Kum 22-na, Issue 39, OCTOBER 31, 2009

YMA GENERAL CONFERENCE-A PRESIDENT PU JH ZOREMTHANGA THUSAWI TLANGPUI

Y.M.A  General Conference vawi 64-na palaite leh a chhimtu, ram chhung leh ram pawn atanga lo kal zawng zawngte chibai ka buk a che u. Kan inkhawmpui tiak zan a lo ni leh ta reng mai a, a thlengtu Chalfilh Group Y.M.A  hahzia leh min thlen hnehzia hi a fakawm ka ti a, a lawmawm ka ti takzet a, Darlawn mipuite chungah lawmthu ka sawi tak meuh meuh a ni.

Zanin hi ka tan chuan hun pawimawh leh danglam tak a ni a, President term hnih ka hman zawhna hun a lo ni ve ta. Ka President nih chhung hian hun khirh leh danglam tak tak kan kaltlang a, theihnghlih a har thin ngawt ang. Hetiang hun kan paltlang laia min tawiawma, min finchhuahtu, YMA thlavang hauh tlat thintu ka thawhpui, hruaitu leh member zawng zawngte chungah lawmthu ka sawi tak meuh a ni. Ram chhung leh pawna ka YMA member puite duhsakna avanga kum 14 lai mai, a zawna Central YMA OB-ah post hrang hrang chelh a ka awm tluan thei hi a lawmawm ka ti a, ka tlin lohna leh fel lohnate min hrethiam a, min hliahkhuhtu ka YMA member pui zawng zawng chungah lawmthu ka sawi bawk e.  

Kan awmna hmun theuhah “YMA Motto” hlenchhuaktu leh “YMA dinchhan tihlawhtlingtu, YMA meichher mit lova chhi engtu” i ni zel ang u.

Mizo khawtlang nuna YMA pawimawhna leh tangkaina hi luhchilh thuk poh leh kan la hriat tawk loh zia kan hre dawn chauh a, taksa bung hrang hrangte hnathawh a inang lo ang hian YMA member-te hnathawh leh theihna chin pawh a inang lo, kan awmna a zirin kan hnathawh leh thiltih pawh a dang thei hle.   

YMA hmalakna zauzia hi hriat phak a har a, Zawlbuk awm loh hnua khawtlang venghimtu leh Mizo hnam venghimtu a nihna te,  tlawmngaihnaa insuihkhawm kan nih zawk ziate, khawtlang inzirna tih hial a nihna chhante leh Mizo Culture vawnghimtu kan nihna te hi inzirti thar zel ila; YMA kalphung, Central YMA atanga Section YMA thlenga inkhaidiat dante, Central, Sub-Headquarters, Group thuchhuahte tihhlawhtlin ngei tur a nihna te leh, tlawmngaihna, aia upa zah, intodelh, huaisenna leh rinawmna te hi uar lehzualin i inzirtir zel ang u.

Mizote kan insuihkhawmna awmchhun YMA hi ram mipuite min beiseina a sang hle a, kan nun leh chezia hi ngun takin an thlir a, YMA hi thianghlim taka kal zel turin min duh a ni. YMA tibawlhhlawhtu leh tihmingchhetu ni lovin a ti mawitu nih theuh i tum ang u.

Central YMA thuchhuak hi mimal thuchhuak a ni lova, CEC-in uluk taka a ngaihtuah hnua thu chhuah a ni thin; a tihlawhtlingtu i ni theuh ang u. Central YMA thuchhuah tihhlawhtlin loh kan nei ta fo hi a pawi hle a ni.

Mizo nun dik tak chu chhan ngaite chhan a ni tlat mai. Ral lakah te, Sakei huai lakah te, kangmei leh harsatna mite’n an tawhna reng reng laka chhantu nih a ni. Khawchhung nun fel lo ven thlengin thalaite’n an thawk thin. Chu chu tlawmngaihna tia kan sawi, hnam fing zawkte pawhin an ngaihsan hle chu a ni. British sawrkar an lo luh pawh khan Mizo khawtlang inawp dan chu tha an ti hle a, ti danglam lovin Lal rorelna kha an chhunzawm tir a ni.

A hring a hranin tunlaiah Sakei huai hmuh tur a awm ta lo, ral min runtu pawh hmanlai angin a awm ta lo. Mahse, tunlaia kan sakei huai ruihhlo, HIV/AIDS/hlemhletna/chimralna leh thil dang dangin kan thalaite a seh ta zawih zawih mai. Heng mite chhanchhuah hi kan tih tur a ni a, mahni awmhmun theuhah kan ram siamtha turin theihtawp i chhuah leh ang u.


VENG CHHUNG THUTHAR TAWI:

• Pu Lalsiamnghaka (Missionary), Pu K. Hranga, Y Sec. In luah chu Durtlang Hospital-ah a kal (kidney) paih sak niin, In lama enkawl turin a lo chhuak.
• Pi Rinchhungi w/o Pu R. Lalthlamuana, M Sec. chu Durtlang Hospital-ah a hnuangzang ruh chawr zai a ni.
• Dr. E. Saipari, M Sec., a nawmsam meuh loh avangin In lamah a inenkawl mek.
• Np. Lalhriatpuii d/o Pu Lalmalsawma, A Sec., asthma leh pneumonia avanga New Life Polyclinic-a enkawl chu a lo chhuak.
• Pu K. Zasiama, A Sec., Pneumonia leh thana avangin In lamah enkawl a ni.
• Tv. Stephen Lalramzauha s/o Pu R. Biaknawla, M Sec. chuan North-East Wushu Championship, Shillong-a neihah Gold Medal a la.
• Nl. Lalthakimi-te unau chu Pu Chalchhunga, M Sec. In atangin Pu Lalramthanga, Y Sec. In-ah an insawn.
• Pu MS Dawngliana (Sena) s/o, Pu K. Zasiama, A Sec.-te chu Pi Pari, A Sec. In-ah an inbawlhrang ve ta. 
• Nl. Lalhriatpuii Sailo-te unau chu Dr. Vanlalsiama, M Sec. In atangin Pi Pari In, A Sec.-ah an insawn.
• Nl. Loisi Lalduhawmi d/o Pu Kaisangzuala (Br. President), A Sec. chuan RIPAN atangin B.Sc. (MLT) 1st Division-ah a pass.
• Kan Branch President Pu Kaisangzuala chu CEC member atan ruat thar a ni.

ARTICLE:  VENG CHHUNG VAWNFAI CHUNGCHANG
Dina Pa, A Section

Kan hriat theuh angin tunlaiin kan Veng chhungah Village Council-te ruahmanna leh hmalakna hnuaiah ‘Clean Mission Vengthlang  Committee’ dinin  Faina kawngah hma chak taka lak mek a ni hi thil lawmawm tak a ni. Clean Mission Vengthlang Committee-te’n veng chhung In tinah ‘Faina’ chungchanga ‘Thu Sawm Pek’ te siamin, thahnemngai takin chhung tinte hnenah lehkha  semin veng chhung a lo fai a, a lo thianghlim zawk  theihna tura hma a la mek hi veng chhung mipuite’n ngaihpawimawh a, zawm tlan theuh theih a tha hle  mai.  Chhungkaw engemaw zatin tha taka an zawm a, an In  leh a vel an tihfai laiin chhungkaw thenkhat a nachang la hre lo an awm niin a lang. Faina chungchang hi kan ngaipawimawh vak lo nge ni ang aw? Tun thlengin mahni In leh a vel tihfai nachang hre lo/zawm lo kan la awm nual hi mahni In chhung theuhvah inzirtir  kan la mamawh viau ni te pawhin a lang. Clean Mission Vengthlang  Committee hmalakna hi kan veng chhung tan leh keimahni tan theuh a ni tih hriat a, tha taka  thlawp hi kan mawhphurhna theuh a ni tih i hria ang u.

1. VENG TANA MI INPHALTE’N CHAWIMAWI AN PHU: Kan In leh a vel han tih hian kan kawtkai chauh a huam lo tih kan hriat a pawimawh viau mai. Tunhma ang reng khan Mission Vengthlang hi a ngai reng a ni thei tawh lo tih hretute vek kan ni. Veng a lo changkang tawh a, kawmchhak kawmthlangte a lo awm nual  ta bawk nen, inkalpawhna tha zawk mamawhnate avangin veng chhunga mi inphal leh mi thahnemngaite’n an Hmun lo Ram-te  inkalpawhna nan leh veng chhung mipuite tana awlsam zawk nan tiin an  mahni ‘Ram/Huan’ an sat hek nasa hle a ni. Veng chhung tana an inphalna te hi kan hriatreng a pawimawh khawp mai.

2. KA HUAN LEH RAMTE HIAN MITE TAN HARSATNA A THLEN EM?: Kan thenawm khawvengte tan kan Huan leh Ram te hi a hnawksak em? tih leh, kan thingkung ding thuau maite hian  kawmthlang lama awmte tan Chhiatna/Vanduaina a thlen palh  thei ang em tih erawh kan ngaihtuah a kan thlithlai fo thin a pawimawh viau mai. Kawmthlang lama awmte’n an theih ang angin an tuallai/kawt kai leh an ban phak tawk tawk kawngchhak hnimhnah te thian fai mahse ban phak piah lam, ‘Ram neitute’ rawn ngai, vantlang tana hnawksak bawk si leh khawhawi thawven thlak loh zet mai chhak lama buk luai han hmuh chang hi chuan a thawveng lo  thin khawp  mai. Huan Lo Ram neitute bengvarna ah a innghat thui viau in sam fai nachang han hre hlawm ilang chuan kan kawmthlang lama awm te tan a va nuamin a va lawmawm dawn em!! Amaherawh chu kan Ram zim te hi a chereu mek a ni tih hriain kan Thingkung neih ang ang te erawh kan in humhalh sak hram hram a pawimawh awm e.

3. ENGVANGA HRISEL THEI LO VIAU  NGE KAN NIH?: Khawvel a changkan ang zelin kan nitin khawsakna te pawh a hmasawn zawng a ka khawsak a pawimawh. Hausak leh retheih lampang ani lo. Kan khawsakna hmunhma tawp lutuk avangte leh chet tawp luat avangin ‘Damdawi In’ kan lut fo ta ve ang? Kan ngaihtuah ngai lo a ni maithei. Kan Tu leh Fa te leh puitlingte pawh Tuihri/ kawthalo, Rulhut pai, hritlang khawsik leh natna chi hrang hrang avangin chhungkua kan buai phah fo thin a nih hi! Hei hi keimahni fimkhur loh vang leh kan chet duhdah luat vang a ni fo. Tlang hrileng erawh dan rual a nilo, amaherawh che kan natna tlanglawn engemaw chen hi chu kan invent theih a ni.

Midangte tana thil tha kan ti thei lo anih pawhin midangte tana harsatna siamtu leh hrisel lohna thlentu nih loh hram kan tum thei dawn lawm  ni?

ZONUNMAWI I CHHAWM NUNG ZEL ANG U

Kum 22-na, Issue 38, OCTOBER 24, 2009

CENTRAL YOUNG MIZO ASSOCIATION GENERAL CONFERENCE 2009 A TIAK TA

YMA Inkhawmpui Lian tum 64-na, Oct. ni 20-23, 2009 chhunga Dawrlawn khuaa neih chu Oct. ni 23, 2009 zan khan a tiak ta. Kumin YMA Gen. Conference thlengtute hian an thleng zovin, inkhawpui hmanna pandal- Chalfilh Run tia a hming an sak pawh a thain a mawi hle. Kumin inkhawpuiah hian palai inziaklut 4,300 vel leh lang-a kal 800 vel an awm a ni.

Oct. ni 21, 2009 (Nilaini) zing dar 10:00-ah Rorel Inkhawm tan a ni a, rorel palai hi 1,152 an ni. Thu tihtlukte chu:

1. Kum 2009-2010 chhunga Central YMA Budget atan Rs. 59,34,700/- chu lungrual taka pawm a ni.

2. YMA Dan Bu siamthat tura rawtna hrang hrang lutte chu siamthat ngaite siamthain, pawm a ni.

3. YMA KHAWIH
(a) Faina chungchangah chak zawk a hma lak ni rawh se.
(b) Mihring hriselna atana tha lo chi Polythene Bag kan hman tlem zawk nan uar zawka inzirtir nise.
(c) ILP neilo hnamdang dap chhuahna kawngah Central YMA in hmala ve rawh se.
(d) Kan Inhmun / Lo Ramte hnamdang (Non-Tribal) hnenah hralh a nih tawh loh nan hma lak ni rawh se.
(e) Midik leh rinawmte chawikanna tur leh ram leh khawtlangin hma a sawnna turin kuttling lova sum lak that loh zia uar zawk a zirtirna ram pumah neih ni rawh se.

SORKAR KHAWIH
(a) Sikul zirlaiah Mizo Nun Zemawi tam zawka telh ni rawh se.
(b) Mizoram-a Foreigner lo lutte khuahkhir
hna Dan Sorkar-in a neih sa hi khauh takin kalpui rawh se tih chu CEC-in a tul anga lo zir chiangin hma lo la se tih a ni.

