Kum 22-na, Issue 12, APRIL 24, 2009

VENG CHHUNG CHANCHINBU HMASAWNNA ATAN MEDIA WORKSHOP NEIH A NI

Tahrik ni 24.4.2009 (Zirtawpni) khan I & PR Department leh Central YMA tangkawp chuan I & PR Auditorium-ah YMA Branch-te tan Media Workshop a buatsaih a. Central YMA chuan Aizawl khawpui chhung Branch zawng zawng atangin Branch aiawh pakhat theuh leh thingtlang atangin Branch YMA Chanchinbu nei chu aiawh pakhat theuh intir tura a sawm leh ngen angin Branch aiawhte an tel tha hle.

He hun hi Pu H.Lalsangzuala, Chairman, Literature Committee, CYMA-in a kaihruai a. Ramhlun Vengthar Branch YMA Zaipawl chuan tanna hla an sa. Pu LR Sailo, Director, I&PR Deptt. chuan Inlawmna Thu a sawi. Nl. Esther Lalchhanchhuahi, Chhinga Veng, Tv. Lalrinkima, Durtlang leh Nl. Zomuanpuii, Sihphir-te’n kal khawmte hi zaiin an awi.

Pu R. Zothanmawia, Secretary, Literature Committee, CYMA-in report a pe a; Pu JH Zoremthanga, President CYMA chuan thu sawiin, “YMA Chanchinbu-te hi khawtlang tan a pawimawh a. YMA leh khawtlang hmel tilangtu a nih avangin uluk taka enkawl leh, kan thu chhuah turte pawh fimkhur a pawimawh a ni,” tiin a sawi. “Ei zawnna atana hmanga YMA Chanchinbu-te hi enkawl kan ni lova, tlawmngaih chhuaha khawtlang rawngbawlna a ni tih hria a, theihtawp chhuaha enkawl thin kan ni. Khawtlang tana rawngbawlnaah theihtawp chhuahin, tan i la zel ang u,” tiin a sawi bawk.

Nl. Irene Lalruatkimi, Member, Literature Committee, CYMA, resource person chuan YMA Branch Chanchinbu Enkawltute Tan tih paper a buatsaih, subject hrang hrang - (1) Self Introduction (2) Subject Introduction (3) Communication (4) Chanchinbu Kalhmang (5) Branch Chanchinbu leh (6) Rahbi Thar Atana Rawtna tihte chu slide projector nena entirin, ngaihthlak nawm takin a sawi. Paper zirho zawh hnuah Branch hrang hrang atanga aiawh kalte’n mahni Branch chanchinbu kalphung leh rawtna te sawiho zui a ni.

Kal khawmte tan MSACS leh I&PR Deptt.-te chuan refreshment tui tak an buatsaih a. Pu Vanlalruata, Asst. Secretary, CYMA chuan lawmthu sawiin a khar.



VENG CHHUNG THUTHAR TAWI:

• Pi Lalramhmangaihi (Nunui) w/o Pu Laltlanmawia, Y Sec. chu pumna avangin Durtlang Hospital-ah enkawl a ni.
• Pi Ramengmawii, Y Sec. (CP Road), damlo, In lamah enkawl mek a ni.
• Nl. Marina Lalnunmawii d/o Dr. Jerome Rokima, Y Sec., a scooty leh taxi insu vanga a hmai leh ban sawh na chu In lamah enkawl mek a ni.
• Pi Chiangkungi m/o Pi Malsawmi, Y Sec. chu Aizawl Hospital-ah enkawl mek a ni.
• Pi Lalrokimi (Marovi) w/o Pu RC Lalrokunga, M Sec. (Tlang Veng) chu Mumbai lama hun eng emaw chen an inenkawl hnuah tluang takin an rawn haw.
• Upa Zaikunga, M Sec. chu damlohna avangin In lamah enkawl mek zel a ni.
• Lalnuntluangi (Tluangpuii) d/o Pu Zobela, M Sec. (Tlang Veng), hritlang âwmna avanga Aizawl Hospital-a awm chu dam takin a lo chhuak.
• Pu Vanlalruata Chhangte, A Sec.-te chu Pu Lalrintlinga te In, A Sec.-ah an insuan lut.
• Pi Zothanpari (Partei) w/o Pu PC Lalrinpuia, M Sec. chu Assistant-ah inziak tlingin, Social Welfare Sectt.-ah dah a ni.
• Kan veng nu Pi Vanlalbeli w/o Pu K. Bawlliana, Y Sec. (Darnam) hla phuah - Ka Lungkham tih chu MBSE chuan Cl-XI zirlaia telh turin a thlang.

FAM ROLUNG MUAL:

Hming : R.K. LALCHHUANKIMA
Kum : 45
Kohhran: Presbyterian
Thihni: April 24, 2009. 5:30 AM
Vui Hun: April 24, 2009. 01:00 PM
Vuitu: Rev. C. Lianhmingthanga
Section: A Section

Tv. R.K. Lalchhuankima hi Pu Kaptawna (L) leh Pi Ralkaithangi (L) te nupa fa 9 zinga a naupang ber dawttu niin, April 25,1964 khan a lo piang a. An unau hi hmeichhia 4 leh mipa 5 an ni.

Zirna lamah PUC a zawh hnuin B.A. a zawm a, mahse pass chhuak lovin lehkha zir lam chu a chawlhsan ta a ni. Amah hi thian ngaina leh rual kawm thiam tak a ni a, kalna lam apianga amah ngaihsaktu leh thiantha siam thei zel mi a ni.

