Kum 22-na, Issue 04, FEBRUARY 28, 2009

MISSION VENGTHLANG-IN VILLAGE COUNCIL MEMBER THAR KAN NEI TA















PIC: Pu Lalsawta, Hon’ble Minister, Education-in
VC member-te thla a lakpui.

Mizoram pumah Village Council Inthlanna chu Ni 24.2.2009 khan neih a ni a. Inthlanna hi tluang leh felfai takin neih zawh a ni. Sorkar lai Congress Party chuan hmun tam zawkah hnehna an chang. Rampumah vote tla zawng zawng hi 70% vel a ni.

Mission Vengthlangah pawh Govt. Primary School-ah V/C thlanna hi neih a ni a. Vote nei zawng zawng hi 2825 niin vote tla zawng zawng chu 1957 a ni. Vote tla hi za zelah 69.27 a ni. Inthlan hma atangin MPF ten ngenna siamin theihtawp chhuahin tan an la a, campaign boruak thalo leh dawt phuahchawp leh vote lei titi thangva pawh a awm lo niin a lang. Tin, inthlan ni-ah pawh nilengin duty an in siam a, an fakawm tak zet a ni. Hei bakah hian YMA member tlawmngaite’n vote thlak tur lo kalte hming leh No. lo zawnsak hna an thawk bawk a a lawmawm hle, hei hian vote thlak a ti awlsamin boruak pawh a ti dai nuam tak zet bawk.

V/C member paruk kan nei thei a, Congress Candidates parukte thlan tlin vek an niin, a hlangin V/C an siam dawn a ni. Hei hi Mission Vengthlanga a thlen vawi khatna niin a lang. Kan khawtlang hruaitu tur V/C kan thlan chhuahte leh an vote hmuh zat chu hetiang hi a ni:

1. Pu B. Lalhriattira - 1406
2. Pu Vanlalhuma - 1332
3. Tv. Vanlalthlenga - 1321
4. Pu Vanmalsawma - 1294
5. Pu V.L. Faka Hnamte - 1112
6. Pu Zarkhawthanga - 997

V/C Member tharte hi ni 25.2.2009 (Nilaini) zan khan inhmukhawmin hetiang hian chanvo an insiam rem nghal a, vawiin ( 28.2.2009 ), chawhnu dar 3:30 hian V/C hluite nen charge an inhlan dawn a ni.

President : Pu B. Lalhriattira
Vice President : Pu Vanlalhuma
Treasurer : Tv. Vanlalthlenga
Secretary : Tv. Lalmalsawma Khiangte


VENG CHHUNG THUTHAR TAWI:

• Pu F. Thangpuia, Y Sec. (Dam), BP fel loh vanga Aizawl Hospital-a awm chu a lo chhuak leh ta.
• Pu R. Vanlallawma, Y Sec. (Kawn) chu Scooter-a a chetsualnaah a kutzungchal a tliak a, In lamah enkawl a ni.
• Pi R.L. Lalnuntluangi w/o Pu David C.Zoliana, M Sec. Secretary, Guwahati lama in check-up chu vawiin hian an lo haw dawn.
• Nl Zothanpuii d/o Pu F. Lalropianga, M Sec. Comm. member, Kolkata lama in check-up chu dam takin a lo haw.
• Np. Malsawmkimi d/o Pu Rosangzuala (Branch Treasurer), M Sec., Aizawl Hospital-a enkawl chu dam takin a lo chhuak.
• Pi Lalzarliani w/o Pu Hrangkhuma, M Sec., damlo, In lamah enkawl mek a ni.
• Pi Lalthanpuii w/o Pu Vanlalsawma, M Sec., Guwahati lama in check-up chu vawiin hian a lo haw dawn.
• Pu Zarzoliana s/o Pu Lianbuanga (Pu Ramdinsanga, M Sec. In luah) damlo chu a tha chak vak lo. In lamah enkawl mek a ni.
• Nl. Lalremtluangi d/o Pu Lalremsiama, A Sec., chu a tonsil Aizawl Hospital-ah zai a ni a, In lamah enkawl chhunzawm a ni.
• Pu R.Rokhuma h/o Pi Vanlalthuami, A Sec. chu taksa vung vangin In lamah enkawl mek a ni.
• Tv. Lalthuammawia s/o Pu R.Kapliana, A Sec. chu khawsik vangin In lamah enkawl mek a ni.
• Np. Nancy Lalrinngheti d/o Pi Rinchhani, A Sec. chu hritlang khawsik avangin In lamah enkawl mek a ni.
• Pu H. Lalbiaktluanga, A Sec. kan Branch Treasurer hlui chu in check-up turin vawiin hian Mumbai lamah a liam thla leh dawn ta.
• Pu Lalchhuanmawia Kawlni, A Sec. te chuan an In sak thar an luahlut ta.
• Nl Biakthangpuii chuan Pu Lalsangliana In, A Sec. thlanmual kawnga mi chu a luahlut ta.
• M Section chuan Chhiatni Thatni-a hawh theih turin Electric Extension Cord siamtha ta.
• A Section chuan sum tuakna’na Sangha an zawrh lei saktu zawng zawng chungah lawmthu an sawi e.

