September 29, 2012 issue

VENG CHHUNG FAINA LEH THIANGHLIMNA KAWNGA HMALATU - CLEAN & BEAUTIFICATION COMMITTEE

Local Council term hmasa zawk khan veng chhung faina, thianghlimna, mawina kawnga chak zawka hma kan sawn theihnan hmalatu bik turin Clean Mission Vengthlang Committee a lo din a. Tuna Local Council ding mek hian he Committee hi tlema huamzau tir hretin CLEAN & BEAUTIFICATION COMMITTEE tiin din chhunzawm zel a ni a. Thupui ber atan “Fai hi zahawmna a ni” tih hman a ni.

A THILTUM
He Committee thiltum bulpui ber chu veng chhung faina leh thianghlimna chak zawka vawn nun chhoh zel a ni ber a. Chumi kawnga hmalaknaah chuan faina hnatlang neih te, veng chhunga institution hrang hrang leh a tulna hmun apianga awareness campaign neih te, thingphun leh nungcha humhalh te a huam vek a. Tin, chhungtinte hnena mahni In leh a vel vawnfai te; kan ranvulh, tuichhe paihna leh septic tank te thenawm khawvengte tana hnawksak lo tura enkawl chungchang inzirtirte leh, chumi kawnga theihtawpa hmalakte a huam vek a ni.

ENG DINHMUN NGE A THLEN TAWH?
He committee din a nih hnu hian kan veng hian faina kawngah hmasawnna kawng thui tak hmuh theih khawpin kan zawh tawh a. A tlangpuia lakin kan veng chhung hmun tin hi a fai thawkhat viau ta niin a lang. He Committee hmalakna avang hian kan la tawn ngai reng reng loh, veng fai thlannaah pawh kum 2010 khan Top Ten-ah hial kan lo lang tawh a ni. A ber ni tura kan inbuatsaih chhoh zel pawh a pawimawh tak zet a ni.

KUM 2012 A HMALAKNA PAWIMAWH
Veng chhunga institution kan neih — School hrang hrangah te bakah, SAI leh MTC-ah te Faina Awareness Campaign hlawhtling taka neih a ni tawh a.

A duh apiang hnenah thingphun hun laiin thingphun tur thingtiak (seedlings) 250 semchhuah a ni bawk a.

Veng chhung hmun hrang hranga dah tur Syntex bawlhhlawh bawm buaipui mek a ni a; October thla chhung hian bawm 40 dah fel hman tura ruahman a ni.

Tin, Faina leh Thianghlimna kawnga inzirtirna tur veng chhung Documentary film buaipui mek a ni bawk.

FAINA HNATLANGPUI
Faina Hapta kan lo thleng leh dawn ta. October ni 2, 2012 hian veng pum huapin faina hnatlangpui koh a ni a. Dar 10:00 AM-ah Kawn-ah innghahkhawm tur a ni. Hawnna function tawi-ah Pu Nghaklianmawia, CEO, AMC chu Khuallian a ni ang. Function hman zawh veleh hnatlang neih zui nghal tur a ni. Veng mipuite hnatlang turin kan inhriattir e.
_____________________

September 22, 2012 issue

CHHUNGKUA by R. Vansanga, M Section

Chhungkua tih hi, hrilhfiah a ngai hauh lovin kan chiang sa mai awm e. “In chhungkua in dam tlang em?” tih zawhnaah tumah kan buai loh hi maw. Tun tuma

chhungkaw chungchang ka han sawi tum leh duh ber chu, chhungkua hi a nuam hlei a, kan hlim hlei em em a, hei hi eng hian nge maw thlentir le? Chhungkaw hlim

leh nuam kan duh vek si, mahse kan hlim vek si lo hi a chhan i zawng ang, kan hmu ngei ang, a hlat loh hmel viau ve.

Chhungkaw nuam leh hlim siamtu chu: Chhungkaw hlim leh nuam hi, a dawna dawn a nilova, tawnfuh palh thil lah a ni hek lo. Pawnlam atanga rawn siam lah va ni

hek suh. A chhunga chengte ngeiin an siam, tumah inrawlh remchang lo leh inrawlh theih pawh ni lo a ni. Kan chhungkua chu a nawm chuan kan siam, a nawm loh

pawhin kan siam tho a ni a, a hnai set sawt hle mai.

