27 October, 2012,issue

YMA GENERAL CONFERENCE VAWI 67-NA A TIAK TA

YMA General Conference vawi 67-na October ni 23-25, 2012 chhunga Kawrtethawveng khuaa hman chu Oct. ni 25, 2012 (Ningani) zan khan a tiak ta. Kumin General Conference-ah hian kan Branch atangin palai 16 an kal a, kan Branch atanga palai-te hi Pu Kaisangzuala, President, Pu Lalhmingmawia, CEC leh Pu Lalhmingmawia Ralte, Br. Exe. Com. member-te’n motor thawhchhuahpuiin an kal a ni. Tin, Variety Programme-ah Lemchan tawi hmuhnawm tak an chang bawk a, mipuiin an lawm hle.

KAL LAM LEH HAW LAM: Kan Branch atanga palai kalte hi Oct. ni 23, 2012 (Thawhlehni) zing chaw eikhamah kan veng Dawrkawn atangin an chhuak a, tluangtakin

chawhnu dar 3 velah Kawrtethawveng hi thlengin thlenna tura an lo siamsakah an thleng hlawm a, hneh leh zo taka lo thlengtute chungah an lawm hle. Hlimtak leh hlawk taka Conference an hman zawhin Oct. ni 26, 2012 (Zirtawpni) zingah Kawrtethawveng rawn chhuahsanin chawhnu dar 2 ah dam takin an lo thleng leh ta.

TUKTHUAN TUIHNAI: General Conference palai kalte haw lam hi Pu Rodingliana Chawngthu s/o Upa C. Lalhmuaka, M Sec. tuna Mamit SP ni mek chuan tukthuan tuihnai tak a lo buatsaih saka, palai te an puar hle. Branch YMA chuan a chungah lawmthu a sawi e.

PALAI KAL ZAT: General Conference palai riaklut a kal zat hi Oct. ni 25, 2012 (Nilaini) tlai lam thlenga Reception counter-a recort danin 2759 an ni. Tin, rorel palai hi inchhiar laia awm zat chu 758 an ni bawk.

GEN. CONF. THURELTE:

I. Kum 2013 YMA Gen. Conf. thlen diltu Vairengte leh Khawbung ‘S’ te chu secret ballot-a thlan niin, kum 2013 chu Khawbung ‘S’-ah nghah a ni dawn ta.

II. A. YMA KHAWIH:
1. Mizo mipuite inpumkhatna tichhe thei zawng leh Mizoram thendarh zawnga chibing hmalakna reng reng tihtawp a nih theih nan YMA-in hma la rawh se.
2. Rampum huap faina beihpui thlak turin Central YMA-in hma la rawh se.
3. Sorkar atanga Development Work veng/khua atana lo kal thin hi, tha leh rotling zawka thawh a nih theih nan YMA-in hma la rawh se.
4. Mizorama piang nilo, Foreigner-te Birth Certificate pek an nih loh nan hma lak ni rawh se.
5. Human trafficking dona kawnga kan chak zawk theih nan YMA-in hma la rawh se.
6. Electoral Roll dik leh felfai tak kan neih theih nan YMA-in dik leh uar zawka hma lak ni rawh se.
B. SORKAR KHAWIH:
1. Mizoram chhunga Quarry awm te hi mihring tan a hlauhawm loh nan YMA-in a tul angin hma la rawh se.
2. Aizawl khawpui laili, Assam Rifles chhuahsan tur ram hi mimal hnena pe lo tur leh pek tawh sa pawh cancel turin leh tangkai taka hman a nih theih
nana humhalh turin Sorkar ngen ni rawh se.
3. Branch YMA tinin mahni area-a motor kawngpui kamah uar zawka thing phun nise, tin, kawngpui kam, mimalin an neih thin hi sorkar dan dinglai anga
reserved a nih zel theih nan sorkar-ah thlen ni rawh se.
4. Tribal Certificate pek chhuah chungchangah YMA-te hriatpuina (Recommendation/Verification) a tel theih nan sorkar-ah thlen ni rawh se.
III. KUMPUAN RAWTNA: Kum 2013-a Kumpuan atana rawtna ‘Ram leh Hnam humhalh’ tih leh ‘Intodelh’ tih chu ban phara buk a niin, Ram leh Hnam humhalh tih chu
lungrual taka pawm a ni.
IV. BUDGET: Kum 2012-2013 chhung atan Central YMA Budget-ah Rs 83,66,352/- chu pawm a ni. (Kan Branch chuan kum 2012-2013 atan Rs 8500/- kan budget tur a
ni).
V. REPORTS: Kum 2011-2012 Annual Report leh Finance Report chu lungrual taka pawm a ni.
VI. TANPUINA: Oct. ni 25, 2012 zan inkhawmah Pi Lalawmpuii (L) w/o Pu Lalthlengliana, Lungdai Sentlang-te tanpuina tur thawhlawm khawn nise tih a ni. (He
tah hian Rs 40,000/- chuang thawhkhawm a ni).