VILLAGE COUNCIL INTHLAN THLIR ZUINA
R.Vansanga, M Section

Election chhiarkawp: Vote nei mi 2825, vote thlaktu mi 1957, vote tla za zelah 69.27. Vote hmu hnem ber hmuh zat 1406, vote hmu tlem ber hmuh 408, a inthlauhna vote 998. Congress vote hmuh zawng zawng 7462, MNF vote hmuh zawng zawng 3845, an inthlauhna 3617. Chawhruala Congress mimal tinin an vote hmuh zat 1244, chawhruala MNF mimal vote hmuh 641.

Mission Vengthlang VC neih hran hnuah, Congress hlangin VC an siam tum khatna a ni awm e. Change a thleng e.

MPF: MPF hian tun inthlan chu nuam an ti ber an ti. Engtik lai pawhin hlui khat daih chuan an vil chawt reng a. MPF nu hovin thingpui hneh takin an buatsaih. A ralmuang tha si a tih tur vak awm hek suh, a khat tawkin thla an la deuh reng. An upa hlawm si a, an thlalak chhungtin daih siam tir a, an ha siam tanpui nana zawrh an tum a ni awm e.

TITI LENG VEL:
‘Inthlan hi ka hmachhawn hnem hle tawh a, hetiang reng renga Ballot Box lian hi ka la tawng ngai lo’ -Upa C. Hmingthanga

(Ngamtlak nupa hnenah) ‘Nangni nupa vote ve hi chu an pawm dawn emaw ni le? In kal dante hniang hnuang hi vote nung nei hmel pawh in pu love, va vote ve teh reng un’- Upa Hauhmingthanga

Vote chhiarna phek a han bih lawr den den a, ‘Ka va han tawi tek tawk ve le’ - Pu Zadingluaia

Sangha a man thin ni ngei tur a ni, ‘Mipuite hian an thlang sual lo, kan Lal pawh kha he kawvela a len laiin, sangha mantute kha a ni a koh chat chat.’ - Pu B. Lalhriattira

‘A eng dang a ni lo, Congress thli a tleh a ni ber mai e’ - Pi Vanlalbuki

‘Nia, hei mipui zarah min han thlang tling ve chu a ni a, Taxi khalha kan eizawn laite kha a lunglen thlak mang e’ - Pu Vanlalhuma

‘Kha maw ka tihreng kha’- Pu Vanlalvena

VOTE THIi: Rin aiin vote thi a tlem. Thlangtu mipui changkan zia a ti lang. Vote thihna chhan chu paruk aia tam thlan vang a ni ber. Duhamna chi loh ber a ni. Paruk aia tlem thlanah vote a thi thei lova, a aia pakhat lek a tam chin chu vote loh nen a thuhmun, thlangtu ten i hria ang.

PARTY VOTE: A hriat theih fu, a hriat dan ber chu Party hlangah chiah vote an pe, mahse tlinpuina khawp chu a tling lo. Party tui pawlh loh kan tlem tawh khawp mai.

PAKHAT CHAUH DUH: Mi paruk lai thlang thei si, pakhatah chauh vote pe an awm nual, an kawppuite nge ni, an mahni? tih lah hriat ni suh. Lo kal hah man a awm lo ang reng, hmangaihna khurbing ka vuah tawp.

VOTE CHHIAR: Rin aiin a awlsam. Zan dar 6:30 atangin vote chhiar tan a ni a, darkar hnihah kan zo vek. Kan Returning Officer Pu R. Vanlallawma accident a tawh hlim a ni chungin, a tih tur fel takin a hlen, chuan dar 9-ah, kan R.O. chuan hmui vung bur leh ban awrh hnuang chungin result Official-in a puang a, kan haw darh ta nghal a ni.

LEHKHABU THAR: Heng a hnuaia lehkhabu thar ngaihnawm tak tak turte hi, kan VC Member thar theuh atangin an rawn buatsaih a. Kumin chhung ngeia tihchhuah an tum, mipuite’n lo ngaihven lawk a dik ang. Chung lehkhabu lo chhuak mai turte chu-

1. Sa sah dan kawng sarihte - Pu Zarkhawthanga
2. Tlang Veng kawng leh Kei - Pu Vanmalsawma
3. Taxi leh a stand inlaichin dan - Pu Vanlalhuma
4. Tlawng lui leh a vel bihchianna - Pu B. Lalhriattira
5. Perek ber leh tuboh hmai - Pu V.L. Faka Hnamte
6. Thir leh tunlai khawvel - Tv. Vanlalthlenga

Kum 22-na, Issue 03, FEBRUARY 21, 2009

BRANCH LEH SECTION COMMITTEE INTUAITHARNA LEH KHAWTLANG NUN SIAMTHAT ZIRHONA NEIH A NI

Nizan (ni 20.2.2009) khan YMA Mission Vengthlang Branch chuan Branch leh Section Committee member-te intuaitharna leh Khawtlang nun siam that zirhona YMA Hall-ah a nei a, member ten ngaipawimawhin an kal tha hle. Central YMA in kumin atan Thupui a a thlan Khawtlang nun siam that tih chu Dr. R. Zonuntluanga, Branch Executive Committee member chuan a sawi.