4. Kum 2009-2010 kum puan atan Khawtlang Nun Siamthat tih chu lungrual taka pawm a ni.

5. Kum 2010 YMA General Conference thleng turin Sub-Hqrs. YMA, Lunglei thlan a ni
Kumin hi Central YMA OB thlan kum a nih angin Oct. ni 22, 2009 khan hruaitu thar thlanna hi neih a ni a; hruaitu atana chhawp chhuah mi 16 atangin heng mite hi kum 2009-2011 chhunga Central YMA OB atan thlan chhuah an ni:

President: Pu Lal Chungnunga, Ramhlun North
Vice President: Pu C.Zoramliana, Tuikual North
Gen. Secretary: Pu Lalbiakzuala, Khatla
Asst. Secretary: Pu Vanlalruata, Tuikual South
Treasurer: Pu R.Lalngheta, Hlimen
Fin. Secretary: Pu J. Lalsailova, Mission Veng North



VENG CHHUNG THUTHAR TAWI:

• Np. Lalrinhlui d/o Pu Lalhmangaihzuala (Atea), Y Sec. chu damlohna avangin Mumbai lamah an thangpui mek.
• Pi Tlangvuli w/o Pu Sangkima, Y Sec., Civil Hospital-a rilphir zai chu dam takin a lo chhuak.
• Pu Malsawmtluanga, Y Sec. te chuan fapa an nei thar.
• Pu C. Vanlalzawma, Y Sec. te chuan fanu an nei thar.
• Pu Sairengpuia Sailo s/o Pu Rev. Lalhluma Sailo, M Sec., Civil Hospital-a a rilphir zai chu In lamah enkawl mek a ni.
• Upa Hauhmingthanga, M Sec. chu nimin khan Durtlang Hospital-ah a pum zai a ni.
• Pu Laldingngheta, A Sec.-te chuan fapa an nei thar.
• Pu K. Lalbiakfela, A Sec.-te chuan a pakhatna atan fapa an nei thar.
• Nl. Melody Lalhnunhlimi d/o Pu K. Darchawiliana, Y Sec. leh Lalbiaksiama, Thenzawl-te chu Oct. ni 22, 2009 khan an innei.
• Pi Lalthawmi m/o Pu Varthanmawia, Y Sec. chu USA lamah a chhuk thla leh ta.
• Upa R. Lalbuatsaiha, A Sec.-te chuan Oct. 20, 2009 khan an inneih Ruby Jubilee an lawm.
• Lalnunpuii d/o Pu Lalramtiama leh Lallawmzuala s/o Pu Lalthlantluanga, A Sec.-te chu National Talent Search-ah an inziak tling.

FAM ROLUNG MUAL:

Hming : ZARZOLIANA
Kum : 35
Kohhran: Presbyterian
Thihni: Oct. 20, 2009. 9:00 PM
Vui Hun: Oct. 21, 2009. 12:00 PM
Vuitu: Pastor C. Lalsangliana
Section: M Section

Tv. Zarzoliana hi Upa K. Roseia leh Pi Lalngaii-te fa panga zinga a milai niin, kum 1974 Sept. ni 16 khan Aizawl-ah a lo piang a; an unau hi hmeichhia 3 leh mipa 2 an ni.

Zirna lamah kum 1992 khan HSLC a zo a, a bak hi chu mumalin a kal zawm ta lo. Amah hi tlangval tlawmngai, mi pawi sawi ngai lo leh thenrual kawm thiam tak a ni a; Krismas leh Kumthar ruaitheh bakah, mi chhiat thata fatu leh thil tul dang dang thawk mawlh mawlh thin mi a ni.

Kum 2004-a Mission Vengthlang Presbyterian Kohhran-a harhna a lo thlen tum khan harhtharna chang vein, a phak ang tawk tawkin Pathian rawng a bawl chho ve a. Kumin Sept. thla atang khan an thianzaho-in, “Mahni chauh chuan rawngbawlnaah chak a har a, thianzahoin tih tak takin rawngbawl turin i inbuatsaih teh ang u,” tiin Lungleng-a Pu Eric Thansanga ramah Bethel Camp an nei tan a. Heta a awm lai hian, Oct. 14, 2009 zan khan a khawsik a tlun chiam mai a, a tuk lamah pawh a thawh chhuah peih tak loh avangin a rawn haw chho ta a ni. Na bet lutuk lovin Pathianni (Oct. 18, 2009) thleng khan a awm a, mahse tlai lamah a na chu a zual tak thut avangin zan dar 7:00 velah Aizawl Hospital-ah dah chhoh a ni a. Heta tang hian nikhaw hre lovin a awm chho ta a, doctor leh nurse-te’n theihtawp an chhuah chungin natna chi hrang hrang, malaria PF leh PV bakah, mitliam leh internal bleeding-te a lo neih chu tuar zo lovin Oct. 20, 2009 (Thawhlehni) zan khan dar 9:00 khan a chhungte leh a thiante chu a lo kalsan ta a ni.

Tv. Zarzoliana ruang hi tlaivarpui a nih hnuin, a tuk Oct. 21, 2009 chhun dar 12:00 khan Pastor C. Lalsangliana’n In lamah vuiin, Upa K. Lalengzauva’n Mission Vengthlang Thlanmual-ah a thlah liam ta a ni. YMA member a nih avangin Oct ni 22, 2009 (Ningani) zan khan YMA-te’n ralna hun an hmang.



FAM ROLUNG MUAL:

Hming : C.RAMTHARA
Kum : 60
Kohhran: Nunna Lalchhungkua
Thihni: Oct. 22, 2009. 12:20 AM
Vui Hun: Oct. 22, 2009. 01:00 PM
Vuitu: Lal Puithiam Rorelliana
Section: A Section

Pu C. Ramthara hi Pu C. Lalmawia (L) leh Pi Kaptialite fa pali zinga upa ber niin, March ni 12, 1949 khan Hmawngkawn khuaah a lo piang a. Kum 1971 khan Nl. Zawnthangi nen inneiin, fa 3 an nei a ni. Pu C. Ramthara hi a chunga a chanchin kan tarlan Tv. Zarzoliana ni pasal a ni.

Kum 1989 khan Aizawl-ah an rawn pem lut a, a rawn pem tirh atangin kan veng, tuna a awmna A Section-ah hian an inbengbel ta a ni.

Zirna lamah HSLC zovin, kum 1973 khan Health Worker hna a thawk tan a; kum 1977 khan Health Supervisor-ah kaisangin, Saitual PHC-ah a hun tawp thleng hian a thawk a ni.

Pu Ramthara hi thenrual pawl thiam tak a nih avangin a awmna hmun hrang hrangah chanvo pawimawh tak tak a chelh tam hle a. Kan veng-ah pawh YMA Executive member leh A Section Leader-ah kum 4 zet a lo tang tawh a ni. A awmna Kohhran (Nunna Lalchhungkua)-ah pawh Fin. Secrectary te hial lo chelh tawh bawk.

Kum 2008 May thla khan pumpui cancer avangin Greenwood Hospital-ah zai a ni a. Hemi hnuah pawh a natna avang hian dawmdawiin hrang hrang, Nazareth Hospital leh Grace Nursing Home-ah te enkawl zui a ni a. Mahse a natna hian that lam a pan hleih theih loh avangin doctor-te thurawn angin In lamah enkawl zui a ni a; a nupui fanau leh a unau-te’n duat taka an enkawl chungin Oct. 22 , 2009 (Ningani) zing dar 12:20 khan Chatuan Ram min lo pan san ta a ni.

Pu Ramthara ruang hi Oct. 22, 2009 chhun dar 1:00 khan Nunna Lalchhungkua Kohhran Lal Puithiam Rorelliana’n In lamah vuiin, Lal Puithiam Chawngpianga’n Thlanmual-ah a thlahliam ta a ni.

Pu C. Ramthara hi YMA member a nih avangin Oct. ni 24, 2009 (Inrinni) zan dar 7:00-ah YMA-te’n ralna hun hman tur a ni a, member-te’n i ngaipawimawh ang u.



KAN VENG LEH YMA GENERAL CONFERENCE 2009

YMA General Confrence, Oct. 20-23, 2009 -a Darlawn-a hman zawh takah kan veng atangin palai 21 kan kal a; palai kal nan hian motor tê 5 hman a ni. Kan Branch palai-te hi Counter No. 7, pandal awmna veng (Darlawn Venghlun)-ah thlen tir kan ni. Kan Branch atanga item nei tura ruat, Male Voice (Tv. Lalmuanawma, Pu C. Lalfakawma, Tv. Lalremruatdika leh Tv. Stephen-a)-te palai lawm inkhawm-ah thiam takin an zai a. Nl. Maggie Malsawmzuali leh Tv. TBC Zaithanpuia-te’n thiam taka zaiin mipui an awi thin bawk.

General Conference-ah hian hruaitu hlui chawimawina (OB mipa tan: A zawna kum 10, a zawn lova kum 15; OB hmeichhe tan: A zawna kum 5, a zawn lova kum 7) mi 82 hnenah hlan a ni a. YMA member boral (2009) 660 sunna hun hman a ni bawk.

Conference-a Branch chanchinbu tha puanna leh lawmman semnaah Zonunmawi chanchinbu pawh Top 10-ah a lang ve e.

Kum 22-na, Issue 37, OCTOBER 17, 2009

YMA MISSION VENGTHLANG BRANCH EMERGENCY MEETING VAWI 2-NA THU

October ni 15, 2009 (Ningani) zing dar 6:30 khan YMA Mission Vengthlang Branch chuan Emergency Committee Meeting vawi 2-na YMA Hall-ah a nei. He meeting-ah hian Committee member 26 kalin 15 an kal lova, kal lo mi 12-in an kal theihloh chhan sawiin an pha. Meeting hi Pu Kaisangzuala, President-in kaihruaiin Pu Gilbert Lalzarliana, Asst. Secretary chuan Pathian hnena tawngtaina a nei a, thurel tan a ni. Thurel tlangpuite :

1. YMA General Conference kal dan tur chungchang sawiho a ni a, Section hrang hrang atanga Conference kal tur hming pe a la luhkim loh avangin Office Bearer te’n lo ngaihtuahin kalna tur motor pawh a tul angin ruahmanna lo siam se, tih a ni. Tin, rorel leh inthlannaa palai tur ruat tawh pawh harsatna avanga theilo tur an awm chuan OB te’n lo siam rem se, tih a ni bawk.

2. RTI hmanga FDA-in kan veng chhunga kum 2006-2007 chhunga an hnathawh chhannaah YMA leh Basketball Court chungchang lo lang chu sawiho a ni a. FDA atang hian Basketball Court siam nan April ni 16, 2007 khan Rs 1,00,000/- (nuai khat) dawn a ni a, May ni 3, 2007 zana Branch Committee-ah report-in minute-ah ziahluh a ni. Hei hi Basketball Court siam nan hman a ni. Kan veng chhunga vai awm-te hnatlang neihpuiin tlaivarin a chhuat plastering a ni a, vanduaithlak takin a tukzingah ruahpui vanawnin a nan chhe leh ta hlauh a, a pawi tak zet a ni.

Basketball Court hi YMA Day 2008-ah hawn hman ngei tum a nih vangin sum awm ang angte pawtkhawm leh puk chawpin hma lak chhunzawm leh a ni a, YMA Day-ah hian hawn hmana peihfel a ni. June ni 13, 2008 khan FDA atangin Rs 1,00,000/- (nuai khat) dawn leh a ni a, hei hi July ni 3, 2008 zana Branch Committee-ah report-in minute-ah ziahluh a ni a, Committee rorel leh remtihna angin Basketball Court siamna atana sum bat rulh nan hman nghal a ni.

YMA Hall hi June 2009 atangin FDA hian chei that hna a thawk a, Hall chei nan hian YMA kut-ah sum pakhatmah a lut lo. Committee-in hma lo la se tia mawhphurhna a pek ten an duh dan an sawi angin FDA hian a thawk a, sum hman chungchangah YMA chu a inrawlh lova, a hriatpui lo a ni. Hall chei that a nih dan chu Aug. ni 29, 2009 Issue-ah tarlan a ni tawh e.

3. Duty chungchang: Tunlaiin veng chhungah zu leh ruihtheih dangte a lo hluar leh ta in, khawlai dungah rui hmuh tur an lo tam leh ta chu YMA chuan pawi a ti tak zet a, VC-in mawhphurhna a pek angin YMA chuan chak zawka hmalak leh ni se a ti a, Section te’n mahni Section huam chhungah ngawrh zawkin hma lo la chhunzawm se, tih a ni.


