Kum 22-na, Issue 39, OCTOBER 31, 2009

YMA GENERAL CONFERENCE-A PRESIDENT PU JH ZOREMTHANGA THUSAWI TLANGPUI

Y.M.A  General Conference vawi 64-na palaite leh a chhimtu, ram chhung leh ram pawn atanga lo kal zawng zawngte chibai ka buk a che u. Kan inkhawmpui tiak zan a lo ni leh ta reng mai a, a thlengtu Chalfilh Group Y.M.A  hahzia leh min thlen hnehzia hi a fakawm ka ti a, a lawmawm ka ti takzet a, Darlawn mipuite chungah lawmthu ka sawi tak meuh meuh a ni.

Zanin hi ka tan chuan hun pawimawh leh danglam tak a ni a, President term hnih ka hman zawhna hun a lo ni ve ta. Ka President nih chhung hian hun khirh leh danglam tak tak kan kaltlang a, theihnghlih a har thin ngawt ang. Hetiang hun kan paltlang laia min tawiawma, min finchhuahtu, YMA thlavang hauh tlat thintu ka thawhpui, hruaitu leh member zawng zawngte chungah lawmthu ka sawi tak meuh a ni. Ram chhung leh pawna ka YMA member puite duhsakna avanga kum 14 lai mai, a zawna Central YMA OB-ah post hrang hrang chelh a ka awm tluan thei hi a lawmawm ka ti a, ka tlin lohna leh fel lohnate min hrethiam a, min hliahkhuhtu ka YMA member pui zawng zawng chungah lawmthu ka sawi bawk e.  

Kan awmna hmun theuhah “YMA Motto” hlenchhuaktu leh “YMA dinchhan tihlawhtlingtu, YMA meichher mit lova chhi engtu” i ni zel ang u.

Mizo khawtlang nuna YMA pawimawhna leh tangkaina hi luhchilh thuk poh leh kan la hriat tawk loh zia kan hre dawn chauh a, taksa bung hrang hrangte hnathawh a inang lo ang hian YMA member-te hnathawh leh theihna chin pawh a inang lo, kan awmna a zirin kan hnathawh leh thiltih pawh a dang thei hle.   

YMA hmalakna zauzia hi hriat phak a har a, Zawlbuk awm loh hnua khawtlang venghimtu leh Mizo hnam venghimtu a nihna te,  tlawmngaihnaa insuihkhawm kan nih zawk ziate, khawtlang inzirna tih hial a nihna chhante leh Mizo Culture vawnghimtu kan nihna te hi inzirti thar zel ila; YMA kalphung, Central YMA atanga Section YMA thlenga inkhaidiat dante, Central, Sub-Headquarters, Group thuchhuahte tihhlawhtlin ngei tur a nihna te leh, tlawmngaihna, aia upa zah, intodelh, huaisenna leh rinawmna te hi uar lehzualin i inzirtir zel ang u.

Mizote kan insuihkhawmna awmchhun YMA hi ram mipuite min beiseina a sang hle a, kan nun leh chezia hi ngun takin an thlir a, YMA hi thianghlim taka kal zel turin min duh a ni. YMA tibawlhhlawhtu leh tihmingchhetu ni lovin a ti mawitu nih theuh i tum ang u.

Central YMA thuchhuak hi mimal thuchhuak a ni lova, CEC-in uluk taka a ngaihtuah hnua thu chhuah a ni thin; a tihlawhtlingtu i ni theuh ang u. Central YMA thuchhuah tihhlawhtlin loh kan nei ta fo hi a pawi hle a ni.

Mizo nun dik tak chu chhan ngaite chhan a ni tlat mai. Ral lakah te, Sakei huai lakah te, kangmei leh harsatna mite’n an tawhna reng reng laka chhantu nih a ni. Khawchhung nun fel lo ven thlengin thalaite’n an thawk thin. Chu chu tlawmngaihna tia kan sawi, hnam fing zawkte pawhin an ngaihsan hle chu a ni. British sawrkar an lo luh pawh khan Mizo khawtlang inawp dan chu tha an ti hle a, ti danglam lovin Lal rorelna kha an chhunzawm tir a ni.

A hring a hranin tunlaiah Sakei huai hmuh tur a awm ta lo, ral min runtu pawh hmanlai angin a awm ta lo. Mahse, tunlaia kan sakei huai ruihhlo, HIV/AIDS/hlemhletna/chimralna leh thil dang dangin kan thalaite a seh ta zawih zawih mai. Heng mite chhanchhuah hi kan tih tur a ni a, mahni awmhmun theuhah kan ram siamtha turin theihtawp i chhuah leh ang u.