Mi taima tak, hnathawh hreh nei lo mi a ni a; samsiam leh lumeh hi a kutkalna lam niin, eizawnna atan hial pawh hun engemaw chen chu a hmang nghe nghe a ni. Hei bakah hian pangpar siam leh khawi te hi a thiamin, inneih ni leh eng emaw tihpui ni-a pangpar khawi leh hmunhma chei vel tura rawih pawh a hlawh hle a ni.

Kohhran lamah pawh mahni phak tawka inhmang thin mi a ni a, Jubili Kohhran indan tirh lai bawr velah phei chuan KTP hruaitu tangkai tak (KTP, Jubili Branch Financial Secretary hmasa ber) a lo ni tawh thin bawk. He’ng mai bakah hian Pathian-ah harhna chang chhovin, Pathian Biak In leh zaikhawmnaa lam peih tak leh zan rei tak tak thlenga ngawrh taka tawngtai peih thin mi a ni.

Hun engemaw chen atang khan a pum lam tha lovin, mi hriat vak lova inbuaipui chang an nei zauh zauh a. Kum 2004 March thla khan Durtlang Hospital-ah a pumpui zai a ni a; hemi hnu, 2006, 2008-ah te khan Nazareth Hospital leh Aizawl Hospital-ah te enkawl a ni bawk. Kumin February thla khan a natna avang bawk hian Durtlang Hospital-ah enkawl leh a ni a, amah leh a chhungte pawhin tha taka a dam chhoh ve zel an beisei laiin tun kar Thawhlehni zing khan a pumna hi a lo chhuak leh a. Theihtawpa an inenkawl chungin nimin zing dar 5:30 khan Chatuan Ram lam min lo pan san ta a ni.

Tv. R.K. Lalchhuankima ruang hi nimin, April 24, 2009 chhun dar 1:00 khan In lamah Rev. C. Lianhmingthanga ‘n Vuina Hunserh a hmang a, Thlanmual-ah Upa Zoramthanga Royte-in Thlahna Hun Hnuhnung a hman leh hnuin, Mission Vengthlang Thlanmual-ah vui liam a ni ta a ni.



THLAMUANTHLAK:

Khawtlangin Chhiatni-a kan intawiawm danah hma kan sawn zel. Hun eng emaw chen kan veng thalai (tlangval) thlanlai kal tlem lutuk thinin kawng hrang hranga sawiho a hlawh hnuah, nimina kan veng tlangval thlan laite chu 70 chuang zet an tling leh ta. Tlangval tlawmngai-te’n veng in timawiin, a thlamuanthlak hle mai.

Kum 22-na, Issue 11, APRIL 18, 2009

CHHIATNI THATNI LEH KHAWTLANG NUN SIAMTHAT SAWIHO

April Ni 14,2009 (Thawhlehni) zan dar 7:00 khan YMA Hall-ah YMA Mission Vengthlang Branch Executive Committee, Section Office Bearers leh Mission Vengthlang-a Kohhran hrang hrang Thalai hruaituten, Chhiatni Thatni leh Khawtlang nun siam that tih thupui hmangin inkawmhona an nei. He hun hi Pu Kaisangzuala, President, Branch YMA-in kaihruaiin Pu Lalrochama, Leader, TKP, Shalom Unit chuan Hunserh a hmang.

He inkawmhonaah hian member YMA Branch & Section - 39, KTP MVT - 13, KTP Jubilee - 12, TKP Shalom Unit -2, PYD MVT - 12 leh Pathian Kohhran Thalai Pawl -12, an vaiin 78 an kal khawm a ni. Chhiatni Thatni leh Khawtlang nun siam that kawnga hmasawnna tur leh rawtna hrang hrangte inpawh tlangtakin sawiho a ni a, chung sawiho leh rawtna tlangpui te chu :

I. CHHIATNI THATNI:
Mitthi lumen zana zai hruai chungchangah Kohhran lian zawk Thalai hruaituten inpawh tlangtakin Kohhran dangte leh te zawk sawi chuang lovin theihtawp chhuahin hma la leh zual se. Tin, kan Mizo lengkhawm zai hla-te uar zawka sak leh chawinun zel ni se.
Thlan laih chungchangah thahnem ngai lehzual tura infuih thar leh nise, hruaitute pawh tun aia taihmak chhuah lehzual ni thei se. Tin, tunlai khawvel thang zelah eizawnna lo in ang lo leh tulna dang dangte vangin; Thlanlai tur Group-a in siam a tha tawh em? Nge, kan tlawmngaihna hi sumah chantirin rual khai zawkin chhungkaw tinin hlawhfa ruaiin thlan hi kan lai tawh zawk dawn?

Nu leh paten kan fate mitthi lumen, thlanlaih leh khawhar in-a kal taima lehzual tura infuih thar leh ni se, chhiatni thatni-a taima taka kan kal leh chet hian kan in lawm tawn a ni tih ngaihtuah chungin, Kristian kan niha kan tih ngei tur leh mizo kan nih tinuamtu a ni tih i hre thar leh ang u.


II. KHAWTLANG NUN SIAM THAT:
Kan khawtlanga Ruihtheih thil lo hluar ta hian khawtlang a tihmelhemin, hmeichhia, nunau leh tar chaklo zawkte tan khawtlang a ti ralti a, ruk ruk leh huan thlai in khawihsak a ti hluar ta hle a ni. Heng ruihtheih thil leh a laka fihlimlote hi lungrual taka kan do tlan a ngai, midang tihah dah mai lovin kan mawhphurhna theuh a ni tih i hria ang u.