VENG CHHUNG THUTHAR TAWI:

• Nl. Lalremkimi c/o Pu L. Thangmawia, Y Sec., Aizawl Hospital-a enkawl mek a ni.
• Pu C. Vanlalzama, Y Sec.-te fapa neih thar chu a hriselna a that vak loh avangin Aizawl Hospital-ah enkawl mek a ni.
• Pu Tlangliana, Y Sec., Kilikawn Hospital atangin a lo chhuak.
• Tv. C. Vanlalhruaia s/o Upa C. Pachhunga (L) chu Aizawl Hospital atanga lo chhuak In lamah enkawl zui mek a ni.
• Pu Lalthantluanga, A Sec. Comm. member nu Pi Solfathangi (K. 70) chu Kawrtethawveng-ah a boral a, Pu Lalthantluanga hi a thang mek.
• Pi Hmingliani (HL Bakery), A Sec. chuan a kum 80 tlianna champhaphak Oct. ni 16, 2009 khan (Zirtawpni) thenrual thate nen Pathian hnena lawmthu sawiin a lawm a, zanriah an kilho.
• Tv. C. Lalrintluanga s/o C. Thuamliana, M Sec. chuan Oct. ni 8-10, 2009 chhunga 1st East Zone Taekwondo Championship, Guwahati-a neihah Bronze Medal a la.
• Heng kan veng mite hian 5th IR Battalion traning zo-in an lo chhuak:

1. C. Lalruatfela s/o C. Hmingthanga, A Section
2. Lalchungnunga s/o R. Dara, A Section
3. Laltlanthanga s/o Zonghinglina, M Section
4. David Lalmuankima s/o Rodingluaia, M Section
5. Laltharmawia s/o R. Lalhmingmawia, M Section
6. C. Vanlalhlimpuia s/o C. Vanlalzika (L), Y Section
7. Lallawmsanga s/o Lalramliana, Y Section
8. Zirsangliana s/o K. Vanlalngheta, Y Section
9. B. Lalremsiama s/o B.Thangrikhuma, Y Section

Kum 22-na, Issue 36, OCTOBER 10, 2009

MISSION VENGTHLANG PRESBYTERIAN KOHHRAN-IN AIZAWL CHHIM PRESBYTERY KHAWMPUI A THLENG

Aizawl Chhim Presbytery huamchhungah hian Pastor Bial 8; Mission Veng, Bungkawn, Kulikawn, Khatla, Hlimen, Mission Vengthlang, Lungleng-I leh Maubawk te awmin heng Bial hrang hrang chhunga Kohhran awm zawng zawng chu 30 a ni. “Khenbeh Nun” (Galatia 2:20) chu Inkhawmpui Thlarau lam thupui tur a ni.

Tun tum Presbytery Inkhawmpui-ah hian Palai nisa 320 leh Palai thlan 158, an vaiin 478 te’n ro an rel dawn a; Agenda pakua (9) awmin agenda 5-na General-ah hian Bial hrang hrang atangin ngaihtuah tur 23 lai a awm bawk. October ni 8, 2009 (Ningani) khan Nomination Committee, Finance Committee leh Sub-Pastoral Committee an thukhawm tawh a. Nimin, Oct. ni 9 (Zirtawpni) khan rorel tanin vawiin ni 10 (Inrinni) hian chhunzawm a ni ang.


VENG CHHUNG THUTHAR TAWI:

• Pu Vanlalrova, Y Sec. te chuan a pakhatna atan fanu duhawm tak an nei thar.
• Pu Lalnunfela, Y Sec., Dutlang Hospital-ah Zirtawpni khan a rilphir zai a ni.
• Dr. L. Siamliana, M Sec. chu Durtlang Hospital-ah enkawl leh a ni.
• Nt. Benjamin Vanlalvohbika s/o Pu Lalsangliana, M Sec., hritlang âwmna, Durtlang Hospital-ah enkawl a ni.
• Pu Rohmingliana, A Sec. Committee member, Clean MVT hnatlang-a a ke ti hliam chu In lamah enkawl mek a ni.
• Tv. Michael Rosangzuala s/o Pi Zoremliani, A Sec. leh Nl. Lalrempuii, Khatla North te chu Mission Vengthlang Presby. Kohhran Hall-ah Oct. 16, 2009 (Zirtawpni) hian an innei dawn.
• Pi Zomuanpuii te chhung chu Pi Hrangchhuani, Y Sec. In atangin Pu Lalthantluanga, A Sec. In-ah an insawn.
• Pu Lalthantluanga, A Sec. Committee member te chuan A Sec.-ah an In thar an luahlut ta.
• Zonunmawi buatsaihtute Branch President-in a rawn tawiawm a, thlamuanthlak an ti hle.

ARTICLE: ZONUNMAWI VAWN NUN
Thuamtea Khawhring, Lunglei

1.Zonunmawi chu engnge ni?:
Zonunmawi hi engnge ni le?Hriatsaa ngaih si, sawifiah har tak a ni. Mizote tan chuan “Zonunmawi” han tih hian rilru lamah chuan a chiang nghal mai a, kaa sawi chhuak tur erawh chuan, tawi te leh felfai taka sawi a har khawp mai. Mihring nun mawi leh tha, dik leh fel, thianghlim leh tlawmngai hi zonunmawi kan tih chuan a kawk ber mai a tih theih awm e. Zonunmawi hian thil te tak te atanga lianpui thlengin a huam a, nun dan tha leh mawi, aia upa zahna te, tlawmngaihna te, nachang leh hmangchang hriatna te, mahni hmasial loh te, duham loh te, mahni aia midang ngaih pawimawh zawkna te, awmdan mawi (manners & etiquette) hriatna te, tawngkam mawi leh hawihhawmna te, rinawmna, dikna leh taihmakna te hi a huam vek mai. Thuhnuai- rawlhna leh inngaihtlawmna te hi zonunmawi ze ken mawi tak a ni a, dik lo deuha thil tih leh kut tlinglova sum lakluh te hi zonunmawi huang chhungah chuan a leng ve lo. Thatna leh tlawmngaihna chu zonunmawi hming chawiin a par vul thin a, midangte tana malsawmna a ni thin.

2.Engvanginnge beihpui thlak a tul?:
Hetianga Zonunmawi beihpui hial thlak a han ngai ta mai hian, kan zonunmawi hi a lo tla hniam hle tawh tih a ti lang chiang hle mai. Mizofate’n kan chhuan em em thin leh tawngka lama kan hman thin “zonunmawi” kulhpui chu sawi nghinin a awm mek a, a nghingah chuan a zar thenkhat chu a tliak hial tawh a ni maithei. Kan ram tinuamtu, kan hnam min chawisangtu, nun dan mawi leh tha Zofate’n kan neih thin, duh tak leh duat taka “zonunmawi” tia kan koh thin kha, natna chi hrang hrang tuarin a rum mek a, chhan a ngai a, siam that a ngai a, thar thawh a ngai a, vawng nung zel turin tan kan lak a ngai ta a nih hi! Midang tih atana dah hman kan ni tawh lova, mahni theihna zawn theuhah, mahni theih dan ang angin, mahni thiam dan ang anga tan kan lak thar a tul a, te lua leh lian lua awm lovin, kan ramah hian khawtlang nun nuam tak kan neih leh theih nan puan ven kan sawi chhin a hun ta a ni.

3. Engnge kan tum?
Kan tum ber chu Zonunmawi tla hniam tan mek chawi kan leha tuai thar leha vawn nun zel hi a ni. Engnge kan tum thlir kual pahin zonunmawi kaihthawh a tulna leh a tichhetu kawng hrang hrangte kan thlir kual den den dawn a ni.

3.1. Hnathawhnaah:
Tunlaiah chuan hna chi hrang hrang kan thawk ta. Hmanlai angin kawn khata liam fai vek zel a rem ta lo. Thenkhat chu dawrkaite kan ni a, thenkhat chu sawrkar office-a thawkte kan ni a, office-a nitin kai ve tho, sawrkar hnuaia thawk ni chiah lote pawh kan awm bawk. Sikul lama zirtirtu hna thawk te, lo neia eizawng te, huan thlai leh sangha dil siam te, motor khalh leh chanchinbu lam enkawltute pawh kan ni ta fur mai. Heta ‘hnathawh’ kan han tih hian, eizawnna hnathawh ni chiah lo, zirlai anga sikul kai thinte pawh a huam a, nitin hna leh tih tur nei ang chite kha chu a huamah ngai ila a sual lovang. Hetianga nitina hna kan thawhna kawngah hian zonunmawi hi kan lo rap hrual mai mai thin em? Mahni hna theuhah kan dawngdah em? Kan thawk tha em? Min dawrtute tan dawr nuamin kan awm em? Dik lo deuh hlekin thil kan ti thin em? Zonunmawi hian mahni hna tha tak leh thahnemngai taka thawh a keng tel tih hria ila, zonunmawi ti vul leh tur chuan mahni hna theuh dik tak leh rinawm taka kan thawh a tul tihah hian i chiang thar leh ang u.

3.2. Chhungkuaah leh Kohhranah: Tunlaiah zawng, chhungkaw tam takah hian nu leh pate’n an fate hnenah awmdan mawi leh tih dan tha te, nunphung dik leh zahawm te an hrilh hman ta lo. Fate aia ngaihpawimawh an ngah ta a, an fate chu an awmpuite kutah emaw hostel-ah emaw dahin, anni chuan sum ringawt an buaipui ta thin. Zilh loh leh hrilh loh fa chuan zonunmawi a hre lo. A va rapthlak em! Zonunmawi leh Pathian thu hi a inkalh hauh lova ni tih hre lo hian kohhran huangchhungah pawh social gospel hi kan hlamchhiah lutuk thin. Khawtlang a lo nawm zawk theih nan hian kohhran pawh hian mawhphurhna a nei ve a ni lo’mni? Vantlang hna (social service) thawhna lam kawnga kohhranin a mit a chhing fo thin hi zonunmawi ti daltu pakhat a ni thei a, ke kan pen chhuah ve a hun tawh a ni. Nun dan mawi leh tha vawng nung turin chhungkaw tinin kan tu leh kan fate kan zilh tam a pawimawh em em bawk.

Kum 22-na, Issue 35, OCTOBER 03, 2009

YMA MISSION VENGTHLANG BRANCH EXECUTIVE COMMITTEE VAWI 10-NA THU

September ni 1,2009 (Ningani) zan khan YMA Hall-ah YMA Mission Vengthlang Branch Executive Committee Meeting vawi 10-na neih a ni. Pu Kaisangzuala, President-in meeting hi kaihruaiin Pu H.Lalbiaktluanga’n Pathian hnena tawngtaina a nei. Member 29 kalin, member 13 an kal lova, member kallo te mi 9-in an kal theihloh chhan sawiin an pha a ni. Thurel tlangpui te:

1. REPORT :
(a) Branch: Branch Secretary hnen atangin meeting hmasa a thurelte tha taka bawhzui a nih thu ngaihthlak a ni.
(b) Section: Section tinin mahni Section huam chhungah Duty ngawrh takin an nei reng. Meeting hmasa leh tun meeting inkarah Y Sec. ten damlo 9 an kan a, chhungkaw 1 tanpuina an pe bawk. M sec. ten damlo 1 an kan.
(c) Information & Publicity: Vantlang mike siam that hnatlang an nei a, tun dinhmunah vantlang mike te hmantlaka siam that vek a ni. Vantlang mike enkawlna hi remchang hmasa bera vantlanga khawn turin VC remtihna lak tawh a ni.
(d) Property: YMA Property-te hawhchhuah leh dahkir chungchangah harsatna awm deuh thin report chu, YMA Property-te Chhiatni Thatni-a kan hmanin a hma thei ang leh uluk taka dahkir (return) thuai thin nise, a dahna hmun tur takah dahin, Section hruaitute’n enpui thin nise tih a ni.

2. YMA Gen. Conf. Darlawna neih turah member atam thei ang ber kal tum nise, member-te tan kal man chawi ngai lovin Bus hire nise tih a ni a, Rorel leh inthlanna a Palai tur inruat nghal a ni.

3. Veng chhung Duty chungchang sawi a ni a, V.C. leh khawtlangin ruihtheih thil leh sualna hrang hrang laka vengchhung then thianghlimna YMA kuta a dah angin chak taka hmalak zel nise, tih a ni.

4. Kumin-a YMA thupui, Khawtlang Nun Siamthat chungchangah uar zawka inzirtir nise, YMA Chhangah pawh theihtawpa hmalak ni se la, YMA hruaitute pawhin tanlak tar lehzual nise, tih a ni.

5. Miharsate pual bawm hunah Rs 350/- thawhkhawm a ni.



VENG CHHUNG THUTHAR TAWI:

• Rev. Dr. Lalsawma, Y Sec., Aizawl Hospital-a enkawl a nih hnuin a lo chhuak.
• Pu Danny Vanlalhruaia, A Sec., pum lam that loh avanga Aizawl Hospital-a enkawl a nih hnuin a lo chhuak.
• Pi Lianmawipuii w/o Pu Chawngsailova, Y Sec., chhul tha lo avangin Civil Hospital-ah zai a ni.
• Pu Lalhmangaihzuala s/o Pu R. Zasiama (L), Y Sec., khawsik, In lamah enkawl mek a ni.
• Np. Lalruatpuii d/o Pu Laldawngliana, Y Sec., khawsik leh luak, Aizawl Hospital-ah enkawl mek a ni.
• Pu C. Vanlalzama, Y Sec. Comm. member-te chuan a hmasa ber atan fapa duhawm tak an nei thar.
• Tv. C.Lalremruata (Nanoa) s/o Pu C. Lalramthanga, Y Sec., inkhelhnaah a banrek a titliak a, In lamah enkawl mek a ni.
• Pu Zaliama, A Sec., pum tha lo avangin Durtlang Hospital-ah enkawl mek a ni.
• Tv. Lalrampana c/o Pu Lalsangliana, A Sec., mitliam avangin In lamah enkawl mek a ni.
• Pu C.Ramthara, A Sec., pum tha lo avanga In lama enkawl mek chu a tha chak vak lo.
• Mission Vengthlang Presbyterian Kohhran chuan Oct. 8-11, 2009 chhung hian Aizawl Chhim Presbytery inkhawmpui a thleng dawn.
• INSAWN: (1) Pu Lalramtana te chhung chu Pu P.C. Rokhuma, A Sec. In atangin Pi Lalengzauvi, Y Sec. In-ah (2) Pu Lalengzauva te chhung chu Pu R. Lalduhawma In, A Sec. atangin Pu Lalchungnunga In, A Sec-ah.
• LO PEM LUT: (1) Pu Vincy Lalthanpuia te nupa, Zarkawt atangin Dr. Eric Zomawia, M Sec. In-ah (2) Pu Lalhlimpuia te chhung, Darlawng atangin Pu Vanlalthuama, Y Sec. In-ah (3) Tv. Henry Lalbiakchama leh Tv. C. Lalmuankima te, Lungphun atangin Pu C. Lalrintluanga, A Sec. In-ah.

