Kum 21-na, Issue 39, OCTOBER 26, 2008

YMA GENERAL CONFERENCE 63-NA TLUANG TAKA HMAN ZAWH A NI

October 21- 23, 2008 chhunga neih, YMA General Conference vawi 63-na chu tluang taka hman zawh a ni ta. Conference-ah hian a thlengtute inbuatsaihna a tha in Pandal leh hmunhma buatsaih vel a felfai hle a. Khawmpui palai kalte pawhin a thlengtu Serchhip khua inbuatsaihna hi an fakin Conference kal manhla an ti hle. Kumin Conference-ah hian Palai riak lut 2167 zet an awm a ni. Conference chungchanga hriat tur pawimawh deuhte han tarlang ila-

1. CYMA 2007—2008 report pawimawh zualte :
YMA Branch awm zat : 763
Group awm zat : 47
Sub-Hqs. awm za : 5
YMA member zat : 2,78,140
YMA Life member zat : 7,647

2.CYMA Sum dinhmun 2007—2008:
Sum hmuh zat : Rs 80,64,223
Hmanral zat : Rs 70,70,293

3. Rorel inkhawm: Rorel inkhawmah hian CYMA OB 6, CEC member 33, CYMA OB hlui 5, Sub-Headquarters hruaitu 19, Sub Headquaters thuthmun Branch atangin 163, Group atangin mi 237 leh, Aizawl khawpui Branch hrang hrang atangin mi 296, an avaiin mi 759 an tel a. An thu tihtlukte chu:

YMA khawih:
(a) Mizo nunze mawi uar zawka inzirtir ni se, tih chu lungrual taka pawm a ni.
(b) YMA Danpui (constitution)-a siam that ngaite ennawn ni rawh se.

Sawrkar khawih:
(a) Mizoram sawrkar hnalak thinah hian a tling leh tlakte chauh lak anih theih nan sawrkarah thlen ni rawh se.
(b)’Saitluk Airport tihpuitlin a nih thuai theih nan Mizoram sawrkarah ngen ni rawh se,’ tih chu, hun engemaw chen sawiho anih hnuah a thu siam remin, ‘Saitluk ramah Airport siam a nih thuai theih nan Mizoram sawrkarah ngen ni rawh se,’ tia pass a ni.

4. Budget: CYMA Budget 2008—2009 atan Rs 8,397,400/- pawm a ni.

5. Conference thlen diltu: Kum 2009 YMA general conference thlen diltu pali- Darlawn, Zemabawk, Thingsulthliah leh Kolasib te chu palai kalten vote la-a an buk hnuah YMA General Conference vawi 64-na, kum 2009-a neih tur chu Darlawn-ah nghah tura thu tih tluk a ni.

6. Kumpuan: YMA-in kalphung pakhat ang hiala kan lo neih tawh, Kumpuan thupui hrang hrang hmanga kum 19 zet kan lo kalpui tawh chu Branch leh member-te thahnemngaihna zarah a hlawhtling thin hle a. Kan Kumpuan hnuhnung ber, Ruihhlo Do phei chu a zawnin kum 4 zet kan kalpui tawh bakah, kan ram pawhin kawng tam takah a lo thatpui tawh a ni. Mahse kumin conference-ah hian Kumpuan neih loh tura rel a ni.

7. General Conference leh kan Branch: Kumin YMA General Conference hian kan Branch tan pawimawhna tak a neih chu Conference khuallian hi kan veng pa, Upa C.Rokhuma a ni tlat mai. Kan Branch atang hian khawmpui chhim tur leh khuallian tawiawm turin kan Branch OB 4 leh member dang 15 zet an thawk chhuak a ni. Branch hminga Conference palai kal zawng zawngte chungah YMA, Mission Vengthlang Branch chuan lawmthu a sawi e.
Kan dam em ang a, nakum 2009 YMA General Conference chu Zoram hmarchhak khawpui, Darlawn-ah kumin aia nuam, kumin aia tam leh hlimawm zawkin kan han hmang ang chu le! A remchan phei chuan kan Branch hian Special Item neih ngei pawh i tum teh ang u.