VENG CHHUNG THUTHAR TAWI:

• Pu Lalsiamnghaka (Missionary), Pu K. Hranga, Y Sec. In luah chu Durtlang Hospital-ah a kal (kidney) paih sak niin, In lama enkawl turin a lo chhuak.
• Pi Rinchhungi w/o Pu R. Lalthlamuana, M Sec. chu Durtlang Hospital-ah a hnuangzang ruh chawr zai a ni.
• Dr. E. Saipari, M Sec., a nawmsam meuh loh avangin In lamah a inenkawl mek.
• Np. Lalhriatpuii d/o Pu Lalmalsawma, A Sec., asthma leh pneumonia avanga New Life Polyclinic-a enkawl chu a lo chhuak.
• Pu K. Zasiama, A Sec., Pneumonia leh thana avangin In lamah enkawl a ni.
• Tv. Stephen Lalramzauha s/o Pu R. Biaknawla, M Sec. chuan North-East Wushu Championship, Shillong-a neihah Gold Medal a la.
• Nl. Lalthakimi-te unau chu Pu Chalchhunga, M Sec. In atangin Pu Lalramthanga, Y Sec. In-ah an insawn.
• Pu MS Dawngliana (Sena) s/o, Pu K. Zasiama, A Sec.-te chu Pi Pari, A Sec. In-ah an inbawlhrang ve ta. 
• Nl. Lalhriatpuii Sailo-te unau chu Dr. Vanlalsiama, M Sec. In atangin Pi Pari In, A Sec.-ah an insawn.
• Nl. Loisi Lalduhawmi d/o Pu Kaisangzuala (Br. President), A Sec. chuan RIPAN atangin B.Sc. (MLT) 1st Division-ah a pass.
• Kan Branch President Pu Kaisangzuala chu CEC member atan ruat thar a ni.

ARTICLE:  VENG CHHUNG VAWNFAI CHUNGCHANG
Dina Pa, A Section

Kan hriat theuh angin tunlaiin kan Veng chhungah Village Council-te ruahmanna leh hmalakna hnuaiah ‘Clean Mission Vengthlang  Committee’ dinin  Faina kawngah hma chak taka lak mek a ni hi thil lawmawm tak a ni. Clean Mission Vengthlang Committee-te’n veng chhung In tinah ‘Faina’ chungchanga ‘Thu Sawm Pek’ te siamin, thahnemngai takin chhung tinte hnenah lehkha  semin veng chhung a lo fai a, a lo thianghlim zawk  theihna tura hma a la mek hi veng chhung mipuite’n ngaihpawimawh a, zawm tlan theuh theih a tha hle  mai.  Chhungkaw engemaw zatin tha taka an zawm a, an In  leh a vel an tihfai laiin chhungkaw thenkhat a nachang la hre lo an awm niin a lang. Faina chungchang hi kan ngaipawimawh vak lo nge ni ang aw? Tun thlengin mahni In leh a vel tihfai nachang hre lo/zawm lo kan la awm nual hi mahni In chhung theuhvah inzirtir  kan la mamawh viau ni te pawhin a lang. Clean Mission Vengthlang  Committee hmalakna hi kan veng chhung tan leh keimahni tan theuh a ni tih hriat a, tha taka  thlawp hi kan mawhphurhna theuh a ni tih i hria ang u.

1. VENG TANA MI INPHALTE’N CHAWIMAWI AN PHU: Kan In leh a vel han tih hian kan kawtkai chauh a huam lo tih kan hriat a pawimawh viau mai. Tunhma ang reng khan Mission Vengthlang hi a ngai reng a ni thei tawh lo tih hretute vek kan ni. Veng a lo changkang tawh a, kawmchhak kawmthlangte a lo awm nual  ta bawk nen, inkalpawhna tha zawk mamawhnate avangin veng chhunga mi inphal leh mi thahnemngaite’n an Hmun lo Ram-te  inkalpawhna nan leh veng chhung mipuite tana awlsam zawk nan tiin an  mahni ‘Ram/Huan’ an sat hek nasa hle a ni. Veng chhung tana an inphalna te hi kan hriatreng a pawimawh khawp mai.

2. KA HUAN LEH RAMTE HIAN MITE TAN HARSATNA A THLEN EM?: Kan thenawm khawvengte tan kan Huan leh Ram te hi a hnawksak em? tih leh, kan thingkung ding thuau maite hian  kawmthlang lama awmte tan Chhiatna/Vanduaina a thlen palh  thei ang em tih erawh kan ngaihtuah a kan thlithlai fo thin a pawimawh viau mai. Kawmthlang lama awmte’n an theih ang angin an tuallai/kawt kai leh an ban phak tawk tawk kawngchhak hnimhnah te thian fai mahse ban phak piah lam, ‘Ram neitute’ rawn ngai, vantlang tana hnawksak bawk si leh khawhawi thawven thlak loh zet mai chhak lama buk luai han hmuh chang hi chuan a thawveng lo  thin khawp  mai. Huan Lo Ram neitute bengvarna ah a innghat thui viau in sam fai nachang han hre hlawm ilang chuan kan kawmthlang lama awm te tan a va nuamin a va lawmawm dawn em!! Amaherawh chu kan Ram zim te hi a chereu mek a ni tih hriain kan Thingkung neih ang ang te erawh kan in humhalh sak hram hram a pawimawh awm e.

