Kum 22-na, Issue 27, AUGUST 08, 2009

YMA MISSION VENGTHLANG BRANCH EXECUTIVE COMMITTEE VAWI 8-NA THU

August ni 8, 2009 (Ningani) zan dar 7:00 khan YMA Mission Vengthlang Branch Executive Committee Meeting vawi 8-na chu THP Hall-ah neih a ni. Meeting hi Pu Kaisangzuala, President-in kaihruaiin, Pu C.Lalduhkima’n Pathian hnena tawngtaina hun a hmang. Member 20 kalin, 4 an kal lova, member kal lo 17-in an kal theih loh chhan sawiin an pha a ni. Thurel tlangpuite chu:

1. REPORT: Branch leh Section hrang hrang atangin report tlangpui hetiangin ngaihthlak a ni.

Branch: Executive Meeting hmasa in bawhzui tura a rel leh ruahman te a theih ang ang a bawhzui leh tihhlawhtlin a ni a, YMA Hall chei mek a niin zawh fel tep a ni. Chhiatni Thatni-a hman tur Silpouline 2 leh Hruizen fei leh sei tak pakhat lei a ni.

Y Section: Damlo 3 an kan a, Kuang siamin an hnatlang.
M Section: Damlo 3 an kan a, Sum tuak nan vawk an talh a, Committee member-te ngawrh takin an duty thin.
A Section: Damlo 3 an kan a, Pu Lalchungnunga In an sakpui a; THP Hall-II bul kawngba samfaiin an hnatlang.

2. THISEN PEK RUNPUI (BLOOD DONATION): July ni 11, 2009 (Inrinni)-a neih a ni a; mipa 66 leh hmeichhia 5-in thisen an pe a ni. Thisen pete leh pek tuma lokal zawng zawng chungah Branch chuan lawmthu a sawi a, Civil Hospital Blood Bank-a thawktute leh refreshment min tumsaktute hnenah pawh lawmthu a sawi tak meuh meuh bawk.

3. CYBER CRIME SEMINAR: Central YMA buaitsaih, Cyber Crime Seminar buatsaiha tel turin Zonunmawi Editor Pu Lalmuankima leh Jt. Editor Tv. Vanlalhlua te ruat an ni.

4. THAWHHONA THIANGHLIM: Clean Mission Vengthlang-in khawtlang vawnfai chungchanga min rawn sawmna chu ngun taka ngaihtuah a nih hnuin, Branch hmalakna zulzui tho a nih avangin a theih ang anga thawhpui tura thutlukna siam a ni.

5. KAWN CHEI: Mission Vengthlang Dawrkawn chu kumin hian chei leh nise tiin a rel a; hma lo la turin Sub-Committee pawh a din fel nghal bawk.

6. SECTION SILVER JUBILEE: February 26, 2010 hi Mission Vengthlang YMA Section champhaphak vawi 25-na (Silver Jubilee) a ni a; Section hi Branch Committee-in a din a nih avangin kumthar-a hruaitu thar turte kutah hemi vuakvek chungchang hi dah a ni.


VENG CHHUNG THUTHAR TAWI:

