pemin awmhmun an bengbel a. Kum 1983 khan Mission Vengthlang-ah rawn pem phei lehin, vawiin ni thlengin awmhmun an rem ta a ni. Amah hi mi lehkha thiam thei a niin, B.A. pawh Pachhunga University College-ah zirin, distinction-ah a pass hial a ni. 1974 khan MCS 1st batch-ah 8-na dinhmun hauh phak hial khawpa mithiam a ni a. Kum 1987 khan sawrkar hna bansanin politics-ah a zuang lut a. 1993 khan Aizawl South-II bialah MLA atana thlan tlin a nih hnuah, tun tum 2008 MLA inthlan khan Aizawl East-II ah hneh takin thlan tlin a ni leh ta a ni. Hetianga Mission Vengthlang tui liak, ram roreltu atana thlan tlin a ni leh ta mai hi a chhuanawmin, veng-in kan chhuangin kan lawmpui hle a ni.

Nl. LalThangpui Pulamte:
He nula fel leh chhuanawm tak hi Febuary, 2006 atang khan Mission Vengthlang-ah rawn awmin, lehkhabu chhiar ngaina tak a ni a. Jan. 14, 1980 khan lo piangin, Churachanpur-ah Nursery atanga HSLC thleng a zir a, Cl-XII atanga B.A. thleng Scottish Church College, Kolkata-ah zirin, M.A. (Phil) erawh chu Manipur University-ah kalin subject 2-ah Gold Medalist a ni nghe nghe a ni. Tun tum MPS lakah khan pakhatna a hauh pha hi kan chhuang hle a, Mission Vengthlang timawitu langsar tak a nih avangin chawimawi loh theih loh niin Branch YMA chuan a ngai a ni. Amah hi Pu H.Thangluaia te nau a ni, an In-ah a khawsa mek a ni.

Tv. John Lalnunhlima:
July 12, 1982 khan lo piangin, Mission Vengthlang tuiliak dik tak a ni a. Tlangval tlawmngai leh chhuanawm, ruaitheh nikhua pawha har khukna lam tawn nileng peih mi, Kohhran leh Tlawmngai pawla theihtawpa inhmang a ni na chungin a zirlai erawh a thlahthlam phah ngai chuang lo. Kum 1997 khan HSLC 1st Div-ah pass-in a zo va, HSSLC erawh chu 2nd Div-ah pass-in, BSc. (Botany Hons.) 1st Div-ah a tling leh a. MSc. (Botany) hi Mizoram University hnuaiah zirin, 1st Div-ah a pass a, Gold Medalist a ni nghe nghe a ni. Amah hi Pu C. Lalriliana fapa a ni a, A Section-a an mahni In-ah a khawsa mek a ni.

Nl. C.Malsawmzuali:
Jan. 15, 1982 khan Pu C. Vanlalrema leh Pi Lalrodingi te fanu ni turin a lo piang a. Lehkha thiam thei tak niin, St Pauls HSS atangin 1st Div-ah HSLC kum 1998 a pass a; kum 2000 khan he School atang vek hian HSSLC chu 2nd Div-ah a zo leh a ni. BSc. (Zoology) chu Pachhunga University College-ah 2004 khan 1st Div-ah a lo zo tawh bawk. Kum 2006 khan MSc. (Forest Ecology, Biodiversity & Environmental Science) chu 1st Div-ah Mizoram University atangin a lo zo leh ta a, Gold Medalist a ni nghe nghe a ni. Mission Vengthlang-a an mahni In-ah a khawsa mek.

Nl. Grace Lalhlupuii Sailo:
Jan. 16, 1985 khan Pu Lalchungnunga Sailo leh Pi Saithuami Sailo te fa naupang ber atan a lo piang a, lehkha thiam thei tak niin, kum 2001 khan St. John School, Whitehall, Shillong atangin HSLC 2nd Div-ah a zo a; kum 2003 khan St. Mary HSS, Shillong-ah HSSLC 1st Div-ah zo lehin, kum 2006 khan B.A. (Sociology) 1st Div-ah a zo leh a. MSW chu Mizoram University atangin 2008 khan 1st Div-ah pass-in, Gold Medalist a ni nghe nghe a ni. Tunah hian Y Section-a an mahni In, Dawrkawn chhakah an awm mek.

He zan hlimawm takah hian Mizoram deng chhuak khawpa zaithiam hmingthang Pi Liandingpuii, A Sec.; Nl Margaret Malsawmzuali, A Sec.; Pu Lalremruata, Khatla; Nl Lalremruati, A Sec. te chuan zaiin kalkhawm an chawk hlim hle a. Heng zaithiam hmingthang te hi ngaithlatu lamin man chawi loa, mit lawng ngeia an hmuh avangin vannei an inti hle. Mi vannei zual bikte’n Lucky Gift chu Tv Lalmalsawma Khiangte-in hneh takin a buaipui a, kalkhawmte an hlim hle.

Pawhchawp Zaipawl Intihsiak Section hrang rang 3-in neiin, Lengkhawm Zai-a intihsiak a ni a, Y Section 1-na niin, A Sec. 2-na an ni a, M Sec. chuan hnu an khar.

Tun tum Inter Section Sports pumpui result puan nghal a ni a. M Section chu 1-na niin; kan Branch Secretary Pu Lalhmingmawia’n 1-na pual bik liau liau atana Rs. 3000 a donate an dawng. Y Section chu 2-na niin, A Section chuan hnu an khar ve thung.