Dr. R. Zonuntluanga chuan, “Tun hmaa Mizo nuna bet tlat a ngaih heng- Rinawmna te, Taihmakna te leh mi dang tana thil tha tih duhna, Tlawmngaihna nun leh kan nun zemawi hrang hrangte kha Kristian kan nih hma a kan lo neih vek tawh a ni a. Kristian kan lo nih hnu phei hi chuan nunpui langsar lehzual awm tak kan ni. A chhan chu heng kan sawi tak te khi Chanchin Tha huangchhung a mi an ni vek bawk si. Khawi khawi laiah emaw zawng siam that ngai a awm tih a chiang a ni,” tiin thu kamkeuna a nei a.

Khawtlang nun siam thatna atana hma lakna tur leh zirturte, heng thu then hrang hrang -
(1) Thawhchhuah phu tawka khawsak leh nun thiam te
(2) Hawihhawmna leh Tawngkam mawi hman in zirtir uar te
(3) Thalai hnathawh tum lo tam tak awm ta pawi zia te
(4) Sorkar thil duat sak leh mahni ta anga en a humhalh that tul zia te
(5) Mahni hnathawhna theuh a rinawm pawimawhna te
(6) Zu leh Ruihhlo laka fihlim a tul zia te
(7) Mipat hmeichhiatna hman khawloh pawi zia te
(8) In leh a vel vawnfai pawimawhna te leh
(9) Ngaihsan tur dik hriat pawimawh zia
te sawi zau in, heng thu then hrang hrang hmanga thangthar leh naupang zawkte atanga in zirtir leh keimahni pawh entawn tlaka nun a pawimawh zia a sawi a.

Tuna kan tu leh fate hi Pathian tihna te, Rinawmna te, Taihmakna te, Aia upa zahna te, Tlawmngaihna tak tak te leh nun mawi kawng hrang hrangte kan zirtir a, keini nu leh pa leh an zirtirtute’n kan zirtir anga entawn tlaka kan nun bawk chuan kum 20/30 lo kal leh turah chuan a tha zawngin hma kan sawn ngei ang a ti bawk.

Khawtlang nun siam that inzirtir nan Chhungkua atangin tan ila, nitin School leh Sunday School-te hmang tangkai thiam ila, tuna kan zirlai leh zir dan pangngai ti danglam chuang lovin, a karlakah zehtel leh hun hran siam te leh Rawngbawltute pawhin Sermon thupui-ah te pawh hmang thin se a tha hle lawng maw? tiin thu tlangkawmna a nei. Heng thu then hrang hrangte leh sawi zauna atangin sawihona neih zui a ni.


Tin, heng bakah hian, Section inpawh tlan lehzualna turte, veng chhung a inlungrualna tha zawk a thlen zel theihna tura Branch leh Section hmalakna turte sawiho a ni a. Chhiatni ah tun aia tan la leh zual tura in fuih tharna neiin, nu leh pate pawhin kan fate tun aia uar zawka zirtir leh a tul huna tirh chhuah ngam a pawimawh tihte an sawiho bawk.



VENG CHHUNG THUTHAR TAWI:

• Pi Lalchami m/o Pu H.Ramdinliana, Y Sec. (Darnam), a mit (bile)-a lungte awm chu Aizawl Hospital-ah zai a ni a, enkawl mek a ni.
• Tv. R.Lalnuntluanga s/o Pu R. Lalhmingliana, Y Sec. (Kawn) chuan Bike-a a tluknaah a khingkhangruh a tliak a, Durtlang Hospital-ah enkawl a ni.
• Np. Lalhmuchhuaka s/o Pu Israel R.Lalbuatsaiha, Y Sec. (Darnam) chu damlohna avangin Aizawl Hospital-ah enkawl mek a ni.
• Pi Rosaline Vanlalchhungi w/o Pu Zodingliana (Makuka), Y Sec. (Kawn) chu pumna avangin In lamah enkawl mek a ni.
• Pi Lalnuntluangi, Y Sec. (Dam) chu an In chhungah a tlu sual palh a, In lamah enkawl mek a ni.
• Tv. David Lalmalsawma s/o Elizabeth Rindingliani, Y Sec. (Vengmawi) chu pumna avangin Aizawl Hospital-ah enkawl mek a ni.
• Pu Lalchungnunga Pachuau, M Sec. chu bike-a chesualin, a ban ruh a sawh auh.
• Pi Zohruailiani w/o Pu C. Lalrempuia, M Sec. (Bethani) te chuan an fa hmingkoh atan Civil Hospitala-h fanu duhawm tak an nei.
• Pi Lalrindiki w/o Pu Vanlalnghaka Chhawnchhek, M Sec. te chuan a 2-na atan fapa an nei thar.
• Pu Lalrintluanga, M Sec. chu Kolkata lamah in check-up turin a thang mek.
• Pi R.L. Lalnuntluangi w/o Pu David C. Zoliana, M Sec. chu Guwahati-ah MIR ti turin refer a ni a ni 23.2.2009 (Thawhtanni) hian an kal dawn.
• Pu Andy Lalrinmawia, A Sec. chu chhungkaw thila Manipur lamah a thang mek.
• Pu C. Lalduhkima, Pu R. Lalsiamliana leh Tv. Lalrintluanga, A Sec. te chu chhungkaw thil lamin Guwahati lamah an thang mek.
• Feb. 25, 2009 (Nilaini) hian A Section chuan sum tuakna’n an huam chhungah sangha an rawn zuar dawn a, tlawmngaia lo lei sak turin an inngen e.
• Feb. 16&17, 2009 khan A Section chuan Tuikhur hiah hnatlang an nei a, member thawk chhuakte chungah hruaitute an lawm hle.