• Hmingthanmawia (thla 1 leh ni 1), Pu Lalremhluna (Puia), Y Sec. (Vengmawi) chu August ni 6, 2009 (Ningani) zan dar 7:30 khan Aizawl Hospital-ah a boral a; hemi zan hian Pastor C.Lalsangliana’n a vui zawhin an In bulah phum a ni.
• Tv. Laldinliana s/o Pi Lalbiakthangi, A Sec., Lung leh La (spleen) vung avangin Aizawl Hospital-ah enkawl mek a ni.
• Tv. Lalrinawma s/o Pu L. Chhawnthanga, A Sec., pumna avangin Kulikawn Hospital-ah enkawl a ni.
• Pi Lalzoliani w/o Pu Lalkamlova Rokhum, A Sec., Kal (kidney) na avanga Vaivenga Hospital-a enkawl chu a lo chhuak.
• Np. Remruatfela s/o Pu Lalremliana, A Sec. tonsil nâ, zai tur, In lamah enkawl a ni.
• Pi Rotluangi, A Sec., New Life Polyclinic-a enkawl thin chu In lama enkawl chhunzawm a ni.
• Pu Lalthangpuia s/o Pu Jordanthanga, A Sec. te chhung chu a pa-te In hnuaiah an inbawlhrang.
• ZIN HAW: (1) Tv. Ch. VL Biakmawia, A Sec. Fin. Secy., a pa nau boral avanga Diltlang-a zin (2) Pu Lalthawmmawia, A Sec. Leader, Phulen-a zin chu vawiin hian a lo thlen beisei a ni.
• Chhim Phei YMA Coordination Committee chuan an buatsaih- Chhimphei Lamtluang tih lehkhabu chu THP Library-a dah turin copy 10 an pe.
• PEM LUT LEH CHHUAK: (1) Pu Nghaklianmawia te chhung, Kulikawn atangin an In, Y Sec. (Vengmawi)-ah (2) Pu Samuel Lallianrawna te chhung, Vaivakawn atangin Er. Lalthangkhuma Ralte In, M Sec.-ah (3) Tv. Lalengkima te unau, Ngopa atangin Pu T. Kapliana (L) In, Y Sec.-ah (4) Pu H. Lianmawia te chhung, Y Sec., Saron Veng-ah an insawn chhuak.

ARTICLE: ZONUNMAWI CHANCHINBU
Jacob-a Pa, Y Section

He chanchinbu hi veng chhung tan a tangkai mai a ni lova, a chhuanawm tak zet zet a ni. Mi chanchin kan hriat phah a, awm thar te, damlo te, hlim leh lawm te, bo zawnna te, lawmthu sawina te leh inzawrhna thlengin he chanchinbu hian a tarlang thin. Mi dang tana tangkai, thu tha tak tak chhiar tur ziak mite hnen atanga a dawn chu a chhuah bawk thin.

A enkawl:
YMA hian hnatlang zing ber thlang dawn se, Zonunmawi enkawltute hi an nih loh nakah. Zirtawpni apiangin hnatlang an nei a, kal ve lo nih chu tlawmah an ngai a, lungrual takin an thawk thin a ni. Aurinna hmanga inauh khawm a ngaih loh avanga thawm zawi an nih loh zia chu kan hre tlang vek awm e.

Thu leh Hla
Zonunmawi Chanchinbu hian thu chhuah tur nei apiang thu chu a hnar lo va; chanchin thar a ni emaw, thu zirtir nei a ni emaw, veng chhung mipui hlawkna tur a nih phawt chuan a chhuah kawngah a tlanchhe ngai lo. Thurawn a dawng hreh hauh lo va, sawiselna pawh a haw ngai na hek lo. Malsawmtu nih hi a thil tum a ni zel a; chuvangin thu leh hla thiamte khan han tawiawm tha deuh teh ang u.

A Mangan ve thin:
Hnatlang a zin em avang hian thuchhuah tur han haihchham chang chu he chanchinbu hian a nei ve bawk. Heng hunah tak hian a ni, tanpui vartu hnai rengte a mamawh thin ni. A thuchhuah i lawm loh zawng a awm chuan sawi duah loh khan a enkawltute hi hrilh mai la; chhuah awm tak chhuah loh chang a awm ang a, chhuah loh awm taka i ngaih rawn lang ta nawlh pawh a awm ngei ang le. Mak ti mai suh, a enkawltute hi mihring an ni a, an famkim bik loh avang hian an mangang ve thin bawk a ni. An manganna tanpuitu nih tum fan ang u.

Thlei bik nei lo:
Eng pawl pawh, eng kohhran pawh mai hian thu an neih chuan an chhuah chak em em vek a; he chanchinbu rilru zau zia, thuk zia hi thu leh hla hian a hrilhfiah zo mawlh lo a ni. Chuvangin in pawlin emaw thu chhuah tur in neih chuan a enkawltute han hrilh teh u, an lo chhuah mai ang.