Kan mizo nun ze mawi leh tha; Aia upa zah, rinawmna, tlawmngaihna, mite tanpui leh a dang tam takte kha uar zawkin, Chhungkua, Sikul, Khawtlang, Sande Sikul leh Kohhranah te in zirtir thar leh ni se. Ruihtheih thil leh sualna dangten chhungkua min run a, hmun a khuar lohna turin Nu leh Pate’n kan fate ngamin thunun a pawimawh.

Khawtlang nun siam thatnaah YMA leh Kohhran Thalaite lungrual taka thawhho zel ni se, YMA ten theihtawp chhuaha hma an lakna thlawpin Kohhran Thalaite’n inkhawmnaah khawtlang nun siam that hi uar zawka inzirtir ni thei se.

Heng tarlan baka sawiho tam takte nen mahni pawl theuhah sawiho leh ngaihtuah zui a, chak zawka hmala theuh tura in ngen leh infuihin kham lo takin zan dar 11:15-ah an tin ta a ni.



VENG CHHUNG THUTHAR TAWI:

• Rev. Lalnghinglova, Y Sec. chu a mit (eye) zai tirin Guwahati-ah a thang mek.
• Pi Laltinthangi, Pu Lalramliana (Para), Y Sec. pizawn chu a mit (bile)-a lungte awm Aizawl hospital-ah zai a ni.
• Pu C. Vanlalsiama, M Sec. chu Grace Nursing Home-ah a beng zai a ni.
• Pi Zachhingi m/o Lalmuankima (Nuktea), M Sec., bike chetsual avanga a lu leh a kawng sawh, Aizawl Hospital-a enkawl chu In lama enkawl chhunzawm turin a lo chhuak.
• Pi Lalengkimi (Aeni) d/o Pu Rodingliana, M Sec. chuan Durtlang Hospital-ah fanu a nei thar.
• Pi Laltlanzovi w/o Pu Ramchungnunga, A Sec., thisen pek leh a ni a, In lamah enkawl zel a ni.
• Kan veng pa, Upa Lalhriata lehkhabu ziah - Chun Chawi Loh tih chu MAL chuan Book of the Year 2008 atan a thlang. Kan lawmpui hle.
• April ni 16, 2009 (Zirtawpni) khan Zoram pum-ah MP thlanna chu tluang taka neih zawh a ni. MP thlannaah hian Zoram pumah vote 52% vel a tla. Kan vengah chuan Govt. Primary School-ah vote thlak a ni a, vote tla hi 48.89% a ni a, vote nei zawng zawng zatve pawhin vote kan thlak lo a nih chu.

ARTICLE: RETHEI LEH HAUSA KAR A ZAU EM?
Zualtea Pa, M Section

Pitar pakhat hi a tunu, nula ve ek ek tawh hian a hnung kham a zut sak hauh hauh a. Chutia a pi duat taka a zut hauh hauh lai chuan nula chu za deuh mai hian a rawn nui chhuak ta hawk hawk mai a. An chhungte dang lo awm hnaite’n a chhan an han zawh chuan, “Ka pi hian a ngumah Scorpion lem tatoo a nei nia,” tih pahin, “Ka pi khawi maw, ka lo en chiang chhin,” a’n ti leh nghal zat a. Mahse, a pi chuan a tatoo chu inhmeh a inti chiah lo nge, en a phal loh mai bakah, hnung kham pawh an inzut sak hleithei ta lova.

Ni e, he pitar hian a tleirawl/nulat taksa nalh lai chuan he a tatoo hi a duhin, inhmeh pawh a inti viau thin ang. Mahse, tunah zet zawng a taksa a lo vuaiin, a vunte a lo zur ta. A tatoo lah chu a taksa leh rilruah ser nung ang maiin a riak tlat a; inhmeh leh mawipui chu sawi loh, a tunu duat em emin a hmuh mai pawhin zak takin a awm phah ta si. Zahpui viau mahse a tatoo chu a taksa leilunga a luan ral hma chuan a put reng a ngai tawh dawn.

Tatoo hi khawvelah hian a mikhual lo angreng khawp mai, mithiam (scientist)-te sawi dan chuan Isua pian hma kum 3000 bawr vel ami, Egyptian mummy thenkhat taksaah pawh tatoo hnuhma hi hmuh tur a awm tawh a ni. Mahse a hming, tatoo hrim hrim hi chu kumzabi 18-na bawr vela Sap-hoin Polynesian (Tahitian)-ho tawng ‘tatau’ tih atanga an lak chhawn niin a lang. Hmanlai atanga tunlai thlengin taksaa tatoo chhut kai dan hi chi hrang hrang - thir linga deh, thil hriam hmanga ziah leh hriau-a chhun thi a, ziahte an hmang thin a; tihdan thar an la hmuchhuak mek zel bawk.

TATOO LEH THALAITE: Tunlai hunah pawh kan thalaite chuan tatoo hi an uar fu mai. Nula/Tlangval, an taksaa tatoo neite hian an siam chhan ber chu nalh an tih vang a ni ber. Nula tatoo neite chuan an ngumah, mawng bawr, hnute leh malpuiah te an chhut tir ber a; mipa lam chuan awm bawr, ban puam, kuttum leh an nghawng velah an thil ngainat zawng lem an chhut tir deuh ber.