Chhungkaw nuam siamtu ber niawm tak,ni ber silo te: In leh lo tha, sum leh pai ngah, bungraw changkang tha neih, lirthei neih that, hna ropui tak tak thawh;

heng zawng zawng hi chhungkaw hlim leh nuam siamtu ber niawm tak, mipui vantlangin kan awh leh duhte a ni tlangpui. Mahse mahni awmna veng leh khua han

thlir vang vang ila, hetiang nei tha hlawm em em hi chhungkaw hlim leh nuam ber berte, chhungkaw nun kan awh ber berte a nih loh zia kan chiang ang.

Nu leh pa an pawimawh: Nu leh pa tamtakte’n kan tifuh loh fo chu, pawn lama kan nelawmna leh biak nawmna In chhunga kan seng lut lo hi a ni. Midangte

tihlim a, tinui thin khan engatinge mahni chhungkua ber kan tihlim loh thin? Midangte tihlimna hmanrua kha mahni inchhungah seng lut ila, engahnge chhungkaw

hlim kan nih loh theih ang le? Pawn lama nelawm, mahni In chhunga nelawm loh tan chhungkaw nuam a siam theih loh a ni.

Thalaite: Mipa sawi hmasa ila, tamtak hi chu inchhung tihrehawmtute in ni. Pawn lamah in tawng bawrh bawrh a, engmah thawh hreh in nei lo va, mahni In

chhungah in han tawng tha duh lova. In tawng chhun lah rang pial vut, “Enga?”tih haw fu si, In chhung thil tul thawk tura tha za thei hauh lo in ni te hi

chhungkaw nun tinuamlotu a ni chiang. Pawn lama in biak nawmna leh thawhhreh in neih loh hi In chhungah han lalut teh u; chhungkaw hlimna in va han thlen

chiang dawn em ve le. Hmeichhe thalai-te hi chhungkaw hlim leh nuam siam turin in mawh a lian khawp mai; tawng duh, nuih tam, hlim hmel in put theih chhung

chu chhungkua a hlim reng ang.

Hmeichhia hrim hrim: Chhungkhat nu, nula, mo, tupawh ni rawh se, chhungkaw nuam siam tura Khuanu ruat in ni chiang. In hlim a, in nuih ham hamna hmun chu

chhungkaw nuam a ni ringawt. Pa ber chu nui huah huah reng mahse, hmeichhe lam an tum tlatna hmunah pa berin chhungkaw boruak nuam a siam pha lo hrim hrim

a ni.
Chhungkaw nuam leh hlim siamna hmanrua hi a hautak lo tak meuh va; tawngtheia kan awm te hi hmang tangkai ila, pawisawi zawng ni lovin tawng duh ila,

kan nuih theihna te hi mahni In chhungah seng lut tam ila, hnathawk theia kan awmte hi chhungkaw tan hmang tangkai ila a tawk der mai a ni.

September 15, 2012 issue

YMA GENERAL CONFERENCE AGENDA TUR

YMA General Conference vawi 67-na chu October ni 23 – 25, 2012 khian Kawrtethawveng khuaah neih a ni dawn a, Central YMA leh Branch hrang hrangte General Conference atan an inbuatsaih mek zel. September ni 12, 2012 (Nilaini) khan Central YMA Hall-ah Central Co-Ordination Committee (CCC) meeting neih a ni a, General Conference Agenda tur Sub-Hqrs./Group/Branch atanga thehluh CEC-in a lo thlitfim tawh chu thlifim lehzualin hengte hi Gen. Conference Agenda atan chhawpchhuah turin a rel fel.

AGENDA:
I. YMA KHAWIH:
1.Mizo mipuite inpumkhatna tichhe thei zawnga hnam bila thil tih reng reng tihtawp nan YMA-in hma la se, chibing leh hnam bil inlak hran tumna awm hi YMA-in do tlat rawh se.
2.Rampum huapa faina beihpui thlak turin YMA-in hma la rawh se.
3.Dik taka birth certificate hman a nih theih nan Central YMA-in hma la rawh se.
4.Human Trafficking donaa chak zawka hnathawh nan Central YMA-in hma la rawh se.
5.Mizoram-a piang nilo, ram dang mite birth certificate pek an nih loh nan Central YMA-in hma la rawh se.

II. KUMPUAN: Kum 2012 – 2013 YMA Kumpuan atan ‘Ram leh hnam humhalh’ leh ‘Intodelh’ tih chu buk tura chhawpchhuah a ni ang.