VENG CHHUNG THUTHAR TAWI:

• Pi Hmingkhumi w/o Pu Zakiamlova (L), Y Sec., dam lo, In lamah enkawl mek a ni.
• Pu Lalremruata, Y Sec. te chuan fapa an nei thar.
• Pu Zohmingliana (Mazova), M Sec. chu mitliam leh chuapa tui tling vangin Aizawl Hospital-ah enkawl mek a ni.
• Dr L. Siamliana, M Sec., kan veng VCP chu hun eng emaw chen Kolkata-a enkawl a nih hnuin a lo haw chho leh ta. Inenkawl zui turin a la kal leh ang.
• Pu Lalrintluanga, M Sec. chu thisensang vangin Aizawl Hospital-ah enkawl mek a ni.
• Pu Ralramthanga, M Sec., thisensang avanga Civil Hospital-a enkawl chu a lo chhuak ta.
• Pu H Lallawmkima, A Sec., khawsik âwmna leh pumna avangin In lamah a inenkawl. A fapa, Np Lalnunhlua pawh khawsik awmna avangin In lamah enkawl mek a ni bawk.
• Tv Lalthanpuia s/o Pu Laltlanliana, A Sec., mitliam, Aizawl Hospital-ah enkawl mek a ni.
• Pi Laltlanzovi w/o Pu Ramchungnunga, A Sec., Nazareth Hospital-a enkawl mek a ni a, thisen 2 unit pek a ni. Thisen petute hi Tv Vansangpuia, A Sec. leh Tv Surchandra c/o Pu B. Zachungnunga, M Sec. te an ni.
• Pi Malsawmdawngliani (âmi) w/o Pu Lalbiakenga, A Sec. chu In lama inenkawl chhunzawm turin a lo chhuak.

ARTICLE:
KAN VENG LEH CONTACT SPORTS CENTRE
F. Lalramdinliana, Y Section

Tunlaiin sunhlu mual ram SAI Hostel sak nana pek chungchangin kan veng a luah hneh hle mai a, hemi avang hian Contact Sports Centre chungchang pawh sawi tel a ni ve ziah ti ila kan sawi sual lo ang. Contact Sports Centre chungchangah kan khawtlang hruaitu hluite demna niawma lang thei ziaka chhiar tur a awm tak fo avangin thu belhchian dawl lo kan infah thei dawnin ka hria a, chuvangin hemi chungchangah hian khatih laia kan khawtlang hruaitute leh Synod lama thawk thinte ka kawm kual nual a, hetiang hi thil awmzia chu a lo ni.

Contact Sports Centre awmna hmun hi Pu Mendus-a hun laia amah Pu Mendus-a ho ngeia an laih kha niin a hriate chuan an sawi a, Boys ME school kha an inti neitu thin viau niin an sawi nghe nghe. Boys ME school kha Mission enkawl a nih avangin sawrkara a luh hnu khan helai hmun hi sawrkarah chhawm lut lovin Synod kutah a awm zui ta zel a ni. Tin, a ram neitute'n an hman loh laiin veng chhung mite'n an hmang ve chauh thin niin Synod hotu hlui pakhat chuan a sawi nghe nghe.

Kum 20 vel kalta-ah khan Contact Sports Centre hi College veng field-a awm tura tih a ni a, mahse an khawtlangin an duh loh avangin an dah ta lo. Mizoram sawrkarin Contact Sports Centre chu Mizoramah ngei awm atana an duh ve avangin hmun dang an zawng leh ta a, tichuan kan veng field anga kan lo sawi thin, Synod ram chu an rawn dil ta a ni.

Synod ram dilpui tur hian khatih laia kan veng YMA hruaitute kha an rawn ngen a, anni'n thil tha zawk a nih beiseiin Synod hotute hnenah pawh an lo dilpui ta ngei bawk. An dilna chu Synod Executive Committee-in a ngaihtuah a, Synod chuan kum 52 chhung hawh tir a phal ta a ni. A diltu hnenah a ram neitu-in hawh a phalsak miau avangin khatih laia kan khawtlang hruaitute lo pawmpuia lo pawmpui loh theih kha a ni lo a, a dil erawh an dilpui ngei a, an pek erawh a ni lo tihna a nih chu.

Contact Sports Centre hi helai hmunah hian awm ta lo se helai hmunah hian kan la inkhel reng thei ang em tih hian ngaihtuahna a ti thui khawp mai. A hmun tih zauh nana rawt hniam emaw pawh Synod-in a phal a rin loh zia Synod hotu hlui pakhat chuan a sawi hial zawk a ni. A hmun hi hmun nuam leh rem tak a nih avangin engemaw sak nan chuan Synod hian a hman ngei a rin thu a sawi bawk.