I FANU/FAPA-IN TATOO A NEI EM?: Helam kawngah hian nu leh pa tam zawk hi chuan ngaihtuahna kan seng tam lo khawp mai. In fate kha han bel chiang teh.... “Ka fanuin a lo nei ve reng alawm, mahse a chhut tirna hi a kumkar deuh a, a langsar lo khawp mai.” A ni maw? Mahse, a awmna lansarh loh avang khan ngaih tha ngawt suh; miin min hmuhpui loh chuan kawr mawi paw’n awmzia a nei lo ang hian i fanu tatoo pawh kha a mawi tih zawng, mi hmuh atana a chhut tir a nih ang ngeiin hmutu chu an awm ngei ang. Khawi hmunah leh eng hunah nge tih hriatpui kilh kelh chu a har khawp ang. Zirtirna pek hmanhmawh chi a ni.

Mipa lam pawh Defence Service hrang hrangah, thil danga tling vek, tatoo neih vanga tla ta an tam tawh tihte hi hriat a pawimawh khawp mai.

I fanu/fapa-in tatoo a nei lo maw? “A tha,” ti ve hauh lo turin zirtir rawh. A tih ve hlauh chuan a reh tawh dawn si lova.

HEI HI NGAIHTUAH HMASA ILA: Nula tlangval, tatoo chhut tir duh reng reng chuan, he ka tatoo chhut tir tur hi ka dam chhungin ka taksaah a awm tawh dawn a; nakinah, tu leh fate ka neih ve hunah kan tute’n, “A pi/A pu, hei hi eng tihna nge? Engatinge hetiang hi i taksaah a awm bik?,” an la rawn ti ang a, chutih hunah chuan engtin nge kan chhân ang le?

Kum 22-na, Issue 10, APRIL 11, 2009

VENG CHHUNG HIMNA LEH THIANGHLIMNA
VCP, Mission Vengthlang

Mission Vengthlang hi tun hma atangin ruihtheih thil hrang hrang zawrh kawngah veng fihlim kan ni a, hei hi min tizahawmtu ber pawh a ni. Eng emaw lai atang khan heng ruihhlo leh zu zawrh kawngah hian sawi kan kai ve ta zeuh zeuh a, veng neitu tak tak nihna inhriate tan rilru a na lo thei lo.

Hman deuh khan vantlang inkhawmah veng chhung himna leh sual dona kawngah hian VDP emaw, JAC emaw din ve tawh maite hi a tha em tiin sawihona neih a ni a. Chutah chuan VDP emaw, JAC emaw din lovin, YMA hian tlawmngaih chhuahin hma la rawh se tiin thutlukna siam a ni. Chuta tang chuan tun thleng hian YMA chuan he hna hreawm tak, awlsam tea mi huat nih hlawh theihna hi a kengkawh ta a, tun thleng hian sual dona kawngah YMA chuan hma a la ta zel a ni.

March 26, 2009 zân khan veng chhung NGO hrang hrangte, YMA Hall-ah Joint Meeting, VC kaihhruainain neih a ni a, hetah pawh hian YMA lam hian kan ko a rit lutuk deuh e, VDP emaw, JAC emaw-te hi din tawh mai ila, tiin rawtna an nei a. Amaherawhchu, kal khawmte chuan tun dinhmun atan chuan YMA-te hian tlawmngaih chhuahin VC-te nen theihtawp lo chhuah leh phawt rawh se, tiin thutlukna a siam leh ta a ni.

Veng chhung sual dona kawnga mawhphurtu nih hi thil namai a ni lo va, veng chhung mi chengte nunphung a hniam phei chuan thil hreawm leh hautak tak a ni lehzual a ni. Veng dang atanga hatsatna lo thleng ringawt hi chu buaipui a ziaawm a, Keimahni leh keimahni harsatna kan insiam thin hi a hautu leh a hauha te tan a nuam lo mai ni lovin, hetiang hian kan khawtlang boruak pawh a tipik thin a ni.

Tun lai khawvel changkang zelah meizu mite pawh an inthlahrung a, mei zu turin hmun fianrial leh midang tibuai lo thei ang tur an zawn hram hram tawhna hunah hi chuan zu ruih avanga mi dangte harsatna siamtu nihte hi a changkang lo lutuk tawh a, kan in duh a nih pawhin changkang takin, zahawm taka awm hi kan zir a hun tawh a ni. Tun hma, kan rual u, zu in mi ve thote pawhin an thian veng danga mite bula sawi nuam an tih chu, “Kan vengah zu zuar an awm lo,” tih hi a ni. Chuvangin Mission Vengthlang-in tun hmaa zahawmna a lo ken kha tunah pawh hian kan chhawm nung zel thei a, ruihhlo leh zu awm lohna veng hi awlsam takin kan la ni thei reng a ni. Chu mi tur chuan veng chhung mi tinte hian mahni hma zawnah theuh tih tur kan nei. Mission Vengthlang zahawmna vawng nung tur hian tute pawhin tih theih kan nei a ni tih hre tharin khawtlang himna leh thianghlimna atan puanven sawi chhingin tan ila thar ang u.