Kum 22-na, Issue 34, SEPTEMBER 26, 2009

CENTRAL YMA BUATSAIH LEGAL AWARENESS SEMINAR NEIH A NI

September ni 24, 2009 (Ningani) chawhnu dar 1:00 khan Central YMA Hall, Tuikhuahtlang-ah Central YMA buatsaihin Legal Awarness Seminar neih a ni. He Seminar-a tel tur hian khawpui chhung Branch aiawh mi pahnih tal kal tura ngen leh hriattir an nih angin an kal tha thawkhat hle. Kan Branch atangin Pu C. Chuaukunga, CEC, Pu Israela, Vice President leh Pu C. Lalnunsanga, Branch Executive Committee member te an kal.

He Seminar hi Central YMA hnuaia committee peng pakhat Legal Committee ten an buaipui a. Pu R. Thanga, Chairman, Legal Committee-in Seminar hi kaihruaiin Pu V.L. Chhuanawma, Secretary, Legal Committee chuan hunserh a hmang. Pu J.H. Zoremthanga, President chuan thuhma a sawi a, Branch hrang hrang atanga member lo kalte chungah lawmthu sawiin chibai a buk a, “Legal Committee-te hmalaknaa Central YMA-in Legal Awarness Seminar a buatsaih thei chu a lawmawm a, YMA-te’n ram leh khawtlang tana hna kan thawh leh hmalakna hrang hrangah Dân kan hriat leh kan ngaihpawimawh thiam a pawimawh takzet a ni,” a ti.

Pu Lalsawma Pachuau, Nodal Officer (PFA), Directorate of Health Services chuan Food Safety Awarness chungchang hun reilote chhung a sawi a, “Ei leh In chungchangah fimkhur a pawimawh a, ei leh in-a kan fimkhur leh fimkhur loh hian kan hriselnaah thui tak nghawng a nei a; ei leh in thain chakna leh hriselna min thlen laiin, ei leh in tha lo chuan natna hrang hrang min thlen thin. Ei leh in tur kan thlan dawnin a tuina leh itawmna lam aiin hriselna atan kan taksa-in a mamawh leh, thianghlim taka siam a ni em tih i ngaihtuah thin ang u,” a ti.

Legal Awarness Seminar paper buatsaih tura sawm (Resource person) Pu L.H. Lianhrima, Advocate chuan Seminar subject, Tribal-te Dân-in a humhalh chungchang chu thiam takin a sawi a, “Mizo-te hi tribal kan ni a, tribal-te chanvo leh nihna Dân-in a sawite kan hriat chian a pawimawh. Dân-in a phut ang leh Dân hnuaia kan chanvo dik tak kan humhalh a, kan chan theihna turin theihtawp chhuah a tul a ni,” a ti a. “Hnam dang (non tribal)-te’n min chim ral lohna tura Dân-in min hung bikna hi zir chiangin i humhalh zel ang u,” a ti bawk. Tribal kan nih anga kan chanvo leh Dân-in min humhalhna hrang hrang inzirtirna paper a buatsaih chu zir ho a niin, sawi hona hun tha tak neih a ni.


VENG CHHUNG THUTHAR TAWI:

• Pu Vanlalruata s/o Pu F. Lalsanga, Y Sec., kal (kidney) tha lo vangin Civil Hospital-ah enkawl mek a ni.
• Pu V.L. Faka Hnamte, Y Sec. (Br. Comm. member) chu hritlang vangin In lamah enkawl mek a ni.
• Pu Zodingliana, Y Sec.-te chuan fanu an nei thar.
• Pi Lalremsangi w/o Pu Mawitea, Y Sec.-te chuan a pakhatna atan fapa an nei.
• Pu H. Lalbiaktluanga, A Sec., Mumbai-a in check-up a kal chu dam takin a lo haw leh ta.
• Joseph Lalremruata s/o Pu C.Liankunga, Y Sec. leh Zodingliani, Kulikawn-te chu Sept. ni 25, 2009 (Zirtawpni) khan Mission Vengthlang Presbyterian Kohhran Hall-ah an innei.
• Pu C. Vanlalrema, Y Sec. (Br. Comm. member) chu a thawhna Transport Deptt.-ah Asst. Director atangin Dy. Director-ah a kaisang.
• David Lalthlamuana s/o Pu H. Kaphnuna (L) chuan RICIT, RIPAN atangin 1st Division-ah a pass.
• Kan khawtlang hruaitu VC-te’n veng chhung kawng dungah êng tha zawk kan neih theih nan hma an la mek.
• Kan Branch OB pathum, Vice President leh Secretary-te pahnihin Zonunmawi min rawn ho a, thlamuanthlak kan ti hle.

ARTICLE: THLAN LAIH ENGTINNGE NI ZEL DAWN?
Lalthawmmawia, A Section

Mizote Kristian kan nih hma leh nih hnu pawha chhiatni-thihna kan tawh nikhuaa kan mawhphurhna vawiinni thlenga kan la kalsan theih loh chu Thlan Laih hi a ni awm e. Khawvel changkang zelin mitthi ruang sawngbawl dan thar a rawn herchhuahpui te a nih ngawt loh chuan mitthite hi kan inphumin, Thlan pawh kan la lai zel dawn niin a lang. Kan tih tur Loh theih loh a la ni reng chung hian khawvel changkannain a hrin, kan khawsak dan lo danglam zelah hian hman lo, tum lo, a nachang hre lo erawh kan tam tain, a nihna takah chuan kan veng bik hi chu Tlangval tlawmngai zual 20/30-te avang chauhvin mitthi an awmin phumna tur Thlan kan nei thei chauh a ni. Hei hi Aizawl veng hrang hrangah pawh an harsatna neih lian tak a niin, kan veng hi chu a titha pawl tak kan ni zawk maithei e. Kan veng-ah hian Thlan lai rual thalai za tam kan awm chungin tlawmngaia thlan lai thinte hi kan va tlem em! Kan kal that tumin 50/60 vel kan tling thei a, kan mualpho tak tak hma hian tihdan thar ngaihtuah a ngai hle mai. Tunah ngaihtuah lo mah ila nakin lawkah kan ngaihtuah a la ngai tho tho dawn.

Kan veng-ah hian Thlan lai thinte hi Tute nge? Veng chhunga mi awmthei fa, officer leh eizawnna kawngah pawh mi khawsa thei fate an ni em? Dik taka sawi chuan tlawmngaia thlan lai thinte hi (eng emaw zawngin kan sawina ni lo se) veng chhhunga mi harsa leh khawsa-thei lo zawk; a tlangpuiin nitin-a inhlawhfaa ei zawngte an ni. Heng mite hian Mitthi an awmin an nitin ei zawnna hna kalsanin, tlawmngaih chhuah tak meuhin Thlan an lai thin a ni, an va zahawm em! Heng tlawmngai thinte hi awm lo se engtinge ni zel ang?

Kan tlawmngaihna hi sumah chan tirin, Thlan hi sum thawh khawmin i lai tawh mai ang u! Chhiatni Fund kan khawn thinah hian Thlan laihna tur khawn tel tawh ila. Chutianga kan tih chuan thlan lai duh ve em em, Sorkar hnathawk officer leh officer lo, mimal hna pawimawh avanga thlan lai ve fo thei lote pawhin chu Fund chu phur taka pein, mimal hna pawimawh leh office/hna thawk chungin lungmuang takin an sumin thlan an lai thei tawh ang. Bituk neia kan inkhawn a nih pawhin tuk bâk thleng thleng pawha pe duh tur hi tam tak kan awmin a rinawm a ni. Tlangval tlawmngai, eizawnna kalsana thlan lai thinte pawhin tha leh hlawh chan lovin tlawmngaihna hna an thawk thei tawh ang. Tichuan, tlawmngai (thlan lai) tura inphutna leh tlawmngai lo (thlan laih loh vang)-a kan inngaihna leh kan indem thinna zawng zawng hi a lo bo tawh ang.

Hei bakah hian Thlan hung/remna-ah hian sang hnih/thum vel sen a ngai thin a; chhiat tawk thenkhat ralna dawng tlem deuhte chu an râlna dawnin a daih lo mai thei. He thlan hung/remna senso pawh hi Chhiatni Fund khawnah hian tel se; mitthi chhungte thlan nghah tuka an buaipui leh ngai lovin Thlan laitute bawk khan buaipuiin hma tel se, invui hun pangngaia kan invui chuan ruangthlak niin a tih fel nghal theihin a lang. Chu chu Thlanmual cheibawlna leh Thlan inrem dan line mumal leh mawi zawka siam a nih theih nan pawh a remchang bawk ang.

Thlan lai tur chuan hlawhfa eng zatnge rawih tur ni ang? tih chu ngaihtuahtu fel tak ten an ngaihtuah thiam ang. Motora mitthi vui pawh sawiselna nasa tak karah vawiin thlengin kan kalpui theih hi maw!

‘Hlawhfa ruaiin Thlan i lai ang u’ tia han rawt chu Mizo culture leh tlawmngaihna tihchhiatna hialah kan ngai mai thei. Thlan laih chungchangah kher kher hi chuan Tlawmngai kan tlem tawh em a ni, a tlawmngai fal deuhte avangin kan veng hi kan mualpho lo a ni chauh a, a tlawmngaite chu an tlawmngai a, tlawmngai lo kan tam si hi kan mualpho tak tak hma hian a tihdan i thlak ang tihna mai a ni. Thil uiawmah ngaiin, kan phal lo a ni mai thei. Phal lo tur kan ni em? Kum khat chhung ni mai lo, kum nga chhung pawha vawi khat mah thlan laihna a kal ngai lo (a kal rual nisi) te hi chu a phal lotuah i tang lovang u. Tlawmngaia thlan lai thinte’n thlan laih an ning a ni lo. Mahse veng pumpuia thalai rual awm zawng zawngte mawhphurhna ni si, a tlawmngai fal tlemte an hah rengna hi her rem deuh a ngai a ni. Thil tha tihnaah chuan hmahruaitu nih i hreh lovang u; a tha zawk a nih dawn phawt chuan kan tih thin/kalphung pawh nise thlah ngam veng huaisen nih i hreh lo thung ang u.

Kum 22-na, Issue 33, SEPTEMBER 19, 2009

MISSION VENGTHLANG DAWRKAWN-A COMMUNITY SANITARY COMPLEX HAWN A NI

Nimin, September ni 18, 2009 (Zirtawpni) zing dar 7:00 khan MissionVengthlang Dawrkawn-a Community Sanitary Complex (Vantlang Zun In leh Ek In), PHE Deptt. sak chu VC kaihhruainain Er. C. Lallunghnema,SE, PHE Deptt. chuan a hawng ta. Er. C. Lallunghnema hi department lam atangin Er. C. Lalhmahruaia EE leh Pu Sapliankhuma JE-te’n an rawn tawiawm bawk.

Hawnna inkawm hi Pu B. Lalhriattira VCP-in kaihruaiin, veng hmasawnna tur, vantlang mamawh Community Sanitary Complex (Vantlang Zun In leh Ek In) kan nei thei chu lawmthu a sawi a. Hetiang kan neih theihna tura hma min lak saktu Er. C. Lallunghnema leh PHE Deptt.-te chungah khawtlang aiawhin lawmthu a sawi bawk. Community Sanitary Complex hi kan veng Basketball Court-ah kan lo nei tawh bawk a ni. Hawnna Inkhawm-a tel tur hian veng chhung NGO hrang hrang hruaitute sawm an ni.

He Community Sanitary Complex hawngtu Er. C. Lallunghnema chuan thu sawiin, khawtlang mipui mamawh, thianghlim leh faina kawnga hmalakna pakhat, vantlang zunin leh ekin sak zawh a lo ni leh ta chu lawmthu a sawi a, a hman tangkai leh enkawl thianghlim chu veng chhung mipuite kutah a innghat a; hetiang veng tana thil hlu tak sak nana a hmangtu tam theihna hmun tha lai tak veng hruaitute’n an pek avangin lawmthu a sawi bawk.

He Community Sanitary Complex hi department chuan khawtlang neitu VC-te hnenah a hlan nghal a; a enkawl zui leh tul dangah pawh VC-te thuneihna a ni tawh dawn a ni. Hawnna Inkhawm neih zawh hian THP Hall-ah thingpui inho a ni a. Er. C.Lalhmahruaia, EE, PHE Deptt. chuan, Community Sanitary Complex an sak tawh zawng zawngte aia tha leh entawntlak a nih thu sawiin, an la sak leh zel turah entawn atana hmang tura an kawhhmuh zel dawn thu a sawi bawk.