Khatih laia kan khawtlang hruaitu pakhat chuan, "Synod hian hmun a indaih lo hle mai a, kan venga field awmchhun pawh hi in sak nan a hmang mai ang tih kan hlau a. Chuvangin infiammite chhawr zui theih loh tur ngawt ai chuan Contact Sports Centre awm zawk kha tha hle turah kan ngai a, chuvangin a awm theih nan khan sawrkar kha kan dilpui a ni," a ti ve bawk.

Kan khawtlang hruaitu hmasate'n khatiang ngaihtuah nachang an hria kha kei chuan han dem ngawt chi-ah ka ngai lo va, hun harsa leh dodalna tam tak pal tlanga YMA rawn tung nungtute an nih avang leh infiammite hmakhua ngaih vang zawka Contact Sports Centre atana sawrkar an lo dilpui pawh kha awm lo ka ti hran lo.

Contact Sports Centre chu a lo ding ta ngei a, tam takin Mizoram tana ro tling tih tur khawpa an hman tangkai tawh laiin keini'n kan duh ang anga hman ve kan lo tum a, mahse kan hman duh dan te leh hman a nih theih dan te a lo inmil lo deuh nge, kan chhawr tangkai lo kan ti zui a. A hmanna hriate'n tangkai taka an chhawr theih laiin keini chuan hnawk kan lo ti hmanhmawh a, a chhawr tangkaite'n medal tam tak lak nan an hman hnu-ah pawh keini chuan kan hlawkpui lo kan la ti a nih tak ber hi maw.

Contact Sports Centre a nih miau avangin football khelhna chi chu a ni lo phawt a, han intih hlim hut hutna hmun lah a ni hek lo. Contact Sports lama infiammite intah hriamna hmunpui a ni a, tin, Gymnasium thlengin a awm bawk lehnghal. Contact Sports Centre avang hian Mizoram hian Gold Medal engemaw zat a hlawh chhuak tawh a, mi tam tak, eizawnna ngelnghet zawk nei turin a chher chhuak tawh bawk. Veng pawn leh khaw dang atang pawha an rawn pan vang vang he Sports Centre hi a awmna veng neitu zawk hian chhawr theih a nihna zawna kan chhawr thiam hun hunah, "Mizoram tan hian kan veng hian a thawh hlawk asin," emaw "Kan veng tan hian a hlu a ni," kan la ti ngeiin ka ring.

Click here to download the full issue (OCT. 26, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)

Kum 21-na, Issue 38, OCTOBER 19, 2008

VENG ROHLU MI INPHALTE HNENAH BRANCH YMA-IN LAWMTHU A SAWI

Kaisangzuala, President,YMA, Mission Vengthlang Branch

Heti khawpa hmun remchang tur a nih avang hian Branch YMA chuan zahpui awm lo (standard) ve deuh hleka thuam/enkawl nise, a ti a. A chhunga thutthleng dah tur pawh YMA thutthlengsei pangngai ang ngawt ni lo deuh, Plastic Armed Chair khauh tha chi, Nilcamal Company (India) siam ngat dah nise tiin duhthu a sam a. Plastic Chair pakhat man hi Rs. 300/- a hisap a ni a; YMA-in sum neihsa a neih loh avangin kan mi tlawmngai inpe leh inphalte hnenah YMA Chanchinbu kaltlangin, kan Hall thar atana mamawh, Plastic Chair thawh khawm (donate) tura ngenna thu kan tlangaupui ta ngawt mai a nih kha.
Chutah zet chuan veng chhung mi tlawmngai leh inphalte hmel a lo lang ta tuk tuk mai. A thenin, kan chhungkaw member zat ka rawn thawh e, an ti a, a thenin, dawrzawn khat (1 doz.) hi a laklawh lo ang, rawn la rawh u, an ti a. Thenkhatin, panga, pathum.....a khawinge YMA/vantlang tana thawh ve hrim hrim ka duh, pakhat chu ka thawh ve e, ti an awm bawk. Kâr lovah kan mamawh zat, Hall khat mawi tawk chu kan hmu ta der mai a, a va ropui em! Veng tana mi inphalte kan hmuh hian Branch YMA chuan thlamuanthlak a ti a, mi inphal te, mi inpe te hi veng chhung tan in hlu kan ti a. Mite tan malsawmna in ni a, kan chhuang che u a, in thil pek avangin vengin hma a sawn ta a ni. Petu zawng zawng chungah Branch YMA chuan lawmthu kan sawi tak zet zet a ni. (Chair man petu hming leh a pek chhan hi thutthleng hnungah thai lan vek tum a ni.)