VENG CHHUNG THUTHAR TAWI:

• Pi Dengziki, Y Sec. (Darnam) chu Durtlang Hospital-ah a ke zai a nih hnuah In lamah enkawl chhunzawm a ni.
• Pi Lalchhandami w/o K.Hmingthanga, Y Sec. (Darnam) ke na avangin In lamah enkawl mek a ni.
• Pu R.Khualdawla, Y Sec. (Darnam) chu BP sang avangin In lamah enkawl mek a ni.
• Tv B.Lalawmpuia (Op-a) s/o Sangnghina, Y Sec. (Dam) chu Civil Hospital-ah a kawng zai a ni.
• Pu B.Zosiamliana h/o Lalremruati, Y Sec. (Darnam) chuan an fa 3-na atan fanu an nei thar.
• Pi Lalthanpuii w/o Pu Vanlalsawma, M Sec. (Tlang Veng) chu Greenwood Hospital-ah dah luh a ni.
• Dr. L.Siamliana, M Sec., kan veng VCP chu Kolkata-a hun eng emaw chen an inenkawl hnuin a lo haw. Thla 3 hnuah a kal leh ang.
• Pu Lalrintluanga, M Sec. (Tlang Veng) chu Civil Hospital-ah pumpui zai a ni.
• Np K.Lalremruati d/o Pu K.Lalnunsiama, A Sec. chu Aizawl Hospital-a enkawl a nih hnuin dam takin a lo chhuak.
• Pu Lalthangzela Sailo, M Sec. te chhung chu Pu R Zasiama, Y Sec. te Inah an insawn.
• Nl C.Lalbiakdiki d/o C.Lalliana, Y Sec. (CP Road) chuan Home Guard-ah Wireless Operator hna a hmu thar a, CTI, Sesawng-ah training in a awm mek.
• Pu C.Zosangliana (Ma-a), A Sec. Br. Committee member leh Pu Lalremthanga, M Sec., Zonunmawi Editor te chu Guwahati-ah an zin.
• PAWISA CHHAR: Pu C.Rokhuma In leh THP Hall-II inkarah pawisa chhar a ni a. A tibo chuan Pu Lalthlungliana, A Sec. (Taxi Driver) hnenah tun kar Dec. 21, 2008 hma ngeiin ngaihven ni thei se
• TELEPHONE HRUI RUK CHING: Tunlai hian kan veng chhungah telephone hrui ruk ching an awm tih hriat a ni a. Thenawm khawvengte telephone hrui inven sak tawnin, hetianga tih chingte hi man chhuak ngei turin mit i len tlang teh ang u.

Kum 21-na, Issue 45, DECEMBER 07, 2008

BRANCH EXECUTIVE COMMITTEE ROREL THUTKHAWM TUM 13-NA

December 4, 2008 (Ningani) zan khan kumin chhunga a tum 13-na atan YMA, Mission Vengthlang Branch Executive Committee rorel thutkhawm neih a ni. He rorel thutkhawmah hian kan Branch Vice-President Pu Israela’n a kaihruai a. Member 26 kalin, mi dang 7-te erawh chuan zin chhuah vang leh remchan lohna dang vanga an kal theih loh thu thawnin an pha thung a ni. Thurel leh report pawimawh, member-ten kan hriat tlan awm chi han tarlang ila:

1. Sum dinhmun:
Tuna YMA, Mission Vengthlang Branch sum, kan Branch Treasurer kuta awm kan neih mek chu Rs 40,393/- a ni. Hemi zan meeting-a miharsate pual Bawm hunah Rs 365/- a tla bawk.

2. Vantlang Mike:
Veng chhung thil pawimawh kan hriat tlan theihna hmanraw pawimawh tak, Vantlang Mike thuam thatna’n Information Sub Committee chuan Mike Horn unit 3 an lei thar a. Veng chhung hmun thenkhat atanga Vantlang Mike hriat that theih mang loh awm thin chu a hrui chiangkuang lo laite an siam tha bawk.

3. Khawtlang nun siam Tha pawl:
Tun hnaia Aizawl chhim lama pawl din thar, Khawtlang Nun Siamtha Pawl-a kan Branch aiawha hma lo la bik turin kan Branch atangin mi 3 ruat an ni a. He pawl ding thar tanpuina’n hian kan Branch chuan Rs 1,000/- kan pe bawk.

4. Branch sum Audit:
Kumin chhunga kan Branch sum hman dan endik (audit) turin mi pahnih, Pu Lalmuankima, M Section leh Pu Lalthawmmawia, A Section-te tlawmngai tura ruat an ni. Hemi rual hian kan Section pathum-te sum endik turin Branch Treasurer Pu H.Lalbiaktluanga leh Fin. Secretary Pu Rosangzuala-te ruat an ni bawk. YMA sum audit-tu turte hi Jan. 8, 2009 hmaa zo thei tura ngen an ni.

5. Hruaitu thar thlan:
Nakum, 2009 chhunga kan Branch hruaitu (Office Bearers) thlanna chu Dec. 30, 2009 (Thawhlehni) zanah neih tura rel a ni. Hruaitu thar thlan turah hian heng a hnuaia mi 12-te rawt chhin (nominate) an ni a. Inthlan zanah member kalkhawmte’n floor atangin mi 3 an rawt (nominate) thei bawk ang. Inthlan programme kimchang chu a dawn hnaiah tih chhuah leh a ni ang.

Nominate-te hming:

• Kaisangzuala
• Pu Israela
• Pu Lalhmingmawia
• Pu Gilbert Lalzarliana
• Pu H.Lalbiaktluanga
• Pu Rosangzuala
• Pu Lalthawmmawia
• Pu Chawngthankima
• Pu Lalmuankima
• Pu F.Lalduhawma
• Pu H.Ramdinliana
• Pu R.Zothansanga

6. Sport kharna & Branch Zaipawl Nite:
December 12, 2008 zan khian hlawhtling taka kan hman mek, Branch Sports kharna leh kan Branch Zaipawl Nite hlimawm tak hman tum a ni. Hemi zan hian Section hrang hrangte’n intihsiakna hnuhnung ber atan ‘Pawhchawp Lengkhawm Zai’ hmanga intihsiakna an nei ang a. Kan Branch Zaipawl nen Krismas hla leh Hla lunglenthlak sa hova hun hlimawm tak hmangho turin ruahman a ni.

7. Duty chungchang:
Kan hma lawka Mizote’n hunpui leh hlimawm bera kan neih, Krismas leh Kumthar lo thleng turah hian veng chhung mi tinte hlim leh thlamuang taka kan awm tlan theihna’n veng chhung vawnghim tura Duty ngawrh taka neih tum a ni.


JUBILI BIAK IN THAR:

Tun kar Thawhlehni, Dec. 9, 2008 hian Jubili Presbyterian Kohhran chuan an Biak In thar, Rs 41,45,772/- leh hnatlang tha 1988 zet senga an sak, a dung ft. 60 leh a vang ft. 40-a zau chu ropui takin an hawng dawn.