He Community Sanitary Complex sak hna hi department hmalaknain Pu H. Lalbiaktluanga, kan Branch Treasurer thin chuan a thawk a. A hna a uluk-in, veng tana thil tha duh mi a nih avangin estimate-ah pawh tel lo engemaw zatin a thuam mawi nghe nghe a. Veng chhung mite mai ni lo, deptt. lam hotute pawhin an fak mawlh mawlh a ni.

He Vantlang Zunin leh Ekin hman dan leh enkawl dan tur chungchang chu Deptt.-in VC-te hnena a hlan angin VC-te’n an rawn ngaihtuah dawn a ni.


VENG CHHUNG THUTHAR TAWI:

• Tv. Michael Laldinsanga, Y Sec. Committee member chu bike accident avangin Durtlang Hospital-ah enkawl mek a ni.
• Nl. Lalnunpuii d/o Pi Lalfeli, Y Sec., a dar-a bâwk awm chu In lamah enkawl mek a ni.
• Nl. Rebec Lalremruati d/o Pu Tlangliana, Y Sec., Kulikawn Hospital-ah enkawl mek a ni.
• Pu Vanlalthanga Ralte, Y Sec., Greenwood Hospital-ah zun kawng tha lo zai a ni.
• Nl. Malsawmdawngzeli d/o Pu Lalruatkima Parte, Y Sec., khawsik vanga Kulikawn Hospital-a enkawl chu a lo chhuak ta.
• Np. Zothantluangi, Pu C.Thanliana tunu, M Sec., Care Hospital-a a sinus zai chu a lo chhuak.
• Pu C.Lalthangliana, A Sec. chu thisen sang avangin Durtlang Hospital-ah enkawl mek a ni.
• Pu H.Lalbiaktluanga, A Sec. chuan vawiin hian in check-up turin Mumbai a pan.
• Pu Lalchhanchhuaha Fanai, A Sec. te chuan Durtlang Hospital-ah fanu an nei thar.
• Tv. Lalengkima s/o Pu P.L. Siamliana, A Sec. leh Nl. Rebec Lalrawngbawli, Tuikual Veng-te chu Sept. 25, 2009 (Zirtawpni) hian Jubili Presby. Kohhran Hall-ah an innei dawn.

FAM ROLUNG MUAL:

Hming : LALLAWMSANGI
Kum : 2 ½
Kohhran: Presbyterian
Thihni: Sept. 12, 2009. 4:10 AM
Vui Hun: Sept. 12, 2009. 1:00 PM
Vuitu: Rev. R. Lianbuanga
Section: M Section

Np. Lallawmsangi hi Rev. Lalzawmliana leh Pi Darhmingliani-te fa pahnihna atan ni 10.3.2007 khan a lo piang a. Nau piang tha pangngai tak niin, a hriselna chungchangah pawh ngaihthat lohna tur a awm lem lo va. Amaherawhchu, thla 4/5 vel a nih atangin ‘Kaih’ a ching a, hei vang hian damdawi In-ahte pawh luhpui a ngai hial thin. A kaih thin hi that tak tak a awm thei lo va, a khat tawkin a chhuak fo thin a ni.

Amah hi naupang fel leh lawmawm tak a ni a; naupang e ti lovin music hi a ngaina em em a, rimawi a hriat tawh chuan a lam thuai thuai thin a ni. Tin, tawngtai ngaina tak a ni a, chhung inkhawma Lalpa tawngtaina sawi laite hian a lo thingthi vat thin a ni.

Aug. 30, 2009 (Pathianni) khan a khua a sik a, a khuh deuh khek khek a. Mahse ngaihthat lohna tur leh han buaipui ngai a ni chuang lo va. A tukah pawh hian a ziawm viauin a lang a, khawlaite pawh a la leng a la leng peih a. Amaherawhchu, hemi zan atang hian a khuh hi a lo zual ta a, a âwmna lutuk avangin mut pawh a mu thei ta lo a ni.

Hetia a âwmna-in zual lam a pan tak avang hian ni 1. 9.2009 khan Durtlang Damdawi In panpui a ni a. Damdawi In hnathawktute’n theihtawp chhuahin an lo enkawl a, a tha chho zel dawna a lan laiin thawhah a rawn nei chho ta a, oxygen-te pek a ni a. Mahse tha chhuak zo ta lovin ni 12.9.2009 zing dar 4:10 khan Lalpa hnenah min lo kalsan ta a ni.

Np. Lallawmsangi hi 19.9.2009 chawhnu dar 1:00-ah Rev. R. Lianbuanga’n In lamah vuiin, Upa H.Lalhmangaihzuala’n Thlanmual-ah a thlah liam ta a ni.



INTERNET-A ZONUNMAWI CHHIARTUTE HNENA NGENNA:

Pathian zara tluang taka Zonunmawi chanchinbu a kal mek lai leh, Zoram kilkhawrah pawh inbiakpawhna a changtlun chhoh mek zel lai hian Internet-a Zonunmawi chhawpchhuaktu mihring bawk hi a nikhua lo leh tlat thin.

Kum khat dawn Zonunmawi Internet-a chhawpchhuah a nih hnu hian vawi hnih lai chawlh han lak vang vang tum a thleng ta reng mai a, chhiartute ngaihdamna leh hriatthiamna kan dil tak meuh meuh e.

Hetia vawi hnih lai chawlh han lak deuh vang vang a awmna chhan ber chu Internet-a ZNM chhawp chhuaktupa ber thatchhiat a chhuak a ni tawp mai (zep lovah chuan).

A chhan tenau leh nep zawk dang awm leh chu Internet-a ZNM chhawpchhuah hi mimal hmalakna angreng deuh, Branch pawhin an hriatpui tak tak lem loh (han tih ngawt dawna an hriatpui angreng deuhreuh lawi si) leh, an phurpui vak lem loh a nih vang a ni pakhat bawk awm e. A titupa ber thatchhiat a chhuah tuma chawk phur a, nawr kaltu tur an awm ta thin lo a ni.

Hetah chiah hian Internet-a ZNM chhiartute hi in pawimawh ve awm e. Comment ho te te pawh han ziak ve thin ula, a enkawltu tan phurna nasa tak petu a ni thei ang. Chumi khami ram leh hmun atangin kan lo chhiar ve thin a, kan lo chutih khatihpui khawp mai tih thu tawite pawh han ziak ve zeuh zeuh thin ula, thathona nasa tak min pe ngeiin a rinawm tlat a ni.

Chhiartute in zavaiin chibai ule.

Kum 22-na, Issue 32, SEPTEMBER 12, 2009

YMA MISSION VENGTHLANG BRANCH HNATLANGIN PARAWL IN SA ZO TA

YMA Mission Vengthlang Branch chuan Pu Lalchungnunga, A Section In chu a sa zo fel ta. He In sak nan hian Branch leh Section Committee member-te’n September ni 5, 2009 (Inrinni) khan hnatlang neih a ni a, member an thawkchhuak tha hle. In hi a dung ft. 21 leh avang ft. 11-a sak a ni a, a hnuai chu sum tlem a zawng a lo hmuh ve theih nan midang luah theih turin siam pum sak nghal a ni bawk.

In sak nan hian Thingzai, Rangva leh mamawh dang dang atan Rs 21,734/- hman a ni a, hei hi Pi Biakkimi, A Section In sak nana khawtlang mi inphalte thawhkhawm la bang leh, Branch Committee apianga mi harsate pual thawhlawm tlingkhawm atanga hman a ni. Tanpui ngaite tanpui nana veng chhung mite inpekna a va hlu em!

Pu Lalchungnunga hi parawl, taksa lam hrisel loh avanga tiang nen lo chuan kal tha thei mang lo a ni a; eizawnna mumal pawh nei lo a ni. Kum laihawlah khan a In tur hi a hmanraw neih sa ang angin a lo puah ve nawk nawk tawh a, ‘A’ Section Committee-in vawi hnih leh an Kohhran-te’n vawi khat hnatlanga lo pui tawhin, a chung chu khawr pum titih a ni tawh nghe nghe a ni.

Hnatlang tha bakah hian Sept. ni 4, 2009 (Zirtawpni)-ah hlawhfa lain hnatlangpui thawh remchang lo, a ban thlak leh tul dangte lo thawh hmasak a ni a. Sept. ni 7, 2009 (Thawhtanni)-ah hlawhfa ruai lehin, hnatlangin a thawh zawh hman loh chul mam ngaite chul mamin zawh fel a ni ta.

Heng tanpui ngaite tanpui nana hnathawhnaah hian YMA chu veng chhung Tlawmngai Pawl lian ber a nih angin ruahmanna lo siam a, hnatlanga thawk chhuak a, hma lo latu mai a ni; a thawk tak taktu chu veng chhung mipui kan ni. Sum leh pai, hmanraw tul ang ang thawhtu leh hnatlang zawng zawngte chungah YMA Mission Vengthlang Branch chuan lawmthu a sawi tak meuh meuh a ni.


VENG CHHUNG THUTHAR TAWI:

• Upa P. Pahlira, Y Sec. f/o Pu Kaisangzuala, Branch President chu Aizawl Hospital atangin a lo chhuak.
• Pi Lalrinpuii d/o Pu R. Lalkuala, M Sec. chu Vellore-ah hun engemaw chen enkawl a nih hnuin karhmasa khan a lo haw.
• Pu K. Khualdawla, Y Sec., Aizawl Hospital-a enkawl chu In lama inenkawl turin a lo chhuak.
• Pu H. Lalzuala, Y Sec. te chu kâwng lam fel lo avangin Kolkata-a inentirin an thang mek.
• Pi Zoremsiami d/o Pi Lalnuntawmpuii, Y Sec. chuan fapa a nei thar.
• Pi F. Lalengliani w/o Pu Lalhmingmawia Ralte, Y Sec., pneupmonia avangin Kulikawn Hospital-ah enkawl mek a ni.
• Np. Lalngaihawmi d/o Pu Vanramngaia, A Sec., khawsik avangin Bethesda Hospital-ah enkawl mek a ni.
• Pu C. Ramthara, A Sec., Grace Nursing Home atangin In lama inenkawl turin a lo chhuak.
• Np. Lalhruaikimi d/o Pu Lalhmachhuana, M Sec. pneumonia avangin Aizawl Hospital-ah enkawl mek a ni.
• David Lalrammuana s/o Pi Lalmuankimi (Nuduati), M Sec. leh Lalrinchhani, Salem Veng te chu Sept. ni 11, 2009 (Zirtawpni) chawhnu dar 2:00-khan Mission Vengthlang Kohhran Hall-ah an innei.
• Pu Laltlanmawia, Y Sec. te chu Pu R. Vanlallawma In, Y Sec.-ah an inbawlhrang ve ta.
• Pu Lalhmunsanga chu a pa K. Zasiama, A Sec. In atangin Pu Elija Lathansanga, A Sec. In hnuaiah a inbawl hrang.
• Tv. Lalngaisanga s/o Rev. Lalchunglura, A Sec. leh Nl. Lalthlengliani c/o Pu Lalhmachhuana, M Sec. te chu Sept. ni 18, 2009 (Zirtawpni) khian Jubili Kohhran Hall-ah an innei dawn.
• Sept. ni 9, 2009 (Nilaini) zan tir lama ruah bawhawk surah khan kan Branch Secretary Pu Lalhmingmawia’n an kawmchhak pheia In sakna tur a laih chu a min a, thingbul lian tak a tla tel bawk. He leimin hian a motor 407 a delh chhe hneh hle, kan tuarpui tak zet e.

ARTICLE: INFLUENZA A (H1N1) BIHCHIANNA TAWI
H.Lalhruaitluanga, Y Section

Hri te a leng ang” ti a, kan Lalpa Isua Krista lo kal lehna hnaih tawh thu han sermon a chakawm rualin, chulam chu A mi hman bikte sawiah dah mai ila. He Influenza – A (H1N1), Swine-Flu kan tih mai hian titi a tih tam tak em avang leh Mizo-te hi thil sawichhawng sawichhawng a, thil ni lo pawh awihawm taka sawi thiam kan nih avangin thudik, mithiamte sawi ngei hi kan hriat a, kan lo bengvar zawk nan, a tlangpui zawr zawr, hmun tlem avangin lo tarlang ila:

Influenza – A (H1N1) hi eng ang chiah nge a nih?
Influenza – A (H1N1) (Swine flu ti a hriat) hi Mexico-ah April, 2009 khan lo awm tanin, tunah chuan khawvel pumpui tih theihah a darh tawh a ni. Swine flu han tih mai hi chuan Vawk atanga kai chhawn niawm tak a ni a, amaherawhchu hei hi thil diklo tak a ni. “Swine flu” ti a kan hriat nachhan tak hi he Virus a gene-te leh North America vawk-a gene an hmuh te nen an inan avang maia a hming hi phuah a ni. Scientist-te paw’n a tir chuan a hming phuah mai dan an hre lova ‘quadruple reassortant” virus te an han vuah ren rawn a, hun a kal zel a “Influenza-A (H1N1)” tih hming hi an nemnghet ta a ni.