October 20, 2012 issue

MISSION VENGTHLANG JAC-IN VENG THIANGHLIM NAN THAWK ZEL

Mission Vengthlang Joint Action Committee (JAC) chuan Ruihtheih thil leh sualna kawng hrang hrang laka Veng chhung thianghlimna tur leh himna turin theihtawp chhuahin hma a la mek zel a, mahni In lum pawh luah hmanlo leh chhungkua pawh uap hman lovin a tul ang angin an thawk chhuak reng a ni. Veng mipuite him leh thlamuang taka kan khawsak leh awmho theihna turin rim taka an hmalakna leh thawhrimna hi a fakawmin a hlu tak zet a, an hmalaknaah hian an hah thin hle a ni tih hi kan hriatpui leh theihtawp chhuaha kan tawiawm zel pawh a tha awm e.
DUTY: A khat tawkin a huhovin an duty thin a, hei bakah hian Section hrang hranga Committee an siamte a tul angin mahni Section huam chhung theuhah an duty reng bawk. Tin, eng hunah pawh Ruihtheih thil leh sualna kawng hrang hrang vanga Veng chhunga harsatna leh buaina a awm chuan koh leh hriattir nghal turin an in ring reng a ni.

ZU AN MAN: An thawhrimna leh an duty a thlawn lo, Oct. ni 10, 2012 (Nilaini) tlai khan JAC duty-te hian zu fun 29 lai an man a, a neitute leh zu phurtu (Taxi leh a khalhtu) hi kan veng mite an ni lehnghal a, a zahthlak hle. Zu neitu hi a bikbo a vangin zanah hah pawh sawi lovin an chang a, an man thei hlauh a ni.

AN ZILHHAU: JAC chuan Zu neitu leh phurtu mi pathum leh tum eng emaw zat an lo man a, an lo zilh tawh mi pahnih an vaiin mi panga-te chu Oct. ni 12, 2012 (Zirtawpni) zan khan YMA Hall-ah zilhhau leh thu tha hrilhin an kawm nghal bawk. Zan rei leh hah pawh sawi lova an thawhrimna hian Ruihtheih thil leh sualna kawng hrang hrang laka veng chhung thianghlimnaah hmasawnna a thlen mek zel a, a lawmawm tak zet zet a ni.

AN AWM LO THIN: Tunhma atangin Mission Vengthlangah hian zu zuar an awm lo thin a, chu chu veng ang pawha kan sawifo leh lawmna a ni thin. Tunhnaiah zu lo zuar ru leh pe chhuak an awm lehzeuh zeuh thin hi khawtlang hruaitute, NGO, Kohhran hrang hrangte leh veng mipuite pawhin pawi kan ti tak zet a, tunhnuah chuan hetiang hi thleng tawh lo se kan duh tak zet zet a ni.

KOHHRAN AN CHE: Mission Vengthlang Presbyterian Kohhran chuan veng thianghlimna turte, JAC hmalakna a lo chak zawk theih nan te Tawngtai leh Thilpekin theihtawp an chhuah a. JAC-te hmalaknaa a tul ang anga hman turin Rs 10,000/- (cheng singkhat) JAC-ah an rawn hlan e. Kohhran hmalakna leh thilpek hian nasa takin hna a thawk ngei ang, a va lawmawm em.