An Biak In thar hi chawhma dar 11:30-ah Bialtu Pastor C.Lalsangliana’n a hawng ang a, Biak In thar hlanna inkhawm an nei nghal ang. Tlai lamah Kohhran pum huapin Biak In thar lawmna ruai thehho tur a ni bawk.



VENG CHHUNG THUTHAR TAWI:

• Pi Rinpuii w/o Rev. C.Lianhmingthanga, Y Sec. chu a tluk palh avangin a ke a tina a, In lamah enkawl a ni.
• Pi Mabiaki w/o Pu Roenga, Y Sec. chu Greenwood Hospital-ah a rilphir zai a ni.
• Nl Lalhlimpuii d/o Pu C.Chuaukunga, Y Sec. chu a tonsil na Aizawl Hospital-ah zai a ni.
• Pu Lallawmzuala, Y Sec. (Khatla Road)-te chuan an fahmingkoh atan fanu duhawm tak an nei thar.
• Pi Zonunmawii w/o Pu Vanlalchhuanga, Y Sec. (Kawn) chu pum lam tha lo avanga Aizawl Hospital-a enkawl a nih hnuin In lamah enkawl turin a lo chhuak.
• Np Lalchhanchhuaha s/o Pu Vanlalchhandama, Y Sec. (Vengmawi) chu ka-na avangin Kulikawn Hospital-ah enkawl mek a ni.
• Pu C.L.Ruala, Y Sec. (Darnam) chu a zinnaah dam lovin, tunah In lama inenkawl zui turin a lo haw.
• Pu C.Lalfakawma, M Sec. te chuan fahmingkoh atan Durtlang Hospital-ah fapa an nei thar.
• Pu F.Lalropianga, M Sec. chu pumna avangin Aizawl Hospital-ah admit a ni.
• Pu Zalianthanga, A Sec. chu Birla Heart Institute, Kolkata-a inentir turin a thang mek.
• Nl C.Lalawmpuii d/o Pi Saichhungi, A Sec. chu Guwahati-a a mit entir turin a kal.
• Pu H.Lalbiakthanga, A Sec., kan Branch Treasurer chu Mumbai-ah inenkawlin an la thang mek.
• Pu L.Ramthanga, Y Sec.; Pu C.Vanlalsiama, M Sec. leh Pu F.Malsawma, M Sec. te chu an office aiawha inkhel turin Chandigarh lamah an liam ta.
• Nl C.F.Liansangpuii, Y Sec., kan Branch Comm. member chu thla hnih chhung thingtlang lama a hawi khawthawn hnuin dam takin a lo haw leh ta.
• Pu Zotinkhuma, Y Sec. (Vengmawi) chuan a zinna atangin Duty-te ai tur thing a rawn hawn sak a, kan lawm hle.
• Pu Jolly Newman, M Sec., kan Branch President lo ni tawh, hnathawhna avanga Lunglei-a awm mek chu tunlai hian a rawn zin phei. Ani hi a hnathawhna lamah SE (P&E)-ah a kaisan avangin Aizawl lamah a rawn phei leh dawn a, kumin Krismas hma hi chuan a rawn insawn fel hman beisei a ni.
• Nl Romani d/o Upa Hauhmingthanga, M Sec. chu a hnathawhna Suangpuilawn atangin kum tawp chawlh hmangin a rawn haw.
• Tv Issac Lallawmkima s/o Pu Vanlalbawiha leh Nl C.Zarzoliani d/o Pu C.Lalrinthanga, A Sec. ve vete chu Dec. 12, 2008 (1:00 pm) khian Jubili Biak In-ah an innei dawn.
• Tv Chanchinmawia, A Sec. leh Nl Lalnunpuii, Bungkawn Vengthar te chu nimin zing khan Jubili Kohhran Hall-ah an innei.
• Pu R.Vanengzauva te chhung chu Salem Veng atangin Pu Haukima, A Sec. te In luahin an rawn pem lut.
• Nl Lalthangpuii Pulamte d/o Pu Lalkhawlien, M Sec. chu tun hnaia Mizoram sorkar-in Mizoram Police Service (MPS) atana mi 10 a lak zinga 1-na a ni a, amah hi Mizo hmeichhia-te zinga MPS tling hmasa ber a ni.Kan veng hian Mizo hmeichhia-te zinga SP hmasa ber Pi Darhmingliani, M Sec. kan lo nei tawh bawk a. Kan veng hmeichhia-te an chhuanawmin an duai lo hle.
• Tv Lalzuitluanga s/o C.Thuamliana, M Sec., India aiawha Commonwealth Taekwondo Champioship tel tur athlan chu Visa a hmuh theih loh avangin Canada thleng lovin a lo haw leh ta rih.

Kum 21-na, Issue 44, NOVEMBER 30, 2008

INFIAMNA ROPUI - BRANCH SPORTS CHHUNZAWM

















ME School kawtah Volleyball
















Basketball Court-ah Inkawibah

Kum dang leh hun danga kan lo neih tawh thin aia ropui, YMA Mission Vengthlang Branch Sports chu infiamna hrang hrang, ngawrh taka khel chhoin nimin 29.11.2008 khan a zualpui chu zawh deuh duak a ni ta. Veng chhungin chhiat kan tawh avanga ruahman lawk anga thil a kal theih tak loh avangin nimin khan infiamna hrang hrang zawh fel deuh duak a ni ta. Table Games leh Table Tennis bik hi an zo hman em tih he chanchinbu buatsaih lai hi chuan kan hre hman ta chiah lo.

Infiamna hrang hrangah Major Games bika result tlangpui han tarlang thuak thuak ila.

Football: Champion: M Section Team-II Runners up: Y Section Team-I
Third place: A Section Team-I & Y Section Team II

Basketball (Under 20)
Champion: A Section
Runners up: M Section
Third place: Y Section

Basketball (Above 20)
Champion: M Section
Runners up: A Section
Third place: Y Section leh M Section

Volleyball (Mipa)
Champion: M Section
Runners up: Y Section
Third place: A Section

Volleyball (Hmeichhia)
Champion: Y Section
Runners up: M Section
Third place: A Section

Inkawibah (Hmeichhe tan chauh)
Champion: Y Section
Runners up: M Section
Third place: A Section

Branch Sports-a infiamna chi hrang hrang kan zawh hnu hian a kharna hun (closing function) ropui taka hman tum a ni. A hun leh ni tur duan chhin chu a awm tawh naa, ruat ngheh chiah a la awm loh avangin a hun chu remchang danga tarlanah dah ta ila. He hunah hian Branch Sports-a inelna hnuhnung ber, Pawhchawp Lengkhawm Zai intihsiakna hun hlimawm tak hman a ni ang.