Vawk sa ei hi a him reng em?
He thil hi engtizawng mahin vawk vanga lo awm emaw, kai emaw a ni lo va, vawksa hi hmin taka chum chuan ei atan a him em em a ni; vawksa thinhrikna chhan tur a awm lo. Tin, kan chhehvelah vawk thi an lo awm a nih pawhin chiai tur a ni hran lo.

Influenza-A (H1N1) miin a lo kai a a awmdan tlangpui te lo tarlang leh ila:
Tlang hri leng dang ang bawkin he hri vei tute hi an awm ve thova. Khawsik te, khuh te, hrawk thip te, taksa na them thum te, Lunâ te, Vawt tihna leh tihrawl nâ te pawh a lo awm thei a ni. Mi thenkhatah chuan kawthalo leh luak te pawh he natna hian a keng tel ve thin bawk a ni.

Engtiangin nge he Influenza-A (H1N1) hi a lo darh thei?
He natna hi a natna veitute hahchhiau leh khuh lo per chhuak atanga kai theih a ni. He natna veitu hian a vei atanga ni sarih chhung, a khua a lo sik tan thlengin an kai chhawng tlangpui thin niin a zirchiangtute chuan an hria a ni.

Engtinnge kan inven tak ang?

1. Hahchhiau in emaw, khuhin emaw ka leh hnar rawmawl/tissue faitaka khuh a; tissue hman hnu chu bawlhhlawh bawmah paih mai tur a ni a, rawmawl chu fai taka suk leh hma chu nangmah emaw midangin emawin an hmang tur a ni lo.
2. Kut fai tak a sahbawn nen sil thin tur a ni a, a bik takin khuh leh hahchhiau hnuah faitaka sil ngei ngei tur a ni.
3. Kut-in hnar leh ka te khawih loh tur a ni. A chhan chu kut hian natna, kuta kaite a tihdarh theih thin avangin.
4. Mi hetiang lampang natna neite chu a hnaih lo thei ang ber a awm tum hram hram tur a ni.
5. Miin he natna a vei a ni tih hriatchhuah a nih chuan pawnah emaw, midang zingah emaw awm loh hram hram tur a ni. Hei hi a pawimawh em em a, natna tuartu tan hreawm deuh mahse a dam hma chu midangte a kaichhawn loh nan/a darh zel tur ven nan a inkhung hrang hram hram tur a ni.

Kum 22-na, Issue 31, SEPTEMBER 05, 2009

YMA MISSION VENGTHLANG BRANCH EXECUTIVE COMMITTEE VAWI 9-NA THU

September ni 3, 2009 (Ningani) zing dar 6:30 khan YMA Hall-ah Branch Executive Committee Meeting vawi 9-na neih a ni. President Pu Kaisangzuala’n Meeting hi kai hruaiin Pu Lalkamlova Rokhum chuan Pathian hnena tawngtaina a hmang. Member 27 an kal a, 7 in an pha. Beihrual thla a nih avangin Meeting hun hi sawn a ni. Section leh Sub-Committee hrang hrangte’n an hmalakna report an pek hnuah thurel tan a ni a, Branch report leh thurel tlangpui te:

1. Branch Committee hmasa thurel bawhzui ngaite tha taka bawhzui leh tihhlawhtlin a ni.
2. August ni 28, 2009 (Zirtawpni) zing khan YMA Branch thlan bikte pualin Renewable Energy Run neih a ni a, hetah hian kan Branch member 21 zet thawk chhuak ve in, Branch chuan Rs. 1000/- leh Sylpaulin 1no kan dawng a, a kal zawng zawngte’n T-Shirt leh lukhum an dawng vek bawk.
3. YMA Hall chung rangva a hnawih tur rawng 20 lt. chu Branch Executive Committee member Pu Lalthangkhuma Ralte in min pe, Branch chuan lawmthu a sawi tak meuh meuh a ni.
4. Mission Vengthlang Anganwadi Co-Ordination Committee-ah YMA aiawh turin Pu Rosangzuala, treasurer chu ruat a ni.
5. CM Running Trophy in Cultural Dance Competition-ah tel ve ngei nise, tih chu a lo buaipui tura ruat MICCLUB te hmalakna ngaihthlak a niin, tunah hian ngawrh takin Lam zir mek a ni.
6. YMA Chanchinbu la kan lo pung ve ta zel a, Agent leh Sub-Agent chungchang sawiho a ni a. Pu H. Lalneihkima chu Agent-ah la hman zel nise tih a ni a, Sub-Agent atan Section tin Asst. secretary te ruat belh an ni.
7. Kum 2009 - 2011 atana Central YMA hruaitu thlan turah kan Branch chuan, Pu C. Chuaukunga, CEC member hun engemaw chen lo ni tawh leh tuna CEC member ni mek, kan Branch hruaitu hlun thin chu kan Nominate.
8. V.C. House hnuai YMA ten Kuang leh thutthleng kan dahna chu a bang chhia atanga tui a luh theih avangin V.C. te berawnin a theih anga siam that nise, OB te’n hma lo la se tih a ni.
9. M Section chuan Kuang paruk (6) an siam zo leh ta.
10. Miharsate pual bawm hun a ni a, Rs 360/- thawhkhawm a ni.

VENG CHHUNG THUTHAR TAWI:

• Pu K.Vanlalngheta, Y Sec., khawsik, In lamah engkawl mek a ni.
• Pi Zarzoliani w/o Pu Zotinkhuma, Y Sec., khawsik, In lamah enkawl mek a ni.
• Pu R. Vankhuma, Y Sec., a puma khawihli awm, In lamah enkawl mek a ni.
• Pu Thangchungnunga, Y Sec. (Darnam), Aizawl Hospital-ah enkawl mek a ni.
• Rev. Dr. Lalsawma, Y Sec. chu Durtlang Hospital-ah enkawl mek zel a ni.
• Pu Kawldailova (Pavala), M Sec., a lu hliam zai turin Civil Hospital-ah enkawl mek a ni.
• Pi Rothangi m/o Pu Lalremthanga, M Sec. (Jt. Ed. ZNM) chu In lama enkawl chhunzawm turin Civil Hospital atangin a lo chhuak.
• Upa C. Rokhuma, M Sec., Aizawl Hospital-ah enkawl mek a ni.
• Pi Darhmingliani d/o Upa C. Rokhuma, M Sec., Durtlang hospital-ah enkawl mek a ni.
• Pu C. Ramthara, A Sec. chu Grace Hospital-ah enkawl mek a ni.
• Pi Lalchhandami w/o Pu Lalchhuanmawia Kawlni, A Sec. chu Aizawl Hospital-ah enkawl a ni.
• Tv. Lalramluahpuia (A Sec. Comm. member) c/o Pi Piangzingi, A Sec., Durtlang Hospital-ah enkawl mek a ni.
• Pu Israela, Branch Vice President chu kawng herh avangin In lamah a inenkawl mek.
• Tv. Lalrinawma s/o Pi Thankimi, Y Sec. leh Nl. Lalremruati Fanai, Republic Veng te chu Sept. ni11, 2009 (Zirtawpni) hian MVT Presbyterian Kohhran Hall-ah an innei dawn.
• Rev. Malsawmzoliana, Y Sec. chu Kolkata atangin chhungkaw thil avangin a lo haw.
• LO PEM THARTE: (1) Pu R. Ramdinthara te chhung, Chanmari atangin Pu Vanlalpeka In, A Sec.-ah (2) Pu Kapkima te chhung, Marpara atangin Pu Haukima In, A Sec.-ah. (3) Pu Lalngaihawma te chhung, Kanan Veng atangin Pu L.Thangmawia In, Y Sec.-ah (4) Pu Jefferson Varte te chhung, Luangmual atangin Pu Lalramthanga In, Y Sec.-ah (5) Nl. Lalbiakimi te unau, Tlaksik (N.Tripura) atangin Pu Lalvansanga In, Y Sec.-ah.

FAM ROLUNG MUAL:

Hming : LALNUNPUIA
Kum : 15
Kohhran: Presbyterian
Thihni: Sept. 04, 2009. 7:00 AM
Vui Hun: Sept. 04, 2009. 1:00 PM
Vuitu: Rev. C.Lianhmingthanga
Section: Y Section

Tv. Lalnunpuia hi Pu R.Lalrinliana leh Pi Vanlalbuki te fa hmasa ber ni turin ni 12.6.1994 (Pathianni), zan dar 10:30 khan Aizawl Civil Hospital-ah a lo piang a, unau pianpui nau pathum a nei a ni.

A lo pian hian nau duhawm tak a ni a, mahsela vanduaithlak takin bawrhsawmna (kaih)-in a tlakbuak thin a; damdawiin-ah thla khat zet enkawl zui a niin, damdawiin atanga chhuahpui a nih hnuah pawh In lamah enkawl zui a ngai ta zel a. A bawrhsawmna avang hian tho kang thei lo, chaw barh ngai a ni a; sikul pawh kal lovin, a dam chhung, a thih ni thleng hian In lamah amah hi enkawl zui a ni ta a ni.

Amah te hian Pathian hla ngaihthlak hi nuam a ti em em thin a, amah awmtleitu ber pakhat niin, zan khuaa han ngaihthlak chang te pawh a nei hial thin a ni.

Damdawiin-ah vawi tam tak enkawl thin a ni a. Ni 22.8.2009 atang khan Tangseh veiin, khawsik-in a tlakbuak a; Tangseh chu reh tawhin, a khawsik erawh chuan a kian san thei ta lova. |ha leh mai tura kan ngaih laiin, beisei loh ang takin ni 4.9.2009 zing lam dar 7:00 khan kum 15 mi niin min kalsan ta a ni.

Tv. Lalnunpuia hi ni 4.9.2009 chawhnu dar 1:00 khan In lamah Rev. C.Lianhmingthanga’n vuiin, Mission Vengthlang Thlanmualah T/Upa Hmingthansanga’n a thlahliam ta a ni.

Kum 22-na, Issue 30, AUGUST 29, 2009

YMA MISSION VENGTHLANG BRANCH YMA HALL CHEI THAT HNA ZAWH A NI

YMA Mission Vengthlang Branch Hall (YMA Hall) chu thla hmasa, June thla atang khan chei that hna thawh a ni a, tunah chuan zawh fel a ni ta. YMA Hall chei that hna hi Forest Department sum a thawh a ni. YMA Hall hi kum 1984 khan sak tan a ni a; Hall sak nan hian CAPART atangin sum hmuh a niin, hnatlang tha tam tak nen kum 1991-ah sa zovin vantlang hman theih a peih a ni.

Tun tuma Hall chei that hna an thawh hian a bang chhûng lam chu Plywood-a thuah vek a niin, rawng hnawih vek a ni a; Stage bik chu Teakply-a thuah vek a ni thung. Stage kil sir chhak lamah inchhung lam atanga hman theih turin inthiarna siam belh a ni a; Hall pawn lama zun-in awmsa pawh siamthat a ni. Hall hnung lama Sound control-na awm thin chu mipui thutna turin Gallery-ah siam a ni thung a, Gallery hnuai chu Sound control nan siam a ni bawk.

Tunah chuan YMA Hall zahpuiawmlo tak leh a chhung lawilen nuam leh mawi tak kan nei ta. Member ngaihtuah chuan kan Hall hian min dawl zo lo hle naa, YMA function pawimawh neih nan leh vantlang huap inkohkhawm nan kan hman rim ber a ni. Electric wiring pawh felfai leh duhthusam a thain siamthat a ni bawk a; a hmuh a nuamin, a chhunga khawsak a nuam ta tak zet mai.

Hall tha leh nuam tak kan neih rualin a chhiat a that, dimdawi leh uluk taka hman leh a enkawlzui chu YMA member leh khawtlang mipui, a hmangtute kutah a innghat a ni tih hria ila. YMA, veng chhung pawl hrang hrang leh mipuite’n kan hman theih dan leh hman man YMA-in a siamte tha taka zawmin, Hall nuam, mawi leh fai tha tak kan neih reng theih nan dimdawi leh uluk takin i hmang thin ang u.

Hall chei that nana sum kan mamawhte min petu Forest Department leh, chak taka hma min laksaktu Pu Lalthangliana Murray leh a buaipuitu zawng zawngte chungah YMA Mission Vengthlang Branch chuan lawmthu a sawi tak meuh meuh a ni.