VENG CHHUNG THUTHAR TAWI:

• Pi Lalhmuaki w/o Pu R. Hrangzual (L), Y Sec., a ban bawh ulh avangin In lamah enkawl a ni.
• Np Hranglura s/o Pu Lalhmingmawia, Y Sec., Graceland Hospital-a rilphir zai chu a lo chhuak.
• Pi Nuchhungi leh a fanu Nl. C. Lalmuanpuii, Y Sec., Shillong lama an inenkawl hnuin In lama inenkawl zui turin an lo haw.
• Pi Vanlalruati w/o Pu L.Ramthanga, Y Sec. khawsik, In lamah enkawl mek a ni.
• Pu Peter Lalrinmawia, Y Sec. te chuan fanu an nei thar.
• Upa Hauhmingthanga, M Sec. chu vawiin hian Civil Hospital-ah a phinga lungte awm zai chhuah sak a ni.
• Upa Zaikunga, M Sec., dam lohna avangin In lamah enkawl mek a ni.
• Pi Laldini m/o Pu Jolly Newman, M Sec., Durtlang Hospital-a a ban tliak zai nawn chu a lo chhuak.
• Np. Vanlalchami d/o Pu R. Lalhmingliana, M Sec., asthma avanga Kulikawn Hospital-a enkawl chu a lo chhuak.
• Pi Grace Lalchhawntluangi w/o Pu Calvin Lalchawimawia, M Sec., Aizawl Hospital-ah enkawl a ni.
• Pu Lalhmingmawia, M Sec. te chuan fanu an nei thar.
• Tv. Lalramluahpuia c/o Pi Piangzingi, A Sec., chet sual palh vanga Aizawl Hospital-a enkawl mek chuan that lam a la pan thei meuh lo.
• Pu Lalthachianga, A Sec. te chuan fapa an nei thar.
• Pu Lalromawia, A Sec. te chuan fanu an nei thar.
• Pu Ramkinlova te chhung chu Y Sec. atangin Pu K.Lalbiakvela In, M Sec.-ah an insawn.
• Y Section-in Market Building-a Zun In an siam chu an zo fel ta.

ARTICLE: RETHEI LEH HAUSA KAR A ZAU EM?
C.Lalawmpuia, M Section

Tun hma deuh atang khan, ‘Mizoram-ah mi hausa leh mi rethei inkar a zau,’ tih hi sawi a ni fo a, sorkar kal ta MNF sorkar chhung pawh khan he thu hian sawi a hlawh hle a, a leh lamah, ‘A zau lo,’ tiin kan ram hruaitu thenkhatte khan tan an khawh bawk a. Hemi chungchang hian sawi a la hlawh zel ang. A dik a dik chuan ram changkang ber bera kan sawiahte pawh hian mi hausa leh mi rethei inkar hi a zau khawp mai. An sum leh pai atanga teh phei chuan sawi ngaihna awm lo khawpin mi rethei leh hausate inkar hi a zau a ni. Chuvangin a tehfung hi a pawimawh a, a tehfung a zirin Mizoram-a rethei leh hausa inkar zau leh zau lo kan tih pawh hi dikna chen a awm ve ve ang tih a rinawm.

Mi ram BPL leh kan ram BPL-te khaikhin chuan keini chu khi-ah khi-ah kan ni a, mi ram rethei leh hausate dinhmun atanga teh pawhin an mihausate hausak dan chu Mizo pa hausa kan tihte hausakna nena khaikhin chuan inthlau tak a ni a, an ne pawh kan la ek pha lo tih a chiang. A retheiate vek vek lah kan ram mi rethei kan tihte nen chuan kan inthlau lutuk, keini mirethei dinhmun chu anni tan chuan vanram tluk deuhthaw a la ni thei ang. Chuvangin rethei leh hausa inkar a zau lo titute tanfung hi a dik thui khawp mai.

Hetih lai hian hausa leh retheite inkar a zau titute pawh hian dawt chu an sawi bik miah lo. Hman ni lawk, kum 30 chuang emaw awrh kaltaah khan Mizo zingah mi lian leh hausa tia han sawi fal tur an tam lo khawp mai. Chhungkaw khawsak a inang tlang pet pet a, eibar zawnna kawng thuhmun zawhin mitin an tul tlang a. Chuti ang dinhmun kan nih lai leh tun dinhmun han thlir chuan rethei leh hausa inkar zau dan hi teh thiam har khawpin a inthlau tawh tih hi a chiang a. Mi ram intehkhin lovin, keimahni leh keimahni atanga teh chuan kan mi hausate hausak dan leh kan mi miretheite retheih dan hi chu lei leh van tluk dawnin a kar a zau tawh a tih loh theih loh. Kan ramah hian mihring kan tlem a, eibar deh chhuahna tur ram ruak kan la ngah a, ziak leh chhiar thiamna lamah kan fing var a, heti chung hian hausa leh rethei kar chu awihawm loh khawpin a inthlau ta si a ni. Kan population te, kan eibar zawnna dinhmun atangtea teh chuan Mizote hi la inkhai rual pet pet thei tur kan ni. Chuvangin rethei leh hausa inkar a zau titute tanfung hi a dik ve tho.