Hei mai a la ni lo. He hun kan hman tur hi Closing Function a nih mai bakah, Zaipawl Nite a ni dawn bawk a, hetah hian kan Branch aiawh zaipawl member-te chawimawina hlan leh zaihona hlimawm tak neih nghal tura ruahman a ni bawk.


VENG CHHUNG THUTHAR TAWI:

• Pu Lalrosanga c/o Pi Zuichhungi, Y Sec., pumna avangin In lamah enkawl a ni.
• Pu C.Lalnunsanga (Lâna), Y Sec., khawsik âwmna avangin In lamah enkawl a ni.
• Pu H.Ramkinlova, Y Sec., Aizawl Hospital-a enkawl chu dam takin a lo chhuak.
• Pu Victor Lalbiakmawia, Y Sec. te chuan a pahnihna atan Aizawl Hospital-ah fanu an nei thar.
• Pi Lalriliani w/o Pu PC Lalnunmawia, M Sec. chu Civil Hospital-ah enkawl mek a ni.
• Pu H.Lalthantluanga (Missionary), M Sec., Pu Lalzuiliana (L) In luah chu a khawsik a reh theih meuh loh avangin Durtlang Hospital-ah enkawl mek a ni.
• Pu Laldinthara, A Sec. chu tha-nâ avangin Nazareth Hospital-ah enkawl mek a ni.
• Pi Ngurthanzami (Manguri), A Sec. chu kalnâ avangin Care Hospital-ah enkawl mek a ni.
• Pu Hualrotluanga, A Sec., a hnungzang nerve Durtlang Hospital-a zai chu In lama enkawl chhunzawm a ni.
• Np. Lalruatpuii d/o Pu Vanlalruala, A Sec., Greenwood Hospital-a zai chu dam takin a lo chhuak.
• Pi Laltlanzovi, A Sec. chu kan veng thalai K.Vanlalmuanpuii, Malsawmdawngi, Zoremsiami, Y Sec.-a mite chuan thisen an pe. Amah hi Zirtawpni khan In lama enkawl zui turin a lo chhuak a ni.
• Tv Lalremtluanga, A Sec. tha-nâ avangin In lamah enkawl mek a ni.
• Tv C.Lalroliana s/o Pi Lalrinthangi, M Sec. leh Lallianpuii, Mission Veng-te chu Nov. 27, 2008 zan khan an innei. Kan venga zana innei hmasa ber an ni.
• Tv Chanchinmawia, A Sec. leh Nl Lalnunpuii, Bungkawn-te chu Jubili Kohhran Hall-ah Dec. 6, 2008 khian an innei dawn.
• Np Jacob Lalchanmawia s/o Pu Lalthachianga leh Np Lalrindika s/o Pu ST Vanlalruata, A Sec. te chu Vijayawada (AP)-a National Sub Junior Table Tennis Championship-ah Mizoram aiawhin an thang mek.
• Pu Vanrammawia (Pa Mawia), Y Sec. chuan a tarmit a tibo palh hlauh mai. A tel lova a awm hleihtheih loh avangin a chhar chuan pek let leh theih nise a lawm khawp ang.
• State Library atangin lehkhabu thar 88 zet kan dawng thar a, kan Librarian-in a chhinchhiah fel hunah hawh chhuah theih a ni ang.
• Mitthi awm changa kuang siamtute bengvar taka thingpui lum sak thintu Pi Zuichhungi, Y Section-te inpekna a ropuiin, an chungah thalai, kuang buaipui thintute an lawm hle.
• Nl Vanrammawii Hrahsel d/o Pu H.Kaphnuna (L), A Sec. chu Missionary hna a thawhna Kiribati atangin Krismas leh Kumthar chawlh hmangin a lo haw.
• Malsawmzula (thla 1½) s/o Pu Lalengkima Ralte, Padma Shree Khawlkungi, M Sec. In luah chu Septicaemia natna avangin Nov. 27, 2008 zan khan a boral a, a zan la la hian a pu, Pu Tlangthansiama, M Sec. In bulah phum a ni.
• Pu P.B. Lalnienga h/o Lalrinmawii (Lalrini), M Sec., Pu H.Lianchhinga makpa chu tun hnaia zawh tak, Mizoram Palian Inchai champion lai Amawitea, Kolasib chotu tur zawnnaah a chak ber a, hun remchang hmasaah Mizoram Palian Inchai Champion nen hian Title-Fight ropui an nei dawn. Kan vengin Mizoram Palian Inchai Champion kan neih ngei a beiseiawm hle.
• Tv Lalnunpuia s/o Pu Lalrinthangzuala, Y Sec., Coimbatore (TN)-a B.E. zir mek chu tunlai hian chawlh hmangin a lo haw.

FAM ROLUNG MUAL:
Hming : NGURHMINGTHANGA
Kum :33
Kohhran: Presbyterian
Thihni:Nov. 23, 2008. 09:20 PM
Vui Hun: Nov. 24, 2008. 12:00 N
Vuitu: Pastor C.Lalsangliana

Tv Ngurhmingthanga hi Pu Lalchungnunga (L) leh Pi Lalngheti fa 6 zinga 3-na niin, October 14, 1975 khan Chamring khuaah a lo piang a. Pianpui unau mipa pakhat leh hmeichhia 4 a nei a ni.

Tv Ngurhmingthanga hi tawng tam lo tak a ni a, tlangval tihnuam leh thuawih thei tak a nih avangin thenawm khawvengte ngainat pawh a hlawh hle a ni. High School a kal laiin Assam Regiment-ah kum 1995 khan a lut a, hmun hrang hrangahte a awm a. Rastriya Rifle-ah thlan niin Jammu & Kashmir-ah dah a ni. A sipai tan lai hian silai kah leh thildangah lawmman te lain, kum 2002 khan harsatna engemaw avangin sipai hi a chawlhsan a ni.