III. SORKAR KHAWIH:
1.Assam Rifles chhuahsan tur ram hi mimal hnena pe lo tur leh tangkai taka hman a nih theih nan Sorkar-in humhalh rawh se.
2.Electoral Roll-a thun thar turte hming endik a nih hmain thun thar turte hming YMA hnenah hriattir hmasak thin ni rawh se.
3.Tribal Certificate pek chhuahnaah YMA-te hriatpuina a tel theih nan Sorkar-ah thlen ni rawh se.

BRANCH INBUATSAIHNA: Kan Branch pawh Gen. Conference atan a inbuatsaih mek zel a, kumin Conference-ah hian Item neih ve nise, tiin Branch pawhin a rel a, tin, member kal tur kan tam chuan kalna tur pawh a tul ang a ngaihtuah nise, a ti bawk. Kawrtethawveng khua hi a len loh avangin kan Branch atanga kalte chu a tul chuan a huhova thlen a, hmun khata inkulh mai nise, hlimtaka Conference hi hman nise, tiin ngaihtuahna pawh a seng mek a ni. Tin, kan Branch President Pu Kaisangzuala’n hruaitu hlun chawimawina a dawng dawn bawk a ni. Member-te Gen. Conference-a kal turin a tam thei ang ber lo inbuatsaih lawk turin Branch chuan a sawm e.
_____________________________

Chanchinbu pum chhiar duh tan:

September 8, 2012 Issue

MISSION VENGTHLANG THLANMUAL KAWNG CEMENT CHHUN HNA TAN A NI DAWN

Furpui a lo thawk a, motor-tê chu sawi loh Pick-up (4 wheel) pawha theihpalingkawh a tang kawh chunga kan kal hram hramna, kan thlanmual kawng chu hma lak chhoh mek zel a ni. Local Council-in vantlang hnatlang vawi thum (3) lai a ko a, kawng siam rualrem leh JCB hmanga luikawr siam that hnate a thawh hnuah tunah hian a tawntirh lam atangin kawng chhuat atan Cement chhunga kawng siam hna tan a ni dawn ta. Khawtlang mipuite inpek tawhna a lawmawmin a fakawm tak zet a, nasa zawk a sum leh pai, tha leh tui senga kan la thawh zel erawh a ngai dawn a ni.

SUM HMA HRUAI: Thlanmual kawng siam nan hian cheng nuai sawmsarih panga (75 lakhs) vel ruahman (estimate) a ni a, tunah hian Pu Lalhmingliana, MP (RS) duhsakna changin MP Fund cheng nuai 10 kan hmuhin bul kan tan ta mek a ni. Kan thlanmual kawng hi PWD kawng a nihloh avangin a siamna tur hi kawng hrang hranga kan ngaihtuah chhoh zel a ngai dawn. Kan MP zahawmtakin bul tanna tura sum min pek hi hnatlang tha nen a hlawk thei ang bera hmang turin veng mipuite’n theihtawp chhuah a ngai e.

ROD LEH CEMENT: Tunah hian Pu H. Lalbiaktluanga In atanga Pu H. Lalneihkima In thleng kawngpuiah Rod phan a ni a, hetah hian Cement chhun tur a ni. Cement chhun hna hi Sept. ni 10, 2012 (Thawhtanni) atangin hnatlanga thawh a ni ang. 

VANTLANG HNATLANG: Local Council chuan hetiang hian Cement chhun hnatlang a ko – Sept. ni 10, 2012 (Thawhtanni)-ah A Section huam chhung a mite, Sept. ni 11, 2012 (Thawhlehni)-ah M Section huam chhung a mite leh Sept. ni 12, 2012 (Nilaini)-ah Y Section huam chhung a mite. He hnatlangah hian a thei thei thawhchhuah tur a ni a, hnatlang phatna leh in rûnna a awm lovang. Local Council chuan veng chhung mipuite a tam thei ang ber hnatlang turin a ngen a ni.

CEMENT CHAWHNA KHAWL: Thlanmual kawng cement chhun turah hian cement chawhna khawl pawh bun fel a ni ta. Local Council chuan M leh Y Section huam chhung a mite hnatlang Sept. ni 7, 2012 (Zirtawpni) zingkar khan a ko a, cement chawhna khawl hi hna thawhna hmun turah dah fel a ni. Veng chhung mipui hnatlang a thawk chhuak zawng zawngte, SAI Hostel naupangte leh an hotu Pu Lianhmingthang chungah Local Council chu a lawm tak zet zet a ni.