Zonunmawi Chanchinbu thang zel mawlh rawh se.

Kum 22-na, Issue 26, AUGUST 01, 2009

MISSION VENGTHLANG HMASAWNNA ATAN NGAWRH TAKA HNA THAWH MEK ZEL A NI

Kum chanve kan lo hmang liam leh ta reng mai, kum chanve chhunga Mission Vengthlang hmasawnna leh Veng chhunga Sorkar leh khawtlang hruaitute hmalakna hrang hrangte leh hnathawh langsar zual te han tar lang ila. Hengte hi Veng chhung leh Veng pawn lam mi thawh (Contract) te an ni. A hna that leh that loh pawh ngun taka thlir tlan leh khawtlang hruaitute pawhin enpui zel chi niin a lang.

1. Mission Vengthlang dawr kawn VC House thlangah lungrem (Retaining wall) a niin, a laiah vantlang zun-in leh ek-in siam a ni a, dawrte tur pawh siam nghal a ni. He vantlang zun-in leh ek-in hi a hmangtu tur chu veng chhung mipuite kan ni a, a tawp leh thianghlimah veng mipuite zia a lang dawn. Kan enkawl uluk loh chuan a siamtute an zahawm rualin veng mualphona a ni ang.

2. Dr. Eric Zomawia In bul kham pangah kawng hnuai leh chung kalpawhna Step changkang tak siam chu peih tep a ni. Veng chhunga inkalpawhna tha hian veng hmasawn a ti lang a, chhiatni thatni-ah a tangkai zia a lang tulh tulh thin. Hah taka step kal chhuah chiah a zun hing rim, rimtui lo tak hnim ziah ngai tur erawh khawtlang hruaitute’n ruahmanna tha zawk an zawn ngei beisei ila.

3. Tlawng Road, M Sec. huam chhung hmun thenkhatah Side Drain siam a ni. Side Drain tha hian kawng a ti tlo a, bawlhhlawh inchhek khawm tur tuihawk in tha takin a luan liampui thei thin. Veng chhung mi leh veng pawnlam mite siam an ni hlawm; khaikhin ila tutenge kan veng hmangaih tih a chhiat a thatah kan hre mai ang. A enkawl zuitu tur chu a siamtute ni lovin keimahni veng chhung mi, a bik takin a bul hnaia awmte kan ni dawn lawm ni?

4. Jubili Biak In kawmchhak laih zauh mek a ni a, Inkhawm bang leh motor kal vel insulpel chungchangah pawh him deuh tawh zawk tura ngaih a ni. Amaherawhchu, kawng a zau tak avangin motor leh bungraw eng engemaw dah hnawk nan kan hmang leh mai ang tih a hlauhawm, i zah thiam ang u.




VENG CHHUNG THUTHAR TAWI:

• Pu Tlangliana f/o Tv. Richard Lalremsiama, Y Sec. chu pumnâ avangin Kulikawn Hospital-ah enkawl mek a ni.
• Pi Lalrinpuii d/o Pu R. Lalkuala, M Sec. chu kal (kidney) thlak turin Vellore-ah kalpui mek a ni.
• Nl. Lalbiaknguri d/o Pu Vanlalzawna, M Sec. chu damdawiin atangin In lama enkawl zui turin a lo chhuak.
• Kan Jt. Editor (ZNM) Pu Lalremthanga nu Pi Rothangi chu lo hawpui tuma an inbuatsaih mek laiin July ni 28, 2009 (Thawhlehni) zan khan a that loh leh thut avangin ICU-ah dah luh a ni leh ta rih.
• Pu PC Saithanmawia, A Sec., kal tha lo vanga Phai-a kal chu dam takin a lo haw.
• Pi Lalrinzuali w/o Pu Sanglura Sailo, A Sec. chu asthma avangin In lamah enkawl mek a ni.
• Np. Mone-a s/o Pu Binod, A Sec., Durtlang Hospital-a a ke zai chu dam takin a lo chhuak.
• Pu Lalropuia s/o Pu Vanruma, A Sec., Assam Regiment-a tang mek, UN Peacekeeping Force -a Rep. of Congo (Africa)-a hna thawk chawlh hmangin a lo haw.
• Tv. Tlanghmingthanga s/o Pu Hrangzuala (L), Y Sec., Tv. John Lallawmkima s/o Pu Lalrinawma, Y Sec. leh Tv. Lalnunzira s/o Pu Lalhuliana, A Sec. te chu Aug. ni 6, 2009 hian PTC Lungverh atangin training an zo dawn a, 4th IR Battalion-ah an awm ang.
• Tv. Ch. VL Biakmawia, A Sec. Fin. Secy chu a pa nau boral avangin Diltlang-ah a thang mek.
• Pu Lalhmingmawia, Branch Secy. chu Shillong-ah a zin mek.