VILLAGE COUNCIL KHAWTLANG HRUAITU LEH RORELTU
Hruaitea Pa, Y Section

VC thlan chu Ni 24. 2. 2009 khian neih tur a ni leh ta reng mai. VC hi kan venga hotu leh roreltu tur te an ni, fimkhur leh uluk tak, bengsikin i thlang ang u le.

Kohhran, MPF leh CYMA chuan Inthlanpui kal taah pawh khan thuchah siamin hma a la a, a hlawhtlinna pawh tha tak niin a lang. Inthlan engah pawh hian mi thenkhatin thlan tur ka hre lo ti an awm fo, a dik lo. Tute mah, a thlangtu pawh, thlan tura an thur chhuah, pho lan ngat pawh ni se, famkim kan awm ka ring lo. Mahse heti ang veng riang ruanga mi inpe, pho chhuah ngatte chu tlak loh an awm lo ang. Chuta tanga thlan chhuah chu tihsual tak tak a awm thei dawn em ni? Ngun taka an zaa teha veng tana tha ber tur i thlan theih nan thuchah an lo siam atangin tlem tarlang ila, teh nan i hmang tak tak anih ngat chuan famkim lo ta pawh ni se, a sual tam lo ang.

I thlan tur chu Political Party ruihchilh loin thlang teh. I thlan tur te chu mi hming tha an ni em? Zu leh Ruih theih thil dangah an fihlim em? Mahni hnaa rinawm, Kohhran leh Pawla an telnaa chhawr nahawm, veng tana inpe an ni em tih te pawh teh nan hmang la, i tifuh ngei ang.

VC atana pholante chu Zonunmawi Ni 7. 2. 2009 chhuakah i lo hmu tawhin i hre tawh. Khang mi 12 atang khan 6 thlan chhuah tur a ni. VC atan thlan tur an ni a, VC ni mek leh ni tawh, la ni lote an Section awmna nen tarlang ila a tha awm e.

Pu B. LALHRIATTIRA (M Section) leh Pu P. C. LALNUNMAWIA (M Section) - Anni hi vawi duai lo VC-a thlan leh ni mek an ni. A chunga sawi bakah khian an VC lai khan eng anga tangkai leh thawhpuite thawhpui thiam leh tha nge an nih chu en tel a tha hle ang.

Pu VANMALSAWMA (M Section) leh Pi VANLALBUKI (Y Section) - Anni pahnih hi VC tur pawhin mikhual lo, lo ni tawh, tun tumah khan awl an ni. An VC hun laia an lo thawh dan leh an nih loh lai pawha eng ang dinhmunah nge veng tan hmun an luah a, hna an thawh tih en tel ni se.

Pu V. L. Faka Hnamte (Y Section), Pu Vanlalhuma (Y Section), Pu Vanlalthlenga (A Section), Pu Zarkhawthanga (A Section), Pu Lalzarliana (A Section), Pu C. Vanlalawia (M Section), Pu Vanlalzawma (A Section), Pu Zadingluaia (M Section) - Heng mite hi VC-ah chuan mi thar tur an ni. Mahse veng tan leh pawla an telnaah eng anga hnu-hma nei nge an nih tih erawh chu hriat loh rual an ni lo, an hnu hma lo neih tawh chu teh nan hman tel a that viau a rinawm.

Hawh teh u, tih takzetin leh inchhung khurah pawh sawiho ngeiin, duh thawh deuh anih phei chuan pholan, thlan tur ni ta chu tu tute nen pawh inrawnte thlengin uluka thlan a tha lo maw ka ti a ni.


BRANCH HMALAKNA

• Tunlai hian Basketball Court bula Inthiarna leh Bual In changkang tak siam mek chu ngawrh taka thawh mek a ni a. Tunah hian hna tam zawk chu thawh zawh a ni tawh. Pu Vanmalsawma, M Section chuan Branch aiawhin nitin hnathawkte tanpui leh vil hna a thawk.
• Nimin khan THP Hall thar chu electric wiring hna thawh tan a ni. He wiring hna hautak tak hi Information & Publicity member-te’n hnatlangin an thawk a, tun kar lo awm turah hi chuan wiring hna hi thawh zawh hman ngei beisei a ni.

Kum 22-na, Issue 02, FEBRUARY 14, 2009

YMA MISSION VENGTHLANG BRANCH SECTION-TE'N MEETING AN NEI

YMA Mission Vengthlang Branch-a Section hrang hrangte chuan YMA leh khawtlang tana an hnathawh tur ngaihtuahin Committee Meeting an nei hlawm a. Section committee hrang hranga thurel tlangpuite hu hengte hi a ni:

Y SECTION
Ni 10.2.2009 (Thawhlehni) zanah Section Leader In-ah meeting neiin, Leader Pu Lalramthanga’n meeting a kaihruai a, member 27 kalin, 5-in an pha. Thurelte chu:

• Ni 20.2.2009 (Zirtawpni) zana Branch leh Section committee intuaitharnaah kal vek nise an ti a. Hemi huna ngaihtuah turin Section hrang hrangte thawhho that dan tur leh Chhiatni Thatni-a chak zawka hma lak dan tur ngaihtuah te thlen nise an ti.
• Damlo pali, Rs 300/- theuhin kan nise an ti a (Hei hi tih hlawhtlin tawh a ni).