KAN ZAVAIA TA: Chhungkaw eng emaw zat chuan kan chhungte kan phum tawhna leh kan la inphum zelna tur kan thlanmual kawng hi kan zavaia ta a ni. Khawtlang hruaitute leh mipuite’n theihtawp chhuaha hma kan lak a, kan theih ang anga kan thawh zel chuan kan la siam zo ve ngei ang. Tan i la tlang zel ang u.

Chhiar zawm duh tan:

September 1 2012,issue

YMA MISSION VENGTHLANG BRANCH EXECUTIVE COMMITTEE VAWI 9-NA NEIH A NI

YMA Mission Vengthlang Branch Executive Committee Meeting vawi 9-na chu August ni 28, 2012 (Thawhlehni) zan khan THP Hall-a YMA Committee Room-ah neih a ni. Meeting hi Pu Kaisangzuala, President-in kai hruaiin Pu F. Lalduhawma’n Pathian hnena tawngtaiin hunserh a hmang. Meeting-ah hian member 30 kalin 12 an kal lova, kal lo zing atangin mi 8 in an kal theihloh chhan sawiin an pha. Tanpui ngaite pual bawm hunah Rs 570/- thawhkhawm a ni.

THUREL TLANGPUITE:
1. REPORTS KAIHTAWI: 
(1) Branch Secretary hnen atangin meeting hmasa thurelte tha taka bawhzui leh tihhlawhtlin ngaite tihhlawhtlin a nih thu ngaihthlak a ni.
(2) Section Secretary-te hnen atangin hetiang hian report ngaihthlak a ni — 
Y Section: Damlo 4 an kan a, Section sum tuak nana Zonunmawi chanchinbu an Section huam chhunga semtute zanriah kilpui an tum. 
M Section: Aug. ni 25, 2012 (Inrinni) khan an Section huam chhunga vantlang mike thalo siamin an hnatlang. 
A Section: Damlo 3 an kan a, sum tuak nan vawk an talh, THP Hall-II sak mekah balu dah felin hnatlang an nei.

2. LEHKHA HMUH:
(1) Gen. Secretary, Central YMA hnen atangin YMA Gen. Conference atan Agenda thehluh, report hrang hrang thehluh leh Item neih tur thehluh theih a nih thu lehkha hmuh a ni a. Agenda atan ‘Ram leh Hnam humhalh kumpuan’ leh ‘Mizoram khawpui hrang hrangah Fire Station a tam thei ang ber dah ni rawhse.’ tih chu thehluh nise, tih a ni a. Branch hmalakna report dang chu form awm sa hmangin Secretary-te’n lo thehlut se, tih a ni. Conference-ah hian short play drama/skit Item neih tum nise, tih a ni bawk.
(2) General Secretary, Central YMA hnen atang vekin Inter Branch Volley Ball (Man & Women) leh Marathon race buatsaih a nih tur thu hriattirna hmuh a ni a. Volley Ball-ah hi chuan chhuah loh mai nise, Marathon a tlan duh tur an awm chuan Sport Sub-Committee in lo bawhzui se, tih a ni.
(3) Secretary, Mission Vengthlang Presbyterian Kohhran hnen atangin Beihrual thupui kaihhruaina angin khawtlang hruaitute leh NGO hruaitu (OB) te inkawmho tura sawmna hmuh a ni a, Office Bearers leh Section tin Leader & Secretary-te kal se, tih a ni.
(4) Secreatry, Mission Vengthlang Sporting Club hnen atangin TT Competition atana THP Hall an hman theih vanga lawmthu sawina hmuh a ni.

3. RED RIBBON DRAMA: Red Ribbon Drama Competition lo awm turah Branch YMA chuan chhuah ve nise a ti a, lo buaipui tur leh hma lo la turin Pu R. Zothansanga, Branch Secretary chu a ruat nghal.

4. RUANG CHHUAK & KUANG CHEI: Local Council-in Ruang chhuak chungchang leh kuang chei chungchanga NGO hruaitute kohkhawma sawihona a neihpui tawh chu NGO hrang hrangte’n Committee-ah lo sawi nawn lehin sawihona hi neih leh nise a ti a. Branch YMA chuan, ‘Kan kalphung pangngai hi a la tha rih e’, a ti.

ZONUNMAWI CHANCHINBU : ZONUNMAWI-September-1-2012