August 9, 2003-a a pa’n a boral san avang leh, a u Lalchamliana’n hmun hrana a awmsan avangin chhungkaw enkawltu ber a ni a, hnathawh tur remchang apiang a thawk thin.

Hriselna lamah insawiselna nei hran lo nia hriat a nih laiin kar hmasa tir lam atang khan pum nawm loh thu a sawi a. Amaherawhchu, a la ding chung viau va, lenvah pawh a la thulh lem lo. Inrinni (Nov. 22, 2008) chawhnu lam atangin a pumna a rawn zual deuhva, Kulikawn Damdawi In-ah entir a ni. Doctor-in damdawi te chawhin, In lamah inenkawl tura haw tir a ni a; a tuk Pathianni khan a na chu a zual zel tak avangin Aizawl Civil Hospital panpui a ni a, thisen test leh X-ray te tiin, a lung a vung a ni tih hmuhchhuah a ni ta a. Doctor-te leh nurse-te’n theihtawp chhuahin an enkawl chungin a natna hi a lo nasat tawh em avangin zan dar 9:20-ah min lo boralsan ta a ni.

Tv Ngurhmingliana ruang hi Nov. 23, 2008 (Pathianni) zan hian tlaivarpui a nih hnuah, a tuk Thawhtanni chhun dar 12:00-ah Bialtu Pastor C.Lalsangliana’n vuina hunserh In lamah a hmang a. Thlanmual-ah Upa Zoramthanga Rawihte-in thlahna hunserh hnuhnung a hman leh hnuin Mission Vengthlang Thlanmual-ah thlah liam a ni ta a ni.

Kum 21-na, Issue 43, NOVEMBER 23, 2008

INFIAMNA ROPUI BRANCH SPORTS TAN A NI TA

Nimin, November 22, 2008 (Inrinni) khan YMA, Mission Vengthlang Branch Sports chu YMA Field, Vaivakawn-ah ropui taka hawn a ni ta. Branch Sports hi kan Branch huam chhunga Section pathum, Y, M leh A Section-te inhmelhriatna’n leh thawhhona tha zawk kan neih theihna’na ruahman a ni. Branch Sports hawnna hi member-te’n an ngaipawimawhin an kal tha hle a. Kan veng atanga Vaivakawn Field panna tur hian Branch YMA chuan hmeichhia zawng zawng chuanna tur Bus leh, Section tin atanga mipa chuan khawmna’n ‘pa’ takin 407 Truck pathum a hire. He’ng bakah hian veng chhunga member tlawmngai mi eng emaw zatin mahni motor an rawn thawhchhuahpui bawk.

Nimin, Branch Sport hawn ni hian infiamna dang buaipui tel hauh lovin Football chauh khelh a ni. Football-ah hian Section pathum atanga a tha tha thlan chhuah Team hnih theuhte inkhelh a ni bawk a, match hmasa ber atangin game en chakawm tak a ni chho vek mai. Result erawh kan rawn tarlang hman ta lo hlauh.

Hei bakah hian Football final khelh hma a Exibition Match, Branch Committee member mipa leh Section pathum hruaitute inkhel tur pawh hi a boruak a sang khawp mai. President Pu Kaisangzuala’n an tumpui turte vau lawkna’na, “Keini chu hneh rual kan ni lovang, kan adviser hovin kan thim thla mup mup mai dawn a nia,” a tih mai pawh Official Pu Lalmuankima’n, “Hei hi chu vun rawng vanga inhmuhsitna a nih avangin a sawitu hi Yellow Card leh Rs 50/- chawi tira hrem ni rawh se,” a tih chu thu tlinga ngaih a nih vangin Yellow Card hmu saa inkhel tur pawh an awm nawk dawn a nih hmel.

Tun kar chho Sport Programme:
Tun kar chhoah hian Branch Sports hi kan veng chhung hmun 5-ah a hnuaia tarlan ang hian chhunzawm chhoh zel tura ruahman a ni. Tun kar chhova sport item hrang hrang khelh turte hi basketball tih loh chu zanah vek, inkhawm zanah zan dar 7:45 leh, inkhawm loh zan chuan zan dar 6:30-ah te tan ziah tum a ni.

1. Synod Higher Secondary School TT Hall: Hetah hian Table Tennis match zawng zawng khelh tura ruahman a ni. Section aiawha khel turte’n mahni khelh hun tur Section hruaitute leh Game Incharge-te hnenah ngaihven vat vat nise.

2. YMA Hall: YMA Hall-ah hian Table Games, Carrom match zawng zawng khelh tura ruahman a ni. Carrom bikah hian Men’s Singles-ah ringawt pawh mi 70 chuang zet an chhuak dawn a, hei bakah hian Women’s Singles, Mixed Doubles leh Men’s Doubles-ah engemaw zat khel tur an awm bawk avangin mahni khelh hun tura inpeih hman lote chu tumah innghak buai lova inkal kân (walkover) hmiah hmiah tur a ni. Player tinte inring rengin i awm ang u.

3. THP Hall (YMA Hall thar): Hetah hian Table Games chi hrang hrang- Draught, Chinese Checker leh Dawlchuh te khelh tur a ni. Heng game-a Section aiawh turte chuan mahni khelh hun tur Section hruaitu leh Game Incharge-te hnenah ngaihven nise.

4. Basketball Court: Basketball bikah hian Section tin atangin team 3 theuh (Under 20-ah team 1, Above 20-ah team 2 theuh) an rawn thawhchhuahpui dawn a. Above 20 bik hi chu Nov 29, 2008 (Inrinni)-a final khel hman turin Nov 25, 2008 (Thawhlehni) atangin tlai tin dar 3:30-ah khelh chhoh ziah tur a ni. Rules pawimawh leh mahni khelh hun tur chu Game Incharge-te hnenah ngaihven tur a ni e. Hei bakah hian Nov. 29, 2008 (Inrinni) zing dar 10:00 atanga tanin under 20 team-te leh above 20 final khelh tura ruahman a ni.