VENG CHHUNG THUTHAR TAWI:

• Rev. Lalnghinglova, Y Sec. chu Lung lam that loh vangin Kolkata-ah inentirin an thang mek.
• Pi Rothiangi w/o Pu R.Lalengliana, Y Sec. chu a naka khawihlipui vangin a pawn chhhuak peih meuh lo.
• Pi Laltlanmawii w/o Pu Lalhriatkima, Y Sec. chu polio natna avangin Durtlang Hospital-ah enkawl mek a ni.
• Pi Vanlalmawlsawmi w/o Pu Lalthuthlunga, Y Sec. chu pum tha lo vangin Aizawl Hospital-ah enkawl mek a ni.
• Pu Ralramthanga M Sec. chu BP sang avangin Durtlang Hospital-ah enkawl mek a ni.
• Pi Lalchhanchhuahi w/o Pu C.Lalsangliana, M Sec. chu naute a neih hnuah a lung lam that loh avangin harsatna a tawk zui a. Durtlang Hospital ICU-ah enkawl mek a ni. Amah hi Pu Ralramthanga, M Sec. fanu a ni.
• Np John Lalrinawma s/o Pu R.Lalzawmliana, M Sec., a beng nâ avangin a nu nen Guwahati-ah an kal.
• Pi Malsawmdawngliani (âmi) w/o Pu Vanlalbiakenga, A Sec. chu Aizawl Hospital-ah zai a ni.
• Pi Lalrampari w/o Pu Lalmalsawma, A Sec., Delhi-ah a kawng zai a ni a, In lama enkawl chhunzawm turin an lo haw chho.
• Np Samuel C.Lalruatdika s/o Pu C. Malsawmkima, A Sec., pneumonia avanga Aizawl Hospital-a enkawl chu dam takin a lo chhuak.
• Pu C. Zosangliana (Ma-a), A Sec. te chuan a pahnihna atan fanu an nei thar.
• Pu Zosangliana te chhung chuan Model Veng atangin Pu C.Liankunga In hnuai, Y Sec. an rawn luah lut.
• Nl R.Lalhruaitluangi d/o Pu R.Lalhmangaiha, Y Sec. leh Tv H.Lalremruata, Thuampui Zawlnuam te chu Oct. 28, 2008 hian MVT Presby. Kohhran Hall-ah an innei dawn.
• Pi Jane C.Vanlalmuanpuii (Maduati), M Sec. chu a hnathawhnaah kaisangin, Lunglei DIET principal turin a phei.
• Pu Vanlalsawma, M Sec. (Tlang veng) leh Pu Sailoliana, Y Sec. te chu Asst. Director atangin Dy. Director-ah an kaisang.
• Pi Laltlanzovi, A Sec., natna khirh tak tuara hun rei tak enkawl tawhchu A Section chuan veng chhung mi inphalte hnenah tanpuina an khawn sak a, mi tlawmngaite zarah cheng sing chuang zet an ngah sak thei dawn. A Section hruaitute an lawm hle.
• October 16 & 17, 2008-a Jubili Branch KTP buatsaih Variety Show entute leh ticket lei sak a, mi zawrh saktute zawng zawng chungah KTP, Jubili Branch chuan lawmthu a sawi e.
• Jubili Kohhran Ramthar Comm. bultumin naktuk hian bus hire-in, mi 20 vel zet Damdep-I hmuna Work Camp nei turin an fehchhuak dawn.

Click here to download the full issue (OCT. 19, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)

Kum 21-na, Issue 37, OCTOBER 12, 2008

YMA GENERAL CONFERENCE 63-na SERCHHIP-AH I HMANG ANG AW!

October 21-23, 2008 chhunga neih tur, YMA General Conference vawi 63-na atana a thlengtu Serchhip khaw inbuatsaihna chuan a vawrtawp a thleng chho tan mek. General Conference lo awm turah hian Serchhip khua chuan Mizoram hmun hrang hranga YMA member, a kal duh apiang min sawm a ni. Kumin General Conference kal tumte kan inbuatsaihna’n leh kan lo hriat lawkah eng eng emaw han thlir lawk ila a tha awm e.

A hmun:
Kumin YMA General Conference atan hian Serchhip khua chuan Pandal lian tawk tak, Mizo Inpui tia a hming an sak, a dung 180 ft. leh a vang 150 ft. chu August 30, 2008 atang khan uluk takin an sa tan tawh a, kum dang aia pandal changkang leh nuamah palaite inkhawmpui hman tir tumin theihtawp an chhuah mek a ni.