FAM ROLUNG MUAL:

Hming :C.LALMUANPUII
Kum : 27
Kohhran: Baptist
Thihni: July 29, 2009. 08:00 AM
Vui Hun: July 29, 2009. 01:00 PM
Vuitu:Rev H. Chalbuanga
Section:Y Section

Nl. C. Lalmuanpuii hi September ni 12, 1981 khan Pu C. Sanghlira leh Pi Nuchhungi (L)-te fa hmasa ber ni turin Lungsen khuaah a lo piang a. An unau hi 3 an ni. Kum 1991-ah a pa hna avangin Aizawl-ah an lo pem a; Republic Veng-ah awmin, kum 1994 khan Mission Vengthlang-ah an rawn inbengbel ta a ni.

Mi nun zawi chi, mi pawisawi hlau tak; chhungkaw tana tangkai em em a ni a. Kohhran leh khawtlangah theih ang tawk tawka inhmang ve thin a ni. Town Baptist Kohhran, Upper Republic-ah lawiin, inkhawm a ngai pawimawh em em thin.

Kum 1999-a Mission Vengthlang Baptist Kohhran (Shalom) a lo din khan TKP-ah te telin, zaipawl member-te a ni a; Kohhran rawngbawlna hrang hrangah theihtawp chhuahin a thawkchhuak hram hram thin. Shillong, Arunachal Pradesh leh Tripura-ah te zai-a rawngbawlin a lo fehchhuak ve tawh thin a ni. Nikum 2008 May thla khan Kohhran Zaipawl-te’n EFI Convention, Naharlagan (AP)-a rawngbawlna an neih tumin a taksa vung hi a lo chhuak leh a. An lo haw hnuah pawh a reh hleihtheih tak loh avangin doctor-te inentirin, Shillong-ah referred a ni.

A dinhmun hi a that loh avangin April ni 6, 2009 khan Shillong atanga lo hawin, that lam a pan theih chuan loh avangin doctor-te biakrawn reng a ni a. Civil Hospital-ah pawh vawi engemawzat admit niin, thisen vawi tam tak pek a ni a; Dialysis hmangin vawi 14 lai enkawl a ni. July 19, 2009 (Pathianni) zan khan a thawk lamah harsatna a neih avangin Civil Hospital-ah dah leh a ni a, oxygen pek a niin, doctor leh nurse-te’n theihtawp chhuaha an enkawl chungin July ni 29, 2009 (Nilaini) zing lam dar 8:00 khan Lalpa hnenah min lo chawlsan ta a ni.

Hemi ni vek, chawhnu dar 1:00-ah Rev. H. Chalbuanga’n In lamah vuiin, Upa C. Lallunghnema’n a ruang chu Thlanmualah a vui liam ta a ni.

Nl. C. Lalmuanpuii hi YMA member a ni a, khawtlang tana theih ang tawk tawka inhmang ve thin a niin, YMA Mission Vengthlang Branch chuan nizan, July ni 31, 2009 (Zirtawpni) khan ralna hun a hmang.