M SECTION
Ni 12.2.2009 (Ningani) zanah YMA Hall-ah meeting neiin, Leader Pu Chawngthankima’n meeting a kaihruai a, member 19 kalin, 12-in an pha. Thurelte chu:

• Ni 20.2.2009 (Zirtawpni) zana Branch leh Section committee intuaitharnaah kal vek nise an ti a. Hemi huna ngaihtuah tur hrang hrang an sawiho.
• Damlo 4, Rs 300/- theuhin kan nise an ti.
• Mizo Pipu Zai Intihsiaknaa tel an member-te chungah lawmthu an sawi a, March ni 10, 2009 hian zanriah kilpui an tum.

A SECTION
Ni 12.2.2009 (Ningani) zanah THP Hall-II ah meeting neiin, Leader Pu Lalthawmmawia’n meeting a kaihruai a, member 23 kalin, 10-in an pha. Thurelte chu:

• Ni 20.2.2009 (Zirtawpni) zana Branch leh Section committee intuaitharnaah kal vek nise an ti a. Hemi huna ngaihtuah tur hrang hrang an sawiho.
• Sum tuakna turin remchang hmasa bera Section huam chhungah sangha leh mombati zawrh nise an ti.
• Sub-Committee pathum hetiang hian an siam: (1) Light & Sound Sub-Committee (2) Property Sub-Committee (3) Games & Sports Sub-Committee.
• Feb. ni 16, 2009 zingkar hian tuikhur hiah hnatlang neih nise an ti.
• THP Hall-II a tul anga repair nise an ti a, Ni 13.2.2009 (Zirtawpni) zing khan an repair nghal.
• Chhiatni-a hman tur petrogas repair tirin, Rs 350/- zet an seng.
  

VENG CHHUNG THUTHAR TAWI:

• Pi Khuangthuami, Y Sec., Dam Veng-a a fapa In lama enkawl chu tunah an mahni In lamah enkawl chhunzawm a ni.
• Pi Lalthanpuii w/o Pu Vanlalsawma, M Sec. chu Guwahati-ah check-up turin kalpui a ni.
• Pu Zarzoliana c/o Pi Malsawmi, M Sec. chu Khawsik vangin enkawl mek a ni.
• Pu Lianzuala c/o Pu C.Lalnunvula, M Sec. chu zai a ni a, enkawl mek a ni.
• Pu H. Lalmuana, A Sec., Internal Bleeding avanga Nazareth Hospital-a enkawl chu dam takin a lo chhuak ta.
• Pu Zothanliana, A Sec. Asst. Secretary, a ke tliak-a thir phum phelh chu In lamah enkawl mek a ni.
• Upa R.Lalbuatsaiha, A Sec. chu a kawng nâ avangin a pawn chhuak thei lova, In lamah enkawl mek a ni.
• Nl. Lalmawizuali d/o Pu H.P. Lalzuala, M Sec. leh Dr. Benjamin Lalrammuana, Zemabawk te chu Feb. 19, 2009 (Ningani) hian Zemabawk Presbyterian Kohhran Biak In-ah an innei dawn.
• Y Section Dam Phei kawng chu tunlaiin blacktopping that a ni.
• Pu C. Lalrinthangzuala, Y Sec., thenawm state-a Municipal Corporation an kalpui dan zirchiang tura an office aiawha thawkchhuak pawh dam takin a lo haw leh ta.
• Ni 12.2.2009 (Ningani)-a Mizo Pipu Zai Intihsiak, Vanapa Hall-a neihah Mission Vengthlang Cultural Club (M Section) va telve te chuan Participation Prize Rs 3000/- an dawng.
• Pu Lalsangliana h/o Pi Lalchhanchhuahi (Pu Ralramthanga fanu) te chuan M Sec.-a a pa In an luah lut ve ta.
• Pu Zobela, M Sec. chuan Zonunmawi Office wiring a thlawnin min tihsak a, a chungah kan lawm hle.
• Pu Lalsawta, M Sec., Hon. Minister, Education etc., sawrkar pawimawha meeting-a Delhi-a kal chu dam takin a lo haw.
• A Section chuan Feb. ni 7, 2009 (Inrinni) khan hnatlangin kumina an project, khuang tur an la.