Hma kan sawn zel ang a, kan eizawnna kawng leh kan rilru sen dan, kan theih chin leh phak chin a inthlau deuh deuh ang a, mi rethei leh hausa inkar hi chu a la zau tulh tulh ang tih hi pawm tur a ni a. Khai rual duh vanga mi hausate hrek leh khap beh ngawt theih a ni lo. Mahni hma zawn theuha kan tlanna kawngah hian kan thlen chin a thuhmun dawn lo. Mahse rethei leh hausa inkar zau hi neih sum leh paia teh hi thil dik a ni em? tih zawk hi kan ngaihtuah tur niin alang. Sum leh pai kan neih dan chu a la inthlau tulh tulh dawn, hetih lai hian khua leh tui kan nih anga kan chanvo inang tlang kan dawn dante hi eng ang nge? Court rorelna-ah mi rethei leh hausa tan thiamchan inawl hleih dan eng nge? Hna zawn kawngah mi hausa tana chance awm zah chiah hi mi rethei tan a awm ve em? tihte leh thil dang dangte hi a tehfung tur a ni a. He’ng anga a inthlauh zung tawh a, mi hausa chan a vawng hluai tawh a nih hi chuan rethei leh hausa inkar a zau a ni. Hei zawk hi rethei leh hausa inkar chungchang tehna lian ber zawk chu a ni.

Mizoram hi rorelna fel tak hnuaiah awm ila tuna rethei leh hausa inkar hi zau vak tur a la ni lo. Mizoram hian sorkar hnathawk an hausa ber a, a dawtah politician; chumi dawt lehah sumdawng ti ta ila kan sawi sual tam lo maithei a ni. Hei ringawt pawh hian kan ram kalphung dik loh zia chu a lantir chiang a ni. Sumdawng hi chu lo dahtha ta ila, sorkar hnathawk leh politician-te hausakna chhan ber nia lang chu mipui an retheih vang tih hi a ni tawp mai. Mipui chanvo tur, mipui a thlenhmaa a tawpna apiang kha an lian thur thur tawh mai a ni.

Tunah hian mi ram ang em emin Mizoram-ah mi rethei leh mi hausa inkar a zau lo kan ti a nih pawhin, tun ang renga kan kal a, kan sorkar kalphung leh mipui rilru puthmang kan thlak a, kan her dik loh chuan, nakin lawkah mi ram rethei leh hausa inkar zau kan tihte dinhmun hi chu kan thleng thuai ang. Heng anga kan luh lohna tur hian rorelna dik, rorelna fel, sum leh paia rinawmna hi sorkar hian chak taka a kenkawh a ngai a ni. Sorkar a dik phawt chuan chhungkaw dinhmun chu a lo inthlau viau a nih pawhin rethei leh hausa kar zau anga sawi tur a ni lo vang.



KAN VENG HSSLC 2009 RESULT

Y SECTION
Lalremruatfela s/o Vanlalthanga Ralte II
Lalthantluanga s/o HS Lalnghakliana II
Lalrinsiami d/o R.Partira II
Simon Rosangliana s/o R. Rotluanga II
Reuben Lalruatfela s/o Jasper Rongura II
R. Lalliansanga s/o R. Lalrinzuala III
Lalthakima s/o Vanlalrawna III

M SECTION
Lalrinawmi d/o H.Lalhmangaihzuala I (Commerce-ah 4-na)
Zodinthara s/o Lalhmangaiha I
Daniel C.Lalchhuanawma s/o Rev. C. Lalsangliana II
Martin Lalzirliana s/o C.Lalnunnema II
Florence Lalthazuali d/o Lalremmawia II
H. Lalrinzuali d/o H. Lalbiakmawia II
Lalthanmawia s/o C.Huallianthanga III

A SECTION
Lalhruaitluangpuii d/o HC Thanthuama I (Commerce-ah 9-na)
Lallawmzuali d/o C. Lalthlamuana I
Lalremruata s/o Peter C.Lalrinmawia II (E)
Laltlanmawia s/o Lalramhluna II
Vanlalnunpuii d/o Lalramhluna III
MS Dawngliana s/o V. Lalchhuana III
L. Vanlalchullova c/o Zoremliani III
____________________________________


HSLC 2009 PASS THAR HRIAT BELHTE:

Y SECTION
PC Lalnunzira s/o Lianzuala D (M, Sc,SS)
Lalnuntluangi d/o K.Vanlalhlua I (IT)
Zomuanpuia s/o Zochhuanmawii II

M SECTION
Vanlalthiamsangi d/o C.Lalnunnema D (M,Sc,IT)
H. Lalrindiki d/o H.Lalbiakmawia I
Christopher Lalruata s/o C. Lalthanthianga II

A SECTION
C. Zothankhuma c/o Chhunglawmi III
Noel Zorintluangi d/o R.Lalbiakenga III




VENG TAN HMA LA ZEL DAWN

Veng chhungah ruihtheih thil, a bik takin zu lo hluar ta leh, he’ng laka fihlim lote’n nunaute ralmuanna tichhe khawpa veng an tiralti a, an timawi lo hi YMA chuan a ngaimawh hle a. VC leh NGO hrang hrang hruaitute’n hma la chhunzawm zel tura a ngen angin YMA chuan theihtawpa a ngen angin YMA chuan theitawpin veng chhung thianghlimna leh, mipuite ralmuana turin hma a la zel dawn a ni.

April 5, 2009 Pathianni) khan VC member-te leh YMA Executive Committee member-te duty-in, zu in lai leh zu pawh man a ni a. Thu thaa inzilhin, haw tir an ni. Hetih lai hian zuiruih avanga intibuai awmin, YMA hruaitute’n an thelh pawh pawisa lo khawpa inti luhlul man an ni a, a pawi hle mai. He’ng thil thlengte avang hian dawizep taka invauna te pawh a awm a; hei hi YMA chuan a ngaizam mai mai dawn lo. Theihtawp chhuah a, hma la chhunzawmin April ni 6 leh ni 7 zanahte Branch leh Section committee-te duty chhunzawm a ni a. Heng bakah hian Section committee-te’n mahni Section huam chhungah duty ngawrh taka kalpui zel a ni bawk.