Khuallian:
YMA General Conference-ah Khuallian an awm ngai em ni? Awm ngai tehreng e, i la hre nange? Kumin General Conference-a Khuallian tur chu kan veng pa, Pu C. Rokhuma hi a ni nghe nghe asin. Khuallian neitu Branch kan nih avang hrim hrim pawh hian kum dang aia tam kan thawhchhuah theih chuan a ropui dangdai khawp ang.

Rorel:
Kumin General Conference-ah hian rorel tur chhawp lawk (Agenda) pawimawh a hnuaia tarlan ang hi duan lawk a ni.
Sawrkar khawih
1. Mizoram Sawrkar hna lak thinah hian a tling leh tlakte chauh lak a nih theihna’n sawrkarah thlen ni rawh se.
2. Saitluk Airport tihpuitlin a nih thuai theihna’n Mizoram Sawrkar-ah ngen ni rawh se.
YMA khawih
1. Mizo nun zemawi uar zawka inzirtir nise.
2. YMA danpui (YMA Constitution) a siamthat ngaite ennawn ni rawh se.

Kumpuan:
YMA hian Kumpuan chi hrang hrang neiin, hlawhtling takin a lo kalpui tawh thin a. Kumpuan thupui tur hi General Conference-ah ngaihtuah a, pawm a ni thin. Mahse, kumin chu YMA, Central Co-ordination Committee (CCC) meeting vawi 57-nain a rel angin Kumpuan neih a ni dawn lova, chuvangin Kumpuan chungchang hi ngaihtuah a ngai dawn lo a ni.

Nakumah khawnge?:
Tuna hriat chinah kum 2009 YMA General Conference thlen diltu pathum, Chalfilh Group - Darlawn; Zemabawk leh Zawlbuk Group - Thingsulthliah te an awm tawh a. Mahse, General Conference thlen dilna hi Inkhawmpui rorel tan hma chu thehluh theih reng a nih avangin diltu hi an la pung leh mai thei.

Han kal ve chiah ila:
Kan Branch atanga kal turte pualin Bus hire tum a ni. A kal turin YMA member, a duh apiang Branch Secretary, Pu Lalhmingmawia (Ph: 9436151600) hnenah mahni hming leh awmna Section sawiin inpek theih a ni. Tunah hian hming pe an awm nual tawh avangin hmanhmawh erawh a tha maithei.

Enge ken ngai?:
YMA General Conference kal tur hian Chempui leh Bawngtuthlawh tih lam chu ken a ngai lovang. Mahse, Conference-a kalte’n kan thlen Inte kan chhawk zangkhaina’n mutbu leh zanriak buhfai ken theuh tum ila a Mizo hle ang.


VENG CHHUNG THUTHAR TAWI:

• Pi Lalfakawmi w/o Pu Zoremi Pachuau, Y Sec. (Darnam), taksa chak lohna avanga Aizawl Hospital-a awm chu dam takin a lo chhuak.
• Pi Vanlalfeli, Y Sec. (Dam phei), typhoid avangin Greenwood Hospital-ah enkawl mek a ni.
• Pu Biaktluanga Renthlei f/o Pu R.Lalduhawma, A Sec., dam lo, In lamah enkawl.
• Upa R.Malsawma, A Sec., zunthlum leh a mit (eye) tha lo avanga Phai lam kal chu tluang takin an lo haw leh ta.
• Upa Zalianthanga, A Sec., dam lo, In lamah enkawl chhunzawm zel a ni.
• Pu B.Thangrikhuma, Y Section Leader chu E.Lungdar-ah a pa damlo tlawhin a thang mek.
• Pu Lalchungnunga Sailo, AIR Director, Y Sec. chu hun rei tak chhung a hnathawhna hmun, Itanagar (Arunachal Pradesh)-a a awm hnuin Aizawl lamah rawn transfer a ni leh ta.
• Nl Lalthazuali Ralte d/o Pu Tlangthansiama Ralte, M Sec. leh Tv Thangdailova, Champhai Vengsang chu Oct. 16, 2008 (Ningani) khian Champhai Vengsang Presby. Kohhran Biak In-ah an innei dawn.
• Nl Ramnghakmawii (Manghaki), Y Sec. chuan Prison Department-ah hna a hmu thar.
• Pu Jolly Newman, M Sec., kan Branch President hlui chu a hnathawhna, P&E Deptt.-ah E.E. atangin Superintendent of Engineer (SE)-ah a kaisang a, a awmna tur chiah an la tifel lo nain Aizawl lamah chuan a rawn let theih hmel. Nimin khan a hna tul avangin Delhi lamah meeting turin a liam thla.
• Pu Rothangpuia, A Sec. te chhung chu Pu Lalthankima, A Sec. te thenawmah an insawn.