VENG CHHUNG THUTHAR TAWI:

• Pi Thangliri m/o Pu F. Lalhmangaiha, Y Sec. chu Kulikawn Hospital atangin In lama enkawl chhunzawm turin a lo chhuak.
• Tv. Lalrindika s/o Pu Lalrintluanga, Y Sec., mitliam avanga Grace Hospital-a enkawl chu In lama enkawl zui turin a lo chhuak.
• Upa Lalrintluanga, M Sec., a banrek ruh khi In lamah enkawl mek a ni.
• Pi Rothangi m/o Pu Lalremthanga (Jt. Ed. ZNM), M Sec. chu Kolkatta atangin a lo haw a, Civil Hospital (ICU)-a enkawl zui turin admit nghal a ni.
• Pi Zothanzami w/o Pu Lalremsiama, M Sec., a chi kawnga bâwk awm Aizawl Hospital-ah zai a ni a, enkawl mek a ni.
• Np. Lalrinawmi d/o Pu Vanramngaia, A Sec., sentut avangin Bethesda Hospital-ah enkawl a ni.
• Pu C. Ramthara, A Sec., Grace Hospital-ah enkawl mek a ni.
• Tv. Lalrinawma s/o Pu L. Chhawnthanga, A Sec., Civil Hospital-a enkawl mek chu hma a sawn chak vak lova, thisen-te pek a ni.
• Tv. C. Lalrokima s/o Pu C. Lalronunga, M Sec. leh Nl. Lalrinkimi d/o Pu Lalnunmawia, M Sec. te chu Sept. ni 4, 2009 (Zirtawpni) khian MVT Presbyterian Kohhran Hall-ah an innei dawn.
• MPSC buatsaih Assistant Exam-ah kan veng atangin heng mite hi an tling: (1) Robinson Ngamchungnunga s/o Pu Thawnghluna, Y Sec. (2) Saidingliana Sailo s/o Pu J. Lalmawia Sailo, M Sec.
• Pu K. Lalmuansanga, Y Sec. chuan a lehkhabu ziah Nungchate Chanchin Vol-I chu Aug. ni 26, 2009 (Nilaini) khan a release a, THP Library-a dah turin bu 3 min pe; kan lawm hle.
• Pu F. Lalrova, M Sec. chuan Dr. Eric Zomawia In bul vantlang step siamna leivung, tuihawk luankawr hnawhtu chu ama sum sengin a paihfai tir ta hun mai.
• Jubili Presbyterian Kohhran Biak In chhak laih mek chu Aug. ni 25, 2009 (Thawhlehni) zing kar khan kohhran hnatlanga leivung paih a ni a; vawiin Aug. ni 29, 2009 (Inrinni) hian KTP-te’n hnatlang neiin an paih leh dawn.

FAM ROLUNG MUAL:

Hming : ZONUNTLUANGI
Kum : 17
Kohhran: Presbyterian
Thihni: August 24, 2009. 7:50 AM
Vui Hun: August 24, 2009. 3:00 PM
Vuitu: Pastor C. Lalsangliana
Section: M Section

Nl. Zonuntluangi d/o Pi Ramthanzauvi hi February ni 18, 1992 (Inrinni) khan a lo piang a; naupang hrisel vak lo a ni a, a nu leh a piin duat taka an enkawl seilen a ni. English Congregation School, Mission Veng-ah KG atanga Class VII thleng a kal a; Class VIII atanga Class X chu Synod Higher Secondary School-ah kalin heta tang hian HSLC chu II Div. ah a pass a, Oikos Higher Secondary School-ah Class XI a kal mek a ni. School a kal tirh atangin zirna lamah buaipui a ngai ngai lova, naupang thiamthei pangngai tak leh vantlang chunglam a ni chho ve ngar ngar thin.

Guide lamah a theih ang angin a inhmang ve thin a, kum 2007 khan Guide Programme-ah London (UK)-ah a kal ve nghe nghe a ni.

Kohhran lamah chuan Sunday School-ah Senior Department-ah a kai a, Sunday School hi a ngai pawimawhin a thulh hreh hle thin. Tleirawl inkhawmah hruaitu a ni bawk a, a phak ang tawk tawkin a inhmang ve thin. Mi hlim thei, tawng duh leh thenrual kawm thiam tak a niin chhungkhat laina tihlimtu leh tlawhchhuaktu ber a ni.

August ni 24, 2009 (Thawhtanni) zing khan School kal turin a insiam a, School lamah test tur an neih avangin zanah leh zing karah pawh ngawrh takin lehkha a zir nghe nghe a ni. School kal tura a insiam zawh hnu, tukthuan ei hmalawkin Room-ah tawhsual a tawk chu hmuin rang takin Aizawl Hospital panpui nghal a ni a. Amaherawhchu, a nunna chu chhan hmanlohin Lalpa hnenah min lo kalsan ta a ni.

Hemi ni vek chawhnu dar 3:00-ah Pastor C. Lalsangliana’n in lamah vuiin, Upa Liansailova’n thlanmual-ah a thlah liam ta a ni.

Kum 22-na, Issue 29, AUGUST 22, 2009

WORKSHOP CUM SEMINAR ON CYBERCRIME AND MIZO SOCIETY

Central YMA leh Information & Communication Department, Govt. of Mizoram buatsaih, Workshop cum Seminar on Cybercrime and Mizo Society chu August ni 21, 2009 (Zirtawpni) chawhma dar 10:30 atangin Central YMA Hall, Tuikhuahtlang-ah neih a ni. Branch Executive Committee-in a ruat angin he Seminar-ah hian Zonunmawi Editorial Board atangin Pu Lalmuankima leh Tv. Vanlalhlua-te an tel.

He Seminar hi Pu H. Zoremthanga, President Central YMA-in kaihruaiin, Pu R. Lalzirliana, Home Minister chu khuallian a ni. He huna tel tur hian khawpui chhung YMA Branch aiawh pahnih theuh, Police Deptt. (Crime Branch) leh Media aiawhte sawm an nih angin an tel tha hle.

Cybercrime tih awmzia chu Information & Communication Technologies (ICT) hman khawlohna avanga dan bawhchhiatna sual reng reng hi a ni. He Seminar-in a tum ber chu Computer, Internet, Mobile Phone etc. leh an tlukpui khawl hmanga sualna chi hrang hrang kan hmachhawn mek leh la hmachhawn tur bakah, lo inven dan tur kawng hrang hrang zirchianna a ni ber awm e.

Mizoram chhung ngeiah pawh computer hmangin hna kan thawk tawh a. Internet zawmin, bank account tlengin computer thiltihtheihna kan hmang ta. Computer hmang vekin mi thenkhatte’n sual rawngbawlin, thil sual chi hrang hrang an khawih a; mi account number leh e-mail thleng ruk sakin, hengte hmang hian mi pawisa leh thilpawimawh an ruk sak ta zel mai. Heng computer leh mobile phone hmanga sual rawngbawlna, Cybercrime leh heng laka invenna tur kawng hrang hrangte hi Seminar-ah hian sawiho leh zirho a ni.

Entirna pakhat han sawi ila. Mi thenkhat chuan tunlai hian mobile phone-ah SMS hmangin sum man theihna (lottery) inkawhhmuha, tu emaw Sap hming contact tura inthlemna kan dawng ta fo mai. Heng avang hian Mizopa thenkhatin cheng nuai 2/3 lai an lo hloh phah tawh nghe nghe. Heng hi inbumna thil a nih avangin mitinte i fimkhur ang u.


VENG CHHUNG THUTHAR TAWI:

• Rev. Dr. Lalsawma, Y Sec., kâwngna avangin Durtlang Hospital-ah enkawl a ni.
• Pu Khualdawla, Y Sec., kawng ko-a a tlâk avangin Aizawl Hospital-ah enkawl mek a ni.
• Pu Thomas Lalrammawia, M Sec. te chuan fanu an nei thar.
• Pu Lalrokima, M Sec. te chuan Civil Hospital-ah fanu an nei thar.
• Tv. Israelthara b/o Tv. Ch. VL Biakmawia, A Sec. chu Civil Hospital atangin dam takin a lo chhuak.
• Tv. Lalrinmawma s/o Pu L. Chhawnthanga, A Sec. chu Civil Hospital-ah enkawl mek a ni.
• Pu Lalngaihzuala, A Sec. chu pumna avangin In lamah enkawl mek a ni.
• MVT Presbyterian Kohhran Bialtu Pastor C. Lalsangliana chu Sorkar Tha neih chungchanga mipui zirtirna hun hmang turin Lengpui-ah a kal a, Pu C. Chaukunga’n a tawiawm.
• Nizan August ni 21, 2009 (Ningani) khan A Section chuan Section Committee an nei.
• Baptist Shalom Kohhran chuan kum 10 an tlianna champhaphak lawmna chu nizan atanga tanin, Pathianni zan thleng an nei dawn.
• Kan Branch Secretary Pu Lalhmingmawia, Y Sec., tun kar chhung khawsik leh pum lam nawm loh avanga damlo chu a pawn chhuak peih leh ta a, Zonunmawi buatsaihte pawh min rawn ho thei leh ta a, kan lawm hle.
  

FAM ROLUNG MUAL:

Hming :R. ZASIAMA
Kum : 73
Kohhran: Presbyterian
Thihni: August 18, 2009. 1:00 AM
Vui Hun: August 18, 2009. 1:00 PM
Vuitu:Pastor C. Lalsangliana
Section: Y Section

Pu R. Zasiama hi Pu Chhawnhleia (Tea) leh Sawithangi Ralte-te fa paruk (6) zinga pali (4)-na ni turin kum 1936 khan tuna an In hmunah hian a lo piang a. An unau zinga naupang ber Zachhunga chu a nausen laiin a thi a; an upa ber Pi Zachhingi chu July 10, 2009 khan a lo thi tawh bawk, an khawhar pawh a la reh hma-in ani hian a zui ve leh ta a ni.

Pu R. Zasiama hian lehkha a zir thui lova, tleirawl te, a nih laiin Synod Press-ah lutin hun rei tak a thawk a, chumi hnuah rei vak lo BDO hnuaiah Ruallung khuaah a thawk leh a. Kum 1972 atangin Govt. Press-ah binder-in a lut a, kum 2004 khan Machine-man Grade I-in a pension ta a ni. Pi Ringliani d/o Laichhingpuia, Lungleng I nen kum 1971 khan inneiin, fapa pahnih leh fanu pahnih an nei a, tu 16 lai an nei tawh bawk.

Pu R. Zasiama hi mi tlawmngai leh tuarchhel, mi tana inpe, ramvachal, ramhnuai ngaina em em mi a ni. Tleirawl te a nih laiin Kohhranah a inhmang nghal a, Mission Veng Kristian Thalai Pawl-ah leh Pastor Bial-ah te hruaitu a ni thin. Kum 1956 atangin Naupang Sunday School zirtirtu-ah a tang a; Mission Veng Male Voice hmasa 'Thuchah Kengtute' tia vuahah pawh khan a tel nghe nghe a ni. Mission Veng Kohhran atanga Mission Vengthlang a indan tirha Kohhran Committee din hmasak berah pawh Kohhran Committee member a lo ni tawh bawk.

Amah hi a hriselna tlahniamin pawn chhuak vak lova a awmna a rei ve hle tawh a. Tin, BP sang neiin, inenkawl reng lai a ni. Ni 14.8.2009 zanriah a ei tur chu a chau thut a, a âwmah hnawhtu awm tlatin a hre bawk a. Aizawl Hospital-ah lak chhoh nghal a niin, heart attack a ni tih hmuhchhuah a ni a. Doctor leh nurse-te’n ngun taka an enkawl chungin ni 18.8.2009 zing lam dar 1:00 khan Chatuan Ram a lo pan ta a ni.

Ni 18.8.2009 (Thawhlehni) chawhnu dar 1:00-ah Bialtu Pastor C.Lalsangliana’n In lamah vuiin, Upa K.Roseia’n Mission Vengthlang Thlanmual-ah a thlahliam ta a ni.

Kum 22-na, Issue 28, AUGUST 15, 2009

YMA MISSION VENGTHLANG BRANCH SECTION HMALAKNA HRANG HRANGTE

YMA Mission Vengthlang Branch chuan Branch chakna turin kum 1985 atang khan Section pathum, Y, M leh A-te a siam a. Hei hi tidanglam lovin tun thlengin la kalpui zel a ni. Section-te hian Branch-in tihtur a tukte leh, mahni Section huam chhunga vantlang tana thawh tur tul ang angte theihtawpin an thawk thin. Section hrang hrangte hmalakna hi a fakawmin, Branch chakna hnar tak tak an ni. Tun hnaia Section hrang hrangte hmalakna lo tarlang ila:

Y SECTION

1. August ni 13, 2009 (Ningani) zan khan Meeting an nei a; Meeting hi Leader Pu Lalramthanga’n kaihruaiin, member an kal tha thawkhat hle.
2. September - December, 2009 chhunga Mitthi Buhfai khawn tur an inruat thar.
3. Branch-in tihtur-a a tuk, Chhiatni Fund khawn chu an Section huam chhungah an khawn mek.
4. Emergency Light tha tak lei an tum.
5. June - August, 2009 chhungin damlo mi 11 an kan.
6. August 12, 2009 (Nilaini) khan Section Committee Infuihtharna neih pahnin Branch OB-te sawmin Section Secretary Pu K.Lalbiakvela In-ah zanriah an kilho.
7. Veng chhung himna tura Duty thin chu ngawrh lehzuala kalpui zel an tum.

M SECTION

1. Sum tuak nana Hmunphiah an zawrh chu an hralh zo ta. Hmunphiah zawrh leisaktute chungah lawmthu an sawi.
2. Branch-in tihtur-a a tuk, Chhiatni Fund khawn chu an Section huam chhungah an khawn mek.
3. August ni 14, 2009 (Zirtawpni) chawhnu khan sum tuakna atan Vawk an talh.
4. Section huam chhungah ngawrh tak leh phur takin an Duty mek zel.

A SECTION

1. Tv. Lalbiakdika bo zawnnaa hnatlang ei leh in senso zawng zawng Section-te’n an tum.
2. Branch-in tihtur-a a tuk, Chhiatni Fund khawn chu an Section huam chhungah an khawn mek.
3. Tun hnaiah damlo pahnih an kan.
4. Chhiatni Thatni-a bungraw lakkhawmna tur Tawlailir an siam chu chei that leh a ni.
5. An project pakhat, Khuang siam chu an zo fel ta.
6. August ni 18, 2009 (Thawhlehni) zan khian Section Committee an nei dawn.