3. ENGVANGA HRISEL THEI LO VIAU  NGE KAN NIH?: Khawvel a changkan ang zelin kan nitin khawsakna te pawh a hmasawn zawng a ka khawsak a pawimawh. Hausak leh retheih lampang ani lo. Kan khawsakna hmunhma tawp lutuk avangte leh chet tawp luat avangin ‘Damdawi In’ kan lut fo ta ve ang? Kan ngaihtuah ngai lo a ni maithei. Kan Tu leh Fa te leh puitlingte pawh Tuihri/ kawthalo, Rulhut pai, hritlang khawsik leh natna chi hrang hrang avangin chhungkua kan buai phah fo thin a nih hi! Hei hi keimahni fimkhur loh vang leh kan chet duhdah luat vang a ni fo. Tlang hrileng erawh dan rual a nilo, amaherawh che kan natna tlanglawn engemaw chen hi chu kan invent theih a ni.

Midangte tana thil tha kan ti thei lo anih pawhin midangte tana harsatna siamtu leh hrisel lohna thlentu nih loh hram kan tum thei dawn lawm  ni?

ZONUNMAWI I CHHAWM NUNG ZEL ANG U

Kum 22-na, Issue 38, OCTOBER 24, 2009

CENTRAL YOUNG MIZO ASSOCIATION GENERAL CONFERENCE 2009 A TIAK TA

YMA Inkhawmpui Lian tum 64-na, Oct. ni 20-23, 2009 chhunga Dawrlawn khuaa neih chu Oct. ni 23, 2009 zan khan a tiak ta. Kumin YMA Gen. Conference thlengtute hian an thleng zovin, inkhawpui hmanna pandal- Chalfilh Run tia a hming an sak pawh a thain a mawi hle. Kumin inkhawpuiah hian palai inziaklut 4,300 vel leh lang-a kal 800 vel an awm a ni.

Oct. ni 21, 2009 (Nilaini) zing dar 10:00-ah Rorel Inkhawm tan a ni a, rorel palai hi 1,152 an ni. Thu tihtlukte chu:

1. Kum 2009-2010 chhunga Central YMA Budget atan Rs. 59,34,700/- chu lungrual taka pawm a ni.

2. YMA Dan Bu siamthat tura rawtna hrang hrang lutte chu siamthat ngaite siamthain, pawm a ni.

3. YMA KHAWIH
(a) Faina chungchangah chak zawk a hma lak ni rawh se.
(b) Mihring hriselna atana tha lo chi Polythene Bag kan hman tlem zawk nan uar zawka inzirtir nise.
(c) ILP neilo hnamdang dap chhuahna kawngah Central YMA in hmala ve rawh se.
(d) Kan Inhmun / Lo Ramte hnamdang (Non-Tribal) hnenah hralh a nih tawh loh nan hma lak ni rawh se.
(e) Midik leh rinawmte chawikanna tur leh ram leh khawtlangin hma a sawnna turin kuttling lova sum lak that loh zia uar zawk a zirtirna ram pumah neih ni rawh se.

SORKAR KHAWIH
(a) Sikul zirlaiah Mizo Nun Zemawi tam zawka telh ni rawh se.
(b) Mizoram-a Foreigner lo lutte khuahkhir
hna Dan Sorkar-in a neih sa hi khauh takin kalpui rawh se tih chu CEC-in a tul anga lo zir chiangin hma lo la se tih a ni.

4. Kum 2009-2010 kum puan atan Khawtlang Nun Siamthat tih chu lungrual taka pawm a ni.

5. Kum 2010 YMA General Conference thleng turin Sub-Hqrs. YMA, Lunglei thlan a ni
Kumin hi Central YMA OB thlan kum a nih angin Oct. ni 22, 2009 khan hruaitu thar thlanna hi neih a ni a; hruaitu atana chhawp chhuah mi 16 atangin heng mite hi kum 2009-2011 chhunga Central YMA OB atan thlan chhuah an ni:

President: Pu Lal Chungnunga, Ramhlun North
Vice President: Pu C.Zoramliana, Tuikual North
Gen. Secretary: Pu Lalbiakzuala, Khatla
Asst. Secretary: Pu Vanlalruata, Tuikual South
Treasurer: Pu R.Lalngheta, Hlimen
Fin. Secretary: Pu J. Lalsailova, Mission Veng North



VENG CHHUNG THUTHAR TAWI:

• Np. Lalrinhlui d/o Pu Lalhmangaihzuala (Atea), Y Sec. chu damlohna avangin Mumbai lamah an thangpui mek.
• Pi Tlangvuli w/o Pu Sangkima, Y Sec., Civil Hospital-a rilphir zai chu dam takin a lo chhuak.
• Pu Malsawmtluanga, Y Sec. te chuan fapa an nei thar.
• Pu C. Vanlalzawma, Y Sec. te chuan fanu an nei thar.
• Pu Sairengpuia Sailo s/o Pu Rev. Lalhluma Sailo, M Sec., Civil Hospital-a a rilphir zai chu In lamah enkawl mek a ni.
• Upa Hauhmingthanga, M Sec. chu nimin khan Durtlang Hospital-ah a pum zai a ni.
• Pu Laldingngheta, A Sec.-te chuan fapa an nei thar.
• Pu K. Lalbiakfela, A Sec.-te chuan a pakhatna atan fapa an nei thar.
• Nl. Melody Lalhnunhlimi d/o Pu K. Darchawiliana, Y Sec. leh Lalbiaksiama, Thenzawl-te chu Oct. ni 22, 2009 khan an innei.
• Pi Lalthawmi m/o Pu Varthanmawia, Y Sec. chu USA lamah a chhuk thla leh ta.
• Upa R. Lalbuatsaiha, A Sec.-te chuan Oct. 20, 2009 khan an inneih Ruby Jubilee an lawm.
• Lalnunpuii d/o Pu Lalramtiama leh Lallawmzuala s/o Pu Lalthlantluanga, A Sec.-te chu National Talent Search-ah an inziak tling.