VANTLANG RAM HUMHALHTU PAWL

Mission Vengthlang thalaite’n an din, Vantlang Ram Humhalhtu Pawl chuan an pawl hruaitu turte an thlang a, hetiang hian mawhphurhna an insiam a ni:

Chairman - Tv. Lalmalsawma Khiangte
Vice Chairman - Pu Lalremchhunga Ralte
Secretary - Tv. Lalmuanawma
Asst. Secretary - Tv. Lalramthara

Committee Member - te:
1. Pu Vanlalruata
2. Pu Lalvuansanga
3. Pu Malsawmtluanga
4. Tv. Joel Lianrinzuala

He pawl hian theihtawp chhuaha vantlang ram humhalh an thupui ber a. Tin, politics thilah leh mimal emaw, eng pawl emaw beihna’na din a ni lo tih veng chhung mipuite kan hriattir e. Tin, vantlang ram (Sunhlu Mual) humhalh tura hmalakna pawh chak taka kalpui mek a ni a, Sawrkar hotu lam leh Contractor-te pawh an hna chhunzawm tawh rih lo tura ngen an ni tih kan inhriattir e.

Vantlang ram humhalh vanga ngaihdan inang lovah, veng lungrualna ti derthawng thei zawnga SMS leh chanchinbu-ah te veng chhungkaw mualpho theihna thu thehdarh lo turin veng mi tinte kan ngen e.

Click here to download the full issue (OCT. 12, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)

Kum 21-na, Issue 36, OCTOBER 05, 2008

MISSION VENGTHLANG YMA EXECUTIVE COMMITTEE THUTKHAWM VAWI 10-NA THUREL

Kumin chhunga YMA, Mission Vengthlang Branch Executive Committee thutkhawm tum 10-na chu Oct. 2,2008 (Ningani) zan dar 7:00 khan YMA Hall-ah tluang taka neih a ni a, member 28 zet kalin, a dang 13 erawh chu damloh leh zin bo avangtein an kal thei lo thung a ni.

SUM DINHMUN
Tuna kan Branch-in sum kan kawl mek chu Rs 17,413/- a ni a, Branch Committee apianga hûn thin, miharsate tanpuina tur bawmah Rs 572/- a tling khawm bawk.

ZAIPAWL NITE
CYMA leh Zonet Cable TV buatsaih, Branch Zaipawl Intihsiaka kan Branch aiawhtute pualin YMA member-te tana zan hlimawm tak (Zaipawl Nite) hman nise, tia rel a ni. He hunah hian kan Zaipawlte kaihhruainaa YMA hla lunglen thlak leh hlimawmte hlim taka sakho nise, a hun thuah chuan November thlaa kan Hall thar hman theih hun tinzawn phawt nise, tih a ni.

YMA HALL
Tuna kan Hall hman mek chung rangva hi a tuiek nasat deuh tawh avangin kumin Krismas hma ngei hian mawi taka rawng hnawih tum a ni a. Rawng hnawih tur lo ngaihtuah turin Er. Pu Lalthangkhuma Ralte, M Section chu ruat nghal a ni.
Chutih rualin Hall thara mi tur thuthleng thar, Plastic Chair man tur pawh kan thawhkhawm chho mek a, tunah hian kan Branch OB-te’n veng mipuite inphalna hmachuanin thutthleng chah dan tur an buaipui tan ta. Chubakah, Hall thara hnawih tur rawng pawh ngaihtuah mek a ni bawk.

KAWN CHEI
Nikum lama kan lo tih tawh angin kumin Krismas leh Kumthar vuakvetah hian kan veng kawtchhuahpui ber Dawrkawn chu mawi taka chei leh tum a ni a. A tihdan tur lo ngaihtuah tan turin sub-committee inruat a ni.

TV THAR KHA
Sawrkar atanga kan dawn, Television thar leh Direct to Home (DTH), a dahna remchang kan hriat loh avanga kan thulkhung rih chu Hall thar peih a nih hunah Hall tharah hian hûn chhuah tum a ni.

BASKETBALL HULHLIAP
Kan Basket Ball Court sirah hian hulhliap (Pavilion) tha tak siam tum mek a ni a, chuta tan chuan kan Market Building leh Hall saknaa hman bang, rangva leh thir pipe te hi an leina anga Branch suma khul nise, tih a ni.