LAWMTHU LEH NGENNA: JAC chuan an hmalakna a chak zual zel theih nana thilpek leh tawngtai a theihtawp chhuahtu Kohhrante, NGO-te leh mimal hrang hrangte chungah lawmthu a sawi tak meuh meuh a, Ruihtheihthil laka veng a lo thianghlima a lo ralmuan zel theihnan lungrual taka thawkho zel turin a ngen bawk e. Tin, veng chhung duhloh thil ti thin tute chu lo sim turin a ngen a, chak leh khauh takin hma a la zel dawn tih a hriattir bawk e.
Veng chhunga buaina leh harsatna siam, zu zuar, drugs zuar leh harsatna thleng a awm chuan a hnuaia tarlanah hian thlen nise —
Tv. Lalmalsawma Khiangte — 9862379047
Pu R. Lalrinzuala (Y Sec.) — 9862809881
Pu Rothangliana Bawihtlung (M Sec.) — 9436147753
Pu Zolianchama (A Sec.) — 9862169691

October 13,2012 issue

ZNM_October ni 13, 2012

YMA MISSION VENGTHLANG BRANCH EXECUTIVE COMMITTEE VAWI 10-NA NEIH A NI


YMA Mission Vengthlang Branch Executive Committee Meeting vawi 10-na chu October ni 11, 2012 (Ningani)zan khan YMA Committee Room-ah neih a ni. Meeting hi

Pu Jolly Newman, Vice President-in kaihruaiin Pu H. Lalneihkima’n Rom 12:15-18 chhiara tawngtaiin hunserh a hmang. Meeting-ah hian member 22 kalin 20 an kal

lova, kallo zing atanga 11-in an kal theihloh chhan sawiin an pha a ni. Tanpui ngaite pual bawm hunah Rs 330/- thawhkhawm a ni.

THUREL TLANGPUI:
1. Reports: Pu R. Zothansanga, Branch Secretary hnen atangin Committee hmasa thurel bawhzui ngaite tha taka bawhzui leh tihhlawhtlin a ni thute,

Central YMA ngenna anga Branch report tul ang angte report thehluh fel a nih thu ngaihthlak a ni.
Section-te atangin hetiangin Report ngaihthlak zui a ni bawk – Y Section-in damlo 1 an kan a, OB designation plate thar an siam a, chhiatni fund an

khawn zo. M Section-in chhiatni fund an khawn zo. A Section-in damlo 2 an kan a, hnatlang vawi 3 an nei, chhiatni fund an khawn zova, chhiatni-a hman tur

mouthpiece thar an lei bawk.
Property Sub-Committee atangin YMA Hall-a hman tur sintex lit. 4000 leh tui pump khawl pakhat lei leh dahfel a nih thu ngaihthlak a ni.
Libarian hnen atangin RRRLF atangin lehkhabu thar 100 vel dawn a nih thu leh registration tihfel mek a nih thu ngaihthlak a ni bawk.

2. Lehkha hmuh:
(1) General Secretary, Central YMA hnen atangin E Roll siam thar turah Branch YMA te’n mahni vengah theuh uluk leh felfai taka tih a nih theih nan tan

la theuh tura ngenna leh Complaint ngaite pawh complaint tura hriattirna leh ngenna hmuh a ni. Committee chuan hma lo la turin Branch OB leh Section tin OB

te a ruat nghal.
(2) General Secreatry, Central YMA hnen atangin YMA Gen. Conference-a kal turte ruihtheih thil lak a fihlim turte, mutbu leh zanriah buhfai intodelh

tura ngenna leh tul dang hriattirna hmuh a ni.
(3) Jt Secretary, Kawrtethawveng Jt. YMA hnen atangin Gen. Conference chungchang sawmna leh kan Branch thlenna tur Counter No 1 (Pandal bul) a nih thu

hriattirna hmuh a ni.

3. Gen. Conference kal dan tur: YMA Gen. Conference-a kal dan tur leh kalna tur chu a tul angin OB te’n lo ngaihtuahin hma lo la se tih a ni.
4. Kawn chei chungchang: Krismas vuakvet-a kawn chei leh chungchang sawiho a ni a, Kawnchei Sub-Committee-in ruahmanna lo siamin lo ngaihtuah se, tih a

ni.
5. Hlim zan: Krismas vuakvet-ah hlim zan siam leh nise tih sawiho a ni a, Organising Committee siamin an ni hian ruahmanna lo siam se, tih a ni.
6. Vantlang Mike fund: Vantlang Mike amplifier leh cable-te siam that leh thlak a ngaih tawh avangin October thla chhung hian chhungtin-ah Rs 20/-

zelin Section hruaitute’n mahni Section-ah theuh lo khawn se, tih a ni.