FAM ROLUNG MUAL:

Hming : ZARZOLIANA
Kum : 35
Kohhran: Presbyterian
Thihni: Oct. 20, 2009. 9:00 PM
Vui Hun: Oct. 21, 2009. 12:00 PM
Vuitu: Pastor C. Lalsangliana
Section: M Section

Tv. Zarzoliana hi Upa K. Roseia leh Pi Lalngaii-te fa panga zinga a milai niin, kum 1974 Sept. ni 16 khan Aizawl-ah a lo piang a; an unau hi hmeichhia 3 leh mipa 2 an ni.

Zirna lamah kum 1992 khan HSLC a zo a, a bak hi chu mumalin a kal zawm ta lo. Amah hi tlangval tlawmngai, mi pawi sawi ngai lo leh thenrual kawm thiam tak a ni a; Krismas leh Kumthar ruaitheh bakah, mi chhiat thata fatu leh thil tul dang dang thawk mawlh mawlh thin mi a ni.

Kum 2004-a Mission Vengthlang Presbyterian Kohhran-a harhna a lo thlen tum khan harhtharna chang vein, a phak ang tawk tawkin Pathian rawng a bawl chho ve a. Kumin Sept. thla atang khan an thianzaho-in, “Mahni chauh chuan rawngbawlnaah chak a har a, thianzahoin tih tak takin rawngbawl turin i inbuatsaih teh ang u,” tiin Lungleng-a Pu Eric Thansanga ramah Bethel Camp an nei tan a. Heta a awm lai hian, Oct. 14, 2009 zan khan a khawsik a tlun chiam mai a, a tuk lamah pawh a thawh chhuah peih tak loh avangin a rawn haw chho ta a ni. Na bet lutuk lovin Pathianni (Oct. 18, 2009) thleng khan a awm a, mahse tlai lamah a na chu a zual tak thut avangin zan dar 7:00 velah Aizawl Hospital-ah dah chhoh a ni a. Heta tang hian nikhaw hre lovin a awm chho ta a, doctor leh nurse-te’n theihtawp an chhuah chungin natna chi hrang hrang, malaria PF leh PV bakah, mitliam leh internal bleeding-te a lo neih chu tuar zo lovin Oct. 20, 2009 (Thawhlehni) zan khan dar 9:00 khan a chhungte leh a thiante chu a lo kalsan ta a ni.

Tv. Zarzoliana ruang hi tlaivarpui a nih hnuin, a tuk Oct. 21, 2009 chhun dar 12:00 khan Pastor C. Lalsangliana’n In lamah vuiin, Upa K. Lalengzauva’n Mission Vengthlang Thlanmual-ah a thlah liam ta a ni. YMA member a nih avangin Oct ni 22, 2009 (Ningani) zan khan YMA-te’n ralna hun an hmang.



FAM ROLUNG MUAL:

Hming : C.RAMTHARA
Kum : 60
Kohhran: Nunna Lalchhungkua
Thihni: Oct. 22, 2009. 12:20 AM
Vui Hun: Oct. 22, 2009. 01:00 PM
Vuitu: Lal Puithiam Rorelliana
Section: A Section

Pu C. Ramthara hi Pu C. Lalmawia (L) leh Pi Kaptialite fa pali zinga upa ber niin, March ni 12, 1949 khan Hmawngkawn khuaah a lo piang a. Kum 1971 khan Nl. Zawnthangi nen inneiin, fa 3 an nei a ni. Pu C. Ramthara hi a chunga a chanchin kan tarlan Tv. Zarzoliana ni pasal a ni.

Kum 1989 khan Aizawl-ah an rawn pem lut a, a rawn pem tirh atangin kan veng, tuna a awmna A Section-ah hian an inbengbel ta a ni.

Zirna lamah HSLC zovin, kum 1973 khan Health Worker hna a thawk tan a; kum 1977 khan Health Supervisor-ah kaisangin, Saitual PHC-ah a hun tawp thleng hian a thawk a ni.

Pu Ramthara hi thenrual pawl thiam tak a nih avangin a awmna hmun hrang hrangah chanvo pawimawh tak tak a chelh tam hle a. Kan veng-ah pawh YMA Executive member leh A Section Leader-ah kum 4 zet a lo tang tawh a ni. A awmna Kohhran (Nunna Lalchhungkua)-ah pawh Fin. Secrectary te hial lo chelh tawh bawk.

Kum 2008 May thla khan pumpui cancer avangin Greenwood Hospital-ah zai a ni a. Hemi hnuah pawh a natna avang hian dawmdawiin hrang hrang, Nazareth Hospital leh Grace Nursing Home-ah te enkawl zui a ni a. Mahse a natna hian that lam a pan hleih theih loh avangin doctor-te thurawn angin In lamah enkawl zui a ni a; a nupui fanau leh a unau-te’n duat taka an enkawl chungin Oct. 22 , 2009 (Ningani) zing dar 12:20 khan Chatuan Ram min lo pan san ta a ni.