SECTION SPORTS
Kumin kum tawp lamah hian Section Sport neih ni se tih a ni a, hma lo la turin Sports Sub- Committee ruat an ni.

GENERAL CONFERENCE
Kumin YMA General Conference, Serchhip-a neih turah kan Branch aiawh rorel palai tur mi 6 inruat a ni. Kuminah hian Khawmpui khuallianah kan veng pa hlun, Pu C Rokhuma chu ruat a ni bawk a, member tam thei ang berin han tawiawm tum ila a duhawm hle. Conference-ah hian bus hire-a kal tum a ni a, a kal duhte chu Oct. 15, 2008 ral hmain Branch Secretary, Pu Lalhmingmawia hnenah inhriattir vek nise.


ARTICLE: CARE NATURE SPARE FUTURE
Zodinthara, M Section

Kan ram zim tea mi chi hrang hrang, khawvel zau zawk ngaihtuah pawha ar chil zat lek zingah mi tam takin inlarna an hmu a, Vanram hial fang tawha insawi pawh an awm nuk mai. An sawi dan pawh a inang lo nuk bawk. Chuvang pawh chu a ni mahna awih lo pawl an awm bawk. He ka mumang ngei pawh hi awi lo fe fe chu an awm mahna...

Ral lehlam ram ngaw hring nghulh kara Vaube par vul chuk chu a mawi zia a hmuna fiah tumin ka chhuak a. A hmun ka thlen chuan a mawi nangiang mai tak a, a hnuaia sakhi nupa lo tla, ngaw kara ni zungin a chhun tle zar maite, a zar bela bâwng nupa inchhai kual velte chuan a mawina a tizual hle mai.

Chutia ka kal lai sakhiin min han hmu chu mei kawh vuk khawpin an tlan a, kar loah mual dang an kai ta mai a, sava te lah chu an bo zo. Chuti taka mihring an hlau chu ngaihtuahna a tithui hle mai. Chutih lai chuan ‘CARE NATURE SPARE FUTURE’ tih hi ka rilruah a lo lang zawk a.

Mizote hi pi pute atanga lo nei hnam, kum tin ram zau tak tak vat a, hal chhe thin kan ni a. Hei hian tunlai hun thleng hian nghawng neiin, hla phuahtu’n ‘Tukloh ram’ a tih chu ram bua an chang zo ta. Tin, Mizo thisena bet tlat chu ‘Thangchhuah’ hi a ni. In lama thangchhuah chu sawi lo ila, ram lama thangchhuah tum a, Zawhzazopa ni tura sa kah ngai zat hi bithliah chiah chu awm lo mahse, a thahnem viau mai. Nulate lah khan tlangval laia thangchhuah thei chu an ti ve tlat bawk. Tin, khawtlangah lah thangchhuah thei te kha chu an chung en tlat bawk nen. Sa kah kha an inzirtir a ni ber e.

Chutiang chu kan thlahtute thisen a nih vang nge, nungcha humhalh kawngah hma kan sawn chak tawk lo. Sakhi chu sawi loh, Bawng nupa khiang lera inlem kual vel la hmu lo hi kan thahnem viau mai. Kha’ng sava mawi tak takte khan ram dangah min pem bo san nge, kan kut tuarin an thi zo ta.

Tin, kan Mizo chhul chhuak hlate ka ngaihtuah a. |awngkam mawi tak tak hla hmanga chher chhuah kan nei nual mai. Heng, phulleng, hringnghial, tuklohram, zothlifim, chhemdamthli, virthli tih te hi ram ngaw te min pek vek an ni. Ram ngaw te hian tawng lamah pawh min ti hausa a nih chu. Zo thlifim tihte phei hi chu ram dang mite neih ve hauh loh tur a ni.

Mihring te hi kan pung zel a, thing leh maute hi kan pun chak ang hian an pung chak ve hauh lo. Amaherawhchu, an mang ruala mang ve mai thei kan ni lawi si. Chuvangin, chhia leh tha hriatna chiang tak hmang a, thil siam dangte humhalh turin, a khau kapin Zofate kan pen chhuah a hun ta.

Kan veng hi veng dang khaikhin chuan a la hring mawi khawp mai. Heng a. mawinate hi kan humhalh zel chuan veng dangte min awhna sang zelah ram ngaw siam thatna kawngah hmahruaitu kan ni thei ngei ang. Chu mai bakah thing leh mau humhalh hi mirethei ber pawhin chhuan lo la awm leh turte tana rohlu a hnutchhiah theih a ni

Tin, mifing kan tih te hi eng atangin nge kan teh thin. Finna tak tak chuan rah chhuah a nei ngei ngei thin. Mifing, mahni hmakhaw ngai thiamte chu thing leh mau, ram ngaw humhalh kawngah an inel nasain, ram ngaw humhalh chu mut mawh hnar mawhah an nei ta.