ARTICLE: YMA TAKIN AW...
C.Chuaukunga, Y Section

YMA General Conference 63-na chuan kum 2009 chu kum puan nei loin, thurel No. 1 (a)-ah ‘Mizo Nun ze mawi uar zawka inzirtir ni se’ tiin a rel a. Mitin hian kan khawtlangah Mizo nun zemawi nunpui theuh ila, kan khawtlang chu a nuam ngawt ang tih hi pawm tlang mah ila, Mizo nun zemawi chu eng ber hi nge tih kan hriat tawh mang loh avanga he thu hi rel ngai ta ni ngeiin a lang. Kan Branch huam chhunga YMA member 3000 chuang zette’n a tam thei ang ber Mizo nun zemawi kan zirin kan han nunpui dawn a ni a, a nghahhlelhawm asin.
Ni e, Mission Vengthlang huam chhungah chauh pawh, mi heti zatin uar zawka he thu hi kan zir a nih ngat chuan kumin chhung ngei hian kan khawtlang nunah danglamna kan hmu ngeiin a rinawm. Central YMA chuan hemi chungchangah hian kam keuna ang chauhin hmalakna tur a duang a. YMA zawng zawng, Mizoram bakah Tripura, Assam, Meghalaya, Manipur leh hmun dang danga Mizote, a hmun leh a hun a zira sukthlek hrang, tawng leh ze dang tak tak thlenga zir thar tur kan nih avang erawh chuan kaihhruaina inang diak diak hman tlan tur siam chu thil theih loh hial niin a lang. Kan vengah pawh Branch leh Section hruaitute’n hmalak dan tur beng sika kan ngaihtuah a ngai a ni. Kan hmalakna hian keimahni, kan chhungkua, school leh pawl hrang hrangte kawk se a hlawk ngawt ang.
Hei bakah hian YMA Central Coordination Committee vawi 58-na chuan kan khawtlang nun enin kumin 2009 thupui atan ‘Khawtlang nun siamthat’ a thlang bawk a ni. Hetah pawh hian kan veng tana tul angin Branch leh Section-te’n hma an la tan nghal a ni.
Kan veng chhunga sual do leh khawtlang nun siam that kawngah hian VC huaihawt vantlang inkhawm chuan YMA chu mawhphurhna a lo pe fel tawh a, hei hi sût ahnekin nasa lehzuala tang turin a nawr bakah Presbyterian Kohhran, Mission Vengthlang pawhin ruihhlo chungchangah nasa zawka thawk turin a ngen mek bawk a ni.
YMA chu tanpui ngaite puitu leh khawtlang nun siamthatu pawl a nih avangin heti lam kawngah hian thil tam tak a lo ti tawh a, a ti zel ang a, a chawl ngai lovang. Hman atangin kan veng hi zu zuar awm lohna veng tia sawi a ni thin a. Mahse, tunlai hian mi tlemte, sawi tham pawh ni mang lo zu zuar thin an awm ve ta tlat mai. Hemi chungchangah pawh hian meisi chu hmehmih a nih loh chuan In a kang thei tih hriain YMA chuan ngawrh takin hma a la mek a, nang pawh i theih ang kawng kawngin, tawngtaina thlengin lo tang ve teh.
Thil mak deuh chu, kan vengah hian tlangval thenkhat, hmangaihna nena an mahni chawi liantu nu leh pate ngam tum an awm nual mai nia! Nu leh pa, hetiang ang mi fa nei i nih a, hmangaihna vanga i thunun thei si lo a nih chuan a rukin YMA hruaitute rawn hrilh rawh. Puih i ngaihna apianga pui tur chein YMA hi a inpeih reng a nia. Hei bakah hian kan khawtlangah zurui, buaina siam leh midang tiralti zawnga chet chingte pawh YMA hian a hriain a ngaimawh hle a. He’ng mite tan hi chuan YMA hi zilhtu leh tan tirtu ang hiala a chet a ngai hial mai thei. Kan veng hi zurui thuhnuaia a kun YMA chuan a phal dawn lo.
Khawtlang nun siamthat kawnga YMA hmalaknaah hian chetsual leh pal buak palh a awm lohna’n veng mipuite kan theihna kawng theuhah tang tlang ila. Hei mai bakah, Social Front leh Kohhran hrang hranga Thalai Pawl-te hi khawtlang nun siamtha tur hian tun aia nasain rawn pen chhuak thei se, Kohhran leh chhung tinte tawngtaina nen tang tlang zel bawk ila a duhawm hle a ni. Kan khawtlang siam tha tur hian veng dangmi beisei tur kan nei si lova.
Kan vengah hian chhungkaw harsatna eng emaw vanga khawtlang leh sawrkar phal loh thil ti thin pawh kan awm maithei. Chutiang kan awm a nih phei chuan YMA, Branch leh Section hi a theihna kawng kawnga tanpui turin a inkau reng a nia. I harsatna chu han thlen rawh, i tang tlang ang u.
Mission Vengthlang tui liak zawng zawngte kan sawm a che u. Kan dam leh tlang khatah, kan thih leh ruam khatah aw. Puan ven sawi chhingin mahni, chhungkua leh vengah tan i la theuh ang u le.

Kum 22-na, Issue 01, FEBRUARY 07, 2009

YMA MISSION VENGTHLANG BRANCH EXECUTIVE COMMITTEE VAWI 2-NA THU

Febuary ni 5, 2009 (Ningani) zan khan YMA Mission Vengthlang Branch Executive Committee Meeting vawi 2-na chu YMA Hall-ah neih a ni a. Member 32 kalin rokhawlhna leh damlohna avangin 9 an pha a ni. Branch President Pu Kaisangzuala’n Meeting kaihruaiin report leh thurel tlangpuite hetiang a ni.