Pu Ramthara ruang hi Oct. 22, 2009 chhun dar 1:00 khan Nunna Lalchhungkua Kohhran Lal Puithiam Rorelliana’n In lamah vuiin, Lal Puithiam Chawngpianga’n Thlanmual-ah a thlahliam ta a ni.

Pu C. Ramthara hi YMA member a nih avangin Oct. ni 24, 2009 (Inrinni) zan dar 7:00-ah YMA-te’n ralna hun hman tur a ni a, member-te’n i ngaipawimawh ang u.



KAN VENG LEH YMA GENERAL CONFERENCE 2009

YMA General Confrence, Oct. 20-23, 2009 -a Darlawn-a hman zawh takah kan veng atangin palai 21 kan kal a; palai kal nan hian motor tê 5 hman a ni. Kan Branch palai-te hi Counter No. 7, pandal awmna veng (Darlawn Venghlun)-ah thlen tir kan ni. Kan Branch atanga item nei tura ruat, Male Voice (Tv. Lalmuanawma, Pu C. Lalfakawma, Tv. Lalremruatdika leh Tv. Stephen-a)-te palai lawm inkhawm-ah thiam takin an zai a. Nl. Maggie Malsawmzuali leh Tv. TBC Zaithanpuia-te’n thiam taka zaiin mipui an awi thin bawk.

General Conference-ah hian hruaitu hlui chawimawina (OB mipa tan: A zawna kum 10, a zawn lova kum 15; OB hmeichhe tan: A zawna kum 5, a zawn lova kum 7) mi 82 hnenah hlan a ni a. YMA member boral (2009) 660 sunna hun hman a ni bawk.

Conference-a Branch chanchinbu tha puanna leh lawmman semnaah Zonunmawi chanchinbu pawh Top 10-ah a lang ve e.

Kum 22-na, Issue 37, OCTOBER 17, 2009

YMA MISSION VENGTHLANG BRANCH EMERGENCY MEETING VAWI 2-NA THU

October ni 15, 2009 (Ningani) zing dar 6:30 khan YMA Mission Vengthlang Branch chuan Emergency Committee Meeting vawi 2-na YMA Hall-ah a nei. He meeting-ah hian Committee member 26 kalin 15 an kal lova, kal lo mi 12-in an kal theihloh chhan sawiin an pha. Meeting hi Pu Kaisangzuala, President-in kaihruaiin Pu Gilbert Lalzarliana, Asst. Secretary chuan Pathian hnena tawngtaina a nei a, thurel tan a ni. Thurel tlangpuite :

1. YMA General Conference kal dan tur chungchang sawiho a ni a, Section hrang hrang atanga Conference kal tur hming pe a la luhkim loh avangin Office Bearer te’n lo ngaihtuahin kalna tur motor pawh a tul angin ruahmanna lo siam se, tih a ni. Tin, rorel leh inthlannaa palai tur ruat tawh pawh harsatna avanga theilo tur an awm chuan OB te’n lo siam rem se, tih a ni bawk.

2. RTI hmanga FDA-in kan veng chhunga kum 2006-2007 chhunga an hnathawh chhannaah YMA leh Basketball Court chungchang lo lang chu sawiho a ni a. FDA atang hian Basketball Court siam nan April ni 16, 2007 khan Rs 1,00,000/- (nuai khat) dawn a ni a, May ni 3, 2007 zana Branch Committee-ah report-in minute-ah ziahluh a ni. Hei hi Basketball Court siam nan hman a ni. Kan veng chhunga vai awm-te hnatlang neihpuiin tlaivarin a chhuat plastering a ni a, vanduaithlak takin a tukzingah ruahpui vanawnin a nan chhe leh ta hlauh a, a pawi tak zet a ni.

Basketball Court hi YMA Day 2008-ah hawn hman ngei tum a nih vangin sum awm ang angte pawtkhawm leh puk chawpin hma lak chhunzawm leh a ni a, YMA Day-ah hian hawn hmana peihfel a ni. June ni 13, 2008 khan FDA atangin Rs 1,00,000/- (nuai khat) dawn leh a ni a, hei hi July ni 3, 2008 zana Branch Committee-ah report-in minute-ah ziahluh a ni a, Committee rorel leh remtihna angin Basketball Court siamna atana sum bat rulh nan hman nghal a ni.

YMA Hall hi June 2009 atangin FDA hian chei that hna a thawk a, Hall chei nan hian YMA kut-ah sum pakhatmah a lut lo. Committee-in hma lo la se tia mawhphurhna a pek ten an duh dan an sawi angin FDA hian a thawk a, sum hman chungchangah YMA chu a inrawlh lova, a hriatpui lo a ni. Hall chei that a nih dan chu Aug. ni 29, 2009 Issue-ah tarlan a ni tawh e.

3. Duty chungchang: Tunlaiin veng chhungah zu leh ruihtheih dangte a lo hluar leh ta in, khawlai dungah rui hmuh tur an lo tam leh ta chu YMA chuan pawi a ti tak zet a, VC-in mawhphurhna a pek angin YMA chuan chak zawka hmalak leh ni se a ti a, Section te’n mahni Section huam chhungah ngawrh zawkin hma lo la chhunzawm se, tih a ni.