October 6, 2012 issue

MISSION VENGTHLANG FAI NAN FAINA HNATLANGPUI NEIH A NI

October ni 2, 2012 (Thawhlehni) khan Mission Vengthlang Clean & Beautification Committee kaihhruainain Mission Vengthlang Fai nan veng chhungah vengpum huap hnatlang neih a ni a, Faina hapta hawnna neih nghal a ni. Hnatlangpui hawnna inkhawm tawite Dawrkawn-ah neih a ni a, Pu Nghaklianmawia, CEO, AMC chu khuallian niin Faina hapta leh hnatlangpui hawnna a nei a, hnatlanga thawk chhuakte tana ei-in buatsaih nan Clean & Beautification Committee-ah Rs 3000/- a hlan nghal bawk. Hawnna inkhawm neih zawhah veng chhung hmun hrang hrangah kawngpui dung leh kawngba samfai hnatlang neih zui nghal a ni.


HNATLANG THAWK THA: Hnatlanga thawk chhuak an thahnem hle a, Dawrkawna inkhawmna tawite neih zawh veleh Section hrang hrangte mahni Section huam chhunga thawk turin an insem darh nghal sung sung mai a, tin, AMC lam atangin hnatlang minpui turin mi eng emaw zat an rawn thawk chhuak bawk. Hnatlanga thawk chhuak zawng zawngte hi mi 250 chuang lai an ni. 


MOTOR LEH THILPEK: Pu Lalfaktlinga Sailo, Y Sec. hnen atangin Rs 1200/- leh Pu Zadingluaia, M Sec. hnen atangin squash um 1 dawn a ni. Bawlhhlawh paih turin LAD Dept. lam atangin motor 1 an rawn thawhchhuahpui a, kan veng a tangin Er. K. Lalsawmvela’n PWD motor Pu Lalrinawma, A Sec. khalh chu a rawn thawhchhuak bawk, tin, Pu C. Lalramthanga, Y Section-in hnatlangte ei tur sem kual nan a motor a rawn thawhchhuahpui bawk a, a lawmawm hle.


Y SECTION: Y Section lam hian Khatla Road, kan veng leh khatla inrina bul atangin hna an rawn tan a, an Section area huam chhunga kawngba leh kawngpui dung hnawkte an rawn thian fai tha hle.


M SECTION: Dawrkawn atanga Courtzawl lam panna leh Presbyterian Biak In lam panna kawngah in sem darhin kawngba leh kawngpui dung an tifai a, hemi hnu hian Dawrkawn atanga tlawng Road lam an chhunzawm leh bawk.


A SECTION: M Section nen an in ri-na chuanchung leh chuanhnuai atanga bul tanin an Section huam chhunga kawngba leh kawngpui dung tihfai ngai lai laite an tifai hneh hle bawk a ni.


UPC LAD AN CHE: Veng chhung hnatlangpui neih ni hian Mission Vengthlang UPC LAD member 40 chuang zet chuan Thlanmual samfai hnatlang an lo nei ve bawk a; a va lawmawm em. Hnatlang ei leh in atan Local Council leh Pi Zawnthangi, A Sec.-te’n Rs 500/- ve ve an tum sak a; an lawm hle.


AN FAKAWM: Veng chhunga chhungkaw eng emaw zatin hnatlang tha nghak lovin an mahni inbul, kawmchhak leh kawmthlang-te an lo tifai lawk a, hei hian hnatlanga thawh tur tam tak a chhawk a ni. Hetiang a mahni inbul lo tifai lawkte hi an entawn tlakin an fakawm tak zet e.


LAWMTHU: Clean & Beautification Committee chuan hnatlanga thawk chhuak zawng zawngte, thilpek petu leh motor thawhchhuahpuitute, mahni in leh a vel lo tifai tute zawng zawng chungah lawmthu a sawi tak meuh meuh a, tun tuma faina hapta hman hi duh tawk mai lova mahni inbul leh a velte tihfai chhunzawm zel turin mipuite a ngen bawk e.
________________________________