1. YMA Membership Fee khawn zawh tawh a ni a, hetiang hi YMA Mission Vengthlang Branch Member dinhmun a ni :
Y Section: 976 + 16 Life Member - 992
(Mipa - 482, Hmeichhia - 510)
M Section: 1121 + 9 Life Member - 1130
(Mipa- 536, Hmeichhia - 594)
A Section: 900 + 18 Life Member - 918
(Mipa - 473, Hmeichhia - 445)
Member zawng zawng Mipa - 1491 leh Hmeichhia 1549, kan vaiin 3040 kan ni.

2. Ni 21&23 Feb., 2009 atan Mission Vengthlang Sporting Club-in Basketball Court hman an dilna chu phalsak a ni.

3. Mission Vengthlang Comprehensive Middle School-in Zonal Sports an neih tura Table Tennis Practicena’n THP Hall an dilna chu Ni 11-13 Feb., 2009 chhung atan phalsak a ni.

4. THP Library Membership Fee chu kumin 2009 atangin Rs 20/- ni tawh se tih a ni.

5. YMA Hall-II, Basketball Court bula mi chu March thla atanga luah tan theih turin peihfel nise tih a ni.

6. Branch Executive Committee leh Section tin committee te Ni 20.2.2009 zanah YMA Hall-ah inkawmhona neih nise tih a ni.

7.Bialtu MLA hnena thlen turin veng chhung hmasawnna tur sawihona NGO leh Political Party hrang hrangte nen Ni 21.2.2009 (Inrinni) dar 1:00 pm-ah YMA Hall-ah neih nise tih a ni.

8. Meeting-ah hian miharsate pual bawm hun a ni a, Rs 395/- thawhkhawm a ni.


VENG CHHUNG THUTHAR TAWI:

• Pu F. Lalsanga, Y Sec. chu Aizawl Hospital atangin a lo chhuak.
• Pi Romawii w/o Pu C.Lalramthanga, Y Sec. chu Aizawl Hospital atangin a lo chhuak.
• Pu Tlangchhuana, M Sec. chu Presbyterian Hospital, Durtlang atangin a lo chhuak.
• Nl. F. Zothanpuii d/o F. Ropianga, M Sec. chu a pum na vangin Kolkata-ah refer a ni.
• Pu C. Lalremruata, A Sec. chu a mit entir turin vawiin ni 7.2.2009 hian Guwahati-ah a kal dawn.
• Tv. R.K. Lalchhuankima (A-Kima), A Sec. chu pumna vangin Presbyterian Hospital, Durtlang-ah a awm a, thisen unit 6 lai pek a ni.
• Pu B.P. Lalbiakliana, Y Sec. te chu Pu F. Lalchama In Tlawng Road-ah an insawn.
• Pu Saingura Sailo, A Sec. te chu Pu Darkhawthanga In atangin Pu Sakrema In, A Sec.-ah an insawn.
• Pu J. Lalhmingliana, A Sec. te chuan an In sak thar, Tlawng Road (Forest Check-Gate bul) an luah lut ta.
• Pi V.L.Thlamuani, A Sec. chuan a In sak thar a luah lut ta.
• Pu R. Biaknawla te chhung chu Lunglei atanga rawn pemin Pu Varchungnunga (L), M Sec. In an luah.
• Pu T. Lalrinzuala te chhung chu Bilkhawthlir atanga lo pemin Pu Liankunga, Y Sec. In an luah.
• Pu C. Laldawngliana te chhung chu Champhai atanga lo pemin Pu Vanlalsawma, M Sec. te In an luah.
• Pu C. Lalhmachhuana te chhung chu Thenzawl atanga lo pemin Pu Lalremmuana, A Sec. te In an luah.
• Pu C.Laltanpuia, A Sec. te chu Pu Zarkhawthanga In atangin Pi R.Biakthangi In, A Sec.-ah an insawn.
• Pu R.Zasiama, Y Sec. (Vengmawi) te In hnuai chu a fanu, Pi Vanlalruati te chhungin an luah lut ve ta.
• Pu Lalramnghata (Pu Zatova tia hriat thin), M Sec. te chuan Dawrkawn-a an In thar chu an luah lut ta.
• UPC chuan Ni 6-8 Feb., 2009 chhung hian Mission Vengthlang UPC Biak In-ah Headquarters Bial Khawmpui vawi 42-na an nei.
• Tv. Lalfakzuala s/o Pu Roliana, M Sec. leh Nl. PC Zonunsangi d/o Pu PC Thankima (L), Sialsuk khuate chu Ni 12.2.2009 hian Mission Vengthlang Presbyterian Kohhran Biak In-ah an innei dawn.
• Feb. 6-8, 2009 chhung hian Mission Vengthlang Pastor Bial Kohhran Hmeichhia chuan Mission Vengthlang Presbyterian Kohhran Biak In-ah Bial Khawmpui an hmang.
• Nl. Vanrammawii Hrahsel d/o Pu H.Kaphnuna (L), A Sec. chu Missionary-a a thawhna hmun Samoa Islands-ah a kal leh dawn ta.
• Pi Vanlalrohlupuii d/o Pu Zarkhawthanga, A Sec. chu Missionary-a a thawhna hmun Maharastra atangin chawlh hmangin a lo haw mek.