VENG CHHUNG THUTHAR TAWI:

• Nl. Lalremkimi c/o Pu L. Thangmawia, Y Sec., Aizawl Hospital-a enkawl mek a ni.
• Pu C. Vanlalzama, Y Sec.-te fapa neih thar chu a hriselna a that vak loh avangin Aizawl Hospital-ah enkawl mek a ni.
• Pu Tlangliana, Y Sec., Kilikawn Hospital atangin a lo chhuak.
• Tv. C. Vanlalhruaia s/o Upa C. Pachhunga (L) chu Aizawl Hospital atanga lo chhuak In lamah enkawl zui mek a ni.
• Pu Lalthantluanga, A Sec. Comm. member nu Pi Solfathangi (K. 70) chu Kawrtethawveng-ah a boral a, Pu Lalthantluanga hi a thang mek.
• Pi Hmingliani (HL Bakery), A Sec. chuan a kum 80 tlianna champhaphak Oct. ni 16, 2009 khan (Zirtawpni) thenrual thate nen Pathian hnena lawmthu sawiin a lawm a, zanriah an kilho.
• Tv. C. Lalrintluanga s/o C. Thuamliana, M Sec. chuan Oct. ni 8-10, 2009 chhunga 1st East Zone Taekwondo Championship, Guwahati-a neihah Bronze Medal a la.
• Heng kan veng mite hian 5th IR Battalion traning zo-in an lo chhuak:

1. C. Lalruatfela s/o C. Hmingthanga, A Section
2. Lalchungnunga s/o R. Dara, A Section
3. Laltlanthanga s/o Zonghinglina, M Section
4. David Lalmuankima s/o Rodingluaia, M Section
5. Laltharmawia s/o R. Lalhmingmawia, M Section
6. C. Vanlalhlimpuia s/o C. Vanlalzika (L), Y Section
7. Lallawmsanga s/o Lalramliana, Y Section
8. Zirsangliana s/o K. Vanlalngheta, Y Section
9. B. Lalremsiama s/o B.Thangrikhuma, Y Section

Kum 22-na, Issue 36, OCTOBER 10, 2009

MISSION VENGTHLANG PRESBYTERIAN KOHHRAN-IN AIZAWL CHHIM PRESBYTERY KHAWMPUI A THLENG

Aizawl Chhim Presbytery huamchhungah hian Pastor Bial 8; Mission Veng, Bungkawn, Kulikawn, Khatla, Hlimen, Mission Vengthlang, Lungleng-I leh Maubawk te awmin heng Bial hrang hrang chhunga Kohhran awm zawng zawng chu 30 a ni. “Khenbeh Nun” (Galatia 2:20) chu Inkhawmpui Thlarau lam thupui tur a ni.

Tun tum Presbytery Inkhawmpui-ah hian Palai nisa 320 leh Palai thlan 158, an vaiin 478 te’n ro an rel dawn a; Agenda pakua (9) awmin agenda 5-na General-ah hian Bial hrang hrang atangin ngaihtuah tur 23 lai a awm bawk. October ni 8, 2009 (Ningani) khan Nomination Committee, Finance Committee leh Sub-Pastoral Committee an thukhawm tawh a. Nimin, Oct. ni 9 (Zirtawpni) khan rorel tanin vawiin ni 10 (Inrinni) hian chhunzawm a ni ang.


VENG CHHUNG THUTHAR TAWI:

• Pu Vanlalrova, Y Sec. te chuan a pakhatna atan fanu duhawm tak an nei thar.
• Pu Lalnunfela, Y Sec., Dutlang Hospital-ah Zirtawpni khan a rilphir zai a ni.
• Dr. L. Siamliana, M Sec. chu Durtlang Hospital-ah enkawl leh a ni.
• Nt. Benjamin Vanlalvohbika s/o Pu Lalsangliana, M Sec., hritlang âwmna, Durtlang Hospital-ah enkawl a ni.
• Pu Rohmingliana, A Sec. Committee member, Clean MVT hnatlang-a a ke ti hliam chu In lamah enkawl mek a ni.
• Tv. Michael Rosangzuala s/o Pi Zoremliani, A Sec. leh Nl. Lalrempuii, Khatla North te chu Mission Vengthlang Presby. Kohhran Hall-ah Oct. 16, 2009 (Zirtawpni) hian an innei dawn.
• Pi Zomuanpuii te chhung chu Pi Hrangchhuani, Y Sec. In atangin Pu Lalthantluanga, A Sec. In-ah an insawn.
• Pu Lalthantluanga, A Sec. Committee member te chuan A Sec.-ah an In thar an luahlut ta.
• Zonunmawi buatsaihtute Branch President-in a rawn tawiawm a, thlamuanthlak an ti hle.