Chutia ka ngaihtuah mek lai chuan ka thlang luiah chuan bomb a puak dur a, chumi rual chuan, “A hneh hle mai, an var suau mai,” tih thawm ka hria a, ka harh ta zawk a. Ka hawi vel a ,kan chhehvel thil te chu humhalh an tul zia a takin ka hmu ta a.


VENG CHHUNG THUTHAR TAWI:

• Np Lalrinhlua s/o Pu Kapthuama, Y Sec. (Darnam) chu Kulikawn Hospital atangin dam takin a lo chhuak.
• Pi Emanuel Lalrokimi (Eli) w/o. Pu Lalhmahruaia, Y Sec. (Kawn), pumna avanga Aizawl Hospital-a awm chu dam takin a lo chhuak.
• Pu Zalianthanga, A Sec., lungna chu a tha chak vak lo.
• Pu Lalchhuanawma, A Sec. te chuan an fa hmingkoh atan Civil Hospital-ah fapa an nei thar.
• Pi Laltlangzovi, A Sec. chu Nazareth Hospital-ah enkawl chhunzawm zel a ni a, he’ng kan veng tlangval 3 - Lalsawmliana, Lalruatliana leh B. Laldingliana te’n thisen an pe.
• Pu Lalfela, A Sec., Greenwood Hospital-a a pum zai chu dam takin a lo chhuak.
• Pu Lalengvara te chhung chu Pu Varhmingthanga In, M Sec, atangin Pu Lalrolura In, Y Sec. (Khatla Road)-ah an insawn.
• Pu Zosangzuala, M Sec. chu SI atangin Inspector-ah a kaisang a, tuna a awm mekna 3rd Battalion MAP hmunpui, Mualpui atangin Sesawng lamah a insawn dawn.
• Pu R.Lalduhawma, A Sec. te chuan an In sak thar an luahlut ta.
• Pu MS Dawngliana s/o Pi Rokimi, A Sec. chu Mission Vengthlang VC Secretary atan ruat a ni.
• Pu H.Lalneihkima, A Sec., kan Branch Exe. Committee member chu a nu damloh avangin Lêng khuaah a thang mek.
• Pu Vanlalnghaka (K. 85) chu Sept. 28, 2008 khan Melriat khuaah a boral. Amah hi kan veng pa lar Pa Bawiha (L) unaupa a ni.

THALAI INHMUKHAWM

Sunhlu Mual ram Mauhak Mual-a vantlang ram, SAI Hostel awmna atana pek a nih duh loh avangin veng chhunga thalaite chu Oct. 03, 2008 (Zirtawpni) zan 7:00 khan YMA Hall-ah an inhmukhawm a, Hall chhunga leng lo khawp thalai an kal khawm a ni.

Heta kalkhawmte hian vantlang tana sawrkar-in min lo zuah sak tawh, a ram neitu mipui vantlang rawn lova SAI Hostel hmun atana pek a nih duh loh thu leh, helai hmun hi vantlang ram a nih thin ang ngeia vantlang tana nei let leh tura hmalak nise, tih leh, helai hmun SAI Hostel sak rem an tih loh thu sawrkar hnenah hriattir nise tih thu an relho.

Sawihona kal zelah, Mission Vengthlang Vantlang Ram Humhalhtu Pawl an din a. An pawl thar aiawha hma lo la zui turin he’ng mite hi an ruat:

Y Section:
Pu Lalremchhunga Ralte
Pu Malsawmtluanga
Joel Lianrinzuala

M Section:
Tv Lalmalsawma Khiangte
Tv. Lalmuanawma
Pu Vanlalruata

A Section:
F. Lalramthara
Tv. Lalruatkima
Pu Lalvuansanga te an ni.

Thalai kal khawmte zinga thusawitu tam zawk chuan an hmalaknaah hian tumah mimala huat an neih loh thu leh, Mission Vengthlang tana tha tura hmala an nih mai thu sawiin, huaisen taka Mission Vengthlang tana pen zel an tum thu an sawi bawk.

Click here to download the full issue (OCT. 5, 2008) as a PDF file (Note: PDF file chhiar turin "Acrobat Reader" or "Foxit" computer-ah a awm a ngai)