ARTICLE: KAN KHUA
Lawmawma Pa, M Section

Kan inselem chaih a, tual zawl kan neih chhun chu hlim takin kan pal khu ve rum rum a, kan thlantui luanna kan hmaite chu a rang ang ri-riai a, tlai lam deuhah chuan savawm bu kan luah leh thung thin. Tumah kan awt lova, khawi veng leh khaw dang mah kan ngai lo. Tum khat chu ka nu leh pain vai kalnaah min hruai a, motor awmchhun One-tonne chu a chhe hlauh mai a, kan tlai laklawh tawh si, loh theih lohin min riahpui ta a nih kha. In ropui leh in tiêng tura hrui hmawra thil bial êng pup mai an khaite chu mak tiin ka thlir vak vak a, mahse, ka lunglen an hnem hauh lo, ka ngaih ber chu kan khua kha a ni, haw hlan ka nghakhlel tak zet mai.
Kan thlenin pa chuan, “Haw tawh lo la, kan bulah awm daih rawh aw, naupang kan nei si lova,” a tihte chu tak tak emaw tiin ka hlau hle mai si a. Anni tan zawng thingtlang naupang, bal tak, thil tuihnai engmah ei pha lo, hmuhsitawm takte pawh kan ni mahna le. Mahse, kan khuaa ka hriat reng chu tumah kan inawt bik lova, mite itsikna kan nei lova, mite ta ruk sak chu sawi loh, kan neih ang kha thiante’n nei ve se kan duh avangin kan inpui liam liam thin.
Aia upate’n min tirhin kan hnial lova, nu leh pate’n min koh tawh chuan ‘tin dialah, tin dialah’ tiin kan tlan haw thuai thin a nih kha. Nu leh pate’n chaw ei laiin awmdan tur tha min hrilh a, thiante zinga huaikawm bawl bik kan nih an hlau a, tlawmngaih te, mite tanpui hlut zia te, taima taka kan thawh chuan buh phur tam tak kan la nei ang tihte min hrilh malh malh thin. Huaisen min zirtir a, kan huaisenna erawh midangte tihthlabarna’n ni lo, nunau leh tar chak lo zawkte thlamuanpuina’na hman tur a ni tih min tuh sak thung si. Tumah hmusit lo turin min zilh a, harsa zawk leh chhuanchham te, pianphunga rualbanlote khawngaih min zirtir thin a nih kha.
“Chapona hi sual lian tak a ni a, nu leh pa thu awih leh aia upa zah hi hmuingilna a ni; inngaihtlawmna hi thawmhnaw mawi berte zinga mi a ni a, tawngkam mawi leh hawihhawmna hian zahawmna a siam zawk thin. Mahni infak aiin mi min fakna ri a mawi a, dawngtu nih aiin petu leh tih sak theitu nih hi a hlimawm zawk,” tiin min hrilh thin kha.
Engvangin nge kan khaw chhete, pilril tak kha ka ngaih em em? Eng dang a ni lo, khi’ng Mizo nun ze mawi tak nunpuitute avang khian a nuam a, a ngaihawm a ni. Kei chuan khaw thatê, ualau tak niin ka hria a, kan hmasawnna leh changkanna hian kan pipute nun ze mawi tam tak kha kalsan lovin chhawm nung zel se ka va ti em. Kan khua tak kha chu aw!!



TEACHERS' FELLOWSHIP DIN

Mission Vengthlang a cheng Zirtirtu hnathawk, khawi hmuna thawk pawh huap vekin, Mission Vengthlang Teachers’ Fellowship (MTF) din a ni a. Hei hian Education hnuaia Trainingna hmun te, Zirna In, Sorkar, Kohhran Private a thawkte a huam vek a ni. He Fellowship-in hmalakna tur a duan chu:

1. Vengchhunga zirlaite fuihna tha pek te, an kalna zel tur kawng kawhhmuh te, an rawn theiha awmte chu a hmalakna tur a ni ang a. Chanchinbu hmangin emaw, thusawi hmangin emaw hma a la thin ang.
2. Khawtlang nun siamthat kawngah a theih ang angin hma a la ang.
3. Zirtirtu zahawmna leh hlutna vawng thain, member tinte entawn tlaka nung turin a invawng tha ang.

Heng bakah hian Member-te chhiat/that chungchangah a intuam mawi zawngin leh intanpui zawngin an intawiawm thin ang. Veng chhung Zirtirtu thawklai zawng zawngte member ni vek turin kan inngen a, Membership Fee atan Rs 100/- a ni ang a, hemi hnu hian kum tin Rs 50/- Annual Fee pek thin tur a ni. Membership Fee pek kumah annual Fee pek a ngai lovang. February thla chhung hian thawhlawm hi an rawn khawn dawn a, a khawntute hnen atangin thu chiang zawk inzawh nise. He mi khawn zawhah hian kan kalphung tur leh memberte hming leh thawhna hmun, lehkhabu-ah chuan tirin, member tinte pek vek an ni ang.

Tuna Hruaitute :
Chairman: Pu R. Vansanga
Vice Chairman: Pu Rozama Chawngthu
Secretary: Dr. R. Zonuntluanga
Asst. Secretary: Pu H. Ngurthansanga
Treasurer: Pi C. Lalbiakdiki