5. Inkawibah: Hmeichhia te pual bik liau liau infiamna Inkawibah-ah hian Section tin atanga a tha thlanchhuah 10-te’n Basketball Court-ah an thiam an entir bawk ang.

6. Govt. Middle School Kawt: Hetah hian Section tin atanga Volleyball thiam thlanchhuah thah, mipa leh hmeichhia team 1 theuhte’n an Section tan an theihna an lantir dawn a, Inrinni bikah hi chuan mit a tlaiin, a thlang lam nge ka en ang a chhak lam, ti reng renga inkhap buai a awl khawp ang le. Volleyball pawh hi Inrinni hian khelh zawh vek hman tum a ni.



FAM ROLUNG MUAL:

Hming : ZOHMINGLIANA
Kum : 42
Kohhran: Presbyterian
Thihni:Nov. 16, 2008. 2:30 PM
Vui Hun: Nov. 17, 2008. 12:00 N
Vuitu: Pastor C.Lalsangliana

Pu Zohmingliana hi January 20, 1966 khan Pu Chuauva leh Pi Thanzuali te fa 4-na niin, Kolasib khuaah a lo piang a. An unau hi mipa 3 leh hmeichhia 5 an ni.

January 20, 1988 khan Kelsih khaw nula R. Lalthianghlimi nen an innei a. An pahnih hian nupa lungrual leh inngeih tak an ni a, tunah hian fa pathum, mipa 1 leh hmeichhia 2 an nei a ni. An fate zinga naupang ber hian Class X a zir mek a, an fa u pahnihte chuan Class XII an zir mek thung.

Amah Pu Zohmingliana hi mize zawi leh inthlahrung tak, mi dang tana hnawksak lo tak a ni a. Midangte ngaipawimawh mi leh office-a a hnathawh bakah chuan mahni In chhuahsan ngai mang lo mi a ni.

Pu Zohmingliana hi zirna lama thiamthei tak a ni a, a hun hmasa lamah chuan Kolasib leh Saipum khuaah te High School zirtirtu hna thawkin a awm a. Zirtirtu hna atang hian Bank Service lamah lutin Vijaya Bank-ah a thawk leh a ni. Bank-a a thawh chhung hian India ram hmun hrang hrang, Saharanpur (UP), Shillong (Meghalaya), Silchar (Assam), leh Itanagar (Arunachal)-ah te Manager hna thawkin sawn kual a ni. Hetia hmun hrang hranga a awm kual hnu hian kum 2006 khan Aizawl-ah rawn sawn luh leh a ni a. Chumi hnuah Mission Vengthlang-a Y Section huam chhunga a In sak tharah March 4, 2007 khan an chhungkuain an rawn pem lut ta a ni.

Hetia Mission Vengthlanga an rawn awm hnu hian a hriselna a insawisel tan deuh a, Doctor-te pawh tum eng emaw zat an rawn hnuah a natna chu Scepticemia a ni tih hmuhchhuah a ni a. Hetia a khat tawka natnain a tihbuai deuh reng lai hian Nov. 16, 2008 (Pathianni) khan a natna chu rawn thawk lehin Aizawl Hospital panpui nghal a ni a. Hospital-ah hian doctor-te leh thawktu dangte’n theihtawp chhuaha an lo enkawl chungin a chhungte leh thenawm khawvengte beisei loh takin Pathianni chhun dar 2:30 kha Chatuan Ram lam min lo pan san ta a ni.

Pu Zohmingliana ruang hi tlaivarpui a nih hnuin a tuk, Nov. 17, 2008 (Thawhtanni) chhun dar 12:00 khan Bialtu Pastor C. Lalsangliana’n In lamah vuina hunserh a hmang a. Upa L.Ramthanga’n thlahna hun hnuhnung Mission Vengthlang Thlanmual-ah hmangin, vui liam a ni ta a ni.



VENG CHHUNG THUTHAR TAWI:

• Pi Lalthanpuii w/o Pu Vanlalsawma, M Sec. (Tlangveng) chu a chetsual avangin In lamah enkawl mek a ni.
• Pi Khuangthuami, Y Sec. chu Biak In chhunga a tluk sual avangin In lamah enkawl mek a ni.
• Pu H.Lalnuntluanga, Y Sec. (Darnam), pumna avanga Aizawl Hospital-ah enkawl a nih hnuin In lama enkawl turin a lo chhuak.
• Pu Lalhmahruaia, Y Sec., khawsik leh âwmna avangin In lamah enkawl mek a ni.
• Pu Ralramthanga, M Sec. chu phai lamah refer a nih avangin a fapa Pu Lalrochunga (Puia) chuan a kalpui.
• Pu Lalrintluanga, M Sec. (Bethani) chu phai lamah refer a nih avangin a thiannuin a kalpui.
• Pi Zairemthangi w/o F.Lalrochunga, M Sec. chu Guwahati-ah inenkawl turin a kal.
• Dr. Lalsiamliana, M Sec., kan veng VCP chu Delhi-a a hnungzang zai a nih laia a lung lam a that loh tel avangin damdawiin tha zawk panpui a ni a, ICU-ah dah a ni. Tunah chuan ICU atanga chhuakin zai leh theih hun tur nghakin an awm mek.
• Pu Zosangzuala, M Sec. (Courtzawl Dam) te chuan an fa hmingkoh atan fanu an nei thar.
• C.Lalrempuia s/o Pu C.Lalronunga, M Sec. leh Zohruailiani Pachuau, Sialsuk te chu Nov. 21, 2008 khan Mission Vengthlang Presby. Kohhran Hall-ah an innei.
• Pu Lalthansanga Varte, M Sec. chu Itanagar-ah AIR Director turin Arunachal Pradesh lamah a liam ta.
• Dr. Eric Zomawia te nupa, M Sec. chu International Association of Cancer Registry annual meeting, Sydney (Australia)-a neihah India aiawhin an kal. He meeting-ah hian Dr. Eric Zomawia’n paper a present a ni.