ARTICLE: ZONUNMAWI VAWN NUN
Thuamtea Khawhring, Lunglei

1.Zonunmawi chu engnge ni?:
Zonunmawi hi engnge ni le?Hriatsaa ngaih si, sawifiah har tak a ni. Mizote tan chuan “Zonunmawi” han tih hian rilru lamah chuan a chiang nghal mai a, kaa sawi chhuak tur erawh chuan, tawi te leh felfai taka sawi a har khawp mai. Mihring nun mawi leh tha, dik leh fel, thianghlim leh tlawmngai hi zonunmawi kan tih chuan a kawk ber mai a tih theih awm e. Zonunmawi hian thil te tak te atanga lianpui thlengin a huam a, nun dan tha leh mawi, aia upa zahna te, tlawmngaihna te, nachang leh hmangchang hriatna te, mahni hmasial loh te, duham loh te, mahni aia midang ngaih pawimawh zawkna te, awmdan mawi (manners & etiquette) hriatna te, tawngkam mawi leh hawihhawmna te, rinawmna, dikna leh taihmakna te hi a huam vek mai. Thuhnuai- rawlhna leh inngaihtlawmna te hi zonunmawi ze ken mawi tak a ni a, dik lo deuha thil tih leh kut tlinglova sum lakluh te hi zonunmawi huang chhungah chuan a leng ve lo. Thatna leh tlawmngaihna chu zonunmawi hming chawiin a par vul thin a, midangte tana malsawmna a ni thin.

2.Engvanginnge beihpui thlak a tul?:
Hetianga Zonunmawi beihpui hial thlak a han ngai ta mai hian, kan zonunmawi hi a lo tla hniam hle tawh tih a ti lang chiang hle mai. Mizofate’n kan chhuan em em thin leh tawngka lama kan hman thin “zonunmawi” kulhpui chu sawi nghinin a awm mek a, a nghingah chuan a zar thenkhat chu a tliak hial tawh a ni maithei. Kan ram tinuamtu, kan hnam min chawisangtu, nun dan mawi leh tha Zofate’n kan neih thin, duh tak leh duat taka “zonunmawi” tia kan koh thin kha, natna chi hrang hrang tuarin a rum mek a, chhan a ngai a, siam that a ngai a, thar thawh a ngai a, vawng nung zel turin tan kan lak a ngai ta a nih hi! Midang tih atana dah hman kan ni tawh lova, mahni theihna zawn theuhah, mahni theih dan ang angin, mahni thiam dan ang anga tan kan lak thar a tul a, te lua leh lian lua awm lovin, kan ramah hian khawtlang nun nuam tak kan neih leh theih nan puan ven kan sawi chhin a hun ta a ni.

3. Engnge kan tum?
Kan tum ber chu Zonunmawi tla hniam tan mek chawi kan leha tuai thar leha vawn nun zel hi a ni. Engnge kan tum thlir kual pahin zonunmawi kaihthawh a tulna leh a tichhetu kawng hrang hrangte kan thlir kual den den dawn a ni.

3.1. Hnathawhnaah:
Tunlaiah chuan hna chi hrang hrang kan thawk ta. Hmanlai angin kawn khata liam fai vek zel a rem ta lo. Thenkhat chu dawrkaite kan ni a, thenkhat chu sawrkar office-a thawkte kan ni a, office-a nitin kai ve tho, sawrkar hnuaia thawk ni chiah lote pawh kan awm bawk. Sikul lama zirtirtu hna thawk te, lo neia eizawng te, huan thlai leh sangha dil siam te, motor khalh leh chanchinbu lam enkawltute pawh kan ni ta fur mai. Heta ‘hnathawh’ kan han tih hian, eizawnna hnathawh ni chiah lo, zirlai anga sikul kai thinte pawh a huam a, nitin hna leh tih tur nei ang chite kha chu a huamah ngai ila a sual lovang. Hetianga nitina hna kan thawhna kawngah hian zonunmawi hi kan lo rap hrual mai mai thin em? Mahni hna theuhah kan dawngdah em? Kan thawk tha em? Min dawrtute tan dawr nuamin kan awm em? Dik lo deuh hlekin thil kan ti thin em? Zonunmawi hian mahni hna tha tak leh thahnemngai taka thawh a keng tel tih hria ila, zonunmawi ti vul leh tur chuan mahni hna theuh dik tak leh rinawm taka kan thawh a tul tihah hian i chiang thar leh ang u.

3.2. Chhungkuaah leh Kohhranah: Tunlaiah zawng, chhungkaw tam takah hian nu leh pate’n an fate hnenah awmdan mawi leh tih dan tha te, nunphung dik leh zahawm te an hrilh hman ta lo. Fate aia ngaihpawimawh an ngah ta a, an fate chu an awmpuite kutah emaw hostel-ah emaw dahin, anni chuan sum ringawt an buaipui ta thin. Zilh loh leh hrilh loh fa chuan zonunmawi a hre lo. A va rapthlak em! Zonunmawi leh Pathian thu hi a inkalh hauh lova ni tih hre lo hian kohhran huangchhungah pawh social gospel hi kan hlamchhiah lutuk thin. Khawtlang a lo nawm zawk theih nan hian kohhran pawh hian mawhphurhna a nei ve a ni lo’mni? Vantlang hna (social service) thawhna lam kawnga kohhranin a mit a chhing fo thin hi zonunmawi ti daltu pakhat a ni thei a, ke kan pen chhuah ve a hun tawh a ni. Nun dan mawi leh tha vawng nung turin chhungkaw tinin kan tu leh kan fate kan zilh tam a pawimawh em em bawk.