VENG CHHUNG THUTHAR TAWI:

• Pi Thanghliri m/o Tv. F. Laltanpuia, Y Sec. chu taksa chak lohna avangin In lamah enkawl mek a ni.
• Pi Rothangi m/o Pu Lalremthanga, ZNM Jt. Editor, M Sec., Kolkata-a enkawl mek chu a taksa mamawh chaw pekna tur a pum verh a ni.
• Pi Vanlalfeli, Y Sec. (Dam), pum tha lo, In lamah enkawl mek a ni.
• Pu F. Lalhmangaiha, Y Sec. chu bike-a accident avangin Durtlang Hospital-ah enkawl mek a ni.
• ZNM Manager Pu Vanmalsawma, M Sec. chu August ni 10, 2009 (Thawhtanni) khan Durtlang Hospital-ah a mit (eye) zai a ni a, In lamah enkawl mek a ni.
• Pi Lalthanpuii w/o Pu Vanlalsawma, M Sec., te chu August ni 14, 2009 (Zirtawpni) khan Kolkata-ah in check-up turin an kal.
• Pi Zothansiami w/o Pu CT Vanlalchhana, M Sec., Aizawl Hospital-ah a mit (bile)-a lungte awm zai a ni.
• Pi Famkimi (Missionary) w/o F. Vanlallawma, M Sec. chu damlohna avangin Vellore panpui leh a ni.
• Tv. Israelthara b/o Tv. Ch. VL Biakmawia, A Sec., luak leh khawsik vangin Civil Hospital-ah enkawl mek a ni.
• Pi Ngurchhingpuii w/o Pu Haukima, A Sec., Aizawl Hospital-a enkawl chu dam takin a lo chhuak.
• Pu Lalchhanchhuaha, A Sec., khawsik leh pumna, In lamah enkawl mek a ni.
• Pu Lalngaihzuala, A Sec., pumna leh tha-na avangin In lamah enkawl mek a ni.
• Tv. Laldinliana s/o Pi Lalbiakthangi, A Sec., Aizawl Hospital-a enkawl chu dam takin a lo chhuak.
• Tv. H.Tlanglawmthanga s/o Pu Zarzoliana, M Sec. leh Nl. Vanlaldiki, Nghalchawm khua chu August ni 18, 2009 (Thawhlehni) Nghalchawm Preby. Kohhran Hall-ah an innei dawn.
• Pu Lalawmpuia s/o Pi Ngurthanzami Sailo, A Sec. chuan 4th IR Battallion training chhungin heng award-te hi a dawng: (1) Best in Drill (2) Best All-round. A chhuanawm hle mai.
• Pu Lalramtiama, Branch Committee member (A Sec.) chu PTC Lungverh-ah training-in a awm mek.
• Tv. Lallawmsanga s/o Pu H. Lalneihkima, A Sec., chu 4th IR Battallion training zovin a lo chhuak.

FAM ROLUNG MUAL:

Hming :LALBIAKNGHETA
Kum : 28
Kohhran: Church of God
Thihni: August 10, 2009
Vui Hun: August 11, 2009. 11:00 AM
Vuitu:Pastor L.Chhawnthanga
Section:A Section

Tv. Lalbiakngheta hi Pu Hauhnuna leh Pi Lalzidingi te fa pathum zinga a milai ni turin October 9, 1982 khan Haulawng khuaah a lo piang a. An unau hi mipa pahnih leh hmeichhia pakhat an ni. Kum 1985-ah Haulawng atanga rawn pemin, tuna an awmnaah hian an inbengbel ta a ni.

Naupang harhvang leh hrisel tak niin, a lo tlangval hnu pawhin a theih ang anga chhungte tan leh mahni intodelh tum a, a tul leh a theih ang ang thawk thin a ni. Tun hnai, hun eng emaw ti chhung phei kha chu Forest Deptt. hnuaiah inhlawhin, Tlawng kamah a riak reng nghe nghe a ni.

Tunlai thalai tam takte harsatna thlentu, ruihtheihthil-in hun eng emaw chhung kha a lo tibuai ve tawh thin a. Pathian-ah piantharna changin, rawngbawlte pawhin a lo chhuak ve lawp lawp tawh thin. Heti chung hian harsatna a tawk ve leh thin a; tun hnai maiah khan Pathian kohna chiang taka hriain, ‘Sim rawh u, Vanram chu a hnai tawh e,’ tiin a u leh nau, a nu leh pate bulah pawh a au a au thin a. Sual thupha chawiin, tap chungin Pathian a au thin. Hetia a awm lai hian Setana sual hnatawhin a riru tibuaiin, chhia leh tha hriatna tha pawh hmang thei lovin a lo awm ta a. A rilru buai avangin, August ni 8, 2009 (Inrinni) zing khan a pate-a nupui chu a hliam a; heta tang hian amah chu bo nghalin, August ni 10, 2009 (Thawhtanni) chawhnu dar 2:00 velah an kawmthlang kawrah thi-a chhar a ni ta a ni.

A ruang hi zanah tlaivarpui niin, a tuk August ni 11, 2009 (Thawhlehni) chawhma dar 11:00-ah Pastor L.Chhawngthanga’n In lamah vuiin, Upa Darthangvuanga’n Thlanmual-ah a thlahliam ta a ni.

Kum 22-na, Issue 27, AUGUST 08, 2009

YMA MISSION VENGTHLANG BRANCH EXECUTIVE COMMITTEE VAWI 8-NA THU

August ni 8, 2009 (Ningani) zan dar 7:00 khan YMA Mission Vengthlang Branch Executive Committee Meeting vawi 8-na chu THP Hall-ah neih a ni. Meeting hi Pu Kaisangzuala, President-in kaihruaiin, Pu C.Lalduhkima’n Pathian hnena tawngtaina hun a hmang. Member 20 kalin, 4 an kal lova, member kal lo 17-in an kal theih loh chhan sawiin an pha a ni. Thurel tlangpuite chu:

1. REPORT: Branch leh Section hrang hrang atangin report tlangpui hetiangin ngaihthlak a ni.

Branch: Executive Meeting hmasa in bawhzui tura a rel leh ruahman te a theih ang ang a bawhzui leh tihhlawhtlin a ni a, YMA Hall chei mek a niin zawh fel tep a ni. Chhiatni Thatni-a hman tur Silpouline 2 leh Hruizen fei leh sei tak pakhat lei a ni.

Y Section: Damlo 3 an kan a, Kuang siamin an hnatlang.
M Section: Damlo 3 an kan a, Sum tuak nan vawk an talh a, Committee member-te ngawrh takin an duty thin.
A Section: Damlo 3 an kan a, Pu Lalchungnunga In an sakpui a; THP Hall-II bul kawngba samfaiin an hnatlang.

2. THISEN PEK RUNPUI (BLOOD DONATION): July ni 11, 2009 (Inrinni)-a neih a ni a; mipa 66 leh hmeichhia 5-in thisen an pe a ni. Thisen pete leh pek tuma lokal zawng zawng chungah Branch chuan lawmthu a sawi a, Civil Hospital Blood Bank-a thawktute leh refreshment min tumsaktute hnenah pawh lawmthu a sawi tak meuh meuh bawk.

3. CYBER CRIME SEMINAR: Central YMA buaitsaih, Cyber Crime Seminar buatsaiha tel turin Zonunmawi Editor Pu Lalmuankima leh Jt. Editor Tv. Vanlalhlua te ruat an ni.

4. THAWHHONA THIANGHLIM: Clean Mission Vengthlang-in khawtlang vawnfai chungchanga min rawn sawmna chu ngun taka ngaihtuah a nih hnuin, Branch hmalakna zulzui tho a nih avangin a theih ang anga thawhpui tura thutlukna siam a ni.

5. KAWN CHEI: Mission Vengthlang Dawrkawn chu kumin hian chei leh nise tiin a rel a; hma lo la turin Sub-Committee pawh a din fel nghal bawk.

6. SECTION SILVER JUBILEE: February 26, 2010 hi Mission Vengthlang YMA Section champhaphak vawi 25-na (Silver Jubilee) a ni a; Section hi Branch Committee-in a din a nih avangin kumthar-a hruaitu thar turte kutah hemi vuakvek chungchang hi dah a ni.


VENG CHHUNG THUTHAR TAWI:

• Hmingthanmawia (thla 1 leh ni 1), Pu Lalremhluna (Puia), Y Sec. (Vengmawi) chu August ni 6, 2009 (Ningani) zan dar 7:30 khan Aizawl Hospital-ah a boral a; hemi zan hian Pastor C.Lalsangliana’n a vui zawhin an In bulah phum a ni.
• Tv. Laldinliana s/o Pi Lalbiakthangi, A Sec., Lung leh La (spleen) vung avangin Aizawl Hospital-ah enkawl mek a ni.
• Tv. Lalrinawma s/o Pu L. Chhawnthanga, A Sec., pumna avangin Kulikawn Hospital-ah enkawl a ni.
• Pi Lalzoliani w/o Pu Lalkamlova Rokhum, A Sec., Kal (kidney) na avanga Vaivenga Hospital-a enkawl chu a lo chhuak.
• Np. Remruatfela s/o Pu Lalremliana, A Sec. tonsil nâ, zai tur, In lamah enkawl a ni.
• Pi Rotluangi, A Sec., New Life Polyclinic-a enkawl thin chu In lama enkawl chhunzawm a ni.
• Pu Lalthangpuia s/o Pu Jordanthanga, A Sec. te chhung chu a pa-te In hnuaiah an inbawlhrang.
• ZIN HAW: (1) Tv. Ch. VL Biakmawia, A Sec. Fin. Secy., a pa nau boral avanga Diltlang-a zin (2) Pu Lalthawmmawia, A Sec. Leader, Phulen-a zin chu vawiin hian a lo thlen beisei a ni.
• Chhim Phei YMA Coordination Committee chuan an buatsaih- Chhimphei Lamtluang tih lehkhabu chu THP Library-a dah turin copy 10 an pe.
• PEM LUT LEH CHHUAK: (1) Pu Nghaklianmawia te chhung, Kulikawn atangin an In, Y Sec. (Vengmawi)-ah (2) Pu Samuel Lallianrawna te chhung, Vaivakawn atangin Er. Lalthangkhuma Ralte In, M Sec.-ah (3) Tv. Lalengkima te unau, Ngopa atangin Pu T. Kapliana (L) In, Y Sec.-ah (4) Pu H. Lianmawia te chhung, Y Sec., Saron Veng-ah an insawn chhuak.

ARTICLE: ZONUNMAWI CHANCHINBU
Jacob-a Pa, Y Section

He chanchinbu hi veng chhung tan a tangkai mai a ni lova, a chhuanawm tak zet zet a ni. Mi chanchin kan hriat phah a, awm thar te, damlo te, hlim leh lawm te, bo zawnna te, lawmthu sawina te leh inzawrhna thlengin he chanchinbu hian a tarlang thin. Mi dang tana tangkai, thu tha tak tak chhiar tur ziak mite hnen atanga a dawn chu a chhuah bawk thin.

A enkawl:
YMA hian hnatlang zing ber thlang dawn se, Zonunmawi enkawltute hi an nih loh nakah. Zirtawpni apiangin hnatlang an nei a, kal ve lo nih chu tlawmah an ngai a, lungrual takin an thawk thin a ni. Aurinna hmanga inauh khawm a ngaih loh avanga thawm zawi an nih loh zia chu kan hre tlang vek awm e.

Thu leh Hla
Zonunmawi Chanchinbu hian thu chhuah tur nei apiang thu chu a hnar lo va; chanchin thar a ni emaw, thu zirtir nei a ni emaw, veng chhung mipui hlawkna tur a nih phawt chuan a chhuah kawngah a tlanchhe ngai lo. Thurawn a dawng hreh hauh lo va, sawiselna pawh a haw ngai na hek lo. Malsawmtu nih hi a thil tum a ni zel a; chuvangin thu leh hla thiamte khan han tawiawm tha deuh teh ang u.

A Mangan ve thin:
Hnatlang a zin em avang hian thuchhuah tur han haihchham chang chu he chanchinbu hian a nei ve bawk. Heng hunah tak hian a ni, tanpui vartu hnai rengte a mamawh thin ni. A thuchhuah i lawm loh zawng a awm chuan sawi duah loh khan a enkawltute hi hrilh mai la; chhuah awm tak chhuah loh chang a awm ang a, chhuah loh awm taka i ngaih rawn lang ta nawlh pawh a awm ngei ang le. Mak ti mai suh, a enkawltute hi mihring an ni a, an famkim bik loh avang hian an mangang ve thin bawk a ni. An manganna tanpuitu nih tum fan ang u.

Thlei bik nei lo:
Eng pawl pawh, eng kohhran pawh mai hian thu an neih chuan an chhuah chak em em vek a; he chanchinbu rilru zau zia, thuk zia hi thu leh hla hian a hrilhfiah zo mawlh lo a ni. Chuvangin in pawlin emaw thu chhuah tur in neih chuan a enkawltute han hrilh teh u, an lo chhuah mai ang.

Zonunmawi Chanchinbu thang zel mawlh rawh se.