Kum 21-na, Issue 42, NOVEMBER 16, 2008

INFIAMNA ROPUI - BRANCH SPORTS NEIH A NI DAWN

YMA, Mission Vengthlang Branch din tirh atanga a aia ropui la thleng ngai reng reng lo tura beisei, Branch Sports chu November 22, 2008 (karleh Inrinni) khian YMA Field, Vaivakawn-ah tan tur a ni ta. Branch Sports hlawhtling tak nei tur chuan kan Branch huam chhunga infiammite leh kan hruaitute mai an tawk lo va, Branch chak leh inlungrual kan nihna tilang tur chuan member zawng zawngte’n kan aiawha infiammite tawiawm tura kan theihtawp kan chhuahnaah hian a hlawhtlinna tak tak zawk chu a awm a ni tih kan hriat tlan a tha hle awm e. Infiamna hrang hrang tih hun tur leh inkhelhna hmunturte han tarlang thuak thuak ila:

A ni khatna chu (Ni 22.11.2008, Inrinni)
A hmun : Y.M.A. Field, Vaivakawn
Tan hun : Zing dar 9:30
Hruaitu : Pu Lalmuankima, Chairman, Sport Sub - Committee

A ni khatnaah hian infiamna dang buaipui hauh lovin Football chauh buaipui tur a ni. Football-ah hian Section tinin team hnih theuh neih tur a nih bakah, team khatah hian mi 18 an awm theuh tur a ni bawk.

Vaivakawn kalna tur hian Branch-in Bus pathum a ngaihtuah fel tawh a. Heng Bus-te hi zing dar 8:45-ah kan veng atangin a chhuak ang. A Section tan Pu Zathuama kawt (Turning point)-ah, M Section tan Court zawl-ah, Y Section tan Dawrkawn-ah a hun dik taka chhuak thei tura inbuatsaih tur a ni. Hemi ni hian Branch-in chhunah refreshment a ngaihtuah bawk ang.

A ni khat ni-a thil nghahhlehawm ber pakhat chu Exhibition Match, Section pathum O.B.-te leh Branch Committee Member mipate’n an khelh tur hi a ni. Branch Committee aiawha goalkeeper tur Pu C. Chuaukunga pawh inlak fit tumin a exer nasa tawh mai.

Table Games
THP Hall (YMA Hall thar)-ah ni Nov. 24 - 28, 2008 (zanah vek) khelh tur a ni. Table Games-a telh tur infiamnate chu:
1. Draught - Men’s Singles
2. Chinese Checker - Men’s & Women’s Singles
3. Carrom Board - Men’s Singles, Women’s Singles,
Men’s Doubles, Mixed Doubles.
4. Dawl Chuh

Table Tennis
November 24 - 28, 2008 (zanah vek) chhung hian Y.M.A. Hall-ah Table Tennis khelh tura ruahmanna a hnuaia mi ang hian siam a ni:
1. Junior Boy’s Singles
2. Women’s Singles
3. Men’s Singles
4. Above 35 Yrs.
5. Above 45 Yrs.

Basketball
November 25- 28, 2008 chhung hian tlai tin, tlai dar 3:00-a tanin Semi Final thleng tlaiah hian khelh tur a ni a. Ni 29.11.2008 (Inrinni)-ah Final khelh a ni ang. Section tinin team 2 theuh, a hnuaia tarlan ang hian neih tur a ni, Basketball Team khatah hian mi 10 zel an awm tur a ni:
1. Below 20 yrs (Ni 1. 1. 1989 leh a hnu lama piangte tan) Team khat.
2. Above 20 Yrs - (Ni 1. 1. 1989 hma lama piangte tan) Team khat.

The Final showdown Ni 29.11.2008 (Inrinni)
A hmun : Basket Ball Court & Middle School kawt
Tan hun : Zing dar 10:00
Infiamna :

1. Volleyball: Section tin atangin Mipa leh Hmeichhe Team khat ve ve theuh. Govt. Middle School kawtah khelh tur a ni.
2. Basketball Final
3. Inkawibah: Section tin atangin hmeichhia 10 theuh.



VENG CHHUNG THUTHAR TAWI:

• Pu K.Lalengmawia, Y Sec. te chuan a pathumna atan fapa an nei thar.
• Np Lalnunpuia s/o Pu R.Lalrinliana, Y Sec. chu a hriselna a tlakhniam deuh avangin In lamah enkawl mek a ni.
• Pi Rozami m/o Pu R.Vanlalhuma, Y Sec. chu taksa bawrhsawmna avangin Aizawl Hospital-ah enkawl mek a ni.
• Tv Saidingliana s/o Pu Vanlalropuia Sailo, Y Sec. chu a mit (eye) checkup turin Phai lamah a thang mek.
• Pu Zohmingliana (Mazova), M Sec. chu Aizawl Hospital atangin In lama inenkawl zui turin a lo chhuak.
• Tv Lalhmingliana c/o Pi Sapzingi, A Sec. chu khawsik avangin Durtlang Hospital-ah enkawl mek a ni.
• Upa Zalianthanga, A Sec. chu Civil Hospital atangin dam takin a lo chhuak.
• Np Sheba Lalhnehzovi d/o Pu Lalrinmawia, A Sec., Lung tha lo avanga Aizawl Hospital-a enkawl chu a lo chhuak.
• Nl Lalhmingsangi d/o Pu Lalthawmmawia, A Sec. chu thirsakawr accident avangin In lamah enkawl mek a ni.
• Pu David Zonunmawia s/o Pu Zordanthanga, A Sec. chu Aizawl Hospital-a a Kal zai a nih hnuin dam takin a lo chhuak.
• Pi Laltlanzovi, A Sec chu thisen pek ngaia awm lehin Tv Lalruatkima’n a pe.
• Pi Saichhungi te nufa, A Sec., Guwahati-a mit entir chu an lo haw chho leh ta.
• Pu V.Lalthlengliana, A Sec., tha-nâ chu In lamah enkawl mek a ni.
• Tv Lalremruata Chhangte s/o Pu C.Lalramthanga, Y Sec. chuan Inter-College Sports neih zawh takah khan Boxing-ah Gold Medal a dawng.
• Pu Zosangliana te chhung chu Model veng atangin Pu C.Liankunga In, Y Sec.-ah an rawn pem lut.
• Pu GVL Thlengliana te chhung chu Pu C.Lallunghnema In, Y Sec. atangin Pu K.Lalbiakvela In, M Sec.-ah an insawn.
• Pi Lalhuthangi te chhung chu Pu P.Lalroenga In, Y Sec. atangin Upa C.Lalnunnema In, M Sec.-ah an insawn.
• Tv C.Lalzuitluanga s/o C.Thuamliana, M Sec. chu 4th Commonwealth Games, Canada-a neih turah India aiawha Taekwondo khel turin thlan a ni. Tunah hian Bhopal (MP)-ah training an nei mek a, Nov. 18, 2008 khian Canada panin an chhuak ang. Hlawhtlinna duhawm tak nei turin veng mipuite’n i tawngtaipui ang u.