YMA chuan ruitheihthil laka veng chhung then thianghlimna kawngah mipuite tawiawmna a ngen a. Ruitheihthil avanga buaina leh mawi lo taka khawsa ka hriat chuan a rang thei ang berin VC/YMA hruaitute hnenah hriattir turin a ngen a ni.

Ruitheihthil avanga khawtlang then thianghlim kawnga theihtawp chhuaha thawktute chungah thil tha lo leh pawi a thleng a nih chuan VC leh YMa-in a hmachhawn zel dawn.

Kum 22-na, Issue 09, APRIL 04, 2009

YMA MISSION VENGTHLANG BRANCH EXECUTIVE COMMITTEE VAWI 4-NA THU

April ni 2, 2009 (Ningani) zan dar 7:00 khan YMA Hall-ah YMA, Mission Vengthlang Branch Executive Committee meeting neih a ni a. Member 32 kalin, harsatna hrang hrang vangin 9-in an pha a, committee member zawng zawng hi 41 an ni. Meeting hi Pu Kaisangzuala, Branch President-in kaihruaiin, Pu Lalhmingmawia, Branch Secretary-in Pathian hnena tawngtaina a nei a, thurel tan nghal a ni. Thurel tlangpuite hetiang hi a ni:

• April ni 14, 2009 (Thawhlehni) zan dar 7:00 khian YMA Hall-ah veng chhung Kohhran hrang hrang Thalai hruaitute nen Chhiatni Thatni leh Khawtlang nun siamthat chungchangah inkawmhona neih nise tih a ni.
  

• V.C.-in Village Development Committee member atan Pu Kaisangzuala, Branch President leh Pu Lalhmingmawia, Branch Secretary-te a rawn ruatna chu Executive Committee chuan a pawmpui.
  

• Market Building sakna THP ram leh a thenawm mimal ram inrinna Revenue Deptt.-in teh felin, pillar-te phun nghal a ni a. Bazar hnawmhnawk mimal rama paih lo tura ngenna chu Market Committee ngaihtuah tura thlen a ni.
  

• MP thlannaa Polling Party-te a tul anga lo pui leh buaipui tura DC, Aizawl ngenna chu a theih ang anga tihhlawhtlin nise tih a ni.
  

• Chhiatni Thatni-a kan mawhphurhna tihhlawhtlin kawnga hma kan sawn zel theih nan Nu leh Pate nen inkawmhona, Section tinte’n tul an tih angin neih nise tih a ni.
  

• April ni 11, 2009 (Inrinni) hian veng chhung thenfai hnatlang, Branch pum huapa neih nise tih a ni a; Section tinte mahni Section-ah a tam thei ang ber hnatlang tura beisei kan ni.
  

• Market Building chunga THP Hall-ah Chhiatni Thatni bungraw dahna tur Y-Section-in an Section suma siam an dilna chu pawm a ni a, Branch Office Bearer-te nen enhovin, hma lo la se tih a ni.
  

• April ni 24, 2009 (Zirtawpni) zan khian YMA Hall-ah HSLC leh HSSLC pass-te lawmpuina neih nise tih a ni a, HSLC-a titha ber mipa leh hmeichhiate hnenah Trophy hlanin, pass zawng zawngte lawmpuina thilpek hlan tur a ni. Programme kimchang chu Branch OB-te’n lo siam se tih a ni.
  

• Miharsate Pual Bawm hunah Rs 555/- thawhkhawm a ni. Veng chhung mi, chhungkaw pahnih tanpui tura rel a ni a; hemi atan hian Branch Executive Committee-te’n mahni remchan ang ang thawhkhawm nise, Branch Secretary hnenah a rang thei anga pek khawm tur a ni.

VENG CHHUNG THUTHAR TAWI:

• Pu Hauhmingthanga, M Sec., Nilai zan inkhawm laia chau thut chu In lamah enkawl mek a ni.
• Pu Ralramthanga, M Sec., Civil Hospital-ah enkawl chu a lo chhuak.
• Pu P.C. Lalsangzuala te chhung chu Khumtung atanga lo pemin Pu Ngursavunga In, Y Sec. an luah.
• Pi Lalhmuaki w/o Pu H.Hrangzuala (L), te chuan Y Sec. Dam pheia an In sak thar an luah lut ta.
• Pu Lalrambuatsaiha (Mabuata), Bethlehem Vengthlang chuan kan veng Market-ah Pheikhawk Siamna Hmun a rawn hawng thar ta. A mamawhte’n Ph: 9863644438-ah a biak thei e.
• Pu H. Lallawmkima-te chhung chu Pu Samuel Ramdinthara In, A Section-ah vêk an insawn.
• Pu Lalramtana-te chhung chu a puzawn, Pu Vanrammawia In, Y Sec. atangin Pu PC Rokhuma In, A Sec. (Zion Veng)-ah an insawn.
• Mission Vengthlang Pastor Bial Khawmpui Vawi 3-na nizan atang khan Mission Vengthlang Prebyterian Biak In-ah tan a ni a, Pathianni zan hian a tiak ang.