Kum 22-na, Issue 35, OCTOBER 03, 2009

YMA MISSION VENGTHLANG BRANCH EXECUTIVE COMMITTEE VAWI 10-NA THU

September ni 1,2009 (Ningani) zan khan YMA Hall-ah YMA Mission Vengthlang Branch Executive Committee Meeting vawi 10-na neih a ni. Pu Kaisangzuala, President-in meeting hi kaihruaiin Pu H.Lalbiaktluanga’n Pathian hnena tawngtaina a nei. Member 29 kalin, member 13 an kal lova, member kallo te mi 9-in an kal theihloh chhan sawiin an pha a ni. Thurel tlangpui te:

1. REPORT :
(a) Branch: Branch Secretary hnen atangin meeting hmasa a thurelte tha taka bawhzui a nih thu ngaihthlak a ni.
(b) Section: Section tinin mahni Section huam chhungah Duty ngawrh takin an nei reng. Meeting hmasa leh tun meeting inkarah Y Sec. ten damlo 9 an kan a, chhungkaw 1 tanpuina an pe bawk. M sec. ten damlo 1 an kan.
(c) Information & Publicity: Vantlang mike siam that hnatlang an nei a, tun dinhmunah vantlang mike te hmantlaka siam that vek a ni. Vantlang mike enkawlna hi remchang hmasa bera vantlanga khawn turin VC remtihna lak tawh a ni.
(d) Property: YMA Property-te hawhchhuah leh dahkir chungchangah harsatna awm deuh thin report chu, YMA Property-te Chhiatni Thatni-a kan hmanin a hma thei ang leh uluk taka dahkir (return) thuai thin nise, a dahna hmun tur takah dahin, Section hruaitute’n enpui thin nise tih a ni.

2. YMA Gen. Conf. Darlawna neih turah member atam thei ang ber kal tum nise, member-te tan kal man chawi ngai lovin Bus hire nise tih a ni a, Rorel leh inthlanna a Palai tur inruat nghal a ni.

3. Veng chhung Duty chungchang sawi a ni a, V.C. leh khawtlangin ruihtheih thil leh sualna hrang hrang laka vengchhung then thianghlimna YMA kuta a dah angin chak taka hmalak zel nise, tih a ni.

4. Kumin-a YMA thupui, Khawtlang Nun Siamthat chungchangah uar zawka inzirtir nise, YMA Chhangah pawh theihtawpa hmalak ni se la, YMA hruaitute pawhin tanlak tar lehzual nise, tih a ni.

5. Miharsate pual bawm hunah Rs 350/- thawhkhawm a ni.



VENG CHHUNG THUTHAR TAWI:

• Rev. Dr. Lalsawma, Y Sec., Aizawl Hospital-a enkawl a nih hnuin a lo chhuak.
• Pu Danny Vanlalhruaia, A Sec., pum lam that loh avanga Aizawl Hospital-a enkawl a nih hnuin a lo chhuak.
• Pi Lianmawipuii w/o Pu Chawngsailova, Y Sec., chhul tha lo avangin Civil Hospital-ah zai a ni.
• Pu Lalhmangaihzuala s/o Pu R. Zasiama (L), Y Sec., khawsik, In lamah enkawl mek a ni.
• Np. Lalruatpuii d/o Pu Laldawngliana, Y Sec., khawsik leh luak, Aizawl Hospital-ah enkawl mek a ni.
• Pu C. Vanlalzama, Y Sec. Comm. member-te chuan a hmasa ber atan fapa duhawm tak an nei thar.
• Tv. C.Lalremruata (Nanoa) s/o Pu C. Lalramthanga, Y Sec., inkhelhnaah a banrek a titliak a, In lamah enkawl mek a ni.
• Pu Zaliama, A Sec., pum tha lo avangin Durtlang Hospital-ah enkawl mek a ni.
• Tv. Lalrampana c/o Pu Lalsangliana, A Sec., mitliam avangin In lamah enkawl mek a ni.
• Pu C.Ramthara, A Sec., pum tha lo avanga In lama enkawl mek chu a tha chak vak lo.
• Mission Vengthlang Presbyterian Kohhran chuan Oct. 8-11, 2009 chhung hian Aizawl Chhim Presbytery inkhawmpui a thleng dawn.
• INSAWN: (1) Pu Lalramtana te chhung chu Pu P.C. Rokhuma, A Sec. In atangin Pi Lalengzauvi, Y Sec. In-ah (2) Pu Lalengzauva te chhung chu Pu R. Lalduhawma In, A Sec. atangin Pu Lalchungnunga In, A Sec-ah.
• LO PEM LUT: (1) Pu Vincy Lalthanpuia te nupa, Zarkawt atangin Dr. Eric Zomawia, M Sec. In-ah (2) Pu Lalhlimpuia te chhung, Darlawng atangin Pu Vanlalthuama, Y Sec. In-ah (3) Tv. Henry Lalbiakchama leh Tv. C. Lalmuankima te, Lungphun atangin Pu C. Lalrintluanga, A Sec. In-ah.