ZIRLAI CHHUANAWM:
Mission Vengthlang chuan Mizoram University hnuaiah Gold Medallist pathum kan nei ta der mai.

• Nl. C.Malsawmzuali, Pu C.Vanlalrema leh Pi F.Lalrodingi, Y Sec. te fanu chuan Forest Ecology, Biodiversity & Environmental Science (FEB&ES)-ah 2006 khan pakhatna niin, tun hnai mai khan Gold Medal a la. Kumin khan UGC (NET) a pass bawk.

• Tv John Lalnunhlima, Pu C.Lalrinliana leh Pi Saihmingliani, A Sec. te fapa chuan Botany Department-ah 2008 hian 1-na niin Gold Medal a la.

• Nl Grace Lalhlupuii Sailo, Pu Lalchungnunga Sailo, Y Sec. fanu chuan Mizoram University atangin Master of Social Work (MSw)-ah Gold Medal dawngin, UGC atangin Junior Research Fellowship (JRF) a hmu bawk.

Kan veng tan an chhuanawmin, zirlaite tana entawntlak an ni. Zirlaite’n tan i la zel ang u.


ARTICLE: VENG TAN I HLU EM?
R.Vansanga, M Section

Tunlai chu YMA General Conference zawh atanga YMA Kumpuan lo tawp ta hian sawi zui a hlawhin, pawiti leh huphurh thu sawi pawh an tam fe mai. Kan Branch YMA Committee hnuhnung ber pawh khan he thu hi sawihoin, kan vengah nghawng tha lo a nei em tih a thlir a. Mitthi lumen denchhena zurui an tam thu leh an ngampat thu te bakah, Khawhar In kal tur ang taka awm, Khawhar In thleng si lova lo interek an awm thu te sawi chhuah a ni. Hetia mawi lo taka lo zankhua ve rikngawt mai hi YMA chuan ngaimawhawm a ti tak meuh a, a awm zui lohna’n ngawrh taka hmalak ni se tiin ro a rel hial a ni. Kan editor-in hemi chungchang thu hi chanchinbua chhuah turin hma han la teh a ti a. He sawmna zahawm tak hi tling lo takin ka han ziak ve ta a ni.

Zu hi a hnawk: Mizo nih tinuamtu ber, nula leh tlangvalte tanpuingai tanpuia an han phe suau suau mai thin te leh kan thalaiten sa leh ral laka khua leh veng vawnghimtura mawh an la thin hi a ni. Hetiang mawhphurhna pawimawh tak vawng him zo lova kan thalaite siam thin tu chu ZU a ni. Zu in lo tur hian tumah kan intilui thei lo, a dik chauh chuan YMA pawhin ngen mai bak tih theih a nei hran lo. Mahse, kan nunhona atan Zu hi hnawk lian ber siamtu anih fo avangin a do a do hial a lo tul ta anih hi.

Zu kan ruih hian: Mahni leh mahni kan intih nep mai bakah, min hringtu nu leh pa rilru kan tina a, sawrkar duh loh danin kan awm a, Kohhran leh khawtlang duh loh angin kan awm thin tih hi kan hria em le? Hetianga mawilo leh duhdah tak maia kan han khawsak vel hian veng kan timualpho a, min hmangaihtute kan tilungngai thin a lo ni.

I la rui zel dawn em? Zu in thin i nih chuan Zu hmuna i kal tur i ke kan dawm bet thei lo a, i Zu inna tur hmui kan hup bet thei bawk hek lo. Chuvangin thurawn inpek mai hi a fuh ber i beisei ang. Rui lo la kan duh ber a, i la rui duh tlat a nih chuan mi hmuhah inlar tam lo la, mipui zingah phei chuan khawsa hauh suh, i ruih chhung chu mu bo vang vang la a tha ber ang.

Tunlai hian meizial zuk pawh puipunnaah phal loh a ni a, meizu mite hian an zawm tha hle mai, mei an zuk duh chuan an inthiarfihlim hram thin. Zu inte pawh hi hnawksak miah lo in a kalpui theih, a rim kan nam nasa hle emaw, kan rui hle dawn emawa kan hriat hian inthiarfihlim hlauh mai thin ila, Zu hi hnawksak kan ti ngai lo vang. Zu ruite hian an ruih laia an inthiarfihlim mai hian veng leh chhungkaw mualpho tur an veng thei a, rui lote hian an awl thei hle bawk tih an hre ngei ngei tur a ni.

I hlutna vawng tha rawh: Mihring hlutna vawrtawp siamtu chu mi tangkai nih hi a ni. Chhungkua leh khawtlangah tangkaina kan neih hauh loh a, kan ruih bual reng mai anih chuan mi piang vanduai tak kan ni ang. Kan YMA hruaitute’n khawtlang vawnhim leh khawtlang nuam siam an tumna kawngah, ‘nang hi chu haw vang vang rawh, Khawhar Inah rui chunga i lo kal a remchang lo, kan lo awl mai ang che,’ an tih i tawng palh hlauh ang e, inawlna nuam leh zangkhai a ni dawn hauh lo a nia. Khawhar In chang a ni lova, veng chhung khawilaiah pawh hnar haw leh zilh ngaiin tumah i awm lo vang u.

Heng bakah pawh tunlai hian Tleirawl te te, zan lama khawlaia awm khawm let let ching pawh kan awm a ni awm e, hetiang hun leh hmunah hian thil tha zir tur a awm hauh lo a, sual bul a ni tlangpui, sim bawk tur. Malsawmna dawng a, mipangngaia kan lo piang ve anih si chuan mi hlu tak nih hi kan tum ve dawn lawm ni? Kan duhthlannaah a awm si a.