ARTICLE: THANGTHAR-AH BEISEINA A SANG
R. Vansanga, M Section

Kumin March ni 28 khan, kan vengpa Rev. K.Lungmuana bultumin, Synod Committee Room-ah Mizo Moral Reformation chungchanga inkawmhona neih a ni. Hetah hian Kohhran hrang hrang leh Central YMA aiawhte bakah, thangthar mithiam engemawzat an kal khawm. Moral Reformation han tih hian a kawh ber chu kan ngaihtuahna leh rilru suangtuahna a tha zawnga siamtharna a kawk ber awm e.

He inkawmhonaah hian Mizo rilru put hmang, tunhma leh tunlai, a chhe lam leh a tha zawng kawng hranga sawiho a ni a. Thangthar rilru puthmang thenkhatah sualnate langsar hle mahse, rilru thianghlim, dikna leh rinawmna nei nghet tak an lo thathnem tawh ziate sawi lan a ni a. Hemi chungchang kan veng mite’n kan hriat a, kan nunpui atan tlemte chauh ka’n tarlang ang e.

Tlangval pakhat chu, an chhungte politician lar tak leh Minister hial lo ni ta chuan a thiltihtheihna hmangin sorkar hnaah thun luh a tum a. He tlangval hian a duh bau lo, “Thiltihtheihna leh induhsakna hmanga hna neih ka duh lo, ka hmakhua chu keima theihna ngeiin ka sutlang ve ang,” tiin a hna pek tur chu a hnar tih an sawi a ni. A va ropui em! Hetiang taka rilru thianghlim leh chhuanawm hi Mizo rilruah a awm thei ang tih rin a har hle; mahse an awm tlat si.

Tun hma chuan hmeithai fa leh sâwnte hi mi hmuhsit leh, an thuhla pawh tumahin chaw tak khuka an khukpui duh loh, khawtlang thilah pawh thusawi ve pha lo tur ang hiala an ngaih thin thute sawi lan a ni a; tunah chuan hetiang chi hi a bo hmak tawh. Veng-ah pawh awm thar leh awm hlui inthliarna awm fo thin ang kha a bo tawh hle; thangthar rilru hi a tha lamah a kal chak sawt hle. Hmanlai nun tha bika ngaihna leh tunlai nun sual ta bika ngaihnate hi a dik famkim lo; hmanlai nun tha lo, thangtharte’n kan kalsan tak tam tak sawi lan a ni bawk.

Nungcha humhalh chungchangah kalkhawm zinga kohhran hruaitu langsar tak chuan heti hian a sawi,”Ka zinna lamah hian Vahrit an awh tharlam tak mai ka lei thin a. Tifuh ka lo intih thin nen, tuna kan tu leh fate hi chuan an ei duh tawh reng reng lo. ‘Engtia thi nge tih pawh hriat loh,’an ti a, an ten tlat tawh,” a ti. Hei mai hi a ni lova, “Sava sate hi ei enah an en lova, nungcha mawinate hi an hmu langsar ta. Tunhma kan han chhuakkhawm thin, kan kut hleina thing himdam awm reng reng lova kan han sat chiam thin ang kha a vang tawh khawp mai. Laiking nilum ai mai mai kan han vawm a, kan han inthemthiam nghal ringawt ang chite kha thangtharah a bo ta a, ei tur lam saah chuan talh chawp ngat lo chu an ei duh tawh lo,” tiin a sawi.

Tunlai thangtharah hian dik duhna leh rinawm duhna a lian em em tawh a; thil an chik a, duah hluaha thusawi, a tak hmuh tur awm lote hi an ngaithei tawh lova, dik lo leh fel lo taka thil tih duh lo, an thinlung taka ten em emtu hlawm lian tak hi thangtharah an awm a ni, tihte sawi a ni.

Sawi tur tam tak awm mahse, duhtawk rih ila. A tlangkawm nan tlem han sawi zui ila. Mizo-te hi danglam taka Pathian siam kan ni a, Lal Isua hriat hma pawha hnam inhmangaih,hnam rinawm kan ni a; tun hnaiah duham luat avanga kan zia a han bo tan mek hi Setana hnathawh a ni a, thangthar fel zawkte hmang hian kan ram natna hi Pathianin min tihdam leh i beisei teh ang, êng a awm e.



HSLC 2009 RESULT (PASS THAR CHHUNZAWMNA)

Y SECTION
Rosangkima s/o R.Rotluanga D (M,Sc,SS,Mz)
Lalrinhlua s/o R. Partira D (M,SS,Sc)
Rony Lalhmunmawia s/o C.Vanlaltluanga I (SS, Sc)
Lalruatfela s/o Lalremruata I (Sc)
Lalruatfela s/o Ch.Malsawma I (SS)
R. Lalrempuia s/o R.Lalnuntluanga I
Lalnundiki d/o Zuichhungi II
Vanlalpeki d/o ST Hmingmawia II
Joseph Vanlaldingngheta s/o THC Laldova II
R.Lalrinfela s/o R. Lalluta III

M SECTION
C. Lalramropuia s/o C. Lalrotluanga I (SS)

A SECTION
Saidingpuia Sailo c/o Sanglura Sailo II
A. Vanlalmalsawma Pachuau s/o Saithanmawia Pachuau II
Zonunmawii d/o H. Lalmuana II
Lalnunsiami d/o Laltanpuia II
Lalruatfeli d/o H. Lalmuana III
Lallawmawma s/o Lalnunsiama III
Zonunkimi c/o Rokimi III
Deborah Lalruatkimi c/o Rev.Lalchunglura III
Lalengzami d/o C. Lalrinawma III